Doktrinal nga Kahanas: 1 Mga Taga-Corinto 15:40–42
Diha sa Pagkabanhaw, Adunay Tulo Ka Ang-ang sa Himaya
Sa miaging leksiyon, sa “1 Mga Taga-Corinto 15:32–54,” ikaw nakat-on mahitungod sa tulo ka ang-ang sa himaya diha sa Pagkabanhaw. Imo usab nga nakat-onan nga ang atong Amahan sa Langit maghatag ngadto sa matinud-anon og celestial nga himaya pinaagi ni Jesukristo. Kini nga leksiyon makatabang kanimo sa pagmemorya sa pakisayran sa doktrinal nga kahanas ug sa mahinungdanon nga hugpong sa pulong sa kasulatan alang sa 1 Corinthians 15:40–42, pagpasabot sa doktrina, ug paggamit sa mga baroganan sa pag-angkon og espirituhanong kahibalo sa tinuod nga sitwasyon sa kinabuhi.
Isag-ulo ug ipasabot
Kompletoha ang mosunod nga mga lakang aron matabangan ka sa pagsag-ulo ug pagpasabot sa doktrina nga gitudlo sa 1 Mga Taga-Corinto 15:40–42:
-
Isulat ang “1 Mga Taga-Corinto 15:40–42: Diha sa Pagkabanhaw, Adunay Tulo Ka Ang-ang sa Himaya” sa ibabaw nga bahin sa usa ka piraso sa papel.
-
Pagdrowing og usa ka adlaw sa ubos sa hugpong sa pulong, usa ka bulan sa ubos sa adlaw, ug usa ka bitoon ubos sa bulan.
-
Basaha ang 1 Mga Taga-Corinto 15:40–42, ug panganli ang matag usa sa imong mga drowing og ngalan sa himaya nga girepresentar niini. (Timan-i nga ang Paghubad ni Joseph Smith sa 1 Mga Taga-Corinto 15:40 nagdugang og usa ka pakisayran ngadto sa telestial nga himaya [sa 1 Mga Taga-Corinto 15:40, footnote a].)
-
Tan-awa ang imong gidrowing samtang balik-balikon og sulti ang pakisayran sa kasulatan ug sa mahinungdanong hugpong sa pulong sa kasulatan sa imong hunahuna hangtod imong mabati ang kompyansa nga ikaw nahibalo na gayod kaayo niini.
-
Unsaon nimo pagpasabot sa mga kamatuoran nga gitudlo niini nga tudling ngadto sa usa ka tawo nga wala makasabot unsa ang mahitabo human sa kamatayon sa plano sa Langitnong Amahan? Isulat ang imong pagpasabot sa imong kaugalingong mga pulong.
Bansaya ang paggamit
Ang paggamit sa mga baroganan sa pag-angkon og espirituhanong kahibalo mahimong makatabang kanato sa mga sitwasyon sa tinuod nga kinabuhi ug sa importanteng mga pangutana nga anaa kanato.
Basaha ang mosunod nga mga senaryo, ug pagpili og usa nga ganahan nimong tutokan alang sa sunod nga kalihokan.
-
Si Julia matinud-anong nagsulay pagbuhat sa unsa ang insakto, apan kanunay siyang mobati nga gitunglo tungod sa iyang mga kahuyang. Siya nagtuo nga ang ubang mga tawo makaadto sa celestial nga gingharian apan nagduhaduha nga siya makahimo niini.
-
Si Maria bag-o lang nakadungog og usa ka mahinungdanong pakigpulong mahitungod sa gasa sa pagkabanhaw nga ihatag sa Langitnong Amahan ug ni Jesukristo sa matag usa. Siya nahibulong, “Nganong kinahanglang maghinulsol man ako o magpadayon sa pagtuman sa mga sugo kon ang tanan mabanhaw man sa usa ka hingpit nga imortal nga lawas?”
Sa miaging leksiyon, imong gitun-an ang mahitungod sa mosunod nga kamatuoran nga gitudlo sa 1 Mga Taga-Corinto 15:40–42: sa plano sa Langitnong Amahan, adunay lainlaing mga ang-ang sa himaya alang sa nabanhaw nga mga lawas. Gamita ang mga baroganan sa pag-angkon og espirituhanong kahibalo ug ang kamatuoran nga gitudlo sa 1 Mga Taga-Corinto 15:40–42 aron tabangan si Julia o Maria sa iyang mga kabalaka o mga pangutana.
1. Tubaga ang mga pangutana ubos sa matag mosunod nga mga baroganan sa pag-angkon og espirituhanong kahibalo diha sa imong journal sa pagtuon.
Susiha ang mga konsepto ug mga pangutana inubanan sa mahangtorong panglantaw
Basaha ang parapo 8 diha sa seksiyon nga “Pag-angkon og Espirituhanong Kahibalo” sa Mahinungdanon nga Dokumento sa Doktrinal nga Kahanas (2022). Mahimong markahan ang duha ka pangutana sa kataposan niana nga parapo.
-
Sa unsang paagi nga magamit sa sitwasyon ni Julia o Maria kadtong mga tubag sa duha ka mga pangutana.
Ang parapo 8 nagsulti usab nga, “Tinguhaon nato ang tabang sa Espiritu Santo aron makita ang mga butang sama sa pagkakita niini sa Ginoo.”
-
Unsa kalagmitan ang makita sa Ginoo niini nga sitwasyon nga mahimong makatabang kang Julia o Maria? Ngano man?
Tinguhaa ang dugang nga panabot pinaagi sa balaanong gitudlo nga mga tinubdan
Basaha ang mga parapo 11–12 diha sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas.
-
Sa asa nimo tambagan si Julia o Maria aron mangita sa mga kamatuoran nga ilang gikinahanglan sa ilang kinabuhi?
-
Unsa nga mga kasinatian ang imong nasinati nga nagpakita sa importansiya sa mabinantayong pagpili kon asa ka mangita sa espirituhanong kamatuoran?
Paggahin og pipila ka minuto sa pagpangita og piho nga mga kasulatan o propetikanhong mga pamahayag nga pamati nimo magamit sa sitwasyon ni Julia o Maria. (Ang pipila sa mga tudling sa kasulatan gikan sa bag-ohayng mga leksiyon nga mahimong makatabang naglakip sa 1 Mga Taga-Corinto 15:40–42; Doktrina ug mga Pakigsaad 76:50–52, 62–64, 69–70, 71–76, 81–85; 88:21–24.)
-
Unsa ang imong nakit-an nga lagmit imong mapakigbahin? Giunsa sa mga kamatuoran nga imong nakit-an pagkahimo og kalahian sa imong kinabuhi?
Molihok inubanan sa hugot nga pagtuo
Ribyoha ang mga parapo 5–6 diha sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas. Mahimong markahan ang labing menos sa tulo ka lainlaing mga hugpong sa mga pulong o mga ideya nga sa imong hunahuna mahimong makatabang ni Julia o Maria.
-
Unsa nga mga hugpong sa mga pulong ang imong gipili? Sa unsang paagi nga ang matag usa niining mga hugpong sa mga pulong makatabang kang Julia o Maria?
-
Kon aduna kay mga gipanghunahuna nga sama kang Julia o Maria, unsa ang imong gibuhat aron matinud-anong motubag sa maong mga hunahuna?
-
Nganong ang matag usa niining batan-ong mga babaye nagkinahanglang itutok ang ilang hugot nga pagtuo ngadto kang Jesukristo samtang ilang sulbaron ang ilang sitwasyon? Ngano nga dili nalang buhaton ang labing maayo nga ilang mahimo nga wala magtutok Kaniya?