Mga Buhat 16

“Gitawag Kami sa Dios … sa Pagmantala sa Maayong Balita”

Diha sa usa ka panan-awon, si Pedro mibunyag og usa ka Hentil.

Sa Iyang pagpanamilit sa Iyang Apostoles, ang Manluluwas mimando kanila nga “himoa ninyong mga tinun-an ang tanang kanasoran, sa pagpamautismo kanila sa ngalan sa Amahan ug sa Anak ug sa Espiritu Santo” (Mateo 28:19). Si Pablo ug ang iyang mga kauban nakahimo og talagsaon nga paglambo sa pagtuman niini nga sugo. Ang katuyoan niini nga leksiyon mao ang pagtabang kaninyo sa pag-ila sa tabang nga gitinguha sa Manluluwas nga ihatag kaninyo diha sa inyong pagpaningkamot sa pagpakigbahin sa Iyang ebanghelyo ngadto sa uban.

Pagpakigbahin sa ebanghelyo sa uban

Lagmit inyong nahinumdoman nga human sa Pagkabanhaw sa Manluluwas, Iyang gitigom ang Iyang Apostoles ug gihatagan sila sa mosunod nga sugo: “Busa panglakaw kamo ug himoa ninyong mga tinun-an ang tanang kanasoran, sa pagpamautismo kanila sa ngalan sa Amahan ug sa Anak ug sa Espiritu Santo” (Mateo 28:19).

Si Elder DieterF. Uchtdorf sa Korum sa Napulog Duha ka Apostoles mipakigbahin sa mosunod nga mga hunahuna mahitungod sa sugo sa Manluluwas sa pagsangyaw sa ebanghelyo. Mahimo ninyong tan-awon ang bidyo nga “Misyonaryo nga Buhat: Pagpakigbahin sa Unsay Anaa sa Inyong Kasingkasing” gikan sa time code 2:46 hangtod 3:30 o basaha ang pamahayag sa ubos.

2:3

Kanunay kong [naghinuktok] ug nag-ampo mahitungod sa dakong sugo sa Manluluwas ngadto sa iyang mga disipulo … nga “busa panglakaw kamo ug himoa ninyong mga tinun-an ang tanang kanasoran, sa pagpamautismo kanila sa ngalan sa Amahan ug sa Anak ug sa Espiritu Santo” [Mateo 28:19].

Naningkamot ko sa pagtubag sa pangutana kon “Unsaon nato, isip mga sakop ug mga disipulo ni Kristo, pagtuman niana nga dakong sugo sa atong inadlaw-adlaw nga kinabuhi sa [labing] maayong paagi?”

Karon, dapiton ko kamo sa pagpamalandong niana nga pangutana sa inyong kasingkasing ug hunahuna.

(Dieter F. Uchtdorf, “Misyonaryo nga Buhat: Pagpakigbahin sa Unsay Anaa sa Inyong Kasingkasing,” Liahona, Mayo 2019, 15–16.)

Agi og dugang sa pangutana nga gidapit kamo ni Elder Uchtdorf nga inyong pamalandongan, hunahunaa ang mahitungod sa inyong mga tubag sa mosunod nga mga pangutana. Ikonsiderar ang pagrekord sa inyong mga tubag diha sa inyong journal sa pagtuon.

Sa sukod nga 1–5, unsa kadako ang tinguha ninyo nga mapakigbahin ang ebanghelyo ngadto sa uban? Nganong ingon niini man ang inyong tubag?
Unsa nga mga babag ang inyong giatubang sa pagpakigbahin sa ebanghelyo ngadto sa uban?

Si Apostol Pablo usa kanhi ka gamhanang misyonaryo nga nakadala og daghang mga kalag ngadto kang Jesukristo pinaagi sa iyang pagsangyaw. Niining semanaha, inyong makat-onan ang mahitungod sa pipila ka mga panghitabo nga nahitabo panahon sa ikaduha ug ikatulong misyonaryong mga pagpanaw ni Pablo (tan-awa sa Mga Buhat 15:36–41; 16; 17; 18:1–22 ug Mga Buhat 18:23–28; 19; 20; 21:1–15). Ang mosunod nga mapa naghulagway sa mga biyahe ni Pablo panahon niining mga pagpanaw:

Mapa sa Biblia. Ang Misyonaryo nga mga Panaw ni Apostol Pablo.

Sa inyong pagtuon sa pipila sa mga kasinatian ni Pablo gikan sa iyang ikaduhang misyon niini nga leksiyon, inyong makita ang mga pananglitan sa mosunod nga kamatuoran: ang Ginoo magdala kanato ngadto sa Iyang mga giandam nga modawat sa Iyang ebanghelyo. Hatagi og pagtagad ang mga pag-aghat sa Espiritu nga mahimong makatabang kaninyo sa inyong mga paningkamot sa pagpaambit sa ebanghelyo ngadto sa uban.

Si Pablo ug ang iyang mga kauban misangyaw sa ebanghelyo didto sa Macedonia

Paghulagway ni Lydia, “namaligyag panapton nga dagtom-pula” diha sa Bag-ong Tugon.

Basaha ang Mga Buhat 16:6–15, pangitaa kon unsa ang nasinati ni Pablo ug sa iyang mga kauban sa sayong bahin sa ikaduhang misyonaryong panaw ni Pablo.

Unsa ang inyong makat-onan mahitungod sa Langitnong Amahan gikan niining asoy nga makatabang kaninyo sa inyong mga paningkamot sa pagpangita niadtong mga giandam sa Ginoo nga modawat sa Iyang ebanghelyo?
Giunsa ninyo pagkakita sa pag-andam sa Ginoo sa uban aron modawat sa Iyang ebanghelyo? Giunsa Niya pag-andam o unsaon Niya pag-andam kaninyo aron makakaplag og mga tawo nga nangita Kaniya?

Aron makakita og paghulagway kon sa unsang paagi ang Ginoo moandam sa mga tawo nga modawat ug mopakigbahin sa Iyang ebanghelyo, tan-awa ang bidyo nga “Prayer [Pag-ampo]” (4:12), anaa sa ChurchofJesusChrist.org.

4:12

Si Pablo ug si Silas gibilanggo ug nagpadayon sa pagsangyaw

Si Pablo ug si Silas gilatos ug gipriso. - ch.61-4

Human si Pablo ug ang iyang mga kauban mitudlo ug mibunyag ni Lydia, si Pablo nanghingilin og daotang espiritu pagawas sa usa ka batan-ong babaye nga sulogoon (tan-awa sa Mga Buhat 16:16–18). Siya ug ang iyang kauban nga si Silas kay gilatos ug gibilanggo (tan-awa sa Mga Buhat 16:19–24). Ang pagkabalhog sa bilanggoan tungod sa pagsangyaw sa ebanghelyo mahimo tingali nga salabtonon nga rason nga moundang sa pagsangyaw. Apan alang kang Pablo ug Silas, kini nahimong usa ka kahigayonan sa pagtabang sa uban nga moduol kang Kristo.

Basaha ang Mga Buhat 16:25–36 aron makita giunsa sa Ginoo paghimo nga kahigayon ang pagkabilanggo nila Pablo ug Silas aron sila makasangyaw sa ebanghelyo.

Unsa nga mga Kristohanong hiyas ang gipakita ni Pablo ug Silas dinhi niini nga asoy?
Giunsa man niining mga hiyas paghimo kanila nga mas epektibo sa pagpakigbahin sa ebanghelyo?
Unsa ang inyong nakat-onan gikan niini nga asoy nga makatabang kaninyo sa inyong mga paningkamot nga makakita sa kadtong mga giandam sa Ginoo nga modawat sa Iyang ebanghelyo?

Paggamit sa inyong nakat-onan

Pinaagi sa Espiritu Santo, pangita og inspirasyon gikan sa Langitnong Amahan aron maila ang usa ka butang nga inyong mahimo aron sa pagpakigbahin sa ebanghelyo ni Jesukristo ngadto sa uban. Pagpili og usa sa mosunod nga mga imbitasyon nga pamati ninyo nga mas labing makabenepisyo kaninyo:

Pag-ampo matag adlaw sa Ginoo aron magiyahan kamo ngadto sa tawo nga Iyang giandam nga modawat sa ebanghelyo.
Ikonsiderar ang paglista og duha ka mga ngalan sa higala o mga klasmeyt sa tulunghaan nga posibleng madinawaton sa pagpaminaw sa ebanghelyo ni Jesukristo. Dayon hangyoa ang Langitnong Amahan sa pagtabang kaninyo kon unsaon ninyo pagkahimong instrumento sa Iyang mga kamot aron madala sila ngadto sa Manluluwas.
Inubanan sa hustong pagtugot gikan sa inyong mga ginikanan ug mga lider, pagtrabaho kuyog sa magkaubang misyonaryo sulod sa pipila ka oras. Ipakigbahin ang inyong kasinatian ngadto sa klase sa umaabot nga panahon.
Paghunahuna og inyong kaugalingong ideya sa usa ka butang nga inyong mahimo aron mapaambit ang ebanghelyo sa uban.

Magsulat diha sa piraso sa papel gamit ang ballpen o lapis.

Opsiyonal: Gustong Makakat-on pa og Dugang?

Sa unsang paagi ang social media makatabang kanako sa pagpakigbahin sa ebanghelyo?

Sa bidyo nga “To Sweep the Earth as with a Flood [Mosilhig sa Yuta ingon sa usa ka Lunop]” (2:56), si Elder David A. Bednar sa Korum sa Napulog Duha ka Apostoles namulong mahitungod sa paggamit sa social media sa pagpakatap sa ebanghelyo. Kini nga bidyo anaa sa ChurchofJesusChrist.org.

2:57

Unsa kaha kon ang mga tawo mosalikway sa akong imbitasyon nga magkat-on og dugang niining panahona?

Si Elder Dieter F. Uchtdorf sa Korum sa Napulog Duha ka Apostoles mitudlo:

Wala magkinahanglan ang Dios nga inyong “ibaligya” ang gipahiuli nga ebanghelyo o ang Simbahan ni Jesukristo. Nagpaabot lamang Siya nga dili ninyo kini itago ilawom sa gantangan. Ug kon ang mga tawo mohukom nga ang Simbahan dili alang kanila, ila kanang desisyon. Wala kana magpasabot nga napakyas kamo. Padayon ninyo silang trataron sa mabinationg paagi. Ni kini wala na magpalakip nila aron inyo silang dapiton pag-usab. Ang kalainan tali sa kaswal nga sosyal nga pakigkontak ug maloloy-on, maisogong pagkadisipulo mao ang—pagdapit!

(Dieter F. Uchtdorf, “Ang Inyong Mahinungdanong Pagpanimpalad,” Liahona, Nob. 2019, 88)

Si Elder Neil L. Andersen sa Korum sa Napulog Duha ka Apostoles miingon:

Bisan anaa ang dakong tinguha sa pagpaambit sa ebanghelyo, tingali mas minus ang inyong kalipay sa mga kalamposang milabay. Tingali mobati ka sama sa higala nga miingon, “nakig-istorya na ko sa akong pamilya ug mga higala bahin sa Simbahan, apan diyutay ra ang nagpakita’g interes ug sa matag balibad, magpanuko na hinoon ko. Nasayod kong angay pa kong mohimo og daghan, apan wa na ko molihok ug mibati nga sad-an kaayo ko.” …

Mosugyot ko, ayaw pagbati nga sad-an ka tungod kay nagkulang ka sa imong pagpaambit sa ebanghelyo. Hinoon, pag-ampo, sama sa gitudlo ni Alma, sa mga oportunidad, “aron makabarog ka [nga usa ka] saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit … nga [ang uban] matubos sa Dios, ug malakip uban niadto nga diha sa unang pagkabanhaw, [ug] makabaton og kinabuhi nga dayon.” [Mosiah 18:9]. Mas makadasig kini kay sa mobati nga sad-an.

(Neil L. Andersen, “Usa ka Saksi sa Dios,” Liahona, Nob. 2016, 36–37)

Unsaon nako pagpangita og mga tawo nga katudloan?

Si Presidente Dallin H. Oaks sa Unang Kapangulohan mitudlo:

Kita kinahanglan gayod nga mag-ampo alang sa panabang ug mga direksiyon sa Ginoo aron kita mahimong mga instrumento diha sa Iyang mga kamot alang sa usa ka tawo kinsa andam na karon—usa ka tawo nga gusto Niya nga atong tabangan karon. Niana, kinahanglan gayod nga kita magmabinantayon sa pagpaminaw ug sa pagtagad sa mga pag-aghat sa Iyang Espiritu kon unsaon nato sa pagpadayon.

Kadto nga mga pag-aghat moabot. Nahibalo kita gikan sa dili maihap nga personal nga mga pagpamatuod nga sa Iyang kaugalingon nga paagi ug sa Iyang kaugalingon nga panahon ang Ginoo nag-andam og mga tawo nga modawat sa Iyang ebanghelyo. Ang maong mga tawo nagsiksik, ug kon kita maningkamot sa pag-ila kanila ang Ginoo motubag sa ilang mga pag-ampo pinaagi sa pagtubag sa atoa. Siya moaghat ug mogiya niadtong kinsa nagtinguha ug kinsa sa sinsero nga paagi naninguha og paggiya kon unsaon, asa, kanus-a, ug kang kinsa makigbahin sa Iyang ebanghelyo.

(Dallin H. Oaks, “Sharing the Gospel,” Ensign, Nob. 2001, 8)