Mga Buhat 17:1–14

Siksika ang mga Kasulatan

Usa ka batan-ong babaye naglingkod diha sa iyang kwarto ug nagbasa sa iyang mga kasulatan

Nakahunahuna na ba kamo nganong importante kaayo ang pagtuon sa mga kasulatan? Pipila sa mga kasinatian nga nasinati ni Pablo ug sa iyang mga kauban diha sa ikaduhang misyonaryong panaw ni Pablo naghulagway sa gahom sa pulong sa Dios ngari kanato. Kini nga leksiyon makatabang kaninyo nga mobati og mas dakong tinguha nga makasinati sa mga panalangin sa inadlaw nga pagtuon sa kasulatan.

Mga panabot gikan sa inyong pagtuon sa kasulatan

Magsulat diha sa piraso sa papel gamit ang ballpen o lapis.

Mga pananglitan sa bili sa mga kasulatan

Pipila sa mga kasinatian ni Pablo panahon sa iyang ikaduhang misyonaryong panaw naghulagway sa bili sa pagtuon sa mga kasulatan. Isulat ang mosunod nga ulohan sa inyong journal sa pagtuon: Sa unsang paagi nga ang pagtuon sa mga kasulatan makapanalangin sa akong kinabuhi. Sa inyong pagtuon karon, pangita og mga panabot nga inyong malista ubos niining ulohan.

Kon anaa, gamita ang mga Mapa sa Biblia, nu.13, “Ang Misyonaryong mga Panaw ni Apostol Pablo,” aron makita ang Tesalonica ug ang ubang mga lugar diin si Pablo miadto panahon sa iyang ikaduhang misyonaryong panaw.

Basaha ang Mga Buhat 17:1–4 ug pangitaa kon unsa ang gihimo ni Pablo taliwala sa mga Judio sa Tesalonica.

Unsa sa inyong hunahuna ang mahinungdanon mahitungod sa mga paningkamot ni Pablo?
Unsa ang gikatabang niini nga asoy sa inyong pagsabot mahitungod sa bili sa mga kasulatan?

Ang mensahe ni Pablo ngadto sa mga Judio sa Tesalonica nagpahinumdom kanato nga ang mga kasulatan nagpamatuod kang Jesukristo ug sa Iyang diosnong misyon (tan-awa sa Juan 5:39). Ikonsiderar ang pagdugang niini nga kamatuoran diha sa listahan sa inyong journal sa pagtuon.

Si Elder D.Todd Christofferson sa Korum sa Napulog Duha ka Apostoles mitudlo sa mosunod mahitungod sa katuyoan sa mga kasulatan. Mahimo ninyong tan-awon ang bidyo nga “Ang [Mga] Panalangin sa Kasulatan” gikan sa time code 10:49–11:21 o basaha ang pamahayag sa ubos.

The Blessing of Scripture
The central purpose of all scripture is to fill our souls with faith in God the Father and in His Son, Jesus Christ.

Sa kataposan, ang sentrong katuyoan sa tanang kasulatan mao ang pagbusog sa atong mga kalag uban sa hugot nga pagtuo diha sa Dios nga Amahan ug sa Iyang Anak, si Jesukristo—hugot nga pagtuo nga Sila anaa; hugot nga pagtuo nga ang plano sa Amahan alang sa atong pagka-imortal ug kinabuhi nga dayon, hugot nga pagtuo sa Pag-ula ug Pagkabanhaw ni Jesukristo, nga mipalihok niining plano sa kalipay; hugot nga pagtuo sa paghimo sa ebanghelyo ni Jesukristo nga atong pamaagi sa kinabuhi; ug hugot nga pagtuo nga makaila “sa bugtong tinuod nga Dios, ug kang Jesukristo, nga [Iyang] pinadala (Juan 17:3).”

(D. Todd Christofferson, “Ang Panalangin sa Kasulatan,” Liahona, Mayo 2010, 34)

Hain sa mga panalangin nga nahisgotan ni Elder Christofferson ang inyong nasinati pinaagi sa inyong pagtuon sa kasulatan?
Unsa ang pipila sa mga bersikulo sa kasulatan ang nakapadugang sa inyong hugot nga pagtuo sa Langitnong Amahan ug kang Jesukristo? Giunsa sa mga kamatuoran nga gitudlo niini nga mga bersikulo pagtabang kaninyo nga madugangan ang inyong hugot nga pagtuo?

Samtang daghang mga babaye ug lalaki sa Tesalonica ang nagtuo ug nahimong nakabig pinaagi sa mga pagpanudlo ni Pablo, ang uban naghimo og usa ka panon sa pagsulay sa pagdakop kang Pablo ug kang Silas (tan-awa sa Mga Buhat 17:4–5). Si Pablo ug Silas nakaikyas gikan sa panon [mob] ug miadto sa duol nga lungsod sa Berea, diin sila nagpadayon sa pagsangyaw.

Basaha ang Mga Buhat 17:10–12, nga mangita kon giunsa sila si Pablo ug Silas pagdawat sa mga tawo sa Berea. Ikonsiderar ang pagmarka sa mga pulong o mga hugpong sa mga pulong nga inyong gibati nga mahinungdanon.

Giunsa sa makanunayon nga pagtuon sa mga kasulatan pagtabang niining mga tawhana?

Usa ka kamatuoran nga maila gikan niini nga asoy mao kini: ang pagtuon kanunay sa mga kasulatan mahimong makaandam kanato sa pag-ila ug pagtuo sa kamatuoran. Ikonsiderar ang pagdugang niini nga kamatuoran diha sa listahan sa inyong journal sa pagtuon.

Paghunahuna kon sa unsa nga paagi nga ang makanunayong pagtuon sa mga kasulatan mahimong makatabang kaninyo sa mosunod nga mga sitwasyon:

Usa sa inyong mga magtutudlo sa tulunghaan nagpasabot sa usa ka konsepto nga sukwahi sa inyong mga gituohan.
Pipila sa inyong mga higala nag-awhag kaninyo sa pag-apil sa mga kinaiya nga supak sa inyong mga sumbanan pinaagi sa pagsulti, “Kausa ra bitaw ok ra na.”
Sa kinatibuk-ang komperensiya, usa ka Apostol nagtudlo og usa ka butang nga misukwahi sa bag-ong mga uso sa kalibotan.

Uban pang mga panalangin sa pagtuon sa kasulatan

Ang mga kamatuoran nga inyong naila gikan sa Mga Buhat 17 naghulagway lamang og pipila ka mga panalangin nga atong madawat pinaagi sa pagtuon sa mga kasulatan.

Paggahin og pipila ka minuto sa pagtuon sa pipila o tanan sa mosunod nga mga tudling sa kasulatan, og pangitaa ang uban pang mga panalangin nga atong madawat gikan sa Dios pinaagi sa pagtuon sa Iyang mga pulong ug sa mga pulong sa Iyang mga propeta, nga makita sa mga kasulatan. Idugang ang inyong mga panabot diha sa listahan sa inyong journal sa pagtuon.

Paghimo og plano

Isip kabahin sa inyong pagsalmot sa seminary, kamo gidapit sa pagmugna og usa ka tumong nga may kalabotan sa inyong inadlaw nga pagtuon sa kasulatan. Paggahin og higayon sa pagtimbang-timbang sa inyong kalamboan niini nga tumong ug paghimo og gikinahanglan nga mga pagpahiangay aron makatabang kaninyo nga mahimong mas malamposon sa inyong pagpadayon sa unahan.

Opsiyonal: Gustong Makakat-on pa og Dugang?

Unsa ang ubang mga panalangin nga makuha gikan sa inadlaw-adlaw nga pagtuon sa kasulatan?

Sa paghisgot bahin sa pagbasa sa Basahon ni Mormon matag adlaw, si Presidente Russell M. Nelson misaad sa mosunod:

Minahal kong mga igsoon, mosaad ko kaninyo nga kon mainampoon kamo nga magtuon sa Basahon ni Mormon kada adlaw, makahimo kamo og mas maayong mga desisyon—kada adlaw. Mosaad ako kaninyo nga kon mamalandong kamo sa unsay inyong gitun-an, ang mga bintana sa langit mobukas, ug makadawat kamo sa mga tubag sa inyong mga pangutana ug direksyon sa inyong kinabuhi. Mosaad ako nga kon inyong isub-sob ang inyong kaugalingon sa Basahon ni Mormon, mapanalipdan kamo batok sa mga daotan niining panahona, bisan ang grabeng pagtakboy sa pornograpiya ug sa ubang matang sa adiksyon.

(Russell M. Nelson, “Ang Basahon ni Mormon: Unsa Kaha ang Imong Kinabuhi Kon Wala Kini?,” Liahona, Nob. 2017, 62–63)

Si Presidente Dallin H. Oaks nagtandi sa mga kasulatan sa usa ka Urim ug Thummim nga atong magamit sa pagdawat oh pagpadayag gikan sa Ginoo:

Dili nato palabihon ang punto kon kita moingon nga ang mga kasulatan mahimong usa ka Urim ug Thummim aron pagtabang sa matag usa kanato aron makadawat og personal nga pagpadayag.

Tungod kay nagtuo kita nga ang pagbasa sa kasulatan makatabang kanato nga makadawat og pagpadayag, giawhag kita sa pagbasa og balik-balik sa mga kasulatan. Niining paagiha, atong maangkon ang kasayoran sa unsay gusto sa atong Langitnong Amahan nga atong mahibaloan ug buhaton diha sa atong personal nga kinabuhi karon. Mao kana ang usa ka hinungdan nga ang Santos sa Ulahing Adlaw nagtuo sa inadlaw nga pagtuon sa kasulatan.

(Dallin H. Oaks, “Scripture Reading and Revelation,” Ensign, Ene. 1995, 8)