Mga Buhat 10, Bahin 2

Mga Baroganan sa Pagdawat og Pagpadayag

Usa ka batan-ong babaye nga gisabak ang usa ka libro ug naggunit og kandila nga milingi sa madan-ag nga kahayag sa luyo.

Ang usa ka mahigugmaong Langitnong Amahan mipanalangin ni Cornelio ug ni Pedro og pagpadayag aron matabangan sila nga mas makasabot sa Iyang kabubut-on. Sa ilang paglihok sumala sa pagpadayag nga ilang nadawat, gipanalanginan sila og dugang nga kahayag ug kahibalo. Kini nga leksiyon makatabang ninyo nga molambo ang inyong pagsabot kon unsaon sa Langitnong Amahan pagpadayag sa Iyang kabubut-on nganha kaninyo.

Pagpadala og importante nga mensahe

Handurawa nga kamo kinahanglang mohatag og usa ka importanteng mensahe ngadto sa usa ka tawo nga wala ninyo ikauban.

Unsa ang pipila sa mga paagi nga inyong mapaabot ang maong mensahe ngadto kanila?
Unsa ang pipila sa mga paagi nga ang Langitnong Amahan makapadala og importanteng mga mensahe nganha kaninyo?

Ang Langitnong Amahan adunay daghang importanteng mga mensahe nga ipakigbahin sa Iyang mga anak. Ang pipila sa mga mensahe alang sa tanan, samtang ang uban kay gipahaom alang lamang kaninyo. Ang Langitnong Amahan makigsulti sa mga indibidwal pinaagi sa personal nga pagpadayag. Samtang magtuon kamo niini nga leksiyon, pangita og mga paagi nga ang Dios mahimong magpadayag sa Iyang importanteng mga mensahe aron kamo mahimong makaila sa maong pagpadayag sa pag-abot niini.

Ang Langitnong Amahan nagpadayag sa Iyang kabubut-on nila ni Pedro ug Cornelio

Rebyoha ang sugilanon ni Cornelio ug Pedro sa Mga Buhat 10:1-28, 44–48 (tan-awa usab ang leksiyon “Mga Buhat 10, Bahin 1”). Sa inyong pagrebyo, pangita kon giunsa nila pagkasabot sa unsa ang gipadayag sa Langitnong Amahan ngadto kanila.

Unsa ang inyong nakat-onan mahitungod sa pagpadayag gikan niini nga asoy?

Unsa ang inyong makat-onan mahitungod sa Langitnong Amahan gikan sa mga kamatuoran mahitungod sa pagpadayag nga inyong naila?
Unsa nga mga panalangin ug mga kamatuoran ang lagmit napakyas pagkab-ot nila ni Pedro ug Cornelio kon sila wala molihok sa kon unsa ang ilang nadawat?

Pagtulon-an human sa usa ka pagtulon-an

Usa ka kamatuoran mahitungod sa pagpadayag nga gihulagway niining asoy mao nga ang Langitnong Amahan nagpadayag sa Iyang kamatuoran pinaagi sa paghatag og pagtulon-an human sa usa ka pagtulon-an (tan-awa sa 2 Nephi 28:30).

Timan-i nga si Cornelio ni si Pedro wala dayon makadawat sa tanang impormasyon nga gitagana sa Dios alang kanila. Si Cornelio gisultihan sa anghel sa pagpangita kang Pedro, ug “siya maga-ingon kaniya unsa ang iyang angayan nga buhaton” (Mga Buhat 10:5–6). Human si Pedro nakadawat sa iyang panan-awon, siya “nagduha-duha sa iyang kaugalingon unsa ang gipasabot niining panan-awon nga iyang nakita” (Mga Buhat 10:17). Siya wala kaayo makasabot sa kahulogan sa maong panan-awon hangtod iyang nahimamat si Cornelio.

Si Elder David A. Bednar sa Korum sa Napulog Duha ka Apostoles naghulagway kon unsa kini sama alang kanato. Tan-awa ang bidyo nga “Patterns of Light: Spirit of Revelation [Mga Sumbanan sa Kahayag: Ang Espiritu sa Pagpadayag]” (3:04), makita sa ChurchofJesusChrist.org, o basaha ang mosunod nga pamahayag.

Patterns of Light: Spirit of Revelation
Elder David A. Bednar explains the patterns of light by which God communicates with us and how those patterns lead to the spirit of revelation.

Ang hinay-hinay nga pagtubo sa kahayag gikan sa nagsubang nga adlaw sama sa pagdawat og mensahe gikan sa Dios “pagtulon-an human sa usa ka pagtulon-an, lagda human sa usa ka lagda” (2 Nephi 28:30). Labing kasagaran, ang pagpadayag motubo nga hinay-hinay sa pagdagan sa panahon ug ihatag sumala sa atong tinguha, katakos, ug pagpangandam. … Kini nga sumbanan sa pagpadayag nahilig nga mahimong mas sagad kay sa panagsa ra.

(David A. Bednar, “Ang Espiritu sa Pagpadayag,” Liahona, Mayo 2011, 88)

Magsulat diha sa piraso sa papel gamit ang ballpen o lapis.

Paglihok sa pagpadayag

Tungod kay si Cornelio ug Pedro milihok sumala sa mga pagpadayag nga ilang unang nadawat, sila gipanalanginan og usa ka mas buhong nga pagsabot. Kini naghulagway og lain pang kamatuoran nga anaa makita sa Mga Buhat 10: Ang Langitnong Amahan magapanalangin kanato og dugang nga pagpadayag diha sa atong pagsunod sa pagpadayag nga atong nadawat.

Si Elder Ronald A. Rasband sa Korum sa Napulog Duha ka Apostoles mipasabot sa kamahinungdanon sa paglihok sumala sa pagpadayag gikan sa Langitnong Amahan. Tan-awa ang bidyo nga “Tugoti ang Balaang Espiritu nga mao ang Mogiya,” nga makita sa ChurchofJesusChrist.org/study/general-conference/2017/04/let-the-holy-spirit-guide?lang=ceb, gikan sa time code 14:41 hangtod 15:19, o basaha ang mosunod nga pamahayag.

Tuguti ang Balaang Espiritu nga mao ang Mogiya
Si Elder Rasband nagtudlo nga ang Espiritu Santo nagdasig, nagpamatuod, nagtudlo, ug nag-aghat kanato.

Kon hatagan nato og pagtagad ang mga pag-aghat nga moabot kanato, molambo kita diha sa diwa sa pagpadayag ug makadawat ug mas daghan pa nga panabot ug direksiyon nga dinasig sa Espiritu. Ang Ginoo nagsulti, “Itugyan ang imong pagsalig diha niana nga Espiritu nga nagtultol sa pagbuhat og maayo” [Doktrina ug mga Pakigsaad 11:12].

Hinaot nga seryoso natong dawaton ang panawagan sa Ginoo nga “paglipay, kay Ako mogiya kaninyo” [Doktrina ug Mga Pakigsaad 78:18]. Siya mogiya kanato pinaagi sa Espiritu Santo. Hinaot nga magpakabuhi kita nga duol sa Espiritu, molihok dayon sa atong una nga mga pag-aghat, nasayod nga kini nagagikan sa Dios.

(Ronald A. Rasband, “Tugoti ang Balaang Espiritu nga mao ang Mogiya,” Liahona, Mayo 2017, 96)

Unsaon ninyo pag-andam ang inyong kaugalingon sa pagdawat og pagpadayag?

Pagpadayag alang sa inyong kinabuhi

Opsiyonal: Gustong Makakat-on pa og Dugang?

Unsaon nako pag-ila sa pagpadayag pinaagi sa Espiritu Santo?

Ikonsiderar ang pagtan-aw sa bidyo nga “Feeling the Holy Ghost [Pagbati sa Espiritu Santo]” (3:17), makita sa ChurchofJesusChrist.org, aron madungog ang mahitungod sa lainlaing paagi ang mga tawo mobati ug moila sa Espiritu Santo.

Feeling the Holy Ghost
Feelings of the Holy Spirit can be likened to hope, joy and peace in your heart and mind.

Unsa ang angay nakong buhaton kon akong gibati nga morag wala ko makadawat og pagpadayag gikan sa Langitnong Amahan, bisan kon nangita ako niini?

Si Elder David A. Bednar sa Korum sa Napulog Duha ka Apostoles mipasabot:

The Spirit of Revelation
The spirit of revelation is real—and can and does function in our individual lives and in the Church.

Diha sa daghan nga walay mga kasegurohan ug sa mga hagit nga atong masugatan sa atong kinabuhi, gikinahanglan sa Dios kanato ang pagbuhat sa atong labing maayo, sa pagbuhat ug dili pagaaghaton (tan-awa sa 2 Nephi 2:26), ug sa pagsalig diha Kaniya. Tingali kita dili makakita og mga anghel, makadungog og langitnong mga tingog, o makadawat og hilabihan ka espirituhanong mga hunahuna. Sa kanunay kita mahimong mopadayon [nga] nanghinaot ug nag-ampo—apan walay hingpit nga kasegurohan—nga kita naglihok subay sa kabubut-on sa Dios. Apan samtang kita nagtahod sa atong mga pakigsaad ug nagsunod sa mga sugo, samtang kita kanunay gayod nga naningkamot sa pagbuhat og maayo ug mahimo nga mas maayo, makalakaw kita uban ang pagsalig nga ang Dios mogiya sa atong mga lakang.

(David A. Bednar, “Ang Espiritu sa Pagpadayag,” Liahona, Mayo 2011, 90)

Unsa nga mga batasan o mga lihok ang makapugong kanako sa pagkadawat og pagpadayag?

Si Elder David A. Bednar sa Korum sa Napulog Duha ka Apostoles mipahayag:

Diha sa mga kasulatan, ang impluwensiya sa Espiritu Santo sa kasagaran gihulagway isip ‘usa ka hinay nga hinagawhaw nga tingog’ (1 Mga Hari 19:12; 1 Nephi 17:45; tan-awa usab sa 3 Nephi 11:3) ug [usa ka] ‘tingog nga hingpit sa kalumo’ (Helaman 5:30). Tungod kay ang Espiritu mohagawhaw ngari kanato sa hinay ug sa kalumo, kini sayon rang sabton nganong kita kinahanglan nga maglikay sa dili maayo nga media, pornograpiya, ug makadaot, makaadik nga mga butang ug mga kinaiya. Kini nga mga himan sa kaaway makada[o]t ug sa kadugayan moguba sa atong kapasidad sa pag-ila ug sa pagtubag sa malumo nga mga mensahe gikan sa Dios nga gihatod pinaagi sa gahom sa Iyang Espiritu.

(David A. Bednar, “Ang Espiritu sa Pagpadayag,” Liahona, Mayo 2011, 88)

Unsa man ang akong mahimo aron madugangan ang akong abilidad sa pagdawat og pagpadayag?

Si Presidente Dallin H. Oaks sa Unang Kapangulohan mipahayag:

Usa ka importante nga paagi nga makasarang alang sa pagpadayag mao ang pagpadayon sa atong pagserbisyo ug pagbuhat. Sa akong pagtuon sa mga kasulatan akong namatikdan nga kadaghanan sa mga pagpadayag ngadto sa mga anak sa Dios moabot kon sila naglihok, dili kay naglingkod lang diha sa ilang nahimutangan nga nagpaabot sa Ginoo sa pagsulti kanila sa unsay unang buhaton. …

Kita dasigon sa Espiritu kon atong buhaton ang tanan natong mahimo, kon kita nagkugi og maayo kaysa maglingkod lang nga nag-ampo og direksyon para sa unang lakang nga buhaton. Ang pagpadayag moabot kon ang mga anak sa Dios naglihok.

Mao nga atong buhaton ang tanan natong mahimo. Dayon magpaabot kita sa pagpadayag sa Ginoo. Siya adunay iyang kaugalingong panahon.

(Dallin H. Oaks, “Sa Iyang Kaugalingong Panahon, sa Iyang Kaugalingong Paagi,” Liahona, Ago. 2013, 24, 26)

Alang sa daghan pang mga sugyot kon unsaon pagdugang sa inyong abilidad nga makabati sa Espiritu ug makadawat og pagpadayag, ikonsiderar ang pagbasa sa “Feeling the Spirit” (Paul VanDenBerghe, New Era, Okt. 2011, 26–29).