Marcos 9:14–29

“Nagatuo Ako; Tabangi ang Pagtuo Ko nga Nakulangan”

Miadto si Jesukristo sa usa ka grupo sa mga tawo nga nagkuwestiyon sa Iyang mga disipulo tungod kay ang mga disipulo dili makapapahawa og daotan nga espiritu sa anak nga lalaki sa usa ka partikular nga tawo. Pagkahuman sa pagtudlo niini nga amahan mahitungod sa hugot nga pagtuo, giayo ni Jesukristo ang anak nga lalaki. Makatabang kini nga leksiyon kanimo sa pagsusi sa imong hugot nga pagtuo sa Ginoo ug pagtinguha og pagpadayag mahitungod sa kon unsaon nimo kini pagpalig-on.

Mga hagit sa hugot nga pagtuo

Hunahunaa nga nakasinati sa mosunod nga mga hagit:

Wala mobati nga giabiabi sa SimbahanDepresyonUsa ka sakop sa pamilya mibiya sa SimbahanAng pagkamatay sa usa ka higala

• Sa unsang paagi kaha makaapekto kini nga mga kasinatian sa pagsalig ug pagtuo sa usa ka tawo diha kang Jesukristo?

• Unsa ang uban pang mga kasinatian ang lagmit nga mosulay sa hugot nga pagtuo sa usa ka tinedyer diha kang Kristo?

• Unsa nga mga kasinatian ang nasinati nimo o sa ubang tawo nga nagpakita kanimo sa importansiya sa pagbaton og lig-on nga hugot nga pagtuo kang Jesukristo atol sa lisod nga mga panahon?

Kompletoha ang mosunod nga pagsusi sa kaugalingon:

Kalihokan sa Tahas: Hugot nga Pagtuo

Pilia ang numero nga pinakamaayong naghulagway kon unsa ka sagad nga angay kanimo ang matag pamahayag. Hinumdomi nga ang espirituhanong pagpalambo usa ka hinay-hinay nga proseso ug walay tawo nga perpekto.

1 = dili gayod; 2 = usahay; 3 = kasagaran; 4 = hapit kanunay; 5 = kanunay

________ 1. Nagtuo ako kang Jesukristo ug gidawat Siya isip akong Manluluwas. (2 Nephi 25:29)________ 2. Ako adunay hugot nga pagtuo nga gikinahanglan nga makatabang nga mapahinabo ang maayong mga butang sa akong kinabuhi o sa mga kinabuhi sa ubang tawo. (Ether12:12)________ 3. Misalig gayod ako sa Manluluwas nga modawat sa Iyang kabubut-on ug mobuhat sa bisan unsay Iyang ipabuhat. (1 Nephi 3:7)

• Pamalandongi ang mga aspeto diin lig-on ka. Unsa nga mga kasinatian ang nakatabang kanimo nga mahimong lig-on niini nga mga aspeto?

• Sa unsa nga mga aspeto nga nanginahanglan ka og pagpalig-on?

“Kaloy-i kami”

Pagkahuman sa Iyang kasinatian kauban si Pedro, James, ug Juan sa Bungtod sa Transpigurasyon, miadto si Jesus sa usa ka tawo nga gustong ipaayo ang iyang anak nga lalaki batok sa dautang espiritu.

Basaha ang Marcos 9:14–22, nga mangita sa lisod nga sitwasyon nga giatubang niini nga amahan ug anak.

• Unsa kaha ang gibati sa amahan sa dihang dili mapaayo sa mga disipulo sa Manluluwas ang iyang anak?

• Kanus-a ka o ang usa ka tawo nga imong nailhan nakabaton og rason aron moingon ngadto sa Ginoo nga, “Kaloy-i kami, ug tabangi kami”?

• Unsa ang imong nahibaloan gikan sa imong mga kasinatian mahitungod sa pagkaandam sa Ginoo nga magpakita og kaluoy?

• Nganong aduna may kaluoy si Jesukristo para sa kada usa kanato?

Basaha ang Marcos 9:23–27 aron makita kon unsa ang sunod nga nahitabo. Ikonsiderar ang pagmarka sa bisan unsang mga pulong, mga hugpong sa mga pulong, o mga kamatuoran nga gibati nimo nga importanting hinumdoman.

• Unsa ang gisulti sa Manluluwas ngadto niini nga amahan sa dihang nangayo siya og tabang?

• Unsa ang dili nimo makalimtan mahitungod sa tubag sa amahan ngadto sa Manluluwas sa bersikulo 24?

• Unsa nga mga kasinatian ang nasinati nimo nga nakatabang kanimo nga moingon, “Nagatuo ako”?

Si Elder Jeffrey R. Holland sa Korum sa Napulog Duha ka Apostoles mihatag og gibug-aton sa importante nga mga kamatuoran nga makat-onan nato gikan niini nga asoy:

Kon mag-atubang og hagit sa pagtuo, ang amahan mopahayag pag-una sa iyang kalig-on ug dayon moila sa iyang limitasyon. Ang iyang inisyal nga pamahayag positibo ug walay pagduhaduha: “Nagatuo ako.” Moingon ko sa tanan nga nangandoy og mas lig-on nga pagtuo, hinumdomi kining tawhana! Sa mga higayon sa kahadlok o pagduhaduha o sa malis[o]d nga mga panahon, gamita ang hugot nga pagtuo nga napalambo na ninyo, bisan og limitado kini. … Panggunit og hugot sa unsay inyo nang nahibal[o]an ug barog nga malig-on hangt[o]d moabot ang dugang nga kahibalo. …

… Kon ang pagduhaduha o kalis[o]d moabot, ayaw kahadlok sa pagpangayo og tabang. … Magpadala ang Dios og tabang gikan sa duha ka habig sa tabil sa paglig-on sa atong pagtuo.

(Jeffrey R. Holland, “Nagatuo Ako,” Liahona, Mayo 2013, 93–94)

• Unsa ang atong makat-onan gikan niini nga asoy sa kasulatan ug mga pagtulon-an ni Elder Holland?

Ang usa ka kamatuoran nga makat-onan nato gikan niini nga asoy mao nga kon pilion nato nga motuo sa Langitnong Amahan ug magtinguha sa Iyang tabang pinaagi sa pag-ampo, motabang Siya kanato nga mapalig-on ang atong hugot nga pagtuo kang Jesukristo.

• Unsa kaha ang buot ipasabot sa “gamita ang hugot nga pagtuo nga napalambo na ninyo” ug “panggunit og hugot sa unsay inyo nang nahibal[o]an”?

Ang usa ka paagi aron “gamiton ang hugot nga pagtuo nga napalambo na ninyo” ug “manggunit og hugot sa unsay inyo nang nahibaluan” mao ang paghinumdom ug pagsalig sa mga miaging kasinatian nga nakapalig-on sa imong hugot nga pagtuo. Si Elder Neil L. Andersen sa Korum sa Napulog Duha ka Apostoles mihulagway niini nga mga kasinatian:

Kauban sa malinawong direksyon nga atong nadawat gikan sa Espiritu Santo, sa matag karon ug unya, ang Dios sa impluwensyal ug sa personal kaayo nga paagi misiguro sa matag usa kanato nga Siya nakaila ug nahigugma kanato ug Siya nanalangin kanato sa piho ug sa dayag nga paagi. …

… Kon ang personal nga kalisdanan, pagduhaduha, o pagkaluya mopangitngit sa atong dalan, … [kining mga] espirituhanong panumd[o]man nga angay hinumd[o]man … nahisama sa sanag nga mga bato nga modan-ag sa unahan, nagsiguro kanato nga ang Dios nakaila kanato, ug nahigugma kanato, ug mipadala sa Iyang Anak, si Jesukristo, sa pagtabang kanato nga makabalik sa panimalay.

(Neil L. Andersen, “Mga Espirituhanong Panumd[o]man nga Angay Hinumd[o]man,” Liahona, Mayo 2020, 19, 21)

1. Kompletoha ang mosunod nga kalihokan, ug tubagi ang mosunod nga pangutana diha sa imong journal sa pagtuon aron ipaambit sa imong magtutudlo.

Sa imong journal sa pagtuon o sa usa ka papel, i-trace ang usa sa imong mga kamot. Sa tunga niini nga pag-trace, isulat ang hugpong sa pulong nga “Nagatuo ako” aron irepresentar ang paggunit sa unsay imo nang nahibaloan. Sa palibot niini nga hugpong sa pulong, ilista sa mubo nga detalye ang mga rason nga ikaw nakahibalo o nagtuo nga “ang Dios nakaila [kanimo], nahigugma [kanimo], ug gipadala ang Iyang Anak, si Jesukristo, aron tabangan [ka] nga makabalik sa panimalay.”

• Sa unsang paagi nga ang paghinumdom sa mga kasinatian nga gihatag na kanimo sa Dios ug mga leksiyon nga gitudlo na Niya kanimo makatabang sa pagpalig-on kanimo sa mga lisod nga mga panahon?

Pamalandongi kon unsa ang imong buhaton, o padayon nga buhaton, aron magdapit og mga kasinatian nga makatabang kanimo nga mahibalo nga nakaila kanimo ug nahigugma kanimo ang Dios.

Opsiyonal: Gustong Makahibalo pa og Dugang?

Marcos 9:29. Unsa ang buot ipasabot sa Manluluwas sa dihang miingon Siya nga, “Kining matanga dili mahimo sa pagpagula pinaagi sa bisan unsa gawas lamang sa pag-ampo [ug pagpuasa]”?

Ang pagpuasa ug pag-ampo makaawhag og mas dakong espirituhanong gahom gikan sa Ginoo. Ang pipila ka hagit, sama sa dihang ang mga Apostoles misulay sa pagpapahawa sa daotan nga espiritu, lagmit nga manginahanglan nianang mas dako nga gahom. Si Presidente Russell M. Nelson mitudlo, “Ang maagh[o]p nga gah[o]m sa pag-ampo mas makapakusgan pa pinaagi sa pagpuasa … kon angay sa usa ka partikular nga panginahanglan” (“Ang Maagh[o]p nga Gah[o] sa Pag-ampo,” Ensign o Liahona, Mayo 2003, 7).

Asa pa ako makakat-on og dugang mahitungod sa hugot nga pagtuo ug pagduhaduha?

Si Elder Jeffrey R. Holland sa Korum sa Napulog Duha ka Apostoles nagtudlo og dugang pang mga kamatuoran mahitungod sa pagpalig-on sa hugot nga pagtuo ug pagdumala sa mga pagduhaduha. Aron makapaminaw sa pipila niini nga dugang pang mga kamatuoran, ikonsiderar ang pagtan-aw sa video nga “Nagatuo Ako” gikan sa code sa oras nga 5:57 hangtod sa 10:28.