Mateo 11:27; Juan 5:19, 30; Juan 8:18–28

“Buot sa Anak nga makaila [sila] sa Amahan”

Gipamatud-an sa Manluluwas nga mas makaila kita sa Langitnong Amahan pinaagi sa pagtuon sa ehemplo sa Iyang Anak. Ang tanang gisulti ug gibuhat ni Jesukristo nagsunod sa ehemplo sa Iyang Amahan ug tinguha niini nga mas hingpit kitang dalhon ngadto sa Amahan. Makatabang kanimo kini nga leksiyon nga mas masabtan kon unsa ang Langitnong Amahan ug kon unsa ang Iyang gibati mahitungod kanimo.

Pag-ila sa Langitnong Amahan

Ikonsiderar ang mosunod nga sitwasyon:

Sa bag-ohay nga pakigpulong sa panagtigom sa sakramento, nadungog ni Claudio ang usa ka miyembro sa iyang ward nga nagdeklara nga, “Nakahibalo ako nga ang Langitnong Amahan nakaila ug nahigugma kanako. Nakahibalo Siya sa akong mga panginahanglan ug nagtinguha nga tabangan ako.” Nakurat si Claudio ug naghunahuna kung giunsa niya pagkahibalo kining tanan mahitungod sa Langitnong Amahan. Samtang namalandong siya sa iyang nahibaloan mahitungod sa Langitnong Amahan sa personal, gibati niya nga dili kini daghan kaayo. Misulay pa gani siya sa pagpangita diha sa mga kasulatan ug wala usab siya nagmalamposon didto.

• Sa unsang mga paagi kaha kita usahay mobati nga sama ni Claudio?

• Sa unsang paagi kaha mahagiton para kanato ang pamati nga wala kita nakaila sa Langitnong Amahan o wala gani kita nakahibalo mahitungod Kaniya?

Ikonsiderar kon unsa ang imong nakat-onan mahitungod sa Langitnong Amahan ug kon unsa ang impluwensya kanimo niana nga kahibalo. Sa usa ka papel o diha sa imong journal sa pagtuon, isulat ang mga pulong nga “Langitnong Amahan” sa tunga. Sa palibot niini nga mga pulong, isulat ang imong nahibaloan mahitungod sa Langitnong Amahan.

• Unsa ang impluwensya sa kinabuhi sa usa ka tawo sa mas hingpit nga pagkaila sa Langitnong Amahan?

Samtang magtuon ka niini nga leksiyon, pangitaa ang mga kamatuoran mahitungod sa Langitnong Amahan ug sa Iyang Anak nga makatabang kanimo nga mas makasabot kon sama Sila sa unsa ug kon unsa ang Ilang gibati mahitungod kanimo. Ikonsiderar ang pagdugang sa imong nakat-onan sa papel mahitungod sa Langitnong Amahan.Regular nga nakig-istorya si Jesukristo sa Iyang Amahan ug gibuhat kini nga adunay importanteng katuyoan. Basaha ang mga mosunod nga tudling, pangitaa kon unsa ang gusto ni Jesus nga mahibaloan sa Iyang mga sumusunod mahitungod sa Iyang Kaugalingon ug sa Langitnong Amahan:

Mateo 11:27 (lakip ang kabag-ohan sa Hubad ni Joseph Smith sa footnote c)

Juan 5:19, 30Juan 8:18–19, 26, 28

• Unsaon nimo sa pagsumada ang gitudlo sa Manluluwas gikan sa imong gibasa?

Si Elder Jeffrey R. Holland sa Korum sa Napulog Duha ka Apostoles nagpasabot og usa ka importanteng paagi aron mailhan ang Langitnong Amahan.Mahimo nimong basahon ang mosunod nga teksto sa “Ang Kahalangdon sa Dios”.

Opsiyonal: Gustong Makahibalo og Dugang?

Unsa ang impluwensya kanako sa pag-ila sa Langitnong Amahan?

Si Propeta Joseph Smith (1805–44) mitudlo:

Kon ang usa ka [tawo] walay makat-unan gawas sa pagkaon, pag-inom ug pagkatulog, ug wala makasabot sa bisan unsa nga mga plano sa Dios, ang mananap nakasabot sa samang mga butang. Kini mokaon, moinom, matulog, ug walay nahibal[o]an mahitungod sa Dios; pero nakahibalo kini sama kanato, gawas kon kita nakasabot pinaagi sa inspirasyon sa Labaw nga Makagagahum nga Dios. Kon ang [mga tawo] dili makasabot sa kinaiya sa Dios, sila wala makasabot sa ilang mga kaugalingon.

(Mga Pagtulon-an sa Mga Presidente sa Simbahan: Joseph Smith [2007], 46–47)