Ang mga Dalan Nga Nag-andam Kanimo alang sa Imong Kaugmaon
Kon moeskwela man ka sa kolehiyo, mangita og trabaho, o magkat-on og kahanas, nagpalambo ka og usa ka hiyas nga mahinungdanon sa pagtukod sa gingharian sa Dios.
Nagtuo ko nga dili damgo sa usa ka 14 anyos nga batang babaye nga magtrabaho sa abugon nga kamalig, mag-alsa og tayaon nga pala, manglimpyo og baho nga kwadra sa kabayo. Apan mao kana ang akong buhat human sa klase kada adlaw hangtud nga igo na ang akong pangedaron aron makakuha og laing trabaho.
Dili gayud kadto ang akong gipangandoy nga sitwasyon nga motrabaho panahon sa high school, apan nasabtan na nako kaniadto nga kon gusto ko og trabaho nga tinud-anay nakong ganahan—trabaho nga wala maglakip og pagpanglimpyo sa agi sa mga hayop—nagkinahanglan ko sa kolehiyo, ug aron makaeskwela sa kolehiyo, nagkinahanglan ko og kwarta. Nasayud ko nga alang kanako, ang edukasyon mao ang hustong lakang ngadto sa (unta) makatagbaw nga panginabuhi.
Ang nakanindot mao nga ang dalan nga akong gipili usa lang sa pipila nga makatabang nimo nga makat-on sa pagtrabaho ug sa pagsangkap alang sa imong kaugalingon nga mga panginahanglan. Gitawag kini nga pagkamapaningkamuton sa kaugalingon sa temporal ug espiritwal nga paagi. Samtang imong ikonsiderar ang imong mga kapilian, paningkamot nga mopili sa dalan nga imong gibati nga labing makaandam kanimo.
Kini nga mga istorya gikan sa mga tawo nga imong ka-edad pipila lang ka tuig ang milabay. Pinaagi sa pagsunod sa ehemplo niini nga mga young adult, imong makit-an ang imong kaugalingong dalan padulong sa malampuson nga pagpaningkamot sa kaugalingon.
Ikonsiderar ang mga Panginahanglan sa Imong Palibut
Ni Oudom Piseth, Cambodia
Aron makab-ot ang akong mga tumong, kanunay nakong sultihan ang akong kaugalingon nga importante kaayo ang pagtrabaho og maayo, apan ang laing paagi aron molampus mao ang pagtrabaho nga maalamon. Human sa akong misyon sa England, mibalik ko sa Cambodia ug mitan-aw sa posible nga mga trabaho. Gitan-aw nako ang mga butang sama sa gitas-on sa pagbansay aron makuha ang matag trabaho ug ang bili sa pagbansay.
Akong nakita nga ang programa sa pagbansay aron mahimong usa ka clothing merchandiser mubo apan lisud, ug dili daghan ang nagbuhat niini. Nakita nako nga maayo kini nga oportunidad ug nakahukom nga maoy kuhaon. Nahuman na nako karon ang programa ug nagtrabaho ko isip merchandiser sa usa ka kompaniya sa mga sinina.
Ang pagpangita sa husto nga panginabuhian tingali lisud kaayo, apan anaa ang Manluluwas nga motabang kanako ug mosuporta kanako.
Gamita ang Edukasyon aron sa Pagmugna og mga Oportunidad
Ni Iolanda Teixeira, Cape Verde, Africa
Ang akong mama kanunay nga moawhag nako sa mga pulong, “Ang edukasyon mao ang yawe sa kalampusan.” Gusto ko og maayo nga kaugmaon alang kanako ug ilabi na sa akong pamilya, ug aron mabuhat kini, kinahanglan nakong ipadayon ang akong edukasyon. Tungod kay walay kwarta aron makaeskwela sa kolehiyo nianang panahuna, mi-apply ko og scholarship aron makatambong sa usa ka bokasyonal nga eskwelahan aron magtuon sa mga sistema ug pagmentinar og computer.
Sa tibuok nakong pag-eskwela misagubang ko og lain-laing mga hagit, apan wala kini makapahunong nako sa pagpadayon sa unahan nga nakatutok sa mas maayong kaugmaon. Ang pag-ampo nakatabang nako pag-ayo; kanunay akong nagtinguha og tambag gikan sa Ginoo. Kanunay akong mapasaligon sa akong pagtuon, ug karon nagpabilin akong mapasaligon sa akong trabaho, naghimo sa akong labing maayo isip computer technician ug marketing assistant.
Trabahoa Karon ang Umaabut nga Imong Gusto
Ni Ann-Sophie ug Lawrence Cavin, Scotland, UK
Ann-Sophie: Ganahan gyud kong moeskwela sa unibersidad, apan ang akong mga plano mahitungod sa unsay tun-an kadaghan mausab sa akong pagkatin-edyer. Human mahuman sa high school, miboluntaryo ko sa ospital sulod sa unom ka bulan. Sukad niadto ganahan na ko sa ideya nga mahimong usa ka nurse, apan wala ko maghunahuna nga makahimo ako niini.
Sa self-reliance nga klase sa akong ward, gihangyo kami sa pagpili og trabaho nga gusto namong maangkon bisan tuod dili kami kwalipikado niini. Nag-ampo ko kon unsay buhaton, ug ang nursing kanunayng misulod sa akong hunahuna. Nakahukom ko nga mosunod sa mga aghat sa Ginoo.
Ang pagsunod niini nga dalan dili kanunayng sayon. Sa pagsugod, nagsiksik ko sa programa sa nursing ug unsay gikinahanglan aron makaeskwela ko. Nakig-istorya ko og mga tawo nga miagi og susama nga proseso. Sa unang higayon nga mi-apply ko sa programa sa nursing, gibutang ko sa waiting list. Apan wala ko mohunong; mi-apply na usab ako ug sa katapusan nakasulod. Usahay gikinahanglan nga magmapailubon ka ug mosalig sa Ginoo tungod kay aduna Siyay Iyang kaugalingong plano alang kanimo.
Lawrence: Sa batan-on pa ko, mihimo ko og tumong nga mamahimo nga labing maayo nakong mahimo bisan unsa pa ang hilisgutan nga akong gitun-an o trabaho nga anaa nako. Kanunay akong naningkamot nga makat-on ug molambo aron mahatagan ang akong kaugalingon sa labing maayong kahigayunan aron molampos.
Nagtrabaho ako karon isip manager sa usa ka kompanya sa sinina, apan gusto nakong moapil sa pwersa sa kapulisan. Sa Scotland, kinahanglang magpuyo ka sa nasud sulod sa tulo ka nagsunod nga mga tuig sa dili pa mo-apply sa pagkapulis. Tungod kay migawas ko sa nasud sulod sa duha ka tuig sa pagserbisyo og misyon, kinahanglan ko nga magpaabut og pipila pa ka mga bulan sa dili pa moapil.
Bisan tuod usa kini ka dakong babag, wala ako mohunong sa pagpaningkamot. Aduna koy maayong trabaho aron makasangkap sa akong pamilya, ug naningkamot ko pag-ayo sa pagsiguro nga makakuha ko og maayong pakisayran alang sa umaabut nga mga trabaho.
Sama niining mga young adult, makita nimo nga lain-laing dalan ang mahimong makaandam nimo sa pag-atiman sa imong kaugalingon ug sa imong umaabut nga pamilya. Samtang maghunahuna niana nga tumong, mahimo ka nga magplano alang sa kalampusan. Si Elder Dieter F. Uchtdorf sa Korum sa Napulog Duha ka mga Apostoles mitudlo, “Atong himoon ang labing maayo nga atong mahimo ug magpalambo og reputasyon nga maayo diha sa tanan natong buhaton. Ibutang nato ang atong mga hunahuna ug mga lawas ngadto sa mahimayaon nga oportunidad alang sa trabaho nga ang matag adlaw nagtanyag” (“Duha ka mga Baruganan alang sa Kaayohan,” Okt. 2009 nga kinatibuk-ang komperensya). Samtang magtutok ka karon sa pagkat-on ug pagtrabaho, makamugna ka og mga gawi nga makatabang nimo nga mobati nga mas masaligon mahitungod sa umaabut.