Ang lalaki kinsa naayo sa adlawng Igpapahulay gigakos sa iyang mga ginikanan, si Jesus makita diha sa palibot. Siya buta sukad sa pagkatawo. Mga eksina nga wala gilakip sa kataposan nga bersiyon [outtakes] naglakip sa naayo nga tawo diha sa tiilan ni Jesus nga migakos, ug sa iyang mga ginikanan. buta-nga-tawo-naayo-mga-ginikanan-nagmaya
Mibati ka ba sukad nga nahilayo sa Dios? Ang uban bang nga tawo nga imong kaila mibati ba sa samang paagi? Si Pablo mipahinumdom sa mga Santos nga Taga-Corinto sa kaluoy nga gipakita ni Jesukristo alang kanila. Si Pablo nagtudlo sa mga tawo nga nahimulag sila gikan sa Dios tungod sa sala. Maayo gani kay, pinaagi sa Pag-ula ni Kristo sila madala pagbalik ngadto sa maayo nga relasyon uban sa Dios ug makadawat sa pagkamatarong ni Kristo (tan-awa sa 2 Mga Taga-Corinto 5:16–21). Kini nga leksiyon makatabang nimo nga mas maduol sa Dios ug mahimong kinsa ang Iyang gusto nga ikaw mamahimo.
Imong relasyon sa Dios
Rebyoha ang mosunod nga mga senaryo. Paghunahuna kon unsa ang pagkaparehas o pagkalahi sa imong personal nga sitwasyon gikan niini nga mga senaryo.
Si Jamilah usa ka makugihon nga disipulo ni Jesukristo. Daghang mga higala ang mitan-aw kaniya isip usa ka ehemplo. Apan, kon siya makahimo og kasaypanan, siya mobati og kaubos mahitungod sa iyang kaugalingon ug mabalaka kon siya makabalik ba ngadto sa Langitnong Amahan usa ka adlaw.
Si Andre adunay mga batasan nga nasayod siya nga dili maayo, ug lisod alang kaniya nga makita unsaon nga siya mapasaylo ug mabag-o. Siya naghunahuna kon siya ba makabati pa nga maduol sa Dios, ug dili siya segurado kon angayan ba kini nga paningkamotan. Dili siya ganahan makigsulti sa iyang mga ginikanan o sa bishop mahitungod sa iyang mga problema.
Hunahunaa ang mahitungod sa imong kaugalingong relasyon sa Langitnong Amahan. Sa imong journal sa pagtuon, ihulagway ang imong kaugalingong sitwasyon sa kinabuhi ug imong relasyon Kaniya. Mahimo nimong ilakip kanus-a ka mibati nga naduol Kaniya ug kanus-a ka mibati nga nahilayo ingon man usab ang imong mga tinguha alang sa imong relasyon ngadto Kaniya sa umaabot.
Sa imong pagtuon, pangita og mga kamatuoran nga mahimong makatabang nimo nga makasabot sa mga panalangin sa pagkahiduol sa Dios ug unsaon nimo pagpaduol Kaniya.
Pagpasig-uli
Sa 2 Mga Taga-Corinto 5 si Pablo misulat nga samtang kita nagpuyo sa kalibotan, kita “nag-agulo” ug mibati nga “nabug-atan,” naghandom nga makabalik ngadto sa atong Amahan sa Langit (tan-awa sa 2 Mga Taga-Corinto 5:1–5). Paghunahuna mahitungod sa mga panahon sa imong kinabuhi nga ikaw mibati og susama sa gihulagway ni Pablo.
Basaha ang 2 Mga Taga-Corinto 5:17–20, nga mangita sa mga kamatuoran nga imong magamit sa imong kinabuhi sa higayon nga ikaw mobati nga nahilayo gikan sa Dios. Timan-i nga niini nga mga bersikulo, ang pasig-uli ug pagpasig-uli nagpasabot sa pagdala og balik ngadto sa pagkahiusa ug pabor sa Dios human mahimulag gikan Kaniya.
1. Tubaga ang mosunod nga mga pangutana diha sa imong journal sa pagtuon:
Unsa nga mga pulong ug hugpong sa mga pulong niini nga mga bersikulo (2 Mga Taga-Corinto 5:17–20) ang labing naghulagway sa unsa ang gibuhat sa Manluluwas alang kanimo?
Unsa ang papel sa Langitnong Amahan sa pagtabang kanimo nga mabalik ngadto Kaniya? (Tan-awa sa 2 Mga Taga-Corinto 5:18–19.)
Unsa nga mga panalangin ang atong madawat kon kita maningkamot sa pagpakabuhi “diha ni Kristo”? ( 2 Mga Taga-Corinto 5:17.)
Usa ka kamatuoran nga gitudlo sa 2 Mga Taga-Corinto 5:17–20 mao nga kita mahimong mapasig-uli sa Dios ug mahimong bag-o nga mga binuhat pinaagi sa Pag-ula ni Jesukristo.
Si Pablo nagtudlo usab kon nganong kita mahimong bag-o nga mga binuhat ug unsa ang gipasabot niini.
Basaha ang 2 Mga Taga-Corinto 5:21, nga mangita sa mga pakisayran sa Langitnong Amahan, ni Jesukristo, ug kanimo.
Unsa man ang imong nakat-onan gikan niini nga bersikulo?
Basaha ang mosunod nga parapo, ug pangita og dugang nga mga panabot nga mahinungdanon alang kanimo.
Sa 2 Mga Taga-Corinto 5:21 si Pablo nagtudlo nga bisan tuod si Jesus wala gayod sukad makahimo sa pagpakasala, diha sa Tanaman sa Getsemani ug sa krus sa Kalbaryo Iyang gidala sa Iyang kaugalingon ang palas-anon, ang gibug-aton, ug ang mga sangpotanan sa atong mga sala. Kon kita matinud-anon nga magtinguha nga mapasaylo ug mahimo nga usa ka “bag-ong binuhat,” kita midawat sa gitanyag ni Jesukristo nga kon kita adunay hugot nga pagtuo Kaniya ug maghinulsol sa atong mga sala, Siya motangtang sa atong mga sala ug kita makadawat sa Iyang pagkamatarong. Sa ingon niini nga paagi, kita mahimong putli, sama nga Siya putli (tan-awa usab sa Mga Taga-Colosas 2:13–14; 1 Pedro 2:24).
Unsaon sa mga pagtulon-an sa 2 Mga Taga-Corinto 5:21 pagtabang kanimo nga mas makasabot nganong kita mahimong bag-o nga mga binuhat kang Kristo ug unsa ang buot ipasabot niini?
Unsa nga mga hunahuna ug mga pagbati ang lagmit nasinati sa walay sala nga Anak sa Dios dihang Siya andam nga midala sa imong mga sala sa Iyang kaugalingon aron nga ikaw mapasig-uli sa Dios ug mabag-o? (Ikonsiderar ang pagbasa sa Isaias 49:16 ug ang Doktrina ug mga Pakigsaad 19:18 sa dili pa motubag niini nga pangutana.)
Aron makita ang usa ka ehemplo sa modernong panahon sa usa ka tawo nga napasig-uli ngadto sa Dios ug nahimong “usa ka bag-ong binuhat” pinaagi sa Pag-ula ni Jesukristo, tan-awa ang “Ako Nakahibalo nga Ang Iyang Grasya Anaa Kon Ako Mapukan [I Know His Grace Is There When I Fall]” (6:24). Kini nga bidyo makita sa ChurchofJesusChrist.org.
Pamalandongi kon giunsa nimo, o sa imong kaila, pagsinati ang pagkaayo ug pagpasig-uli nga gitanyag sa Manluluwas pinaagi sa Iyang Pag-ula.
Ang pagpamalandong sa mga baroganan sa ebanghelyo mahimong makatabang kanato aron mas makasabot ug mabati ang ilang importansiya. Basaha og balik ang paghulagway sa imong kasamtangang sitwasyon sa kinabuhi ug relasyon sa Dios nga imong gisulat sa sinugdanan sa leksiyon. Dayon paggahin og pipila ka minuto sa pagpamalandong sa mosunod nga mga pangutana:
Unsa kaha ang hitsura ug pagbati nga makig-uli sa Dios sa kahangtoran?
Sa unsang mga paagi ikaw gustong mamahimo nga bag-o pinaagi sa Pag-ula ni Jesukristo?
Unsa nga mga kasinatian ang imong naagian sa imong kinabuhi nga nagpakita unsa kaandam si Jesukristo nga motabang kanimo nga mabag-o?
2. Tubaga ang mosunod nga mga pangutana diha sa imong journal sa pagtuon:
Sa unsang paagi nga ang pagpamalandong nakatabang?
Unsa ang imong nakat-onan niini nga leksiyon mahitungod sa mga pagbati ug mga gitinguha sa Langitnong Amahan ug ni Jesukristo alang kanimo?
Pagkat-on, pagbati, ug pagbuhat
Sa imong journal sa pagtuon, isulat unsa ang imong nakat-onan ug nabati karon nga labing mahinungdanon alang kanimo ug ngano. Isulat unsa ang nakapadasig nimong buhaton nga mahimong makatabang kanimo nga makig-uli sa Dios ug mahimong “usa ka bag-ong binuhat” kang Kristo. Unsa nga mga kabag-ohan ang lagmit imong laoman nga makita sa imong kaugalingon (sulod sa usa ka tuig, duha ka tuig, o lima ka tuig) isip usa ka tawo kinsa tinud-anay nga nabag-o diha kang kristo?
Opsiyonal: Gustong Makakat-on Pa og Dugang?
Sa unsang paagi kini nakatabang nako aron magpuyo sa ebanghelyo ni Kristo ug mahimong “usa ka bag-ong binuhat” diha Kaniya?
Si Elder Ulisses Soares sa Korum sa Napulog Duha ka Apostoles mipasabot:
Imahe
Elder Ulisses Soares, Korum sa Napulog Duha ka Apostoles opisyal nga hulagway.
Ang napalambo nga [hugot nga] pagtuo ug pagkakabig makatabang kanato sa paghimo ug pagtuman sa mga pakigsaad ngadto sa Dios, sa ingon makapalig-on sa atong tinguha nga mosunod ni Jesus ug makahimo og tinuod nga espirituhanong kausaban ngari kanato—sa ato pa, mousab kanato ngadto sa pagkabag-ong binuhat, sama sa gitudlo ni Apostol Pablo diha sa iyang sulat sa mga taga-Corinto (2 Mga Taga-Corinto 5:17). Kini nga kausaban magdala kanato og mas malipayon, mabungahon, ug himsog nga kinabuhi ug makatabang kanato nga mapabilin ang mahangtorong panglantaw.
2 Mga Taga Corinto 5:17–21. Unsaon nako nga mas makasabot kon unsa ang gitudlo ni Pablo niini nga mga bersikulo?
Ang mosunod nga pagpasabot mahimong makatabang nimo nga masabtan ang pipila ka mga pulong ug mga hugpong sa mga pulong niini nga mga bersikulo:
Ang pagkahimong “usa ka bag-ong binuhat” nagpasabot nga “ang atong kasingkasing, panagway, ug kinaiya mausab aron mahimong mas sama sa Manluluwas” (Benjamin M. Z. Tai, “Ang Gahom sa Basahon ni Mormon sa Pagkakabig,” Liahona, Mayo 2020, 47).
Si Kristo “wala magkwenta sa ilang kalapasan” nagpasabot nga tungod sa gibuhat ni Kristo alang kanato, sa dihang napasig-uli kita sa Dios ang atong mga sala wala maihap batok kanato.
