2 Mga Taga-Corinto 7

“Sa Diosnon nga Kasubo”

Mahimong lisod ang pagkahibalo kon kita hingpit ba nga naghinulsol. Nasulayan na ba nimo sukad nga nanglimbasog nga masayod kon nahinulsolan na ba nimo sa hingpit o wala ang usa ka butang? Sa iyang unang sulat ngadto sa Mga Taga-Corinto, si Apostol Pablo mipanton sa pipila sa mga Santos nga Taga-Corinto tungod sa ilang pagkamakasasala. Sa iyang kalipay ug katagbawan, si Pablo human niana nakadawat og pulong nga ang mga Santos nga Taga-Corinto nakasinati og tinud-anay nga paghinulsol. Kini nga leksiyon makatabang nimo nga makasabot sa usa ka importanteng sangkap sa tinud-anay nga paghinulsol ug makatabang nimo nga mas mahiduol kang Jesukristo.

Diosnon nga Kasubo

Basaha ang mosunod nga senaryo. Sa usa ka interbiyo alang sa usa ka rekomend sa templo alang sa kaminyoon, usa ka batan-ong babaye mikompisal sa iyang bishop sa pipila ka mga sala nga nangagi. Human sa dugang nga panaghisgot, nasabtan sa bishop nga ang batan-ong babaye wala makahinulsol sa iyang mga sala sa tinud-anay nga paagi ug ang iyang mga sala bug-at nga makapahimo niyang dili takos sa usa ka rekomend sa templo. Ang bishop mipasabot nga ang batan-ong babaye kinahanglan nga maghulat aron makadawat og usa ka rekomend hangtod hingpit na siya nga makahinulsol. Nakalitan siya, miingon nga siya naghinulsol na tungod kay wala na niya buhata og usab ang bisan unsa niadto nga mga sala sulod sa dugayng panahon. Ang bishop mipasabot nga ang paghunong lamang sa sala dili usa ka kompleto nga paghinulsol, ug midapit kaniya sa tinuoray nga pagsugod sa proseso sa matuod nga paghinulsol.

Ang batan-ong babaye mipasabot sa iyang bishop nga siya nasagmuyo pag-ayo tungod kay iya nang gisultihan ang ubang tawo mahitungod sa kasal ug naghimog mga plano sa pagsaulog. Siya nabalaka mahitungod sa kaulaw sa pagkalangan sa iyang mga plano sa kasal ug mahitungod sa unsaon niya pagsulti sa iyang pamanhunon ug mga ginikanan. Mihangyo siya kon aduna bay paagi alang niya aron mapadayon ang kasal sama sa giplanohan ug mopadayon lang sa proseso sa paghinulsol inigka human.

• Base sa tubag sa batan-ong babaye ngadto sa bishop, unsa ang iyang gikabalak-an pag-ayo?

• Ngano kaha nga ang iyang gitutokan makapalisod sa tinud-anay nga paghinulsol?

Pamalandongi unsa ang wala kaayo masabti niining batan-ong babaye mahitungod sa paghinulsol. Sa imong pagpadayon niini nga leksiyon, pangita og usa ka baroganan nga mahimong makatabang niining batan-ong babaye. Pamalandongi usab kon ikaw nanginahanglan niini nga baroganan sa imong kaugalingong paghinulsol.

Diosnon nga kasubo

Usa sa mga tumong ni Pablo sa pagsulat sa iyang naunang sulat ngadto sa mga taga-Corinto mao ang pagdasig sa piho nga mga indibidwal sa paghinulsol. Sa iyang sunod nga sulat, si Pablo midayeg niadtong iyang gikorehian alang sa ilang sinsero nga paghinulsol ug nagtudlo mahitungod sa usa ka importanteng bahin sa paghinulsol.

Basaha ang 2 Mga Taga-Corinto 7:8–11, pangitaa ang mga panabot nga gihatag ni Pablo mahitungod sa paghinulsol nga mahimong makatabang sa babaye sa maong senaryo. (Hinumdomi nga ang pulong paghinulsol sama sa gigamit sa bersikulo 8 nagpasabot sa pagmahay.) Matan-aw usab nimo ang bidyo sa Biblia nga “Ang Diosnon nga Kasubo Mobuhat sa Paghinulsol [Godly Sorrow Worketh Repentance]” (1:40), anaa sa ChurchofJesusChrist.org, ug magsunod subay sa imong mga kasulatan.

Repentance

Godly sorrow for sin leads to repentance. 2 Corinthians 7:8–10

Alang sa mga panabot gikan sa Basahon ni Mormon mahitungod sa diosnong kasubo, basaha ang Alma 36:12–13; 42:29.

• Unsa nga mga panabot ang imong nakutlo nga mahimong makatabang sa babaye sa maong senaryo?

• Sa unsa nga paagi nga kadto nga mga pagtulon-an makatabang kanimo?

Usa ka kamatuoran nga mahimo nimong madiskobrehan mao nga ang diosnong kasubo magdala ngadto sa sinsero nga paghinulsol.

• Unsa ang lain pang matang sa kasubo ang gihisgotan ni Pablo sa bersikulo 10?

• Unsa ang imong nakita sa senaryo nga nagsugyot sa matang sa kasubo nga nabati sa batan-ong babaye?

Paghimo og duha ka mga kolum sa imong journal sa pagtuon pinaagi sa pagbadlis og usa ka linya paubos sa tunga sa panid. Isulat ang Diosnong Kasubo sa ibabaw sa usa ka kolum ug ang Kalibotanong Kasubo sa ibabaw sa laing kolum.

Idugang ang imong mga hunahuna sa mosunod nga mga pangutana ubos sa matag ulohan.

• Unsa ang gitudlo ni Pablo sa mga bersikulo 8–10 mahitungod sa kalahian tali sa Diosnon ug kalibotanong kasubo?

• Unsa kaha ang dugang pa nga mga kalahian ang anaa tali sa duha ka klase nga kasubo?

Basaha ang mosunod nga mga pamahayag, ug pangita og dugang nga mga panabot mahitungod sa diosnong kasubo ug kalibotanong kasubo. Idugang kini nga mga panabot sa imong tsart.

Si Elder Neil L. Andersen sa Korum sa Napulog Duha ka Apostoles naghatag niining kahulogan sa diosnong kasubo:

[Ang diosnong kasubo nagpasabot] nga mobati og lawom nga kasubo ug pagbasol tungod sa kinaiya nga nakadugang sa kasakit ug pag-antos sa Manluluwas, samtang ang atong kalag motangtang sa bisan unsang pagdumili o pasangil. …

Tingali ang labing dako nga pagkahigmata niining kinabuhia sa espirituhanong sensitibo nga anak nga lalaki o babaye sa Dios mao ang talagsaong personal nga pagkaamgo nga ang pagbayad ni Jesukristo sa sala tinuod kaayo ug nga ang Iyang pag-antos dili lamang alang sa tanan—apan alang usab kanimo ug kanako! … Samtang atong espirituhanong masabtan nga Siya nag-antos alang sa atong mga sala, kita mobati og kaguol sa atong bahin sa Iyang kasakit. Kita makaamgo nga kini kabahin sa plano sa Amahan, apan makabati kita og naghingapin nga pagbati sa gasa nga Iyang gitanyag kanato. Kini nga katingalahan, kini nga pasalamat, kini nga pagdayeg sa Manluluwas kinsa mihimo niini alang kanato, nagdala kanato ngadto sa atong mga tuhod samtang ang atong espiritu napuno sa diosnong kasubo.

(Neil L. Andersen, The Divine Gift of Forgiveness [Ang Balaan nga Gasa sa Pagpasaylo] [2019], 149, 150)

Si Presidente Dieter F. Uchtdorf, kanhi sakop sa Unang Kapangulohan, nagsulti sa mosunod mahitungod sa diosnong kasubo:

You Can Do It Now!

As long as we are willing to rise up again and continue on the path, … we can learn something from failure and become better and happier.

Ang diosnong kasubo modasig og kausaban ug paglaom pinaagi sa Pag-ula ni Jesukristo. Ang kasubo nga kalibotanon mobira kanato, mowagtang sa paglaom, ug moagni kanato sa pagtugyan ngadto sa tintasyon.

Ang diosnong kasubo mosangpot sa pagkakabig ug kausaban sa kasingkasing. Tungod niini masilag kita sa sala ug mahigugma sa kamaayo. Kini modasig kanato sa pagbarog ug paglakaw diha sa kahayag sa gugma ni Kristo. Ang tinuod nga paghinulsol nagpasabot nga pag-usab, dili pagpanakit o pagpaantos. Oo, ang kinasingkasing nga pagmahay ug tinuod nga pagbasol sa pagkamasinupakon sagad sakit ug importante kaayo nga lakang sa sagradong proseso sa paghinulsol. Apan kon ang kahasol sa tanlag mosangpot sa kasilag sa kaugalingon o mopugong sa atong pagbangon og balik, kini makababag imbis makadasig sa atong paghinulsol.

(Dieter F. Uchtdorf, “Makahimo Kamo Niini Karon!,” Liahona, Nob. 2013, 56)

Tan-awa ang bidyo nga “Ang Paghinulsol usa ka Proseso Nga Maghatag og Kalinaw [Repentance Is a Process That Brings Peace]” gikan sa time code 0:00 hangtod 1:39 aron makita kon giunsa sa usa ka tawo paghulagway ang iyang kasinatian sa diosnon nga kasubo ug sa unsang paagi kini mipanalangin sa iyang kinabuhi.

Repentance Is a Process That Brings Peace

Three adult members share their experiences with repentance. They say repentance leads to godly sorrow for sin and a willingness to involve God in a process that brings peace and joy.

1. Gamit ang unsa ang imong nakat-onan, tubaga ang mosunod nga mga pangutana:

• Unsa ang Diosnon nga kasubo?

• Unsa ang kalibotanon nga kasubo?

2. Pamalandongi og balik ang senaryo tali sa batan-ong babaye ug sa iyang bishop, dayon tubaga ang mosunod nga pangutana.

• Unsa ang imong mapaambit sa batan-ong babaye mahitungod kang Jesukristo ug sa diosnong kasubo nga mahimong makatabang niya sa pagdapit og mga panalangin sa paghinulsol?

Pamalandongi og kadali ang mahitungod sa imong kaugalingong mga paningkamot sa paghinulsol. Hunahunaa unsa ang nabati ug nasinati sa Manluluwas sa pag-antos alang sa imong mga sala. Unsa ang imong mahimo aron mas hingpit nga maablihan ang imong kasingkasing nga mobati og diosnong kasubo ug dapiton ang makaayong gahom sa Manluluwas diha sa imong kinabuhi? Mahimong isulat ang imong tubag alang niini nga pangutana sa usa ka personal nga journal o notebook.

Opsiyonal: Gustong Makakat-on Pa og Dugang?

Unsaon nako aron ako mas makasabot sa kalahian tali sa diosnong kasubo ug kalibotanong kasubo?

Samtang nagserbisyo isip Area Seventy, si Elder D. Chad Richardson namahayag:

Usa ka nag-unang kalahian tali sa [diosnong kasubo ug kalibotanong kasubo] mao ang ilang tinubdan. Ang kalibotanong kasubo gipasiugdahan ni Satanas. Mao kini ang kasubo nga madakpan, nga dili makapadayon sa pagpakasala, o sa paglantaw batok sa kaugalingon nga anaay pagdumot o pagtamay.

Ang diosnong kasubo, sa laing bahin, mao ang kasubo nga gihatag isip usa ka gasa gikan sa Dios alang sa kadtong andam modawat niini. Ang diosnong kasubo nagdala kanato sa usa ka hingpit nga pag-ila sa kadako sa atong mga sala apan adunay pagkasayod nga kita mahimong gawasnon niana.

(D. Chad Richardson, “Forgiving Oneself,” Ensign, Mar. 2007, 32)

Niadtong Septyembre 2019, ang New Era nga magasin miprinta sa usa ka infographic nga gibase sa mga pagtulon-an ni Elder Dieter F. Uchtdorf sa Korum sa Napulog Duha ka Apostoles nga lagmit makatabang pa kanimo og dugang sa pag-ila tali sa diosnon ug kalibotanon nga kasubo. Pangitaa kini dinhi: Dieter F. Uchtdorf, “Godly Sorrow [Diosnon nga Kasubo],” New Era, Sept. 2019, 32–33.