2 Mga Taga-Corinto 2
“Pasayloa Na Ninyo”
Ang pagpasaylo sa uban mahimong lisod kaayo. Si Pablo nagsulat ngadto sa mga Santos sa Corinto mahitungod sa pagpasaylo sa usa ka malapason sa ilang komunidad. Si Pablo nag-awhag kanila nga mopasaylo, alang sa kaayohan sa tawo nga gipasaylo ingon man usab alang sa ilang kaugalingong benepisyo. Sa imong pagtuon, pagtinguha nga madugangan ang imong pagsabot sa importansiya sa pagpasaylo ug sa imong tinguha nga makapasaylo sa uban.
Unsa kahay imong reaksiyon?
Handurawa unsaon nimo ug sa uban sa imong palibot pagtubag sa mosunod nga mga sitwasyon:
-
Nahimong ilado nga ang usa ka miyembro sa imong ward o branch nakahimo og usa ka seryoso nga sala, sama sa pagsupak sa balaod sa kaputli.
-
Usa ka tawo sa imong ward o branch ang dayag nga misupak sa mga lider sa Simbahan.
Tubaga ang mosunod nga mga pangutana:
-
Bisan tuod kon ang mga tawo niini nga mga senaryo nakigkita sa mga lider sa Simbahan ug nanglimbasog sa paghinulsol, unsaon kaha sa ubang mga tawo paghisgot ug pagtratar kanila?
-
Nganong lagmit malisod alang sa pipila ka mga tawo ang pagtagad kanila nga adunay gugma ug pagpasaylo?
Sa 2 Mga Taga-Corinto 2, si Pablo misulat og susama nga sitwasyon sa Corinto sa dihang ang usa ka tawo nakalapas ug gidisiplina sa mga miyembro sa Simbahan.
Pamalandongi unsaon nimo pagtagad ang kadtong anaa sa imong palibot kinsa nakalapas. Ikonsiderar ang mosunod nga mga pangutana ni Elder Jeffrey R. Holland sa Korum sa Napulog Duha ka mga Apostoles:
Aduna bay usa ka tawo sa inyong kinabuhi nga tingali nagkinahanglan og kapasayloan? Aduna bay tawo sa inyong panimalay, sa inyong pamilya, sa inyong kasilinganan kinsa nakabuhat og dili makiangayon o dili mabination o usa ka dili kristiyano nga butang? Kitang tanan sad-an sa mao nga kalapasan, mao nga sigurado nga adunay tawo gayod kinsa nagkinahanglan sa inyong pagpasaylo.
(Jeffrey R. Holland, “I Stand All Amazed,” Ensign, Ago. 1986, 72)
Sa imong pagtuon niini nga leksiyon, pagtinguha sa pagtabang sa Espiritu Santo aron madugangan ang imong pagsabot sa importansiya sa pagpasaylo sama kang Kristo ug unsaon nimo pagpasaylo sa uban.
Si Pablo nagtudlo mahitungod sa pagpasaylo
1. Kopyaha ang mosunod nga tsart ngadto sa imong journal sa pagtuon ug kompletoha kini:
Basaha ang 2 Mga Taga-Corinto 2:5–11, ug tan-awa unsa nga mga kamatuoran ang imong maila ubos sa mosunod nga mga kategorya:
|
Unsaon nato pagtratar sa usa ka tawo nga maoy hinungdan sa atong pagbangotan? |
Nganong kinahanglan natong tagdon ang mga tawo niini nga paagi? |
|---|---|
-
Unsay imong nakat-onan gikan sa pagtuon niini nga tudling?
Duha ka baroganan nga lagmit imong naila mao nga pinaagi sa Manluluwas nga si Jesukristo, kita makapasaylo ug motabang sa uban diha sa gugma ug kon kita dili makapasaylo sa uban, mabuntog kita ni Satanas.
-
Unsa nga mga pananglitan kon unsaon nimo pagpasaylo, paghupay, o pagmatuod sa imong gugma ngadto sa usa ka tawo nga nakalapas o kaha dili mabination?
-
Base sa unsa ang imong nasayran mahitungod sa Manluluwas nga si Jesukristo, ngano kaha nga gusto Siya nga kita mopasaylo ug magpakita og gugma sa usag usa? Sa unsang paagi Siya makatabang kanato sa pagbuhat niini?
Si Elder Massimo De Feo sa Seventy nagtudlo:
Ang tinuod nga mga disipulo malipay nga mopasaylo. Nasayod sila nga ang Pag-ula sa Manluluwas motabon sa tanang sala ug kasaypanan sa matag usa kanato. Nasayod sila nga ang bugti nga Iyang gibayad “presyong naglakip sa tanan.” Espirituhanong mga buhis, balayranan, galastohan ug bayad [kalabot] sa mga sala, kasaypanan, o mga sipyat giapil tanan. Ang tinuod nga disipulo dali nga mopasaylo ug dali nga mangayo’g pasaylo.
Minahal kong kaigsoonan, kon naglisod kamo sa pagpangita og kalig-on sa pagpasaylo, ayaw hunahunaa kon unsay nabuhat sa uban kaninyo, apan hunahunaa unsay nahimo sa Ginoo kaninyo, ug makaplagan ninyo ang kalinaw diha sa makatubos nga mga panalangin sa Pag-ula.
(Massimo De Feo, “Tiunay nga Gugma: Ang Tinuod nga Timaan sa Matag Tinuod nga Disipulo ni Jesukristo,” Liahona, Mayo 2018, 81-82)
-
Kanus-a ka nakakita og ehemplo sa usa ka tawo nga mipasaylo sa uban ug dayon mipakita og gugma alang nianang tawhana?
-
Sa unsang paagi nga ang dili pagpasaylo makapahimo ni “Satanas … sa [pagpahimulos kanato]”? ( 2 Mga Taga-Corinto 2:11).
2. Kompletoha ang mosunod nga kalihokan diha sa inyong journal sa pagtuon:
Handurawa nga, sama sa mga Taga-Corinto, ang mga tawo sa imong ward nagkinahanglang madugangan ang ilang gugma ug pagpasaylo ngadto sa mga nakasala. Tungod niini, ang imong bishop nagdapit kanimo sa pagpaambit og usa ka mubo nga panghunahuha kabahin sa pagpasaylo diha sa sinugdanan sa imong klase o sa korum nga miting. Paggahin og pipila ka minuto ug pagmugna og usa ka outline sa unsa ang mahimo nimong isulti. Ilakip ang mosunod:
-
Labing menos usa ka bersikulo o hugpong sa mga pulong gikan sa 2 Mga Taga-Corinto 2:7–11.
-
Lain pang kasulatan o usa ka pamahayag sa usa ka lider sa Simbahan. (Mahimo nimong gamiton ang pamahayag ni Elder Kevin R. Duncan sa ubos, usa sa mga kasulatan nga iyang nasulti, o usa sa mga tudling sa kasulatan nga nagsunod sa iyang pamahayag.)
-
Imong kaugalingong mga hunahuna ug pagpamatuod mahitungod sa paghatag og gugma ug pagpasaylo sa uban ug unsaon niini pagtabang kanato nga mahiduol sa Manluluwas.
Mga pagtulon-an mahitungod sa pagpasaylo
Si Elder Kevin R. Duncan sa Seventy miingon:
Kombinsido ako nga kadaghanan nato gusto nga mopasaylo, apan maglisod kaayo kita sa pagbuhat niini. Kon makasinati kita og inhustisya, mahimong dali kita nga moingon, “Nakasala kanang tawhana. Angayan silang silotan. Asa ang hustisya?” Nasayop kita sa paghunahuna nga kon kita mopasaylo, ang hustisya dili mapahigayon ug ang mga silot malikayan.
Dili gayod kini mao. Ang Dios mopahamtang og silot nga makiangayon, kay ang kalooy dili makahikaw sa hustisya [kaangayan] (tan-awa sa Alma 42:25). Ang Dios mahigugmaong nagsiguro diha kaninyo ug kanako: “Itugyan ang paghukom ngari kanako, kay kini akò ug Ako ang mobayad. [Apan tugoti nga] ang kalinaw mag-uban kaninyo” [Doktrina ug mga Pakigsaad 82:23].
(Kevin R. Duncan, “Ang Makaalim nga Haplas sa Pagpasaylo,” Liahona, May 2016, 33–34)
-
Unsa ang imong nakat-onan nga mahimong makatabang sa mga miyembro sa imong ward aron mas makasabot ug makahatag og pagpasaylo?
-
Sa unsang paagi nga ang pagpasaylo sa uban magdala kanila nga mas maduol kang Jesukristo?
Pamalandongi kon giunsa nimo pagtratar ang kadtong mga nakalapas. Pangita og inspirasyon gikan sa Langitnong Amahan mahitungod sa unsa ang imong mahimo aron “makapasaylo … ug … magpaila sa imong pagmahal alang” kanila (2 Mga Taga-Corinto 2:7–8). Ikonsiderar ang pagsulat sa imong mga impresyon ug mga hunahuna sa imong journal sa pagtuon, lakip na ang bisan unsang mga buhat nga pamati nimo makadasig nga buhaton.
Opsiyonal: Gustong Makakat-on Pa og Dugang?
Sa unsang paagi nga ang pagpasaylo makapanalangin nimo sa personal?
Si Presidente James E. Faust (1920–2007) sa Unang Kapangulohan mitudlo:
Kon kita makapasaylo diha sa atong mga kasingkasing alang niadtong naka[mugna] og kasakit ug kadaot [kanato], kita mosaka ngadto sa mas taas nga ang-ang sa pagtamod sa kaugalingon ug pagkatawo.
(James E. Faust, “Ang Makaalim nga Gahom sa Pagpasaylo,” Liahona, Mayo 2007, 68)
Si Elder Jeffrey R. Holland sa Korum sa Napulog Duha ka Apostoles mitudlo:
Uban sa apostolikanhong awtoridad nga gihatag ngari nako pinaagi sa Manluluwas sa kalibotan, ako mopamatuod sa kalinaw ngadto nianang diwa nga sa pagpasig-uli ngadto sa Dios ug sa usag usa kon kita maaghop ug igo ang kaisog sa pagkab-ot niini.
(Jeffrey R. Holland, “Ang Pangalagad sa Pagpasig-uli,” Liahona, Nob. 2018, 79)
Sa unsang paagi si Jesukristo makatabang kanimo nga mopasaylo?
Si Elder Kevin R. Duncan sa Seventy mitudlo:
Ang Makaalim nga Haplas sa Pagpasaylo
Si Elder Duncan nagtudlo nga kon kita modangup ngadto sa Manluluwas, Siya moayo kanato ug motabang kanato sa pagpasaylo niadtong nakadaut kanato.
Ang pagpasaylo mao gayod ang hinungdan nga ang Dios mipadala sa Iyang Anak, busa magmaya kita sa Iyang halad sa pag-ayo kanatong tanan. Ang Pag-ula sa Manluluwas dili lamang alang niadtong kinahanglan nga maghinulsol; alang usab kini niadtong nagkinahanglan nga mopasaylo. Kon naglisod kamo sa pagpasaylo sa laing tawo, o gani sa inyong kaugalingon, hangyoa ang Dios sa pagtabang kaninyo. Ang pagpasaylo usa ka mahimayaon, makaayo nga baroganan. Dili kinahanglan nga kaduha kitang mabiktima. Makapasaylo kita.
(Kevin R. Duncan, “Ang Makaalim nga Haplas sa Pagpasaylo,” Liahona, 2016, 35)
Tan-awa ang bidyo nga “Mga Baroganan sa Kalinaw: Pagpasaylo [Principles of Peace: Forgiveness],” 1:49, anaa sa ChurchofJesusChrist.org, nga nagpakita og usa ka ehemplo kon giunsa, tungod ni Jesukristo, ang usa ka babaye nakapasaylo sa iyang amahan.
Principles of Peace: Forgiveness #PrinceofPeace
It’s impossible to find lasting peace without forgiving and being forgiven. We’ve all been wronged by others and have made mistakes of our own, but that doesn’t mean we can’t find peace by turning to Jesus Christ.
Unsaon nako aron ako mas makasabot kon unsa ang pagpasaylo?
Si Elder Jeffrey R. Holland sa Korum sa Napulog Duha ka Apostoles mitudlo:
Ang Pangalagad sa Pagpasig-uli (Reconciliation)
Si Elder Holland nag-awhag kanato sa pagpasaylo ug sa paghago uban sa Manluluwas isip mga tigpatunhay sa kalinaw, nga kita unta makig-uli uban sa Dios ug sa usag usa.
Si [Jesukristo] wala nag-ingon nga, “Kamo wala tugoti nga mopabati og tinuod nga kasakit gikan sa napusgay nga kasinatian nga naangkon gikan sa uban.” Wala usab Siya nag-ingon, “Aron makapasaylo sa hingpit ipadayon ang makadaot nga relasyon o balik ngadto sa abusado, makadaot nga kahimtang.” Apan bisan pa man sa labing makaguol nga mga kalapasan nga tingali moabot kanato, molampos lang kita batok sa atong kasakit kon motunob kita sa dalan sa tinuod nga pagkaalim.
(Jeffrey R. Holland, “Ang Pangalagad sa Pagpasig-uli,” Liahona, Nob. 2018, 79)