Usa ka Panalangin diha sa Sinulatan sa Akong Inahan

Douglas Hedger

Nevada, USA

Paghulagway pinaagi ni Dilleen Marsh

Usa ka gabii namalandong ko kon unsa nga mensahe ang ihatag sa umaabut nga komperensya sa ward. Gitun-an nako ang mga kasulatan sa tibuok semana, ug bisan kon nakadawat ko og dakong instruksyon ug mga panabut, wala gihapon koy klarong direksyon kon unsay gusto sa Ginoo nga akong ipaambit, isip presidente sa stake, sa mga miyembro sa ward.

Sa kinasingkasing nga pag-ampo, nangayo ko nga giyahan sa Espiritu ang akong hunahuna. Dayon akong gibuksan ang akong mga kasulatan ug misugod na usab sa pagbasa. Kalit nga nahunahunaan nako ang mga tumong sa ward nga bag-o lang namong gihisgutan sa bishop. Usa niadto nga mga tumong mao ang paggamit sa Isangyaw ang Akong Ebanghelyo sa pagpaambit sa ebanghelyo ngadto sa mga higala ug mga silingan.

Nadasig ako nga ilakip ang Isangyaw ang Akong Ebanghelyo sa akong kaugalingong pagtuon nianang gabhiuna. Mikuha ko og kopya ug giablihan kini nga pinasulagma. Niana nga pahina, nakakita ko og duha ka sinulat nga pakisayran sa kasulatan—1 Nephi 8:8–11 ug 1 Nephi 11:21–22. Sa dihang akong gitan-aw og maayo, naamguhan nako nga kadto nga mga pakisayran nasulat sa sinulatan sa akong inahan. Ang akong minahal nga inahan mitaliwan pipila na ka tuig ang milabay, duha ka bulan human sa iyang ika-80 nga birthday. Usa siya ka ehemplo sa pagkamaisugon ug pagkadili hakog, kinsa kanunay nga makakita sa kamaayo sa mga tawo. Ug gimahal niya ang mga kasulatan.

Gipakli nako ang mga kasulatan ngadto niadto nga mga bersikulo aron makita unsay nakaawhag niya sa pagsulat niini. Sa akong pagbasa niini, misulod sa akong hunahuna ang mensahe nga kinahanglan nakong ihatag. Usa kini ka yanong mensahe nga ang mga miyembro sa Simbahan kinsa nakatilaw sa lamian nga bunga sa ebanghelyo makalimot tingali usahay nga daghan pang uban ang nagtinguha sa samang bunga. Kinahanglan kitang motabang ug mosulti kanila asa kini pangitaon.

Naghunahuna ko sa akong minahal nga inahan samtang gitiwas nako og tan-aw ang tibuok Isangyaw ang Akong Ebanghelyo. Walay ngalan, walay laing sinulat, o bisan unsa nga magpakita nga siya ang tag-iya sa libro. Nahingangha ko samtang namalandong ko sa kutay sa espiritwal nga mga pag-aghat nga misangput niini nga higayon. Gimatud-an kanako sa Espiritu nga gigiyahan ko sa akong mga hunahuna, sama gayud sa akong giampo. Wala lang gyud makahibalo ang akong inahan, kon unsa man ka dugay nga nasulat niya kadto nga mga pakisayran, nga gamiton kini sa Ginoo aron mahimong tubag sa mapaubsanong pag-ampo sa iyang anak.