Rebyo 14 sa Doktrinal nga Kahanas

Sabta ug Ipasabot

Ang usa sa mga katuyoan sa doktrinal nga kahanas mao ang pagtabang kaninyo nga masabtan ang mga pagtulon-an sa Manluluwas nga anaa sa mga tudling sa doktrinal nga kahanas ug mapasabot kini sa inyong kaugalingong mga pulong. Kini nga leksiyon makahatag kaninyo og oportunidad aron mapalawoman ang inyong pagsabot ug makapasabot sa mga kamatuoran mahitungod sa usa o dugang pa nga mga tudling sa doktrinal nga kahanas gikan sa Bag-ong Tugon.  

Rebyo

Sa mosunod nga kalihokan, ipares ang matag senaryo diha sa tudling sa doktrinal nga kahanas nga pamati ninyo nga mas labing makatudlo sa tawo o mga tawo sa maong senaryo.

Ang mga tubag anaa sa kataposan sa leksiyon.

1. 1 Mga Taga-Corinto 6:19–20

2. 1 Mga Taga-Corinto 11:11

3. 1 Mga Taga-Corinto 15:20–22

4. 1 Mga Taga-Corinto 15:40–42

1. Pipila ka sakop sa inyong pamilya ang mibati nga nahugno tungod ang usa ka minahal bag-ohay lang nga namatay ug dili na sila makakita nila og balik.

2. Ang ubang mga tawo nagtuo nga ang ilang lawas ila ug nga mamahimo nilang buhaton ang bisan unsay ilang gusto niini. Sila wala makaamgo nga ang Manluluwas mibayad sa bili sa pagtubos kanato, nga literal nga nagkahulogan nga “gipalit kita og balik.” Tungod niini nga hinungdan, kita wala nakapanag-iya sa atong kaugalingon apan nakautang kita sa Manluluwas.

3. Daghang mga tawo ang nagtuo sa langit ug impyerno apan sayop ang pagsabot sa mga kamatuoran mahitungod sa kinabuhi human sa kamatayon ug sa nabanhaw nga mga lawas.

4. Usa ka higala nangutana kaninyo nganong inyong ipalabi ang usa ka lig-on nga kaminyoon ug mga relasyon sa pamilya labaw sa propesyonal nga kalamposan ug kwarta.

Sabta ug ipasabot

Si Presidente RussellM. Nelson nagtudlo kon sa unsang paagi ang mga kasulatan makakonektar kanato ngadto kang Jesukristo. Mahimong tan-awon ninyo ang bidyo nga “President Nelson—The Scriptures Teach Us about Jesus Christ (for Youth) [Presidente Nelson—Ang mga Kasulatan Nagtudlo Kanato mahitungod kang Jesukristo (alang sa Kabatan-onan)]” (0:59), anaa sa ChurchofJesusChrist.org, o basaha ang mosunod nga pamahayag.

President Nelson – The Scriptures Teach Us About Jesus Christ (for Youth)

As we feast on the words of Christ daily, the words of Christ will tell us how to respond to difficulties we never thought we would face.

[Ang mga kasulatan] nagtudlo nato bahin ni Jesukristo ug sa Iyang ebanghelyo, sa gidak-on sa Iyang Pag-ula, ug [sa] mahinungdanong plano sa [atong] Amahan sa kalipay ug katubsanan. [Ang] inadlaw nga pagbasa sa pulong sa Dios importante alang sa espirituhanong kaluwasan, ilabi na niining panahon sa nagkagrabe nga kaguliyang. Samtang kita magbusog sa mga pulong ni Kristo matag adlaw, ang mga pulong ni Kristo mosulti nato unsaon sa pagtubag sa mga kalisod nga wala nato mahunahunai nga atong atubangon.

(Russell M. Nelson, “Paminaw Kaniya,” Liahona, Mayo 2020, 89)

Handurawa nga, aron sugdan ang usa ka kalihokan sa mga kabatan-onan, kamo gihangyo sa pagpakigbahin og usa ka kasulatan nga nakatabang kaninyo sa pagkat-on o pagbati mahitungod kang Jesukristo. Pagpili og usa sa mga tudling sa doktrinal nga kahanas gikan niini nga leksiyon o lain pa gikan sa Bag-ong Tugon. Dapita ang Espiritu Santo aron motabang ninyo sa pag-ila sa mga kamatuoran mahitungod sa Manluluwas nga nagpalawom sa inyong pagsabot Kaniya, sa Iyang ebanghelyo, Iyang Pag-ula, o sa plano sa kaluwasan sa Langitnong Amahan.

1. Tubaga ang mosunod nga mga pangutana diha sa inyong journal sa pagtuon:

• Hain nga tudling sa doktrinal nga kahanas ang inyong gipili?

• Unsa nga kamatuoran o doktrina ang inyong naila gikan niini nga tudling?

• Sa unsang paagi nga ang usa ka kinabuhi sa tawo malahi kon siya wala masayod sa kamatuoran nga inyong naila?

• Sa unsang paagi nga ang pagkasabot niini nga kamatuoran makatabang kaninyo nga mas mahiduol ngadto sa Manluluwas?

Giya sa Tubag sa Rebyo: 1-b, 2-d, 3-a, 4-c