Lucas 17:11–19

“Ang Imong Pagsalig Nakapaayo Kanimo”

Two leperous men kneeling before Christ. The men are extending their arms and beseeching the Lord to heal them. Christ, with His arm raised, stands before them. A crowd of several men are approaching from behind Christ.

Samtang nagbiyahe gikan sa Galilea paingon sa Jerusalem, giayo ni Jesus ang napulo ka sanglahon. Usa lamang sa mga naayo ang mibalik og nagpasalamat kang Jesus. Kini nga leksiyon makatabang nimo nga mobati ug mapahayag ang pagpasalamat ngadto sa Langitnong Amahan, kang Jesukristo, ug sa uban.

Ang imong gibati karon mahitungod sa pasalamat

Ang paggamit sa mga pulong nga “kasagaran,” “usahay,” o “dili gayod” motimbang-timbang sa imong kaugalingon sa mosunod nga mga pahayag:

Mobati ko nga mapasalamaton sa Langitnong Amahan, kang Jesukristo, ug sa uban.
Ako mopahayag sa akong mga pagbati nga mapasalamaton.
Ang pagpahayag sa pagkamapasalamaton adunay positibong epekto sa akong kinabuhi.

Samtang magpadayon ka sa imong pagtuon, tinguhaa ang giya sa Espiritu Santo aron matabangan ka sa pagkahibalo kon sa unsang paagi ang pagpakita og kamapasalamaton makapanalangin sa imong kinabuhi.

Sanla

Unsa ang imong nahibaloan mahitungod sa sakit nga sanla?

Ang sanla, labing nailhan kaniadto kaysa sa karon, usa ka sakit sa pamanit nga mahimong makatingga paingon sa pisikal nga pagkadunot o pagkamatay. Sa biblikanhong kapanahonan, ang mga tawong sanglahon ibulag gikan sa kadaghanan diha sa katilingban ug gikinahanglan nga mosinggit og “Mahugaw!” aron mapasidan-an si bisan kinsa nga nagpadulong kanila (tan-awa sa Giya ngadto sa mga Kasulatan, “Sangla”).

Unsa kaha ang inadlaw nga pagbati ug kasinatian sa usa ka sanglahon sa biblikanhong kapanahonan?
Unsa ang pipila ka hinungdan nganong ang kabatan-onan tingale mobati og susamang mga pagbati sa atong panahon?

Basaha og maayo ang Lucas 17:11–14, nga maghanduraw kon unsa ang imong gibasa. Ang pagbasa og maayo, ang paghatag og pagtagad sa mga detalye, ug ang paghanduraw sa imong gibasa magdala og mas makahuluganon nga mga kasinatian sa pagtuon sa mga kasulatan.Human mabasa kini nga mga bersikulo, sulayi sa pagtubag og daghan kutob sa mahimo ang mosunod nga lima ka pangutana mahitungod sa mga detalye diha sa Lucas 17:11–14 nga walay pag-refer ngadto sa mga kasulatan.

Basaha og maayo, nga maghatag og pagtagad sa matag detalye

Unsa ka suod ang mga sanglahon ngadto sa Manluluwas?
Unsay gihangyo sa mga sanglahon ngadto sa Manluluwas?
Unsay gisulti sa Manluluwas ngadto kanila?
Pila ka mga sanglahon ang adunay hugot nga pagtuo sa paghimo sa gihangyo sa Manluluwas?
Unsay gipanghimo sa mga sanglahon sa dihang nangaayo sila?

Ihanduraw kon unsa ang imong gibasa

Hunahunaa ang imong kaugalingon isip usa sa mga sanglahon nga nalimpyo.

Unsa kaha ang pagbati nga mamaayo gikan sa sangla? Unsa man kaha ang imong bation?
Ngano kaha nga ang pagpang-ayo nahitabo man dinhi niini nga asoy “dihang nangadto sila”? (bersikulo 14).
Unsa kaha unta ang imong mabuhat dihang imong naamgohan nga ang Manluluwas miayo kanimo?

Basaha og maayo ang Lucas 17:15–19, nga magpadayon nga maghanduraw sa unsay imong gibasa ug mangita sa importanting mga detalye.

Unsa nga mga detalye niining mga bersikulo ang pinakaimportante para sa imoha?
Unsa ang imong nakat-onan mahitungod sa pagpakita og kamapasalamaton ug sa mga panalangin nga ikahatag niini?
Unsa ang atong nakat-onan mahitungod kang Jesukristo gikan sa iyang tubag sa usa ka sanglahon nga mibalik?

Ang Langitnong Amahan ganahan nga mopanalangin kanato ug mobuhat niini sa daghang paagi. Iya usab nga gipadala ang Manluluwas nga si Jesukristo ug gipanalanginan ang Iyang mga anak pinaagi sa Manluluwas. Usa ka kamatuoran nga atong makat-onan gikan niini nga asoy mao nga kon kita mopahayag og kamapasalamaton sa mga panalangin nga atong nadawat gikan sa Langitnong Amahan ug kang Jesukristo, mamaayo kita.

Tingale makatabang ang pagkahibalo nga kon ang mga sanglahon nangaayo man sa ilang sangla, gikinahanglan nga sila, ubos sa balaod ni Moises, magpakita sa ilang kaugalingon ngadto sa mga pari aron mapahayag nga limpyo ug makabalik sa ilang mga panimalay ug katilingban (tan-awa sa Levitico 14). Wala nato mahibaloi ang mga hinungdan nganong ang matag usa sa siyam ka tawo wala mobalik aron magpasalamat. Sila nagpakita og hugot nga pagtuo sa Manluluwas, nagmasulundon, ug nangaayo, apan ang Manluluwas miingon sa usa kinsa mibalik ug nagpasalamat, kinsa usa ka Samarianhon, nga ang iyang pagtuo maoy “nakaayo” kaniya (Lucas 17:19).

Unsa kaha ang kalainan tali sa pagkaayo sa sangla ug sa pagkaayo?
Unsa man ang imong nakat-onan gikan niini nga asoy nga makaapekto sa imong relasyon uban sa Manluluwas?
Sa unsang paagi nga ang pagbasa og maayo, nagtagad sa mga detalye, ug paghanduraw niini nga mga bersikulo nakaapekto sa imong kasinatian sa pagkat-on?

Basaha ang mosunod nga mapanagnaong mga pahayag, nga magkonsiderar kon sa unsang paagi kini nga mga pagtulon-an mahitungod sa pagpasalamat magamit ngadto sa usa ka sanglahon ug sa imong kaugalingon nga kinabuhi.Si Presidente Thomas S. Monson mitudlo:

Ang kinasingkasing nga pagpasalamat dili lamang makatabang kanato sa pag-ila sa atong mga panalangin, apan kini makaabli usab sa mga pultahan sa langit ug motabang kanato nga mobati sa gugma sa Dios.

(Thomas S. Monson, “Ang Balaanong Gasa sa Pagpasalamat,” Liahona, Nob. 2010, 87)

Gihatagan og gibug-aton ni Presidente Russell M. Nelson ang bili sa pagbati nga mapasalamaton sa Ginoo. Tan-awa ang video nga “Presidente Russell M. Nelson: Usa ka Propetikanhong Pag-ampo sa Pasalamat, Paglaum, ug Pagkaayo sa Kalib[o]tan” sugod sa time code nga 3:42 hangtod 4:28 o basaha ang teksto sa ubos.

Presidente Russell M. Nelson: Usa ka Propetikanhong Pag-ampo sa Pasalamat, Paglaum, ug Pagkaayo sa Kalibutan
Sa edad nga 96 si Presidente Russell M. Nelson sa Ang Simbahan ni Jesukristo sa mga Santos sa Ulahing mga Adlaw nakakita sa daghang pagsulay. Siya miingon nga dunay yanong solusyo nga makatabang sa pagkaplag og kalipay sa lisud nga panahon—pasalamat.

Opsiyonal: Gustong Makahibalo pa og Dugang?

Lucas 17:14. Importante ba gyod nga ang mibalik nga sanglahon usa ka Samarianhon?

Ang mga Samarianhon mao kadtong nagpuyo sa Samaria kinsang relihiyon mao ang usa ka sinagulan sa tinuohan nga Judeo ug mga tinuohan ug mga batasan nga pagano” ( tan-awa sa Giya ngadto sa mga Kasulatan, “Samarianhon, Mga”). Kanunay nga ubos ang pagtan-aw kanila sa kadaghanan sa mga Judeo. Hunahunaa nganong gihisgotan ni Lucas nga ang mapasalamaton nga sanglahon usa ka Samarianhon. Unsa ang ikadugang niini nga detalye sa imong pagsabot niini nga asoy? Unsa ang gitudlo niini kanimo mahitungod sa Manluluwas?

Unsay kalainan sa pagkamapasalamaton kay sa yanong paglitok og salamat?

Si Presidente David O. McKay nagtudlo bahin sa pagkamapasalamaton ug pagpasalamat:

Ang pagkamapasalamaton mas lawon kay sa salamat. Ang pagpasalamat mao ang sinugdanan sa pagkamapasalamaton. Ang pagkamapasalamaton mao ang kahingpitan sa pagpasalamat. Ang pagpasalamat mahimong maglakip og mga pulong lamang. Ang pagkamapasalamaton makita pinaagi sa buhat.

(David O. McKay, “The Meaning of Thanksgiving,” Improvement Era, Nob. 1964, 914)

Sa unsang paagi ang pagkamapasalamaton makaapekto sa akong kinabuhi?

Ang mosunod nga mga video nagpakita sa epekto sa pagkamapasalamaton.