2 Mga Taga-Corinto 1; 4

“Gihupay sa Dios”

Kitang tanan nakasinati og kasakit sa kasingkasing ug kasubo, mga kapakyasan ug mga babag, ug kahasol ug sakit. Sa dihang ang katawhan sa Corinto nakasinati og kalisod, si Pablo misulat sa mga miyembro sa Simbahan didto aron maghatag og padayon nga suporta ug tambag. Siya mipamatuod sa kahupayan ug kalinaw nga maanaa kanila pinaagi sa Langitnong Amahan ug ni Jesukristo (tan-awa sa 2 Mga Taga-Corinto 1:3–4). Kini nga leksiyon makatabang kanimo aron makasabot sa pipila sa mga paagi sa Dios sa paghupay sa Iyang mga anak ug sa pag-ila og mga paagi nga ikaw makapaambit sa Iyang kahupayan ngadto sa uban.

Unsay naghatag kanimo ug kahupayan?

• Unsa o kang kinsa ka modangop alang sa kahupayan panahon sa kalisod?

• Unsa o kinsa ang naghatag kanimo og labing dako nga kahupayan? Ngano man?

1. Kompletoha ang mosunod nga listahan diha sa imong journal sa pagtuon:

Paghimo og usa ka listahan sa kasamtangan o umaabot nga mga sitwasyon sa kinabuhi nga lagmit magkinahanglan ka og tabang ug kahupayan aron magmalamposon.

Pamalandongi ang mosunod nga mga pangutana:

• Nganong makasalig ka man nga ang Langitnong Amahan ug si Jesukristo mohupay kanimo pinaagi sa gasa sa Espiritu Santo niining mga panahona?

• Unsa ka maayo sa imong pamati nga imong naila ug nadawat ang kahupayan nga gitanyag sa Langitnong Amahan ug ni Jesukristo pinaagi sa Espiritu Santo?

• Sa unsang paagi nga ikaw makahimo sa pagpakigbahin sa kahupayan nga Ilang gitanyag ngadto sa uban?

Pangita og mga tubag sa miaging mga pangutana diha sa imong pagtuon niini nga leksiyon.

Si Pablo gusto nga mohupay sa mga Santos sa Corinto sa ilang mga pagsulay

Samtang anaa sa Macedonia, si Pablo nakadawat og pulong gikan sa usa ka disipulo nga ginganlan og Titus nga ang iyang naunang sulat maayong gidawat sa mga Santos sa Corinto (tan-awa sa 2 Mga Taga-Corinto 2:13; 7:5). Nahibaloan usab ni Pablo ang padayon nga mga hagit niini nga mga Santos ug misulat og laing sulat (2 Mga Taga-Corinto) aron maghatag kanila og kahupayan ug mahisgotan ang ilang mga problema.

• Unsa ang imong nahinumdoman mahitungod sa Corinto ug sa mga kalisdanan sa mga Santos didto?

Basaha ang 2 Mga Taga-Corinto 1:1–4, nga may pagtagad kon giunsa ni Pablo pagsugod sa iyang ikaduhang sulat ngadto sa mga Santos sa Corinto.

• Unsa ang mipatigbabaw kanimo sa pasiunang sulat ni Pablo ngadto sa mga Santos?

• Unsa nga mga ngalan o mga titulo ang gigamit ni Pablo alang sa Langitnong Amahan ang nakapukaw sa imong atensiyon?

• Unsa ang gitudlo niadto nga mga ngalan o mga titulo kanimo mahitungod sa Langitnong Amahan?

• Unsa nga kamatuoran ang gitudlo ni Pablo sa bersikulo 4?

Pagdawat og kahupayan gikan sa Langitnong Amahan ug pagtabang sa uban nga makadawat niini

Lagmit imong naila ang usa ka kamatuoran gikan sa bersikulo 4 sama sa mosunod: Kon kita makadawat sa kahupayan sa Langitnong Amahan panahon sa atong mga pagsulay, kita mas makatabang sa uban nga makadawat usab niini.

• Unsa sa imong hunahuna ang pasabot sa “paghupay niadtong anaa sa bisan unsang kalisdanan”? (bersikulo 4).

• Ngano sa imong hunahuna nga kini gilaoman sa mga disipulo ni Jesukristo?

2. Tubaga ang mosunod nga mga pangutana diha sa imong journal sa pagtuon:

• Kanus-a ka o imong kaila nakadawat og tabang ug kahupayan gikan sa Langitnong Amahan panahon sa usa ka pagsulay?

• Unsay nakat-onan nimo o nila gikan niini nga kasinatian?

• Unsa sa imong hunahuna ang imong mabuhat aron mas makadawat og kahupayan sa Dios panahon sa imong panginahanglan?

Basaha ang mosunod nga pamahayag ni Presidente Spencer W. Kimball (1895–1985).

Ang Dios makakita kanato, ug iya kita nga pagabantayan. Apan sa kasagaran ipaagi niya kini sa uban aron iyang mahatag ang atong mga panginahanglan. Busa, importante kaayo nga moserbisyo kita sa usag-usa sa gingharian.

(Mga Pagtulon-an sa mga Presidente sa Simbahan: Spencer W. Kimball [2006], 103)

Kon aduna, tan-awa ang bidyo nga “[Ang Dios Mobayaw Kanato] God Will Lift Us Up” (4:58) on ChurchofJesusChrist.org. Kini nagsugilon sa istorya sa usa ka batan-ong babaye nga ginganlan og Brittany kinsa nakakaplag og kahupay diha sa pagserbisyo sa uban ug mosalig sa Ginoo imbis tutokan ang iyang kaugalingon nga medikal nga kahimtang.

God Will Lift Us Up

Rather than focus on her medical condition, Brittany has found comfort in serving others and trusting in the Lord.

• Ngano kaha sa imong hunahuna ang Langitnong Amahan sagad nga mogamit kanato aron pagtabang sa uban panahon sa ilang mga pagsulay aron mabati ang Iyang gugma ug kahupay?

Paghunahuna og usa ka tawo nga imong kaila nga kasamtangang nakasinati og kalisod. Mainampoong ikonsiderar kon unsaon kaha nimo pagtabang kanila nga mabati ang kahupay nga gitanyag sa Langitnong Amahan diha sa imong pagbuhat sa mosunod:

1. Paghunahuna mahitungod sa unsa ang imong nakat-onan gikan sa 2 Mga Taga-Corinto 1:1–4 nga mahimong makatabang niining tawhana.

2. Pagbasa og duha o daghan pa sa mosunod nga mga hugpong sa mga bersikulo, nga naglangkob sa dugang nga mga pagtulon-an ni Pablo ngadto sa mga taga-Corinto mahitungod sa mga pagsulay. Pangita og usa ka hugpong sa mga pulong o bersikulo nga pamati nimo mahimong makahuluganon ngadto sa tawo nga imong napili.

   • 2 Mga Taga-Corinto 1:8–11

   • 2 Mga Taga-Corinto 4:6–10

   • 2 Mga Taga-Corinto 4:14–18

3. Paghimo og usa ka butang karon aron matabangan kining tawhana nga mabati ang kahupayan sa Langitnong Amahan. Ikonsiderar nga mag-ampo alang kanila sama sa mga Santos nga Taga-Corinto nga nag-ampo alang kang Pablo (tan-awa sa 2 Mga Taga-Corinto 1:11). Dugang pa niini, mahimo kang magsulat alang niining tawhana og usa ka makapadasig nga mensahe sama sa gibuhat ni Pablo sa mga Taga-Corinto, bisan og ang imong mensahe mahimong usa ka text, email, o pahinumdom imbis usa ka sulat. (Ikonsiderar ang paglakip kon unsa ang imong nakat-onan niini nga leksiyon gikan 2 Mga Taga-Corinto 1; 4 ingon man usab ang bisan unsang personal nga mga kasinatian nga mahimong makatabang.)

4. Paghimo og dugang pa nga mga plano sa pagtabang niining tawhana. Ang Langitnong Amahan mahimong mag-aghat kanimo sa paghimo og dugang pa nga mga buhaton, sama sa pagbisita kanila o pag-alagad kanila sa pipila ka paagi. Seguroha nga isulat ang bisan unsang mga plano nga imong mahunahunaan sa usa ka lugar diin ikaw mapahinumdoman sa pagbuhat, sama sa imong kalendaryo, sa imong smartphone, o sa usa ka piraso nga papel nga imong tan-awon unya.

3. Isumada unsa ang imong nakat-onan panahon niini nga leksiyon ug unsa ang imong plano nga buhaton karon.

Opsiyonal: Gustong makakat-on pa og dugang?

2 Mga Taga-Corinto 1:4. Nganong ang Ginoo naglaom kanako sa pagtabang ug paghupay sa mga tawo nga nagkinahanglan?

Si Elder Gary E. Stevenson sa Korum sa Napulog Duha ka Apostoles nagtudlo sa mosunod:

Pagbantay sa mga Kalag

Si Elder Stevenson nagtudlo nga kita dunay responsibilidad sa pagpangalagad sa uban, pagbantay kanila paingon sa templo ug sa katapusan ngadto sa Manluluwas.

Gikan sa higayon nga mikawas kita gikan sa tubig sa bunyag, gisugo na kita ngadto niini nga buhat. Motabang kita sa uban pinaagi sa gugma tungod kay mao kini ang gisugo sa Manluluwas nga atong buhaton. … Sa higayon nga ang atong mga silingan magkalisod sa temporal o sa espiritwal nga paagi, magdali kita sa pagtabang kanila. Motambayayong kita sa mga alantoson sa usag usa aron mahimo kining gaan. Magbangotan kita uban niadtong nagbangotan. Mohupay kita niadtong nanginahanglan og paghupay. Ang Ginoo mahigugmaong naglaom niini gikan nato. Ug moabot ang adlaw sa dihang manubag kita sa atong gihimong pag-atiman sa pagpangalagad sa Iyang panon.

(Gary E. Stevenson, “Pagbantay sa mga Kalag,” Liahona, Nob. 2018, 111)

2 Mga Taga-Corinto 4:17. Unsa ang gipasabot ni Pablo sa iyang pag-ingon nga ang atong mortal nga mga hagit usa lamang ka “gamay ug lumabay nga kalisdanan”?

Si Elder Paul V. Johnson sa Kapangulohan sa Seventy nagtudlo:

More Than Conquerors through Him That Loved Us

Trials are not just to test us. They are vitally important to the process of putting on the divine nature.

Taliwala sa mga problema, daw imposibling makita nga ang moabot nga mga panalangin mas molabaw pa kay sa kasakit, kaulawan, o kasakit sa dughan nga tingali atong nasinati nianang higayona. … Si Apostol Pablo mitudlo, “Kay kining magaan ug lumalabay nga kasakit naandam alang kanamo sa labihan gayud kadako ug walay katapusang gibug-aton sa himaya.” [2 Mga Taga-Corinto 4:17]. Makapainteres nga si Pablo migamit sa termino nga “magaan nga mga kasakit.” Naggikan kini sa usa ka tawo kinsa gibunalan, gibato, [namiligro diha sa barko], gibilanggo, ug kinsa nakasinati og daghan pa nga mga pagsulay. [Nagduda ko kon daghan ba kanato ang] motawag ba sa atong mga kasakit og gaan. Apan kon itandi sa mga panalangin ug sa pagtubo nga atong madawat sa kaulahian, niining kinabuhia ug didto sa kahangtoran, ang atong mga kasakit gaan ra gayod kaayo. …

Usahay gusto kita nga motubo nga wala ang mga hagit ug molambo ang kalig-on nga wala ang bisan unsa nga panlimbasog. Apan ang pagtubo dili mahitabo pinaagi sa pagsubay sa sayon nga paagi. [Kita klaro nga makasabot] nga ang usa ka atleta kinsa mobalibad sa lisod nga pagbansay dili gayod mamahimong world-class nga atleta. Kinahanglan gayod kita nga magmatngon nga dili mosalikway sa mga butang nga makatabang kanatong makabaton og diosnong kinaiya.

(Paul V. Johnson, “Labaw Pa Ka Mananaog Pinaagi Kaniya nga Nahigugma Kanato,” Liahona, Mayo 2011, 79–80)