Mga Hulagway sa Hugot nga Pagtuo
Michael Isaac
Bydgoszcz, Poland
“Daghan og mahimo nga maayong mga butang ang sakit,” miingon si Michael, kinsa nag-antus og problema sa kidney. Tungod kay ang iyang sakit nakapadako sa iyang pasalamat alang sa ebanghelyo, miingon siya, “maayo kini nga pagsulay.”
Leslie Nilsson, Litratista
Natawo ko sa Ethiopia niadtong 1942 ug miadto sa Poland aron moeskwela pagka-1965. Niadtong 1991, nahimamat nako ang mga misyonaryo ug mipasakop ko sa Simbahan. Nakaserbisyo ko isip presidente sa branch sulod sa tulo ug tunga ka tuig. Miserbisyo ko isip magtatambag sa kapangulohan sa misyon sulod sa 12 ka tuig. Nahimo na usab akong presidente sa branch ug dayon presidente sa district. Dayon nasakit ko og pagkadaut sa kidney.
Karon gamay na lang ko og mahimo sa Simbahan. Naningkamot ko nga motambong ma-Dominggo.
Sa sinugdanan nasuko ko.
“Nganong ako pa man?” Nag-ampo ko. “Miserbisyo ko nimo, Ginoo.” Wala madugay, nakasabut ko. Ang mga kasulatan nag-ingon, “Siya nga adunay hugot nga pagtuo kanako mamaayo, ug wala ikatakda ngadto sa kamatayon, paga-ayohon” (D&P 42:48).
Kini nga bersikulo nag-ingon nga mamaayo kita kon dili pa kita angay nga mamatay.
Ang mga miyembro sa Simbahan kanunay nga nag-ampo alang kanako, apan nagkagrabe ang akong panglawas. Naghunahuna sila nga wala madungog ang ilang mga pag-ampo, apan gidungog sila tungod kay nahimo silang mas maayong mga tawo ug tungod kay gibati nako ang gugma nga ilang gipakita kanako.
Bisan og himsog pa ko, tungod sa akong pangidaron pila nalang kaha ka tuig ang nahabilin kanako? Bisan pa man, duna pay mga oportunidad nga naghulat kanako.
Ganahan ko nga modangup sa mga kasulatan ug mangita og mga bayani nga makatabang kanako. Sa dihang himsog pa ko ug nagserbisyo, ganahan kong mosunod ni Nephi, apan karon kadaghan ko nga naghunahuna ni Job. Buotan siya nga tawo, ug nag-antus usab siya. Kanunay nga adunay paglaum diha sa ebanghelyo.
Sa usa ka siyudad nga sama sa Bydgoszcz, kon gusto ko nga mobisita sa mayor, wala akoy tsansa tungod kay dili ko importante nga tawo. Apan pinaagi sa ebanghelyo, kanunay kitang makasangpit sa Dios. Mao kana nga gimahal nako ang akong simbahan.
Aduna koy Simbahan. Aduna koy paagi sa pagkontak sa Dios pinaagi sa pag-ampo, pinaagi sa pagpuasa, pinaagi sa mga butang nga atong gibuhat. Unsa pa ang akong gikinahanglan?
Usahay moingon ko sa akong kaugalingon, “Tingali mao kana nganong nasakit ko—aron makasabut ko unsa ka nindot ang akong naapilan, unsa ka nindot kini nga kawsa.”
Akong nakita ang akong asawa, si Renata, nga nasubo tungod kay nagkasakit ko. Dili nako gusto nga mahitabo kana, apan ang kasubo usa ka resulta sa gugma. Kon wala siya mahigugma, dili siya maguol. Ang gugma makatabang nimo nga mobati nga wala ka mag-inusara ug nga adunay mga tawo nga nagpakabana.
Baliwala ra ang mamatay. Ang tanang tawo mamatay. Depende lang kana kon unsaon nato pag-atubang ang kamatayon. Nasayud ako nga ang Dios buhi. Nahigugma Siya kanatong tanan—kanako usab. Mao kana ang akong masulti.
Ang sakit ni Michael usa ka lisud nga pagsulay alang sa iyang asawa, si Renata. “Akong nakita ang akong asawa nga naguol tungod kay nagkasakit ko,” miingon siya. “Apan ang kasubo usa ka resulta sa gugma. Ang gugma makatabang nimo nga mobati nga wala ka mag-inusara ug nga adunay mga tawo nga nagpakabana.”
Bisan pa sa mga limitasyon nga nahimo sa iyang sakit, nakakita gihapon si Michael og mga paagi sa pagserbisyo ug pagbayaw niadtong naglibut kaniya.
Nakakaplag si Michael og paglaum ug direksyon diha sa mga kasulatan. Sa dihang himsog ug nagserbisyo pa siya, nakadayeg siya kang Nephi. “Apan karon kadaghan ko nga naghunahuna ni Job,” miingon siya. “Buotan siya nga tawo, ug nag-antus usab siya.”