Mga Hebreohanon 3–4

Pagsulod ngadto sa Kapahulayan sa Ginoo

Si Jesus gihulagway nga naglingkod duol sa suba. Si Kristo naggunit og sungko sa magbalantay. Adunay mga kahoy nga nagtubo subay sa daplin sa suba.

Ang atong Langitnong Amahan ug si Jesukristo nagtinguha nga mopanalangin kanato sa Ilang labing dako nga mga panalangin. Ang pagkawalay pagtuo ug katig-a sa kasingkasing nagpugong sa kadaghanan sa pagdawat niini nga mga panalangin. Pinaagi sa pagdasig sa mga Santos sa pagwagtang sa mga kinaiya sa pagkawalay pagtuo, si Pablo misulay sa pagtabang kanila nga mobalik ngadto sa mga pakigsaad nga ilang gihimo. Kini nga leksiyon gituyo aron matabangan ka nga mabuntog ang pagkawalay pagtuo aron ikaw makadawat sa mga panalangin nga gisaad sa Manluluwas.

Ang atong pagtuo diha ni Jesukristo

Si Elder Neil L.Andersen sa Korum sa Napulog Duha ka Apostoles naghulagway sa usa ka problema nga giatubang sa kalibotan karon:

Kita Naghisgot kang Kristo
Si Elder Andersen miawhag nato sa pagkat-on pa mahitungod sa Manluluwas ug maghisgot Kaniya diha sa panimalay, sa simbahan, sa social media, ug sa atong kada adlaw nga panag-istoryahanay.

Sa pipila ka bahin sa kalibotan diin ang Iyang ngalan gipahayag sulod sa gatosan ka tuig, ang [hugot nga] pagtuo diha ni Jesukristo nagkawala. Ang maisogong mga Santos sa Europe nakakita nga ang pagtuo nagkahuyang sa ilang mga nasod sa paglabay sa mga dekada. Subo usab, dinhi sa Estados Unidos, ang [hugot nga] pagtuo nagkawala. Usa ka bag-ong pagtuon nagpadayag nga sa miaging 10 ka tuig, 30 ka milyon ka tawo sa Estados Unidos miingon nga sila wala na motuo sa kabalaan ni Jesukristo. Nagtan-aw sa tibuok kalibotan, laing pagtuon ang nanagna nga sa mga dekada nga moabot, labaw sa kaduhaon ang gidaghanon ang mobiya sa Kristiyanismo kay sa modawat niini.

(Neil L. Andersen, “Kita Naghisgot Kang Kristo,” Liahona, Nob. 2020, 91)

Unsa ang pipila ka posible nga mga sangpotanan, karon ug sa umaabot sa mga tawo nga wala nagtuo kang Jesukristo?

Paghunahuna sa imong kaugalingong pagtuo kang Jesukristo.

Unsa kalig-on ang imong gibati sa imong pagtuo kang Jesukristo?
Sa unsa nga paagi nga ang pagpili sa pagtuo Kaniya makapanalangin sa imong kinabuhi?

Ang mga pagtulun-an ni Pablo mahitungod sa mga anak sa Israel

Sa iyang sulat ngadto sa mga Hebreohanon, giila ni Pablo nga tungod sa pagpanglutos, pipila sa mga kinabig ang mikonsiderar sa pagtalikod gikan sa ilang pagtuo kang Jesukristo.

Basaha ang Mga Hebreohanon 3:7–19, nga mangita sa makasaysayanon nga asoy nga gihisgotan ni Pablo aron tabangan ang mga Hebreohanon nga makasabot sa kapeligro sa pagkawalay pagtuo.

Ang “pagsukol … diha sa kamingawan” (Mga Hebreohanon 3:8) nagpasabot sa panahon diin, human nakalingkawas sa Ehipto, ang mga Israelita mihagit sa Ginoo nga masuko ug gilimod ang mga panalangin nga Iyang gipangandoy nga ihatag kanila (tan-awa ang Mga Numero 14; Jacob 1:7–8; Alma 12:33–37).

Unsa nga mga panalangin ang wala makuha sa mga anak sa Israel? Ngano man?

Ang kapahulayan sa Ginoo

Gusto sa Langitnong Amahan ug ni Jesukristo nga makasinati kita sa Ilang kapahulayan. Tun-i ang mosunod nga tudling sa kasulatan ug propetikanhong pamahayag aron makat-on unsa ang kapahulayan sa Ginoo. Tingalig makatabang ang pagpangita sa pulong nga “kapahulayan” diha sa Giya ngadto sa mga Kasulatan, kon anaa.

Basaha ang Doktrina ug mga Pakigsaad 84:24 aron makakat-on mahitungod sa kapahulayan sa Ginoo (tan-awa usab ang Alma 13:6, 12–13, 28–29).

Si Presidente Joseph F. Smith (1838–1918) mitudlo kon sa unsang paagi kita makasulod ngadto sa kapahulayan sa Ginoo samtang ania sa mortalidad:

Ang karaang mga propeta namulong kabahin sa “pagsulod ngadto sa kapahulayan sa Dios” [tan-awa sa Alma 12:34; Doktrina ug mga Pakigsaad 84:23–24]; unsa may buot ipasabot niini? Sa akong hunahuna, nagpasabot kini sa pagsulod ngadto sa kahibalo ug gugma sa Dios, ang pagbaton og hugot nga pagtuo diha sa iyang katuyoan ug sa iyang plano, sa ingon nga matang nga kita nasayod nga kita husto, ug nga kita wala mangita og lain pa, wala kita mahasol sa matag hangin sa tuluhoan, o pinaagi sa lipatlipat sa mga tawo nga batid sa pagmugnag kasaypanan. … Ang tawo kinsa nakaabot niana nga ang-ang sa hugot nga pagtuo diha sa Dios nga ang tanang pagduhaduha ug kahadlok gikuha gikan kaniya, siya nakasulod ngadto sa “kapahulayan sa Dios.”

(Mga Pagtulun-an sa mga Presidente sa Simbahan: Joseph F. Smith [1998], 66-67)

Unsaon nimo sa paghulagway sa kapahulayan sa Ginoo?

Si Alma mipaambit og usa ka mensahe parehas sa kang Pablo ngadto sa mga tawo sa iyang panahon, nga ang uban usab nanglimbasog sa pagtuo. Basaha ang Alma 12:34–37, nga mangita og dugang nga mga panabot.

Unsa nga mga baroganan ang imong maila gikan sa Mga Hebreohanon 3 ug Alma 12:34–37?

Usa ka baroganan nga imong makat-onan mao nga kon magpabilin kitang matinud-anon ngadto sa Manluluwas ug dili magpatig-a sa atong mga kasingkasing, makasulod kita ngadto sa kapahulayan sa Ginoo.

Magsulat diha sa piraso sa papel gamit ang ballpen o lapis.

Mopili nga motuo

Basaha ang Mga Hebreohanon 3:7–8, 12–15; 4:2–3, 6–7, 11. Sa imong pagbasa, pangita og unsa ang atong mabuhat aron makasulod ngadto sa kapahulayan sa Ginoo. Mahimo usab nimong basahon ang Hubad ni Joseph Smith sa Mga Hebreohanon 4:3.

Unsay mipatigbabaw kanimo gikan niini nga mga bersikulo?

Si Presidente Russell M. Nelson mitudlo unsaon nato pagbuntog sa pagkawalay pagtuo:

Si Kristo Nabanhaw: Ang Hugot nga Pagtuo diha Kaniya Makabalhin og mga Bukid
Si Presidente Nelson nagpamatuod bahin sa gahom sa hugot nga pagtuo diha kang Jesukristo sa pagtabang kanato sa pagbuntog sa mga hagit sa kinabuhi. Misugyot siya og lima ka paagi sa pagpalambo og mas hugot nga pagtuo.

Pilia nga motuo kang Jesukristo. Kon kamo adunay pagduhaduha mahitungod sa Dios nga Amahan ug sa Iyang Hinigugmang Anak, o sa kabalido sa Pagpahiuli o sa katinuod sa balaang tawag ni Joseph Smith isip propeta, pilia nga motuo ug pagpabiling matinud-anon. Ipaabot ang inyong mga pangutana ngadto sa Ginoo ug sa ubang katuohan nga mga kapanguhaan. Magtuon dala ang tinguha nga motuo kay sa maglaom nga imong makit-an ang sipyat sa kinabuhi sa propeta o sayop sa mga kasulatan. Hunonga ang pagdugang sa inyong mga pagduhaduha pinaagi sa paghisgot niini ngadto sa ubang mga maduhaduhaon. Tugoti ang Ginoo nga mogiya kaninyo sa inyong panaw sa espirituhanong panimpalad.

(Russell M. Nelson, “Si Kristo Nabanhaw: Ang Hugot nga Pagtuo diha Kaniya Makabalhin og mga Bukid,” Liahona, Mayo 2021, 103)

Opsiyonal: Gustong Makakat-on pa og Dugang?

Sa unsang paagi ako maanaay mas matuohon nga kasingkasing?

Si Presidente Dieter F. Uchtdorf, kanhi sa Unang Kapangulohan, miingon:

Ayaw Kahadlok, Sumalig Ka Lamang
Si Presidente Dieter F. Uchtdorf nagsulti kanato nga magmahimong sama ni Daniel ug magbaton og kaisug nga motuo ug mobatok sa pagka-negatibo og hunahuna ug pagduha-duha sa usa ka sekular nga kalibutan. Pinaagi sa pagbuhat niini, makabaton kita og du

Walay magic sa pagtuo. Apan ang kagustohan nga motuo mao ang unang lakang nga gikinahanglan! Ang Dios wala diay pinalabi sa mga tawo. Siya ang inyong Amahan. Gusto Siya nga makigsulti kaninyo. Hinoon, magkinahanglan kini og gamayng siyentipikanhong kakuryuso—nagkinahanglan kini og usa ka pag-eksperimento sa pulong sa Dios—ug sa pagpakita og “usa ka tipik sa hugot nga pagtuo” [Alma 32:27]. Nagkinahanglan usab kini og gamayng kamapaubsanon. Ug nagkinahanglan kini og bukas nga kasingkasing ug hunahuna. Nagkinahanglan kini og tinguha, sa hingpit nga kahulogan sa pulong. Ug, tingali ang pinakalisod sa tanan, nagkinahanglan kini nga magmapailobon ug maghulat sa Ginoo.

Kon dili kita maningkamot nga motuo, pareho lang ta sa tawo nga mipalong sa dakong suga ug dayon mibasol sa dakong suga kay wala kini mohatag og kahayag.

(Dieter F. Uchtdorf, “Ayaw Kahadlok, Sumalig Ka Lamang,” Liahona, Nob. 2015, 78)

Kinsa man ang makatabang kanato aron makaplagan ang kapahulayan sa Manluluwas?

Si Elder W. Craig Zwick sa Seventy miingon:

Ang Langitnong Amahan nahigugma sa matag usa sa Iyang mga anak ug gusto nga ang tanan kanato mobalik ngadto Kaniya. Siya naghatag og mga propeta ug mga pangulong pari uban ang tinuod nga awtoridad sa pagkapari aron matabangan kita nga magpabilin sa tul-id ug pig-ot nga dalan. Aduna, dayon, kitay paggiya niini nga mga lider aron matabangan kita nga makasulod sa Iyang kapahulayan.

(W. Craig Zwick, “Enter into the Rest of the Lord,” Ensign, Peb. 2012, 24)