Rebyo 15 sa Doktrinal nga Kahanas

Gamita ang mga Tudling sa Doktrinal nga Kahanas

Nagkalainlaing kabatan-onan magkauban nga nagpundok. Makita sila nga anaa sa simbahan diha sa usa ka klase sa Sunday School. Sila adunay mga kasulatan ug nagpahiyom. Didto kini sa Samoa.

Usa sa mga katuyoan sa doktrinal nga kahanas mao ang pagtabang ninyo nga makat-on unsaon nga tukma nga magamit ang mga tudling sa doktrinal nga kahanas sa inyong pagtudlo sa ebanghelyo ni Jesukristo ngadto sa uban. Kini nga leksiyon maghatag kaninyo og mga kahigayonan sa pagbansay sa paggamit sa pipila sa mga tudling sa doktrinal nga kahanas ngadto sa lainlaing mga sitwasyon sa pagtudlo.  

Ang sumbanan nga mga kasulatan naglangkob og daghang mga sugilanon sa mga tawo nga naggamit sa mga kasulatan sa pagtudlo sa uban. Pipila sa mga pananglitan naglakip kang Jesukristo nga nagtudlo sa duha sa Iyang mga disipulo ngadto sa dalan paingon sa Emaus (Lucas 24:27), si Nephi nga nagdasig sa iyang mga igsoon nga lalaki nga bawion ang mga palid nga tumbaga (tan-awa sa 1 Nephi 4:2), ug si Moroni nga naghatag og instruksiyon sa batan-ong si Joseph Smith (Joseph Smith—Kasaysayan 1:36–41).

Kanus-a kamo o ang usa ka tawo nga inyong nailhan migamit sa kasulatan sa pagtudlo sa uban?
Nganong sa inyong hunahuna importante man ang paggamit sa mga kasulatan agig dugang sa atong kaugalingong mga pagpasabot diha sa atong pagtudlo sa uban?

Irebyo ang mosunod nga listahan sa mga kapanguhaan sa doktrinal nga kahanas ug mahinungdanon nga mga hugpong sa mga pulong sa kasulatan. Pamalandongi ang nagkalainlaing mga sitwasyon nga lagmit ninyong atubangon diin inyong magamit kini nga mga tudling sa pagtudlo og usa ka tawo.

Doktrinal nga Kahanas sa Bag-ong Tugon: 1 Mga Taga-Corinto–Pinadayag

1 Mga Taga-Corinto 6:19–20	“Ang inyong lawas mao ang templo sa Espiritu Santo.”
1 Mga Taga-Corinto 11:11	“Hinoon diha sa Ginoo ang babaye dili gawas sa lalaki ni ang lalaki gawas sa babaye.”
1 Mga Taga-Corinto 15:20–22	“Kay ingon nga nangamatay ang tanang mga tawo tungod sa ilang pagkahiusa kang Adan, banhawon usab ang tanan tungod sa ilang pagkahiusa kang [K]risto.”
1 Mga Taga-Corinto 15:40–42	Diha sa Pagkabanhaw, adunay tulo ka ang-ang sa himaya.
Mga Taga-Efeso 1:10	“Usa ka laraw nga pagatumanon inig-abot sa tukma nga panahon, laraw sa paghiusa diha kang Kristo sa tanang mga butang.”
Mga Taga-Efeso 2:19–20	Ang Simbahan “tinukod ibabaw sa patukoranan nga mao ang mga apostoles ug mga propeta, nga niini si Jesukristo mao ang ulohang bato sa pamag-ang.”
2 Mga Taga-Tesalonica 2:1–3	“Ang adlaw ni Kristo … dili pa moabot, hangtod nga mahitabo una ang pagsupil.”
2 Timoteo 3:15–17	“Ang balaan nga kasulatan … makagagahom sa pagtudlo kanimo ngadto sa kaluwasan.”
Mga Hebreohanon 12:9	Ang Langitnong Amahan mao “ang Amahan sa mga espiritu.”
Santiago 1:5–6	“Kon aduna man kaninyoy nakulangan og kaalam, papangayoa siya sa Dios.”
Santiago 2:17–18	“Ang hugot nga pagtuo patay kon kini walay binuhatan.”
1 Pedro 4:6	“Ang maayong balita [gi]wali hangtod ngadto sa mga patay.”
Pinadayag 20:12	“Ug ang mga patay gipanaghukman … pinasikad sa ilang mga binuhatan.”