Juan 11:1–46, Bahin 2

Si Jesus Mibuhi ni Lazaro Gikan sa Pagkamatay

Jesus mourning Lazarus.

Sa miagi nga leksiyon, imong natino ang mga baroganan gikan sa asoy sa Manluluwas nga mibuhi ni Lazaro gikan sa pagkamatay. Kini nga leksiyon makahatag kanimo og kahigayonan sa pagtudlo og usa ka baroganan nga makatabang nimo ug sa uban sa pagdawat sa panabang sa Manunubos panahon sa mga hagit sa kinabuhi.

Epekto sa pagtudlo

Pamalandongi ang panahon diin ikaw gitudloan og butang mahitungod ni Jesukristo o sa Iyang ebanghelyo nga adunay dako nga epekto diha kanimo.

• Giunsa man kini pagtudlo sa imoha?

• Nganong aduna man kini dako nga epekto?

Si Jesukristo mao ang Batid nga Magtutudlo. Samtang Siya nagtudlo uban sa gahom ug sa Espiritu, kadtong mga naminaw uban sa pagpaubos mibati og dako nga epekto sa Iyang mga pagtulon-an (tan-awa sa Juan 3:2; Juan 6:35, 68–69).

• Unsa ang pipila ka pananglitan sa mga tawo nga naimpluwensyahan kaayo og dako sa pagtulon-an sa Manluluwas?

Pamalandongi ang ehemplo sa Manluluwas ug ang imong kaugalingong kasinatian samtang ikaw nag-andam ug motudlo og hamubo nga leksiyon base sa asoy sa Pagbuhi sa Manluluwas kang Lazaro gikan sa pagkamatay diha sa Juan 11:1–46. Usa ka elemento sa pagtulon-an sa Manluluwas mao nga Siya nagatudlo kanunay sa tinuod nga doktrina ug mga baroganan. Niini nga leksiyon, aduna kay kahigayonan nga mosunod sa ehemplo sa Manluluwas sa imong pagtudlo og usa ka tinuod nga baroganan. Samtang magpalambo ka sa imong abilidad sa pagtudlo sunod sa pamaagi sa Manluluwas, mas mamahimo kang sama Kaniya.

Lazaro

Hinumdomi kutob sa daghan nga imong mahinumdoman ang asoy bahin sa Pagbuhi sa Manluluwas kang Lazaro gikan sa pagkamatay. Kon gikinahanglan, basaha ang mosunod nga summary.

Si Maria ug si Marta mipadala og mensahe kang Jesus nga ang ilang igsoong si Lazaro nasakit. Gituyo ni Jesus nga ilangay ang Iyang biyahe ug miabot upat ka adlaw na human namatay si Lazaro. Uban sa gugma ug kalooy, gibuhi ni Jesus si Lazaro gikan sa pagkamatay. Kini nga mahinuklugong pagpakita sa balaang gahom naghatag og gibug-aton nga si Jesus mao ang pinili mga Mesiyas ug dunay gahom batok sa kamatayon. Human mahibalo bahin niini nga milagro, ang punoang mga pari ug mga Pariseo nagplano nga patyon si Jesus ug si Lazaro.

Imong leksiyon

Pag-andam og leksiyon gamit ang usa ka baroganan nga atong makat-onan gikan sa Juan 11. Pagpili og usa ka baroganan gikan sa mosunod nga mga kapilian nga ganahan kaayo nimo o gibati nga haom gayod kaayo alang sa mga tin-edyer.

Leksiyon nga kapilian 1: Ang Manluluwas makabuhat og mga milagro sa atong kinabuhi samtang mopakita kita sa atong hugot nga pagtuo Kaniya panahon sa atong mga pagsulay (Juan 11:20–27,38–45).

Leksiyon nga kapilian 2: Ang mga milagro sa Dios sa atong kinabuhi moabot sumala sa Iyang kabubut-on ug panahon (Juan 11:1–7,11–17, 39–45).

Leksiyon nga kapilian 3: Mahimo natong sundon ang buhat ni Jesukristo pinaagi sa pagpakita og kalooy ngadto sa uban (Juan 11:32–3643–44).

Leksiyon nga kapilian 4: Makita nato ang gugma ug gahom sa Dios nga ipakita samtang Siya molig-on ug mohupay kanato panahon sa atong mga pakigbisog (Juan 11:1-7,11–15,38–46).

Leksiyon nga kapilian 5: Si Jesukristo adunay gahom sa kinabuhi ug kamatayon (Juan 11:20–27,39–46).

Leksiyon nga kapilian 6: Pagpili og imong kaugalingong baroganan gikan sa giasoy sa (Juan 11:1–46).

1. Buhata ang mosunod diha sa imong journal sa pagtuon:

Tubaga ang mosunod nga mga pag-aghat aron matabangan ka sa paghimo og outline sa imong leksiyon. Ikonsiderar ang paggahin og 15 hangtod sa 20 ka minuto ang pag-andam sa imong leksiyon ug 5 hangtod sa 10 ka minuto sa pagtudlo niini.

1. Unsaon nimo sa pagpaila ang baroganan nga imong gipili sa paagi nga makatabang sa imong mga gitudloan sa pagsabot nganong mahinungdanon kini?

2. Asa niini nga mga bersikulo ang imong basahon alang sa imong mga gitudloan nga labing maayong makahulagway niini nga baroganan? (Kon may nahibaloan ka nga usa ka dugang nga asoy sa kasulatan, tudling sa kasulatan, o mga pahayag gikan sa usa ka lider sa Simbahan nga makatabang sa imong mga gitudloan sa pagsabot sa baroganan, ikonsiderar nga isulat usab kana dinhi.)

3. Unsa ang gitudlo kanimo niini nga baroganan mahitungod sa Manluluwas? Ikonsiderar ang paghangyo sa imong mga gitudloan sa pagpaambit sa ilang nakat-onan mahitungod kang Jesukristo gikan niini nga baroganan.

4. Unsa ang imong ikapaambit mahitungod sa giunsa niini nga baroganan sa pagtabang kanimo? Unsa nga mga panalangin ang miabot gumikan sa pagsunod niini? Ikonsiderar ang pagdapit sa imong mga gitudloan sa pagpaambit usab og mga kasinatian.

5. Isulat ang imong mga hunahuna mahitungod sa baroganan nga imong gitudlo ug ang usa ka mubo nga pagpasabot kon sa unsang paagi kini mipalig-on sa imong pagpamatuod kang Jesukristo. Ipaambit ang imong pagpamatuod kon gibati nimo nga angay kining buhaton.

2. Itudlo ang imong leksiyon ngadto sa usa ka sakop sa pamilya o higala. Kon mahuman na ka, tubaga ang mosunod nga mga pangutana diha sa imong journal sa pagtuon:

• Unsa man ang imong nakat-onan gikan niini nga kasinatian?

• Sa unsang paagi ang pag-andam sa mga leksiyon ug pagtudlo sa uban makatabang nimo ug sa uban nga mas maduol ug mas mahisama sa Manluluwas?

Dugang nga mga kapanguhaan

Ang mosunod nga mga video ug mga pakigpulong makatabang nimo sa pag-andam ug pagtudlo sa imong leksiyon. Mahimo nimong gamiton kini nga mga kapanguhaan sa usa o sa daghan pang mosunod nga mga paagi:

• aron mas masabtan ang baroganan nga imong gitudlo

• aron maila ang mga kamatuoran, mga sugilanon, o mga panabot nga imong ikapaambit gamit ang imong kaugalingong mga pulong samtang magtudlo

• aron mapangita ang mga pahayag o mga minugbo nga video [video clip] nga mahimo nimong ipakita sa imong mga gitudloan

Ang tanang video nga nalista makita sa ChurchofJesusChrist.org.

Leksiyon nga kapilian1: Ang Manluluwas makahimo og mga milagro sa atong kinabuhi samtang molihok kita inubanan sa hugot nga pagtuo Kaniya panahon sa atong mga pagsulay

Neil L. Andersen, “Ang Pagtuo Dili pinaagi sa Sulagma apan pinaagi sa Pagpili” (kinatibuk-ang komperensiya, Okt. 2015) (tan-awa gikan sa time code nga 1:40 hangtod 4:32).

Leksiyon nga kapilian 2: Ang mga milagro sa Dios sa atong kinabuhi moabot sumala sa Iyang kabubut-on ug panahon

Jeffrey R. Holland, “Naghulat sa Ginoo,” Liahona, Nob. 2020, 115–17.

Jeffrey R.

Leksiyon nga kapilian 3: Mahimo kitang mosunod sa ehemplo ni Jesukristo pinaagi sa pagpakita og kalooy sa uban

Dieter F. Uchtdorf, “Kamo ang Akong mga Kamot,” Liahona, Mayo 2010, 68–75.

Leksiyon nga kapilian 4: Atong makita ang gugma ug gahom nga gipakita sa Dios

samtang Iya kitang gipalig-on ug gihupay panahon sa atong mga kalisdanan

John C. Pingree Jr., “Ako Adunay Buhat alang Kanimo” (kinatibuk-ang komperensiya, Okt. 2017) (tan-awa gikan sa time code 5:49 hangtod 6:48).

Leksiyon nga kapilian 5: Si Jesukristo adunay gahom sa kinabuhi ug kamatayon

D. Todd Christofferson, “Ang Pagkabanhaw ni Jesukristo,” Liahona, Mayo 2014, 111–14.

Paul V. Johnson, “Ug Wala Nay Kamatayon” (kinatibuk-ang komperensiya, Abr. 2016) (tan-awa gikan sa time code 0:17 hangtod 4:56).