Mateo 11:28–30

“Papahulayon Ko Kamo”

Sa panahon sa Iyang pagpangalagad, gitudlo sa Manluluwas ang mas taas nga balaod sa ebanghelyo ug giayo ang mga masakiton. Samtang nagkadaghan ang oposisyon batok sa Manluluwas ug sa Iyang mga pagtulon-an, gisaway Niya ang daotan ug misaad og kapahulayan sa tanang moduol Kaniya. Kini nga leksiyon makadugang sa imong pagsalig nga tabangan ka sa Ginoo sa imong mga hagit ug mga palas-anon.

Imong mga palas-anon ug mga hagit

Pagdrowing og stick figure nga nagrepresentar og usa ka tin-edyer. Pagdrowing og backpack sa likod sa stick figure aron irepresentar ang mga palas-anon ug mga kaugtas nga giatubang sa mga tin-edyer karon. Pagsulat og dili mominos sa lima niadto nga mga palas-anon o mga kaugtas sa sulod, sa ibabaw, o sa palibot sa backpack.

usa ka stick figure sa nagdala og usa ka backpack

Sa sukdanan nga usa hangtod sa lima, nga ang lima hilabihan ka maayo ug ang usa dili gayod maayo, sa imong pamati, unsa kamaayo nimo gisulbad ang imong mga palas-anon ug ang makaugtas nga mga panghitabo?

Kon wala pa nimo kini nabuhat, ikonsiderar ang pagtagana og panahon karon aron dapiton ang Langitnong Amahan nga tabangan ka sa pagpangita sa mga baroganan nga makatabang kanimo sa partikular nga mga palas-anon nga kasamtangan nimong gipas-an. Basaha ang Mateo 11:28–30, nga mangita sa mga kamatuoran nga gitudlo sa Manluluwas nga lagmit nga makatabang sa usa ka tawo nga nabug-atan sa mga palas-anon.

Ang Mateo 11:28–30 usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron mas dali ra nimo kining makit-an.

Unsa nga mga kamtuoran ang imong nakit-an?
Sa unsang paagi kaha makatabang kini nga mga kamatuoran sa usa ka tawo nga adunay problema?

“Isangon ninyo ang akong yugo”

Usahay lisod masabtan ang mga pulong o mga hugpong sa mga pulong sa mga kasulatan. Ang pagkat-on sa kahulogan sa mga pulong ug mga hugpong sa mga pulong mahimong makatabang kanato nga makakat-on kon unsa ang gusto sa Manluluwas nga atong mahibaloan. Pagpraktis niini gamit ang hugpong sa mga pulong nga “Isangon ninyo ang akong yugo” (Mateo 11:29).

lalaki nga nagmaneho og karwahe nga giguyod sa mga baka

Ang yugo mao ang “usa ka himan nga gibutang palibot sa liog sa mga hayop o mga tawo aron pagsangon kanila og dungan” (Giya ngadto sa mga Kasulatan, “Yugo,” scriptures.ChurchofJesusChrist.org). Ang mga hayop niini nga hulagway gitauran og usa ka yugo.

Gisaysay ni Elder Edward Dube sa Seventy ang mosunod nga kasinatian:

Niadtong Disyembre 2015 sa Madziva, Zimbabwe, si Naume [akong asawa] ug ako nakakita og lalaki nga nagdaro sa iyang umahan gamit ang duha ka baka. Nahingangha ako sa pagkakita niadtong usa ka hayop usa ka dako nga baka ug ang laing usa ka gamay nga toro nga baka. Naglibog ko. Miingon ko og kusog, “Ngano kaha nga ang usa ka mag-uuma magdaro gamit ang duha ka hayop nga wala magtupong ang gidak-on diha sa yugo?”

Ang inahan ni Naume, nga nagtindog sa duol, mitudlo sa yugo. Mitan-aw ako pag-ayo ug nakita ang mga higot [mga pisi o kadena] nga nagkonektar sa yugo ngadto sa toro nga baka. Gibira sa dakong baka ang tanang gibug-aton, ug nabira ang gamay nga toro nga baka, nga nagtuon kon unsaon pagdaro.

(Edward Dube, “Learn of Me,” Liahona, Okt. 2020, Africa Southeast Local Pages, ChurchofJesusChrist.org)

Sa unsang paagi kaha ang atong relasyon sa Manluluwas nahisama nianang dakong baka ug sa gamay nga toro nga baka?
Sa unsang paagi nga ang pagkahibalo sa kahulogan sa yugo makapalawom sa imong pagsabot sa unsay gibati ni Kristo kabahin nimo?

Si Elder David A. Bednar sa Korum sa Napulog Duha ka Apostoles miingon:

Ang paghimo ug paghupot og sagradong mga pakigsaad nagyugo kanato ngadto ug uban ni Ginoong Jesukristo.

(David A. Bednar, “Makadaug sa Ilang mga Alantuson uban sa Kasayon,” Liahona, Mayo 2014, 88)

Sa imong hunahuna sa unsang paagi kaha nga ang paghimo ug pagtuman sa mga pakigsaad magyugo kanato ngadto ug uban sa Manluluwas?

Si Elder Dube mipasabot:

Kon kita giyugohan uban kang Jesukristo, Siya ang magpas-an sa palas-anon, ug makigbahin kita sa kalipay sa buluhaton. Ang imbitasyon sa Ginoo sa matag usa kanato nga magkat-on Kaniya mao lang ang bugtong nga tinubdan nga siguradong magdala og kalinaw, kalipay ug maghatag og mga tubag sa problemadong hunahuna.

(Edward Dube, “Learn of Me,” Liahona, Okt. 2020, Africa Southeast Local Pages, ChurchofJesusChrist.org)

Sa unsang paagi nga ang pagkat-on kang Jesukristo karong tuiga nakatabang kanimo sa pagpas-an sa imong palas-anon ug naghatag kanimo og kalinaw ug kalipay?

Pagduol ngadto kang Kristo ug pagdawat sa Iyang kapahulayan

Kalihokan A: “Duol kamo kanako” (Mateo 11:28). Sa unsang paagi ako makaduol kang Kristo?

Aron madawat ang tabang sa Manluluwas ug ang kapahulayan nga Iyang gitanyag, kinahanglan kitang moduol ngadto Kaniya.

Kon adunay tawo nga mangutana kanimo kon unsa ang buot ipasabot sa pagduol kang Kristo, unsa ang imong isulti?

Si Elder Richard G. Scott (1928–2015) sa Korum sa Napulog Duha ka Apostoles nagtuki og pipila ka paagi nga makaduol kita kang Kristo.

Kon padayon kitang mag-ampo buntag ug gabii, magtuon sa kasulatan matag adlaw, mag-family home evening matag semana, ug motambong sa templo pirme, aktibo kitang nagtubag sa Iyang pagdapit nga “moduol ngadto Kaniya.”

(Richard G. Scott, “Himoa ang Paggamit sa Pagtuo nga Inyong Unang Prayoridad,” Liahona, Nob. 2014, 94)

Pwede nimo tan-awon ang “Come unto Christ: 2014 Theme Song” (4:48) aron makakita og mga ehemplo unsaon pagduol sa Manluluwas. Kini nga bidyo anaa sa ChurchofJesusChrist.org.

Come unto Christ: 2014 Theme Song
No matter what we are struggling with, there is always hope if we come unto Christ.

Kalihokan B: “Papahulayon ko kamo” (Mateo 11:28). Sa unsang paagi kaha pas-anon ni Kristo ang akong mga palas-anon?

Ang pinakamaayong ehemplo sa paghupay sa Manluluwas sa mga palas-anon narekord sa Basahon ni Mormon. Si Alma ug ang iyang katawahan nabihag, gipugos sa pagtrabaho, ug gilutos pag-ayo.

Basaha ang Mosiah 24:12–16. Pwede nimo tan-awaon ang bidyo “Kapitulo 17: Alma and His People Escape [Kapitulo 17: Si Alma ug ang Iyang Katawhan Mieskapo]” gikan sa time code 0:01 hangtod sa 1:29. Kini nga bidyo anaa sa ChurchofJesusChrist.org.

Hunahunaa ang imong kaugalingong mga kasinatian o ang mga kasinatian sa mga tawo nga imong nailhan, ug irekord ang usa ka higayon nga gipas-an sa Manluluwas ang palas-anon. Seguroha nga ilakip kon unsa ang gibuhat nimo o sa usa ka tawo nga imong nailhan aron modangop sa Manluluwas ug giunsa Niya pagtabang.

Opsiyonal: Gustong Makakat-on pa og Dugang?

Unsaon kita pagtabang ni Jesukristo kon moduol kita Kaniya?

Si Elder John A. McCune sa Seventy mipasabot og pipila ka panalangin nga moabot kon moduol kita kang Jesukristo.

Samtang atong dawaton ang pagdapit sa Manluluwas nga “duol kamo kanako,” (Mateo 11:28) Siya mohatag sa suporta, kahupayan, ug kalinaw nga gikinahanglan. … Bisan sa atong pinakabug-at nga mga pagsulay, atong mabati ang mainiton nga paghangop sa Iyang gugma samtang kita mosalig Kaniya ug modawat sa Iyang kabubut-on.

(John A. McCune, “Duol ngadto kang Kristo—Magpakabuhi isip mga Santos sa Ulahing mga Adlaw,” Liahona, Mayo 2020, 36)

Ang bidyo nga “Living with Depression [Pagpakabuhi nga may Depresyon]” (3:13) naghatag og usa ka ehemplo sa unsang paagi si Jesukristo makatabang kanato bisan kon kini nagpasabot nga kita wala pa makalingkawas sa malisod nga pagsulay.