Juan 11:1–46, Bahin 1

Gibuhi ni Jesus si Lazaro gikan sa Pagkamatay

Si Maria ug Marta mihangyo kang Jesus sa pag-adto ug pagtabang sa masakiton nilang igsoon nga si Lazaro. Nalangay si Jesus sa Iyang biyahe ug miabot upat ka adlaw na human namatay si Lazaro. Si Jesus mipakita sa iyang kalooy og mibakho uban sa managsoong babaye. Unya gibuhi Niya si Lazaro gikan sa pagkamatay. Kini nga leksiyon makatabang nimo sa pag-ila sa mga kamatuoran mahitungod ni Jesukristo ug sa mga baroganan nga makagiya kanimo sa mga pagsulay sa kinabuhi.

Paghunahuna og usa ka tawo sa imong pamilya. Hunahunaa nga sila dunay grabe nga sakit nga anaa sa kakuyaw ang ilang kinabuhi.

• Unsa kaha nga pagbati ang imong masinati?

• Unsa kaha ang imong buhaton?

• Unsa kaha ang imong mga pangutana?

Sa Juan 11, sila si Maria, Marta, ug Lazaro nag-atubang niini nga sirkumstansya. Bisan og ang ilang kasinatian nalambigit sa sakit ug kamatayon, magamit nato ang mga baroganan nga atong nakat-onan gikan sa ilang kasinatian ngadto sa mga hagit nga lagmit atong atubangon.

1. Buhata ang mosunod diha sa imong journal sa pagtuon:

Dapit sa ibabaw sa imong papel, isulat ang “Unsa ang angay nimong mahibaloan kon mag-atubang og mga hagit.” Sa kinatibuk-an sa leksiyon, hunahunaa ang mga hagit nga imong giatubang o lagmit maatubang. Tinguhaa ang pag-ila sa mga kamatuoran mahitungod kang Jesukristo ug sa Iyang ebanghelyo nga gibati nimong makagiya ug makahatag kanimo og paglaom panahon niana nga mga hagit. Irekord ang imong mga hunahuna diha sa imong papel. Hunahunaa pag-ayo kon sa unsang paagi ang matag kamatuoran nga imong gitino makatabang nimo nga mobati sa gugma alang ug gikan sa Manluluwas.

Pagpangita sa mga Kamatuoran

Usa sa kahanas sa pagtuon sa kasulatan nga makatabang sa pag-ila sa mga baroganan mao ang paghunong kon ugaling makabantay ka nga adunay importanting mga detalye nga makapangutana og yanong mga pangutana, sama ninii:

• Unsa kahay gusto sa Langitnong Amahan nga akong makat-onan gikan niini nga mga bersikulo?

• Unsa ang gitudlo niini nga asoy ngari kanako mahitungod ni Jesukristo?

Basaha ang Juan 11:1–7, ug pangutan-a ang imong kaugalingon sa mga nag-una nga pangutana.

Adunay nagkalainlain nga mga baroganan nga mahimo nimong mailhan gikan niini nga mga bersikulo. Ang mosunod mao ang pipila ka mga ehemplo. Alang sa matag sanglitanan nga baroganan, ikonsiderar ang pagmarka sa hugpong sa mga pulong o mga detalye gikan sa mga bersikulo nga imong nabasa nga nagsuporta sa maong baroganan.

Bisan og gihigugma kita ni Jesukristo, makasinati kita og mga pagsulay.

Bisan og kita matinud-anong nagsunod ni Jesukristo, makasinati gihapon kita og mga pagsulay.

Kon mag-atubang kita og mga pagsulay, makapangita kita sa tabang sa Ginoo, ug Siya motubag diha sa Iyang kaugalingon nga panahon ug sa Iyang kaugalingong paagi.

Ikonsiderar ang pagsulat niini nga mga baroganan diha sa imong piraso nga papel.

• Sa unsang paagi ang pagkahibalo niini nga mga kamatuoran makatabang kanimo?

Duha ka Adlaw human makadungog ang Manluluwas mahitungod sa sakit ni Lazaro, ang Manluluwas mibiyahe padulong sa balay ni Lazaro. Sa Iyang pag-abot, upat na ka adlaw nga gilubong si Lazaro (tan-awa sa Juan 11:17).

Si Elder Bruce R. McConkie (1915–85) sa Korum sa Napulog Duha ka Apostoles mipasabot unsa ang kahulogan sa upat ka adlaw.

Ang pagkadunot haduol na; ang kamatayon dugay nang nahibaloan isip usa ka labing siguro nga moabot. … Ngadto sa mga Judeo ang termino nga upat ka adlaw adunay espesyal nga kahulogan; nabantog sa ilang tinuohan nga sa ikaupat nga adlaw ang espiritu sa kataposan ug sa dili na mausab nga paagi mibiya na gikan sa nahimutangan sa patay nga lawas.

(Tan-awa sa Bruce R. McConkie, Doctrinal New Testament Commentary, 3 vols. [1965–73], 1:533)

Ipadayon ang pagbansay sa pag-ila sa mga baroganan samtang imong basahon ang Juan 11:18–46. Hunong panagsa, ug pangutan-a ang imong kaugalingon kon makasugat ka og mahinungdanong mga detalye, sama sa giunsa ni Maria ug Marta pagpakita sa ilang hugot nga pagtuo kang Jesukristo o giunsa sa Manluluwas pagsanong ang matag kahimtang. Idugang sa imong dokumento ang baroganan nga imong nakaplagan, ug ikonsiderar nga markahan ang mahinungdanong mga detalye ug ang paghimo og lain pang mugbo nga mga sulat diha sa imong mga kasulatan.

Lazarus Is Raised from the Dead

Jesus testifies that He is the Resurrection and the Life. He raises Lazarus from the dead that His disciples may believe. John 11:1–44

• Unsa kaha ang gusto sa Langitnong Amahan nga imong makat-onan gikan niini nga istorya?

Unsa ang gitudlo niini nga asoy kanimo mahitungod ni Jesukristo?

Ipangutana sa imong kaugalingon ang pipila o tanan aning mga mosunod nga pangutana ug tan-awa kon makatabang ba nimo kini sa pag-ila og dugang pang mga baroganan nga imong ikadugang diha sa imong dokumento.

• Unsa ang gibuhat ni Maria ug Marta aron mabansay ang ilang hugot nga pagtuo kang Jesukristo panahon sa ilang pagsulay?

• Unsa ang tubag sa Manluluwas ngadto kanila nga nagtudlo kanimo mahitungod Kaniya?

• Unsang mga elemento niini nga asoy ang nagtudlo kanimo nga mas mosalig pa diha sa Manluluwas?

• Sa unsang paagi ang paghunong dihang nakakita ka og importanting mga detalye ug sa pagpangutana nakatabang nimo sa imong pagtuon?

2. Buhata ang mosunod diha sa imong journal sa pagtuon:

Hunahunaa nga aduna kay kahigayonan nga makigsulti sa usa ka tawo nga nagsagubang og lisod nga pagsulay. Pagpili og usa ka baroganan nga imong nailhan gikan sa Juan 11:1–46, ug ipaambit kon sa unsang paagi kana nga baroganan makatabang kaniya. Ilakip ang imong mga hunahuna kon unsay ikatabang niini nga baroganan ngadto niining tawhana aron makasabot mahitungod sa Langitnong Amahan ug kang Jesukristo og sa Ilang mga tinguha alang kanato.

3. Buhata ang mosunod diha sa imong journal sa pagtuon.

Basaha ang baroganan nga imong gisulat diha sa imong papel nga “Unsa ang imong kinahanglan nga mahibaloan kon mag-atubang og mga pagsulay”. Sa kinaubsan sa maong papel, idugang ang imong mga tubag sa mosunod nga mga pangutana.

• Unsa nga baroganan ang kinahanglan nimong tutokan pag-ayo sa kaugalingon nimong kinabuhi karon? Ngano man?

• Unsa ang imong nakat-onan mahitungod sa Langitnong Amahan ug sa Manluluwas nga makatabang nimo nga mobati og gugma alang Kanila ug gikan Kanila?

• Unsa nga pagdasig ang gibati nimong buhaton base sa unsay imong nakat-onan ug gibati karon? Unsaon man nimo kini sa pagbuhat?

Opsiyonal: Gustong Makahibalo pa og Dugang? 

Nganong mag-antos man ako nga naningkamot man ko nga mahimong matarong?

Si Elder Matthew S. Holland sa Seventy mitudlo:

Adunay Usa nga makasab[o]t sa hingpit kon unsay inyong gisinati, kinsa “mas gamhanan pa kay sa tibuok yuta” [1 Nephi 4:1], ug si kinsa “makahimo sa tanang mga butang sa sukod nga labaw pa gay[o]d kadaghan kay sa [inyong] arang mapangayo o mahunahuna” [Mga Taga-Efeso 3:20]. Ang proseso mabutyag diha sa Iyang paagi ug sa Iyang panahon, apan si Kristo andam kanunay sa pag-ayo sa matag tipik ug aspeto sa inyong tumang kasakit.

Kon Siya inyong tug[o]tan sa pagbuhat sa ingon, inyong madisk[o]br[e]han nga ang inyong pag-ant[o]s wala makawang. … Nakita ninyo, ang kinaiyahan gay[o]d sa Dios ug ang tumong sa atong yutan-ong pagpakabuhi mao ang kalipay, apan kita dili mahimong hingpit nga mga binuhat sa balaan nga kalipay kon walay mga kasinatian nga mosulay nato, usahay sa atong tibuok kusog. Si Pablo miingon pa gani nga ang Manluluwas Mismo sa kahangt[o]ran nahimong “hingpit [o kompleto] pinaagi sa mga pag-ant[o]s” [Mga Hebreohanon 2:10]. Busa pagbantay sa yawan-ong paghunghong nga kon kamo usa pa ka mas maayong tawo, inyong malikayan ang maong mga pagsulay.

Kinahanglan usab ninyong pakigbat[o]kan ang may kalab[o]tan nga bakak nga ang inyong mga pag-ant[o]s nagsugyot nga kamo walay labot sa sirkulo sa mga pinili sa Dios, kinsa nakasinati og kalipay ug mga panalangin ug wala gay[o]d maglis[o]d. …

Mga kaigsoonan, ang pag-antos sa pagkamatar[o]ng makatabang sa pagpasarang kaninyo, kay sa ipalahi kamo gikan sa, pinili sa Dios.

(Matthew S. Holland, “Ang Talagsaon nga Kanindot nga Gasa sa Anak,” Liahona, Nob. 2020, 46–47)