Mga Hebreohanon 7–10
“Nagkab-ot sa Katubsanan nga Dayon [alang Kanato]”
Nakasinati ka ba og panahon diin ikaw nagkinahanglan nga makadawat og kasegurohan sa imong hugot nga pagtuo diha kang Jesukristo? Kanus-a man ka mibati nga nagkinahanglan ka og pipila ka dugang nga tabang aron magpabilin sa dalan sa pakigsaad? Ang mga Santos nga Hebreohanon nangita og subli nga kasegurohan mahitungod sa ilang hugot nga pagtuo diha kang Jesukristo ug sa Iyang gahom sa pagluwas. Si Pablo nagsulat ngadto kanila aron magtanyag pag-usab niini nga pasalig. Iyang gipahinumdoman sila nga ang balaod ni Moises mismo ang nagtumbok kang Jesukristo ug sa Iyang Pag-ula isip maoy tinuod nga tinubdan sa kaluwasan. Kini nga leksiyon gituyo aron matabangan ka nga mapalig-on ang imong hugot nga pagtuo diha kang Jesukristo isip imong Manluluwas ug Manunubos pinaagi sa pagtabang kanimo nga makasabot sa karaang mga simbolo sa balaod ni Moises.
“Ang tanan nga mga butang magpamatuod kang [Jesukristo]” (Moises 6:63)
Pangita og usa ka butang sa duol nga nagpahinumdom kanimo kang Jesukristo o mahimong gamiton aron magpamatuod Kaniya. Ikonsiderar kon unsa ang mahitungod sa butang nga nagpahinumdom kanimo (o nagrepresentar) kang Jesukristo.
Kompletoha ang mosunod nga pamahayag gamit kini nga butang:
“ nagpahinumdom kanako kang Jesukristo tungod kay .”
-
Sa unsang paagi nga ang mga simbolo ug mga pagtandi nga sama niini nakatabang kanimo nga mapalawom ang imong pagsabot kang Jesukristo ug unsa ang Iyang nabuhat alang kanimo?
Ang mga kasulatan nagrekord nga ang tanang mga butang nga gihatag sa Dios nagpamatuod kang Jesukristo (pananglitan, tan-awa ang 2 Nephi 11:4; Moses 6:63).
-
Sa unsang paagi nga ang paghinumdom niini makatabang kanimo?
Ang mga gipahigayon ug mga ordinansa sa balaod ni Moises gituyo aron molihok isip usa ka “sumbanan” o “pagkasama” nga nagpunting sa mga Israelita ngadto kang Jesukristo ug sa Iyang maulaong sakripisyo (tan-awa ang 2 Nephi 11:4; Jacob 4:4–5; Mosiah 3:15). Sa iyang Epistola ngadto sa mga Hebreohanon, si Pablo naghisgot sa simbolismo sa balaod ni Moises ug sa karaang tabernakulo aron magpahinumdom sa mga Santos sa ilang pagkinahanglan kang Jesukristo ug sa Iyang Pag-ula. Gusto niyang motabang sa Judio nga mga Santos nga magpabiling matinud-anon kang Jesukristo imbis nga mobalik sa pagsunod sa balaod ni Moises—ug ang iyang mga pagtulun-an makatabang usab kanato diha sa atong pagpaningkamot nga magpabiling matinud-anon ngadto sa Manluluwas karon. Sa niini nga leksiyon, aduna kay kahigayonan aron mas makasabot sa unsang paagi nga ang simbolismo sa mga kasulatan nagpunting kanato ug nagpamatuod kang Jesukristo.
“Mga pari sumala sa laray ni Melchizedekk
Sa Epistola ni Pablo ngadto sa mga Hebreohanon, ang mga sacerdote [high priest] ug uban pang mga pari sa karaang mga Israelita nagsimbolo kang Jesukristo.
Usa sa mga tahas sa mga pari mao ang molihok isip mga tigpataliwala, simbolikanhong nagtindog taliwala sa katawhan ug sa Dios. Natuman nila kini nga tahas pinaagi sa adlaw-adlaw nga paghalad og mananap nga mga sakripisyo alang sa mga sala ug mga paglapas sa mga Israelita (tan-awa ang Levitico 1; Mga Hebreohanon 10:11). Kini gihimo diha sa tabernakulo.
Basaha ang Mga Hebreohanon 7:22–28, nga timan-an ang Paghubad ni Joseph Smith alang sa Mga Hebreohanon 7:25–26 (anaa makita sa appendix sa Biblia). Pangitaa kon giunsa sa mga lihok niining mga pangulong pari pagtabang kanato nga makasabot nga si Jesukristo mihalad sa Iyang kaugalingong kinabuhi isip usa ka sakripisyo alang sa atong mga sala. Ikonsiderar ang mosunod nga paghatag og kahulogan diha sa imong pagtuon:
-
Ang “garantiya” sa Mga Hebreohanon 7:22 nagpasabot sa usa ka tawo nga migarantiya sa pinansiyal nga utang sa laing tawo.
-
Ang “mas maayo nga kasabotan” nagpasabot sa labaw nga pakigsaad sa ebanghelyo nga gi-establisar ni Kristo.
-
“Kini siya” sa Mga Hebreohanon 7:24 nagpasabot kang Jesukristo.
-
Ang “karon ug sa gihapon” sa Mga Hebreohanon 7:25 nagkahulogan og “bug-os” ug “walay kataposan.”
1. Tubaga ang mosunod nga mga pangutana diha sa imong journal sa pagtuon:
-
Hain nga mga pulong o mga hugpong sa mga pulong niini nga mga bersikulo ang labing mahinungdanon nganha kanimo? Ngano man?
-
Unsa niini nga mga bersikulo ang nagtudlo nga si Jesukristo mihalad sa Iyang kaugalingong kinabuhi isip usa ka sakripisyo alang sa atong mga sala?
-
Unsa ang imong nahibaloan mahitungod ni Jesukristo o unsa nga mga kasinatian ang imong nasinati uban Kaniya nga naghatag kanimo og pagsalig nga Siya makaluwas kanimo?
Simbolismo sa karaang tabernakulo
Kausa sa usa ka tuig, sa Adlaw sa Pag-ula (tan-awa ang Levitico 16), ang pangulong pari mopahigayon og espesyal nga mga sakripisyong mananap una pa mosulod sa bahin sa tabernakulo nga giila isip ang labing balaang dapit (o Balaan sa mga Balaan). Kini nga bahin sa tabernakulo nagsimbolo sa celestial nga gingharian, o ang presensiya sa Dios. Kini nga mga sakripisyo ug ang mga buhat sa pangulong pari gituyo aron pagsimbolo unsaon ni Jesus, ang Halangdong Pangulong Pari, paghimo og usa ka sakripisyo nga mahimong mag-andam og usa ka agianan alang sa mga tawo aron makasulod sa presensiya sa Dios (tan-awa ang Mga Hebreohanon 9:1–15).
Kon mahimo, tan-awa ang “The Tabernacle” (7:18) aron mas masabtan kini nga simbolismo. Kini nga bidyo anaa sa ChurchofJesusChrist.org.
Pangita sa mga tubag alang sa mosunod nga mga pangutana diha sa imong pagbasa sa Mga Hebreohanon 9:11–15, 24, 28 o Mga Hebreohanon 10:4, 10–17.
-
Unsay imong nakat-onan gikan niini nga mga bersikulo mahitungod sa Manluluwas ug sa Iyang Pag-ula?
-
Base niini nga mga bersikulo, unsa nga mga panalangin ang moabot kanato tungod sa Pag-ula ni Jesukristo?
2. Tubaga ang mosunod nga mga pangutana diha sa imong journal sa pagtuon:
-
Unsa ang gitudlo sa mga gisaad nga panalangin sa Manluluwas kanimo mahitungod sa unsa ang Iyang gusto alang kanimo?
-
Unsaon man nimo pagpakita sa imong pagpasalamat alang sa unsay nahimo ni Jesukristo alang kanimo?
Pamalandongi kon sa unsang paagi nga ang pagtuon sa mga pagtandi ug mga simbolismo niini nga leksiyon nakatabang kanimo nga mas makasabot kang Jesukristo ug sa Iyang Pag-ula.
-
Unsa ang pipila sa mga simbolo sa atong panahon nga nagpunting kanato ngadto kang Jesukristo?
Tan-awa sa unsang paagi nga ang kanunay nga pagpangita sa mga simbolismo mahitungod kang Jesukristo mahimong makaimpluwensya sa imong relasyon uban Niya. Pangita og tabang gikan sa Langitnong Amahan pinaagi sa Balaang Espiritu aron mailhan kon unsaon nimo pagbuhat niini nga mas makanunayon sa imong personal nga pagtuon sa kasulatan. Buhata ang bisan unsang pag-aghat nga imong madawat.
Opsiyonal: Gustong Makakat-on pa og Dugang?
Unsa ang Adlaw sa Pag-ula?
Matag tuig atol sa balaan nga adlaw sa Judio nga gitawag og Adlaw sa Pag-ula (gitawag usab nga Yom Kippur), ang labawng sacerdote [high priest] gitugotan nga mosulod sa dapit nga labing balaan (gitawag usab nga ang Balaan sa Mga Balaan) didto sa tabernakulo o, sa wala madugay, sa templo sa Jerusalem. Didto sa altar sa sakripisyo, nga nahimutang lamang sa gawas sa balaang dapit, ang labawng pari mosakripisyo og usa ka toro nga baka ug usa ka laki nga kanding. Iya dayong iwisik ang dugo sa mga hayop sa napili nga mga dapit didto sa labing balaan nga dapit aron sa pagsimbolo sa Pag-ula ni Jesukristo alang sa mga sala sa sacerdote ug alang sa mga sala sa mga katawhan. Dayon ang labawng sacerdote simbolikanhong mibalhin sa mga sala sa katawhan ngadto sa laing lalaki nga kanding (gitawag nga pinasanginlan), diin abugon dayon kini ngadto sa kamingawan, nagtimaan sa pagkatangtang sa mga sala sa katawhan. Misakripisyo usab siya og duha ka karnerong toro isip mga halad nga sinunog alang sa iyang kaugalingon ug sa mga katawhan. (Tan-awa sa Bible Dictionary, “Fasts” tan-awa usab sa Levitico 16:22.)
Mga Hebreohanon 8:6; 9:15. Unsa ang buot ipasabot nga si Jesus mao “tigpataliwala”?
Tan-awa ang bidyo nga “The Mediator” (10:47) aron mas masabtan kining importante nga titulo sa Manluluwas.
