Mga Buhat 11, 15

Ang Manluluwas Nagdumala sa Iyang Simbahan pinaagi sa Pagpadayag

Si Pedro ug Santiago nakigsulti sa apostoles, mga elder ug ubang mga miyembro didto sa Jerusalem mahitungod sa pagpatuli. Ang mga eksena nga wala gilakip sa kataposan nga bersiyon [outtakes]: naglakip og pipila ka tawo nga nagbidyo sa salida, lainlaing mga kuha sa mga grupo sa mga tawo nga naminaw.

Si Jesus miingon sa Iyang Apostoles nga ang ebanghelyo isangyaw sa tanang mga nasod. Ang pagbuhat niini, hinuon, magkinahanglan og lisod nga mga kausaban sa dugay nang gihuptang mga tradisyon sa Judio. Sa Pagkayab ni Jesus ngadto sa langit, kini nga mga kausaban gikinahanglang buhaton pinaagi sa pagpadayag. Ang katuyoan niini nga leksiyon mao ang pagpalawom sa inyong pagsabot kon giunsa sa Manluluwas pagdumala ang Iyang Simbahan pinaagi sa pagpadayag ngadto sa Iyang propeta ug apostoles.

Pangutana sa usa ka higala

Handurawa nga usa ka higala nga lahi ninyo og pagtuo nakahibalo mahitungod sa inyong tinuohan sa mga propeta ug apostoles sa bag-ong panahon. Bisan tuod ang inyong higala nagtuo sa mga propeta ug apostoles sa Bibliya, siya adunay kalisod sa pagdawat sa ideya nga ang Dios naglihok pinaagi kanila karon. Siya mangutana kaninyo, “Sa unsang paagi si Jesus makigsulti sa propeta ug apostoles?”

Unsa kamo kamasaligon sa inyong abilidad sa pagtubag niini nga pangutana?
Unsay inyong isulti ngadto sa inyong higala?

Samtang adunay pipila ka paagi sa pagtubag, ang Mga Buhat 11 ug 15 naghulagway og duha ka paagi nga si Jesukristo nagdumala sa Iyang Simbahan pinaagi sa pagpadayag.

Pagpadayag ngadto sa propeta

Human sa panan-awon ni Pedro ug kasinatian kauban ni Cornelio (tan-awa sa Mga Buhat 10), siya milawig ngadto sa Jerusalem ug nagtudlo niining bag-ong pinadayag nga mga kamatuoran ngadto sa uban pang mga lider sa Simbahan.

Pagkaabot sa Jerusalem, si Pedro misugilon sa iyang panan-awon ug kasinatian kauban ni Cornelio (tan-awa sa Mga Buhat 11:1–18).

Basaha ang Mga Buhat 11:4–18, mangita alang sa unsang paagi ninyo nakita ang Dios nga naggiya sa Simbahan.

Unsa ang inyong nakat-onan gikan niini nga asoy mahitungod sa unsang paagi ang Ginoo nagdumala sa Iyang Simbahan?

Gikan sa kasinatian ni Pedro atong makat-onan nga si Jesuskristo nagdumala sa Iyang Simbahan pinaagi sa pagpadayag ngadto sa Iyang propeta, ang labing dugay sa katungdanan nga Apostol.

Sa unsang paagi nga ang pagkahibalo niini nga kamatuoran makatabang sa paglig-on sa inyong pagpamatuod kang Jesukristo ug sa Iyang propeta?
Nganong nagtuo man kamo nga ang Simbahan karon gigiyahan pinaagi sa pagpadayag ngadto sa propeta sa Ginoo?

Pagpadayag pinaagi sa mga konseho

Lain pa nga ehemplo kon giunsa sa Manluluwas paghatag og pagpadayag ngadto sa Iyang mga propeta ug apostoles gihulagway diha sa Mga Buhat 15.

Ang mga misyonaryo nga sila si Pablo ug Bernabe nagtudlo ug nagbunyag og daghang mga Hentil. Pipila ka mga Judio nga Kristiyano miadto sa Antioquia ug nagtudlo nga ang mga nakabig nga lalaking Hentil gikinahanglang mosunod sa balaod ni Moises pinaagi sa pagpatuli agig dugang sa pagpuyo sa ebanghelyo nga gitudlo ni Jesukristo ug sa Iyang Apostoles (tan-awa sa Mga Buhat 15:1, 5; tan-awa usab sa Giya ngadto sa mga Kasulatan, “Pagtuli,” scriptures.ChurchofJesusChrist.org).

Basaha ang Mga Buhat 15:2 aron makita kon giunsa ni Pablo ug Bernabe pagpangita og kasulbaran sa maong isyu.

Nganong sa inyong hunahuna nga si Pablo ug Bernabe nangita man og giya gikan sa mga lider sa Simbahan didto sa Jerusalem?

Usa ka kamatuoran nga gihulagway diha sa Mga Buhat 15 mao nga pinaagi sa magkauban mga pagtinambagay ug pagtinguha og pagpadayag gikan sa Dios, ang mga lider sa Simbahan nakadawat og inspirasyon mahitungod sa lisod nga mga problema. Sa dihang si Pedro ug uban pang mga lider sa Simbahan nagtinambagay, sila nakadawat og giya gikan sa Dios. Nagpadala sila og mga sulat nga nagpahibalo sa mga miyembro sa Simbahan sa ilang dinasig nga desisyon nga dili kinahanglang ipatuli ang mga nakabig nga Hentil, ug ilang gilakip ang imbitasyon sa pagsunod sa lain pang mga sugo.

Ang usa ka konseho mao ang usa ka grupo sa mga tawo nga magtigom aron sa paghisgot og mga butang nga importante ug unsaon sa pagtubag niini. Aron mas makasabot mahitungod sa pamaagi sa konseho sa Simbahan, basaha ang mosunod gikan sa Kinatibuk-an nga Tamdanan nga Basahon:

Ang lider [sa usa ka konseho] moawhag sa mga sakop nga mosulti sa dayag ug sa matinuorong paagi. Ang nagkalain-lain nga mga kaagi, mga edad, mga kasinatian, ug mga panglantaw sa mga sakop sa konseho makasangkap sa konseho. Ang mga sakop mosugyot ug maminaw sa usag usa sa matinahoron nga paagi. Samtang sila magtinguha nga makahibalo sa kabubut-on sa Ginoo, ang espiritu sa inspirasyon ug panaghiusa mopatigbabaw.

(Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 4.4.3, ChurchofJesusChrist.org)

Unsaon ninyo sa pag-summarize kon unsa ang usa ka konseho sa Simbahan?

Ang Konseho sa Jerusalem

Basaha ang Mga Buhat 15:6–15, 22–28, mangita og ebidensiya sa lainlaing mga bahin sa usa ka konseho. Kopyaha ang mosunod nga tsart diha sa inyong journal sa pagtuon. Sa tuo nga kolum, pagsulat og mga pulong o mga hugpong sa mga pulong gikan sa mga bersikulo nga nag-uyon sa mga hugpong sa mga pulong diha sa wala nga kolum.

Naglihok ubos sa mga yawe sa pagkapari
Nagtutok sa kaayohan sa mga indibidwal ug sa mga pamilya
Nagtugot og pagpahayag gikan sa mga miyembro sa konseho
Mogiya ngadto sa kahiusahan

Ang mga lider sa bag-ong panahon mogamit usab og mga konseho sa pagdapit sa giya sa Dios sa mga butang nga may kalabotan sa Simbahan. Si Presidente Russell M. Nelson mipakigbahin sa mosunod:

Pagpadayag alang sa Simbahan, Pagpadayag alang sa Atong mga Kinabuhi
Si Presidente Nelson mipamatuod nga ang Ginoo naggiya sa Iyang Simbahan pinaagi sa pagpadayag ug nga ang personal nga pagpadayag maanaa alang sa tanan.

Sa dihang nagtigom kami isip Konseho sa Unang Kapangulohan ug Korum sa Napulog Duha, ang among mga lawak mitinganan nahimong mga lawak sa pagpadayag. Ang Espiritu tataw kaayo nga anaa. Samtang kami nakigbisog sa mga komplikado nga mga hilisgotan, usa ka kulba-hinam nga proseso ang nahitabo samtang ang matag Apostoles gawasnon nga mipadayag sa iyang mga hunahuna ug panglantaw. Bisan pa man kon managlahi kami sa among unang mga panglantaw, ang gugma nga among gibati sa usag usa anaa kanunay. Ang among panaghiusa nakatabang kanamo sa pag-ila sa kabubut-on sa Ginoo alang sa Iyang Simbahan.

Sa among mga miting, ang kadaghanan [mayoriya] dili gayod maoy matuman! Mainampoon kaming naminaw sa usag usa ug nakigsulti sa usag usa hangtod nagkahiusa kami. Dayon dihang nakab-ot na namo ang hingpit nga panag-uyon, ang makapahiusa nga impluwensiya sa Espiritu Santo makapadasig! Among nasinati kon unsay nahibaloan ni Propeta Joseph Smith sa dihang siya mitudlo, “Pinaagi sa panaghiusa sa pagbati kita makaangkon og gahom sa Dios.” [Mga Pagtulon-an sa mga Presidente sa Simbahan: Joseph Smith (2007), 477]. Walay gayoy sakop sa Unang Kapangulohan o sa Korum sa Napulog Duha nga motugyan sa mga desisyon alang sa Simbahan sa Ginoo [ngadto] sa iyang kaugalingon nga labing maayong paghukom lamang!

(Russell M. Nelson, “Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 95)

Magsulat diha sa piraso sa papel gamit ang ballpen o lapis.

Opsiyonal: Gustong Makakat-on pa og Dugang?

Pagpadayag ngadto sa mga lider sa Simbahan

Sa iyang pakigpulong nga “Ang Doktrina ni Kristo,” si Elder D.Todd Christofferson sa Korum sa Napulog Duha ka Apostoles migamit sa mga asoy nga natala diha sa Mga Buhat 11 ug 15 sa pagtudlo mahitungod sa pagpadayag ngadto sa mga lider sa Simbahan. Ikonsiderar ang pagtuon sa tibuok nga pakigpulong o tan-awa ang mosunod nga bidyo gikan sa time code 6:10 hangtod 11:34.

Ang Doktrina ni Kristo
Sa Simbahan karon, sama sa karaan, ang pag-establisar sa doktrina ni Kristo o pagkorihir sa doktrinal nga sayop nagkinahanglan sa balaang pagpadayag.

Unsa ang pipila ka ehemplo sa nagpadayon nga pagpadayag?

Si Elder Quentin L. Cook sa Korum sa Napulog Duha ka Apostoles nagtudlo mahitungod sa pagpadayag nga nadawat alang sa Simbahan. Tan-awa ang “Ang Panalangin sa Nagpadayon nga Pagpadayag ngadto sa mga Propeta ug sa Personal nga Pagpadayag aron sa Paggiya sa Atong Kinabuhi” gikan sa time code 4:55 hangtod 6:42, anaa sa ChurchofJesusChrist.org.

Ang Panalangin sa Nagpadayon nga Pagpadayag ngadto sa mga Propeta ug sa Personal nga Pagpadayag aron sa Paggiya sa Atong Kinabuhi
Si Elder Cook nagtudlo nga ang mga propeta padayon nga nagdawat og pagpadayag nga mogiya sa Simbahan ug nga kita makadawat og pagpadayag nga mogiya sa atong mga kinabuhi.

Si Elder Cook nagtudlo usab nga ang propeta ug apostoles nakadawat og inspirasyon gikan sa Espiritu ug direkta nga pagpadayag gikan sa Manluluwas. Tan-awa sa “Pagpangandam sa Pagsugat sa Dios” gikan sa time code 13:37 hangtod 14:15.

Pagpangandam sa Pagsugat sa Dios
Si Elder Cook nagtudlo nga kita mangandam sa pagsugat sa Dios pinaagi sa pagtuman sa balaang gihatag nga mga respnsibilidad sa misyonaryo nga buhat, buhat sa templo, ug paglig-on sa mga miyembro sa Simbahan.

Sa unsang paagi ang mga konseho maglihok diha sa usa ka pamilya?

Si Presidente M.Russell Ballard sa Korum sa Napulog Duha ka Apostoles nagtudlo mahitungod sa mga konseho sa pamilya sa iyang pakigpulong nga “Mga [Konseho sa Pamilya]” (Liahona, Mayo 2016, 63–65).