Doktrinal nga Kahanas: Mateo 11:28–30

“Duol Kamo Kanako … ug Papahulayon Ko Kamo”

Gitudlo ni Jesukristo nga kon moduol kita Kaniya, Iyang himoong sayon ang atong mga palas-anon ug papahulayon kita. Hatagan ka og oportunidad niini nga leksiyon nga ipasabot ang imong nasabtan niini nga doktrina pinaagi sa paggamit sa mga baroganan sa pag-angkon og espirituhanong kahibalo ngadto sa usa ka sitwasyon nga pareho sa mga kasinatian nga lagmit aduna ka sa imong kaugalingong kinabuhi.

Isag-ulo ug ipasabot

Ipraktis ang pagmemorya sa pakisayran ug mahinungdanong hugpong sa mga pulong sa kasulatan alang sa Mateo 11:28–30 pinaagi sa paggamit sa unang mga letra sa matag pulong sa hugpong sa mga pulongan.

“Mateo __:28–__: Duol kamo ka____, kamong ta____ nga gi____ ug gibug-atan sa inyong gi____, ug pa____ ko ka____.”

Ang Doktrinal nga Kahahas nga app makatabang usab kanimo sa pagsag-ulo niining mahinungdanong hugpong sa mga pulong sa kasulatan.

Pagpasabot sa kamatuoran

Hinumdomi kon unsa ang usa ka yugo (tan-awa ang mosunod nga hulagway). Rebyoha ang Mateo 11:28–30, nga mangita sa mga kamatuoran nga gitudlo sa Manluluwas.

1. Kompletoha ang mosunod diha sa imong journal sa pagtuon:

Samtang nagtan-aw sa hulagway sa yugo, ipasabot kon sa unsang paagi nga makatabang kanato ang Manluluwas sa atong mga palas-anon. Siguroha nga ilakip ang atong tahas samtang nakigtambayayong kita kang Kristo.

Pagbansay sa paggamit

Kon gikinahanglan, rebyoha ang mga baroganan sa pag-angkon og espirituhanong kahibalo pinaagi sa pagtuon sa mga parapo 5–12 sa seksiyon nga “Pag-angkon og Espirituhanong Kahibalo” sa Mahinungdanon nga Dokumento sa Doktrinal nga Kahanas (2020). Unya itukma ang kada usa sa mosunod nga mga kapahayag sa angay nga baroganan sa pag-angkon og espirituhanong kahibalo.

(Tan-awa ang Tubag sa Pasulit sa kataposan sa leksiyon alang sa husto nga mga tubag.)

1. Ang pagkat-on sa pag-ila ug paglikay sa dili kasaligang mga tinubdan makapanalipod nato gikan sa sayop nga impormasyon ug gikan niadtong kinsa nagtinguha sa pagdaot sa atong tinuohan.

2. Samtang magtinguha kita sa pagpalambo sa atong panabot ug pagsulbad sa mga problema, importante nga mosalig kita sa pagpamatuod nga ania na nato bahin ni Jesukristo, sa Pagpahiuli sa Iyang ebanghelyo, ug sa mga pagtulon-an sa Iyang gi-orden nga mga propeta.

3. Tinguhaon nato ang tabang sa Espiritu Santo aron makita ang mga butang sama sa pagtan-aw niini sa Ginoo.

1. Lihok inubanan sa hugot nga pagtuo

2. Susiha ang mga konsepto ug mga pangutana nga adunay mahangtorong panglantaw

3. Pagtinguha pa og dugang nga panabot pinaagi sa balaanong gitudlo nga mga tinubdan

Sitwasyon

2. Kompletoha ang mosunod diha sa imong journal sa pagtuon:

Sa duha o tulo ka kapahayag, paghimo og hypothetical nga sitwasyon sa dili tinuod nga tawo nga halos pareho sa imong edad nga kasamtangang naglisod tungod sa usa ka palas-anon. Paglakip og ngalan, partikular nga palas-anon, ug usa o duha ka detalye mahitungod sa gibati sa tawo.

Pag-angkon og espirituhanong kahibalo

Hunahunaa kon unsaon nimo paggamit ang mga baroganan sa pag-angkon og espirituhanong kahibalo aron tabangan ang tawo nga anaa sa sitwasyon. Tubagi ang mosunod nga mga pangutana aron matabangan ka.

Lihok inubanan sa hugot nga pagtuo

• Unsa ang imong gibuhat aron mosalig sa Dios ug modangop ngadto Kaniya samtang nag-atubang ka og mga hagit?

• Unsa nga mga leksiyon ang imong nakat-onan gikan sa paggamit og hugot nga pagtuo diha kang Jesukristo kaniadto nga mahimong makatabang niini nga sitwasyon? Unsaon?

Susiha ang mga konsepto ug mga pangutana nga adunay mahangtorong panglantaw

• Unsa ang imong nahibaloan mahitungod kang Jesukristo nga nakahatag Kaniya og abilidad nga motabang sa pagwagtang sa mga palas-anon?

• Sa unsang paagi nga ang pagdumala sa mga palas-anon ug mga hagit sa atong kinabuhi usa ka importante nga bahin sa plano sa atong Langitnong Amahan?

Pagtinguha pa og dugang nga panabot pinaagi sa balaanong gitudlo nga mga tinubdan

• Sa unsang paagi nga ang kahibalo sa doktrina nga anaa sa Mateo 11:28–30 makatabang niini nga palas-anon o hagit?

• Unsa ang laing kasulatan o mapanagnaong pamahayag nga mahimong makatabang? Unsaon?

Pagpas-an sa mga palas-anon

3. Buhata ang mosunod nga kalihokan diha sa imong journal sa pagtuon:

Gamit ang unsay imong naila, pagsulat og usa ka sulat ngadto sa tawo nga anaa sa imong sitwasyon. Paglakip og mga kamatuoran gikan sa Mateo 11:28–30 ug uban pang mga tinubdan nga makahatag og kahupay ug kadasig.

• Unsa nga baroganan sa pag-angkon og espirituhanong kahibalo kaha ang labing mapuslanon sa pag-andam kanimo sa pagtubag niini nga sitwasyon? Ngano man?

Tubag sa Pasulit: 1. C; 2. A; 3. B