Mateo 15:1–9

Imo bang “gisupak ang sugo sa Dios pinaagi sa imong tradisyon”?

Sa dihang nangutana ang mga escriba ug mga Pariseo kon nganong wala mosunod ang mga disipulo ni Jesus sa ilang mga tradisyon, mitubag ang Manluluwas pinaagi sa pagbadlong niadtong migamit og tradisyon agi og pangatarongan aron mosupak sa mga sugo sa Dios. Matabangan ka niini nga leksiyon sa pagtuki kon unsa sa imong mga tradisyon ang nakatabang kanimo nga mahimong mas mahisama kang Jesukristo ug unsa ang lagmit nga nakapahimulag kanimo gikan Kaniya.

Mga Tradisyon

Basaha ang mga mosunod nga sitwasyon.

• Ang pamilya sa usa ka batan-ong babaye adunay tradisyon nga seryosohon gayod ang edukasyon. Siya gilaoman gayod sa pagbuhat sa mga buluhaton ug mga pasulit.

• Sulod sa pipila ka henerasyon, gihimong prayoridad sa pamilya sa usa ka batan-ong lalaki nga mag-ampo kada buntag ug kada gabii.

• Adunay umaabot nga dakong sosyal nga kalihokan diin daghang mga babaye ang magsul-ob og dili ligdong nga bisti. Kinahanglang magdesisyon ang usa ka batan-ong babaye kon unsa ang iyang isul-ob para sa okasyon.

• Sulod sa pipila ka tuig, daghan sa kabatan-onan sa usa ka partikular nga ward ang dili sinserong misalmot sa ilang mga klase sa Sunday School. Lakip niini ang pagka-late, dili maminaw, ug pag-text o pagdula sa ilang mga cellphone sa panahon sa klase.

• Tradisyon sa usa ka eskuwelahan nga daog-daogon sa mga mas tiguwang nga estudyante ang mga mas batang estudyante.

Tubaga ang mosunod nga mga pangutana, nga may kalabotan sa miaging mga sitwasyon.

• Ngano kaha nga importante man ang atong mga tradisyon?

• Sa unsang paagi kaha makaapekto ang atong mga tradisyon sa atong abilidad nga mahimong sama kang Jesukristo?

• Ngano kaha nga lisod man para sa usa ka tawo nga susihon ang ilang mga tradisyon o usbon ang ilang dili angay nga mga tradisyon?

Samtang gitun-an nimo kini nga leksiyon, makat-onan nimo ang pipila sa mga pagtulon-an ni Jesukristo mahitungod sa mga tradisyon. Ang mga tradisyon mao ang “mga tinuohan ug mga nabatasan nga sinunod gikan sa usa ka kaliwatan ngadto sa lain” (Giya ngadto sa mga Kasulatan, “Tradisyon, Mga,” ChurchofJesusChrist.org). Sa imong journal sa pagtuon, paglista og pipila ka tradisyon nga nahimong bahin sa imong kinabuhi.

Ang mga pagtulon-an sa Manluluwas mahitungod sa mga tradisyon

Aron masabtan kon unsa ang gitudlo sa Manluluwas, makatabang kon mahibaloan ang konteksto, o background, sa Mateo 15.

Basaha una ang Mateo 15:1–9. Unya basaha ang mosunod nga tabang sa konteksto, ug unya basaha pag-usab ang parehong mga kasulatan, nga matikdan ang kalainan nga nahimo sa pagsabot sa konteksto.

Tabang sa konteksto para sa Mateo 15: Sa panahon sa Manluluwas, gitudlo sa mga lider sa Judeo ang sinulat nga balaod ni Moises ingon man usab ang sinulti nga balaod nga wala gihatag sa Dios pero nahimo kini nga tradisyonsa mga tawo. Naglakip kini sa mga butang sama sa pag-ihap sa mga lakang sa Adlaw nga Igpapahulay ug sobrang paghugas sa mga kamot sa usa ka tawo sa dili pa mokaon, nga nagrepresentar sa espirituhanong kaputli sa usa ka tawo. Gigamit ang mga bahin sa tradisyonal nga balaod para sa mga hinakog nga rason. Pananglitan, ang pagtahod sa imong amahan ug inahan usa ka sugo sa balaod ni Moises (tan-awa sa Exodo 20:12), pero gigamit sa pipila ka indibidwal ang sinulti nga balaod aron mangatarongan sa pagsupak niini nga sugo pinaagi sa pag-ingon nga ang ilang kuwarta o mga kapanguhaan gihalad isip “gasa” ngadto sa Dios (Mateo 15:5) ug busa dili kini mahimong gamiton aron sa pagtabang sa pag-atiman sa ilang mga tiguwang nga ginikanan. Kini nga mga kabag-ohan dili kabahin sa orihinal nga tinguha sa balaod ug mga sugo ug dili kini makapahimuot sa Dios.

Basaha ang Mateo 15:1–9, ug pangitaa kon unsay gitudlo sa Manluluwas mahitungod sa mga tradisyon.

• Unsa kaha ang gitudlo sa Manluluwas niini nga mga bersikulo? Tukia ang usa o duha sa mga kamatuoran nga imong nakita.

Opsiyonal: Gustong Makahibalo pa og Dugang?

Unsa ang pipila ka kalibotanong tradisyon ang lagmit nga kinahanglan nakong tangtangon sa akong kinabuhi?

Sa iyang pamahayag nga “Paghinulsol ug Pag-usab” (Liahona, Nob. 2003, 39), si Presidente Dallin H. Oaks sa Unang Kapangulohan naghatag og daghang mga pananglitan sa “mga elemento sa … pamatasan nga [lagmit] nga sukwahi sa mga sugo, mga pakigsaad, ug kultura sa ebanghelyo.” Ang atong pamatasan lagmit nga lahi sa mga tradisyon sa kalibotan kon may kalabotan sa mga butang sama sa kaputli ug pornograpiya, pagsimba, pagkamatinuoron, ug ranggo o estado sa katilingban.

Sa pamahayag nga “Ang Kultura ni Kristo” (Liahona, Nob. 2020, 48–50), ni Elder William K. Jackson sa Seventy mikompara sa yutan-ong mga kultura ngadto sa kultura ni Kristo. Ikonsiderar ang pagtan-aw o pagbasa sa tanan o mga bahin sa iyang pamahayag, nga anaa sa ChurchofJesusChrist.org.

Posible ba nga ipabilin ang akong pangkulturang mga tradisyon ug mosunod gihapon sa Manluluwas?

Ang mosunod nga video naghatag og usa ka pananglitan sa kon unsaon pagpabilin sa pangkulturang mga tradisyon ug mosunod gihapon sa Manluluwas.