Pagrebyo sa Doktrinal nga Kahanas 5

Imemorya ang mga Pakisayran sa Doktrinal nga Kahanas ug Mahinungdanong mga Hugpong sa mga Pulong sa Kasulatan

Imahe

Young single adult reading her scriptures deep in thought

Ang paghinumdom sa mga tudling sa kasulatan ug kon unsa ang gitudlo niini makapanalangin kanimo sa daghang mga paagi. Makatabang kanimo kini nga leksiyon sa pagmemorya sa mga pakisayran sa kasulatan ug sa mahinungdanong mga hugpong sa mga pulong sa doktrina para sa mga tudling sa doktrinal nga kahanas.

Paglaom diha kang Jesukristo

Ang paglaom mao “ang masaligon nga pagpaabot ug paghandom alang sa gisaad nga mga panalangin sa pagkamatar[o]ng,” lakip ang “kinabuhi nga dayon pinaagi sa pagtuo diha kang Jesukristo” (Giya ngadto sa mga Kasulatan, “Paglaum,” scriptures.ChurchofJesusChrist.org).

Sa imong journal sa pagtuon, isulat kon nganong lagmit nga gusto nimo o kinahanglan nimong mobati og dugang nga paglaom.

Si Apostoles Pablo mitudlo, “makabaton kitag paglaom pinaagi sa pailob ug sa kadasig nga gihatag kanato sa kasulatan” (Mga Taga-Roma 15:4).

Unsa nga mga pagtulon-an o mga kamatuoran mahitungod ni Jesukristo nga nakahatag kanimo og paglaom ang nakat-onan nimo gikan sa mga tudling sa doktrinal nga kahanas? Sa unsa nga paagi kini nakahatag kanimo og paglaom?
Sa unsang paagi kaha nga ang pagmemorya sa mga pakisayran sa kasulatan sa doktrinal nga kahanas ug sa mahinungdanong kamatuoran niini makatabang kanimo sa pagdawat og dugang pang paglaom gikan sa Manluluwas?

Niini nga leksiyon makabaton ka og oportunidad aron imemorya ang mga pakisayran sa kasulatan ug mahinungdanong mga hugpong sa mga pulong nga anaa sa tsart sa ubos. Samtang gibuhat nimo kini, tukia kon unsa sa mosunod nga mga kasulatan ug mahinungdanong mga hugpong sa mga pulong sa kasulatan ang nakahatag kanimo og pinakadakong paglaom ug ngano.Ikonsiderar ang pagmarka niini nga mga tudling kauban ang mahinungdanong mga hugpong sa mga pulong niini kon wala pa nimo kini mabuhat.

Pakisayran sa Kasulatan	Mahinungdanong Hugpong sa mga Pulong sa Kasulatan
Lucas 2:10–12	“Kay karong gabhiona, natawo sa lungsod ni David ang inyong Manluluwas, ang Kristo nga Ginoo.”
Juan 3:5	“Walay makasulod sa gingharian sa Dios gawas kon matawo siya pinaagi sa tubig ug sa Espiritu.”
Juan 3:16	“Kay gihigugma pag-ayo sa Dios ang kalibotan ug tungod niini gihatag niya ang iyang bugtong Anak.”
Mateo 5:14–16	“Ipadan-ag ang inyong kahayag atubangan sa mga tawo.”
Mateo 11:28–30	“Duol kamo kanako, kamong tanan nga gikapuyan ug gibug-atan sa inyong gipas-an ug papahulayon ko kamo.”
Mateo 16:15–19	Si Jesus miingon, “Ihatag ko kanimo ang mga yawi sa gingharian sa langit.”
Juan 7:17	“Ang buot magbuhat sa gisugo sa Dios mahibalo [sa] akong gitudlo.”
Mateo 22:36–39	“Higugmaa ang Ginoo nga imong Dios. … Higugmaa ang imong isigkatawo.”
Lucas 22:19–20	Si Jesukristo nagsugo, moambit sa sakramento “aron paghandom kanako.”
Juan 17:3	“Ug kini mao ang kinabuhing dayon: nga ang mga tawo moila kanimo nga mao ang bugtong matuod nga Dios ug kang Jesukristo.”
Lucas 24:36–39	“Kay ang espiritu walay unod ug mga bukog, sama sa nakita ninyo nga ania kanako.”

Sagola ug itukma

Pagkuha og usa ka papel ug guntinga kini sa upat ka parehong strip. Pagpili og dili mominos sa upat ka tudling sa kasulatan gikan sa tsart. Pagsulat og usa ka pakisayran sa kasulatan ug ang kauban nga mahinungdanong hugpong sa mga pulong niini sa kada strip sa papel.

Sunod, guntinga ang mahinungdanong mga hugpong sa mga pulong gikan sa mga pakisayran niini sama sa mosunod nga pananglitan (ang “/” nagpasabot kon asa maggunting).

Juan 7:17 / “Ang buot magbuhat sa gisugo sa Dios mahibalo [sa] akong gitudlo.”

Pagkahuman sa pagbuhat niini sa dili mominos sa upat ka pakisayran sa kasulatan ug mahinungdanong mga hugpong sa mga pulong, ibutang ang mga strip sa papel sa usa ka pundok, ug sagola kini.

Karon sulayi sa pagtukma ang kada pakisayran sa saktong mahinungdanong hugpong sa mga pulong niini nga dili mogamit og bisan unsang tabang. Ikonsiderar ang pagbuhat niini sa duha o tulo ka higayon. Mahimo nimong orasan ang imong kaugalingon aron mahibaloan kon sa unsang paagi nimo mapalambo ang imong kapaspas sa kada higayon nga buhaton nimo kini.

Karon dugangi ang kalisod niini nga kalihokan pinaagi sa paggunting sa mga hugpong sa mga pulong sama sa gibuhat sa mosunod nga mga pananglitan (ang “/” nagpasabot kon asa maggunting).

Mateo 22:36–39 / ”Higugmaa / ang Ginoo nga imong Dios. … / Higugmaa ang imong isigkatawo.”

Mateo / 22: / 36 / –39 / ”Higugmaa / ang / Ginoo / nga / imong/ Dios. … / Higugmaa / ang / imong / isigkatawo.”

Sagola ang mga pulong ug mga numero, ug unya sulayi kini sa paghan-ay sa saktong paagi. Mahimo nimong pilion nga sagolon ang tanang mga pulong ug mga numero gikan sa tanang mga pakisayran sa usa ka higayon o buhaton lamang ang usa ka pakisayran sa usa ka higayon. Ikonsiderar ang pagbuhat niini sa duha o tulo ka higayon. Mahimo nimong orasan ang imong kaugalingon aron mahibaloan kon mapalambo ba nimo ang imong kapaspas sa kada higayon nga buhaton nimo kini.

1. Tubagi ang duha sa mosunod nga mga pangutana diha sa imong journal sa pagtuon.

Unsa ang upat ka pakisayran sa doktrinal nga kahanas ug mahinungdanong mga hugpong sa mga pulong sa kasulatan ang imong gimemorya?
Unsa niini nga mga tudling ang pinakamapuslanon kanimo sa pagkakaron sa imong kinabuhi?
Unsa niini nga mga tudling ang nakahatag kanimo og pinakadakong paglaom diha kang Jesukristo? Ngano man?