Mga Hebreohanon 11, Bahin 1
Hugot nga Pagtuo diha ni Jesukristo
Daghang mga tawo ang nagsulti mahitungod sa pagbaton og hugot nga pagtuo—sa ilang kaugalingon, sa uban, ug bisan sa mga hitabo o mga butang. Busa, unsay nakapahimo sa pagbaton og hugot nga pagtuo diha kang Jesukristo nga makagagahom ug importante? Sa Mga Hebreohanon 11, atong mabasa ang mga pagtulun-an ni Apostol Pablo sa pagpalambo sa hugot nga pagtuo kang Jesukristo. Kini nga leksiyon makatabang kanimo nga makasabot unsa ang hugot nga pagtuo kang Jesukristo ug nganong importante kini kanimo sa personal.
Ang kasegurohan sa hugot nga pagtuo diha ni Jesukristo
-
Unsa ang imong isulti kon adunay mangutana kanimo unsa ang hugot nga pagtuo?
Isulat ang imong kahulogan diha sa imong journal sa pagtuon o sa usa ka digital nga note. Mahimong magbuhat og mga kabag-ohan o pagdugang niini nga kahulogan ug pagrekord og uban pang mga hunahuna ug mga impresyon diha sa imong pagtuon karon.
Basaha ang Mga Hebreohanon 11:1 ug markahe giunsa ni Apostol Pablo paghatag og kahulogan sa hugot nga pagtuo. Mahimong makatabang ang pagkasayod nga sa Paghubad ni Joseph Smith niini nga bersikulo, ang Propeta miilis sa pulong nga substansya ngadto sa kasegurohan, usa ka pulong nga nagkahulogan og pagseguro o pagsalig (tan-awa ang Mga Hebreohanon 11:1 , footnote b).
-
Unsa sa imong hunahuna ang pasabot sa pagka adunay kasegurohan o pagsalig sa mga butang nga imong gilaoman?
-
Unsa ka posible ang pagbaton og ebidensiya sa mga butang nga dili nimo makita?
-
Base niini nga bersikulo, unsaon kaha nimo pag-usab o pagdugang sa imong paghatag og kahulogan sa hugot nga pagtuo?
Usa ka yanong kamatuoran nga gitudlo sa Mga Hebreohanon 11:1 mao nga ang hugot nga pagtuo usa ka kasegurohan sa mga butang nga gilaoman, ang ebidensiya sa mga butang nga dili makita.
Basaha ang Alma 32:21 ug Mga Artikulo sa Hugot nga Pagtuo 1:4 , nga mangita og dugang nga mga panabot mahitungod sa hugot nga pagtuo. Mahimo kang mag-cross-reference o mag-link niining duha ka mga bersikulo sa Mga Hebreohanon 11:1 .
-
Unsa pa man ang imong nakat-onan mahitungod sa hugot nga pagtuo?
-
Unsaon nimo pag-usab o pagdugang sa imong paghatag og kahulogan sa hugot nga pagtuo tungod sa unsa ang imong nakat-onan?
Usa ka paagi sa pagpahiangay sa miaging pamahayag sa kamatuoran mao ang hugot nga pagtuo kang Jesukristo mao ang kasegurohan sa mga butang nga gilaoman, ang ebidensiya sa mga butang nga dili makita nga tinuod.
-
Sa unsang paagiha sa imong hunahuna ang pagbaton og hugot nga pagtuo diha kang Jesukristo lahi kaysa pagbaton og hugot nga pagtuo sa usa ka tawo o usa ka butang?
-
Sa unsang paagi kaha ang imong hugot nga pagtuo diha kang Jesukristo makatabang kanimo nga mosalig Kaniya kon ikaw nag-atubang sa mga pangutana o walay kasegurohan?
Palawomi ang imong pagsabot sa hugot nga pagtuo diha kang Jesukristo
Pamalandong kon unsa ang imong gibati mahitungod sa imong personal nga pagtuo diha kang Jesukristo. Sa unsang mga paagi nimo gibati nga lig-on ang imong hugot nga pagtuo Kaniya? Sa unsang mga paagi nimo gibati nga ang imong hugot nga pagtuo Kaniya mahimong mas lig-on pa?
Si Elder Neil L. Andersen sa Korum sa Napulog Duha ka Apostoles mitudlo:
Sugyot nga mga kasulatan ug mga tabang sa pagtuon
Bible Dictionary o Giya ngadto sa mga Kasulatan, “ Hugot nga Pagtuo ”
Mahimo kang makakita og lain pang mga kapanguhaan sa mga kasulatan o sa Gospel Library nga app pinaagi sa pagpangita sa termino nga “Hugot nga Pagtuo diha ni Jesukristo.”
Gisugyot nga tambag gikan sa mga Lider sa Simbahan
Russell M. Nelson, “Si Kristo Nabanhaw: Ang Hugot nga Pagtuo diha Kaniya Makabalhin og mga Bukid,” Liahona, Mayo 2021, 101–4
Neil L. Andersen, “Ang Pagtuo Dili pinaagi sa Sulagma, apan pinaagi sa Pagpili,,” Liahona, Nob. 2015, 65–68
Richard C. Edgley, “Hugot nga Pagtuo—ang Pagpili Inyo,” Liahona, Nob. 2010, 31–33
Opsiyonal: Gustong Makakat-on pa og Dugang?
Nganong importante man ang pagbutang sa akong hugot nga pagtuo diha ni Jesukristo?
Si Presidente Russell M. Nelson mitambag:
Kon hisgotan nato ang [hugot nga] pagtuo—ang [hugot nga] pagtuo nga makabalhin og mga bungtod—dili [hugot nga] pagtuo sa kinatibuk-an ang atong gihisgotan apan [hugot nga] pagtuo diha sa Ginoo nga si Jesukristo. …
Tingali tagsatagsang makapangutana sa atong kaugalingon, asa man diay ang atong hugot nga pagtuo? Naa ba sa team? Naa ba sa brand? Naa ba sa mga sikat? Bisan ang pinakasikat nga team mapildi. Ang mga sikat molubad. Ngadto lang sa Usa ka Tawo may kasiguroan ang inyong pagtuo, ug kana ngadto ni Ginoong Jesukristo.
(Russell M. Nelson, “Ipakita ang Inyong [Hugot nga Pagtuo],” Liahona, Mayo 2014, 29)
Nganong angay man nakong sulayan sa pagdugang ang akong hugot nga pagtuo diha kang Jesukristo?
Si Presidente Russell M. Nelson mitudlo:
Ang akong panawagan kaninyo … mao nga sugdi karon ang pagpalambo sa inyong hugot nga pagtuo. Pinaagi sa inyong hugot nga pagtuo, si Jesukristo mopalambo sa inyong abilidad sa pagbalhin sa mga bukid diha sa inyong kinabuhi, [tan-awa ang 1 Nephi 7:12 ], bisan og ang inyong personal nga mga hagit parehas kadako sa Bukid sa Everest.
Ang inyong mga bukid tingali mga kasubo, pagduhaduha, sakit, o ubang personal nga mga problema. Ang inyong mga bukid managlahi, ug bisan pa ang tubag sa matag usa sa inyong mga hagit mao ang pagpalambo sa inyong hugot nga pagtuo. Nagkinahanglan kana og buhat. …
Ang hugot nga pagtuo diha kang Jesukristo mao ang kinadak-ang gahom nga atong magamit niini nga kinabuhi. Ang tanan nga butang mahimo ngadto sa magatuo [tan-awa sa Marcos 9:23].
(Russell M. Nelson, “Si Kristo Nabanhaw: Ang Hugot nga Pagtuo diha Kaniya Makabalhin og mga Bukid,” Liahona, Mayo 2021, 102–3, 104)
Unsa ang gikinahanglan kanako aron makat-on pinaagi sa Hugot nga Pagtuo?
Si Elder David A. Bednar sa Korum sa Napulog Duha ka Apostoles miingon:
Ang kasinatian nakapahimo nako sa pagsabut nga ang tubag nga gihatag sa laing tawo sa kasagaran dili mahinumduman og dugay, kon mahinumduman man gani. Apan ang tubag nga atong nadiskobrehan o naangkon pinaagi sa paggamit sa hugot nga pagtuo, sa kasagaran, mahinumduman sa tibuok kinabuhi. Ang labing importanting mga pagkat-on sa kinabuhi mao ang gikaplagan—dili kay gitudloan.
Ang espirituhanong pagsabot nga nadawat ninyo ug kanako, ug diin gikompirmar nga tinuod diha sa atong mga kasingkasing, dili gayod ikahatag ngadto sa laing tawo. Ang bayad sa kakugi ug pagkat-on pinaagi sa hugot nga pagtuo kinahanglang mabayran aron maangkon ug personal nga “makapanag-iya” sa maong kahibalo. Niini lamang paagiha nga unsay nahibaloan sa hunahuna mausab ngadto sa unsay gibati sa kasingkasing. Niini lamang paagiha nga ang usa ka tawo molihok lapas sa pagsalig sa espirituhanong kahibalo ug kasinatian sa uban ug moangkon niadtong mga panalangin alang sa iyang kaugalingon. Niini lamang paagiha nga kita espirituhanong makaandam sa unsay umaabot. Kita kinahanglang “mangita sa pagtulun-an, gani pinaagi sa pagtuon ug usab pinaagi sa hugot nga pagtuo” ( D&P 88:118).
(David A. Bednar, “Paningkamot sa Pagkat-on pinaagi sa Hugot nga Pagtuo,” Liahona, Sept. 2007, 23)