Rebyo 22 sa Doktrinal nga Kahanas

Isag-ulo ang mga Pakisayran ug ang Mahinungdanon nga mga Hugpong sa mga Pulong sa Kasulatan

Pamilya sa New Zealand nga naglingkod sa sala nga nagbasa og mga kasulatan.

Nakahunahuna na ba ka nganong importante man kaayo nga sag-ulohon ang mga kasulatan? Ang pagsag-ulo sa mga kasulatan mahimong makatabang kanimo nga makadawat og inspirasyon, mahinumdom sa Manluluwas, ug makatudlo sa ebanghelyo ngadto sa uban. Kini nga leksiyon gituyo nga makatabang nimo sa pagmemorya sa pipila ka pakisayran sa kasulatan ug sa mahinungdanong hugpong sa mga pulong sa kasulatan sa mga tudling sa doktrinal nga kahanas diha sa Bag-ong Tugon.

Nganong sag-ulohon man ang mga kasulatan?

Handurawa nga ikaw misalmot sa usa ka panuhid alang sa Alang sa Kalig-on sa mga Kabatan-onan nga magasin. Unsaon nimo pagtubag kon pangutan-on ka sa mosunod nga pangutana?

Unsa ang nag-unang lima ka mga hinungdan sa pagsag-ulo sa mga kasulatan?

Adunay daghang maayong mga hinungdan sa pagsag-ulo sa mga kasulatan. Ang nasag-ulo nga mga kasulatan mahimong susama sa mga higala kinsa makahatag kanato og inspirasyon, kahupay, ug kadasig sa mga panahon sa panginahanglan (tan-awa ang Richard G. Scott, “Ang Gahom sa Kasulatan,” Liahona, Nob. 2011, 6). Ang pagsag-ulo sa mga kasulatan mahimong makatabang kanato sa “Paghunahuna sa [Manluluwas] sa matag hunahuna” (Doktrina ug mga Pakigsaad 6:36). Ang pagsag-ulo sa mga kasulatan mahimong makatabang kanato sa “pagbaton sa pulong [sa Dios]” aron kita makatudlo sa uban (Doktrina ug mga Pakigsaad 11:21).

Sa unsang paagi nga ang pagsag-ulo sa mga kasulatan makaapekto sa imong relasyon kang Jesukristo?

Sag-uloha ang mga tudling

Paggahin og pipila ka minuto sa pagsag-ulo o paghinumdom sa mga pakisayran sa kasulatan ug mahinungdanong mga hugpong sa mga pulong sa kasulatan sa mosunod nga mga tudling sa doktrinal nga kahanas sa Bag-ong Tugon. Dihang ikaw mobati og kamasaligon nga ikaw nahibalo niining mga pakisayran ug mahinungdanong mga hugpong sa mga pulong, pagpili og usa o daghan sa mosunod nga mga kalihokan aron masusi ang imong memorya.

Doktrinal nga Kahanas sa Bag-ong Tugon: 1 Mga Taga-Corinto–Pinadayag

1 Mga Taga-Corinto 6:19–20	“Ang inyong lawas templo sa Espiritu Santo.”
1 Mga Taga-Corinto 11:11	“Hinoon diha sa Ginoo ang babaye dili gawas sa lalaki ni ang lalaki gawas sa babaye.”
1 Mga Taga-Corinto 15:20–22	“Kay ingon nga nangamatay ang tanang mga tawo tungod sa ilang pagkahiusa kang Adan, banhawon usab ang tanan tungod sa ilang pagkahiusa kang Kristo.”
1 Mga Taga-Corinto 15:40–42	Diha sa Pagkabanhaw, adunay tulo ka ang-ang sa himaya.
Mga Taga-Efeso 1:10	“Usa ka laraw nga pagatumanon inig-abot sa tukma nga panahon, laraw sa paghiusa diha kang Kristo sa tanang mga butang.”
Mga Taga-Efeso 2:19–20	Ang Simbahan “tinukod ibabaw sa patukoranan nga mao ang mga apostoles ug mga propeta, nga niini si Jesukristo mao ang ulohang bato sa pamag-ang.”
2 Mga Taga-Tesalonica 2:1–3	“Ang adlaw ni Kristo … dili pa moabot, hangtod nga mahitabo una ang pagsupil.”
2 Timoteo 3:15–17	“Ang balaan nga kasulatan … makagagahom sa pagtudlo kanimo ngadto sa kaluwasan.”
Mga Hebreohanon 12:9	Ang Langitnong Amahan mao “ang Amahan sa mga espiritu.”
Santiago 1:5–6	“Kon aduna man kaninyoy nakulangan og kaalam, papangayoa siya sa Dios.”
Santiago 2:17–18	“Ang [hugot nga pagtuo] patay kon kini walay binuhatan.”
1 Pedro 4:6	“Ang maayong balita [gi]wali hangtod ngadto sa mga patay.”
Pinadayag 20:12	“Ug ang mga patay gipanaghukman … pinasikad sa ilang mga binuhatan.”

Kompletoha ang bisan usa lang sa mosunod nga mga pagbansay.

Opsiyon 1: Pagdrowing og usa ka hulagway

Paghangyo og usa ka higala o miyembro sa pamilya aron motabang kanimo sa pagbuhat sa mosunod nga kalihokan. Papilia ang miyembro sa pamilya o higala og usa ka tudling sa doktrinal nga kahanas gikan sa lista apan dili mosulti kanimo unsa nga tudling ang ilang gipili. Dayon maghatag sila og mga timailhan sa tudling nga dili mogamit og mga letra o mga numero hangtod imong masulti og eksakto ang pakisayran sa kasulatan ug mahinungdanong hugpong sa mga pulong. Mahimo nimong sublion kini nga proseso alang sa daghang mga tudling.

Sa unsang paagi sa imong hunahuna nga ang usa ka nasag-ulo nga kasulatan mahimong susama sa usa ka higala kinsa makahatag kanimo og inspirasyon, kahupay, ug kadasig sa mga panahon sa panginahanglan?

Opsiyon 2: Isulat kini

Pagpili og usa ka pakisayran sa kasulatan gikan sa lista ug isulat ang natukma nga mahinungdanong hugpong sa mga pulong sa kasulatan. Pagbansay sa pagsulat sa sama nga hugpong sa mga pulong mga kaupat o kalima ka higayon. Sulayi pagsulat ang mahinungdanong hugpong sa mga pulong sa kasulatan sa pipila sa mga tudling. Pagdugang og nagkalainlain pinaagi sa pagsulat og pinakatay o binuldi nga mga letra. Mahimo usab nimong orasan ang imong kaugalingon ug tan-awa unsa kadako ang imong paglambo sa imong oras.

Sa unsang paagi sa imong hunahuna nga ang pagsag-ulo sa mga kasulatan mahimong makatabang kanimo nga “maghunahuna ngadto sa [Manluluwas] sa matag hunahuna”? (Doktrina ug mga Pakigsaad 6:36).

Opsiyon 3: Nganli ang pakisayran sa kasulatan

Paghangyo og usa ka higala o miyembro sa pamilya aron motabang kanimo sa pagrebyo sa mga tudling sa doktrinal nga kahanas. Sultihi kining tawhana kon pila ka mga pulong ang basahon kanimo gikan sa usa ka mahinungdanong hugpong sa mga pulong sa kasulatan, ug hangyoa siya sa pagbasa sa makusog nianang gidaghanon sa mga pulong. Sulayi pag-ila ang eksakto nga pakisayran sa kasulatan. Sublia kini nga pagbansay sa makadaghang higayon kutob sa imong gusto ug sulayi paghangyo og lainlaing gidaghanon sa mga pulong.

Sa unsang paagi sa imong hunahuna nga ang pagsag-ulo sa mga kasulatan mahimong makatabang kanimo nga maandam sa pagpaambit sa ebanghelyo ngadto sa uban?