“Unsaon nako sa pagdapit sa Espiritu sa akong panimalay kon ang mga tawo nanag-away o nanaglalis?”
Pangayo og Pasaylo
Kon aduna koy pakiglalis, akong nakaplagan nga ang pagpangayo og pasaylo ug pag-angkon nga nasayop ka, bisan kon nagtuo o nasayud ka nga ikaw ang husto, makatabang sa pagpabalik sa kalinaw diha sa kwarto. Dayon lakaw palayo, pagpabilin nga hilom, ipalahi ang hilisgutan, o pangita og butang nga mauyonan. Dili ra magdugay nga mobalik ang Espiritu.
Dylan M., edad 15, California, USA
Paghigugma Lang
Akong nakaplagan nga ang pagpakita og tiunay nga gugma sa akong pamilya nagdapit sa Espiritu nga mopuyo sa among panimalay. Ang propeta namulong mahitungod sa gugma isip hinungdan nga makahimo og kausaban ug ang balsamo nga makaayo sa kalag. Ang diwa sa gugma makahatag og kasiguroan ug kalinaw diha sa panimalay.
Joseph C., edad 18, Arizona, USA
Pakigsulti sa Imong Pamilya
Kon ang imong pamilya dili mga miyembro sa Simbahan, sultihi sila nga dili maayo ang imong bation kon maglalis sila ug hangyoa sila nga mahimong mas maayo. Kon dili kana mahimo, pag-ampo ug paningkamot pag-usab. Kon mga miyembro sila, pahinumdumi sila nga mga anak sila sa Dios ug nga kinahanglan nilang likayan ang mga pakig-away.
Carolina S., edad 19, Goiás, Brazil
Pag-ampo alang sa Espiritu
Sa matag higayon nga ang pamilya sa palibut maglalis, lisud bation ang presensya sa Espiritu, apan wala kana magpasabut nga dili ka mobati niini kon takus ka. Pag-ampo diha sa imong kasingkasing alang sa dugang nga sukod sa Espiritu sa Ginoo ug hatagi og espesyal nga pagtagad ang mga pag-aghat nga gipadala. Ang Langitnong Amahan makatabang kanimo nga mobati og kalinaw ug masayud unsa ang labing maayong paagi nga makatabang sa pagdala niana nga kalinaw nganha sa imong panimalay.
Katie G., edad 17, Utah, USA
Sulayi ang Pakigsabut
Pakigsulti sa imong pamilya aron masulbad ang problema sa paagi nga makabenepisyo sa tanan, o pagpaambit og kasulatan o pagkanta og himno. Makapangayo usab ka og tabang sa Langitnong Amahan aron sa pagsulbad sa problema. Niining paagiha, ang tanan makalma ug makahimo sa pagsulbad sa problema nga dili kinahanglan nga mosinggit o magbayolente. Sigurado nga ang Espiritu mopuno kaninyong tanan sa kalinaw ug mohatag sa tanan og tinguha nga dili makig-away pag-usab.
Luis F., edad 14, Playa del Carmen, Mexico