I le taimi o le misiona a le Faaola, sa olioli Aposetolo i le mana o le Agaga Paia, ae latou te lei mauaina lava le meaalofa a le Agaga Paia, lea o le a mafai ai e i latou, e ala i lo latou amiotonu, ona maua le mafutaga tumau ma le Agaga Paia (tagai i le Bible Dictionary, “Holy Ghost”). Na folafola atu e Iesu Keriso e faamanuia i latou i le meaalofa a le Agaga Paia pe a mavae Lona afio ae i le lagi. O lenei lesona e mafai ona fesoasoani ia te oe e faailoa ai le ala e faatino ai e le Agaga Paia Ana matafaioi eseese i lou olaga.
E mafai faapefea ona fesoasoani le Agaga Paia ia te oe?
O le a se mea ua e malamalama i ai e uiga i le ala e mafai ai e le Agaga Paia ona fesoasoani ia te oe?
O a ni aafiaga ua e maua i le faatasi mai o le Agaga Paia?
Matamata le vitio lenei, o loo maua ChurchofJesusChrist.org, mai le faailo taimi 1:58 i le 3:10, a Elder Gary E. Stevenson faasoa mai se aafiaga na ia maua a o laitiiti.
O a ni au fesili o i ai e uiga i le matafaioi a le Agaga Paia i o tatou olaga?
A o e suesue ai, vaavaai mo tali i au fesili o i ai e uiga i le Agaga Paia ma pe mafai faapefea e le matafaioi a le Agaga Paia ona fesoasoani ia te oe i ou lava manaoga na o oe.
Ua aoao e Iesu Ana Aposetolo e uiga i le Agaga Paia
Ina ua uma ona faatautaia e le Faaola le faamanatuga, ma le iloaina o le a le pine ae tigaina o Ia mo o tatou tiga, faaosoosoga, ma agasala ona faasatauroina ai lea, sa faaauau pea ona Ia aoao atu i Ana Aposetolo.
Faitau i le Ioane 14:16–17, ma vaavaai mo le mea sa folafolaina e le Faaola e tuuina atu i Ana Aposetolo.
Aisea e te manatu na folafola atu ai e Iesu Keriso i Ana Aposetolo o le a latou maua le meaalofa o le Agaga Paia i se taimi vave pe a afio ese o Ia?
Tusi le siata lenei i lau api faamaumau mo suesuega. Tuu se avanoa mo se koluma lona tolu, lea o le a e faaopoopoina i se taimi mulimuli ane. Faatumu le siata mai mea e te maua i fuaiupu o loo lisiina atu.
Fuaiupu
Ua auina mai e le Tama Faalelagi ma Iesu Keriso ia i tatou le Agaga Paia e …
Ua auina mai e le Tama Faalelagi ma Iesu Keriso ia i tatou le Agaga Paia e …
1. Tali fesili nei i totonu o lau api faamaumau mo suesuega:
E faapefea ona e aoteleina mea na aoao mai e le Faaola e uiga i le mafuaaga na Iaua auina mai ai ma le Tama le Agaga Paia ia i tatou?
E mafai faapefea e nei folafolaga ma upumoni ona fesoasoani ia te oe i lou olaga i le taimi nei?
E faapefea e le iloaina e faapea, e auina mai e le Tama Faalelagi ma Iesu Keriso le Agaga Paia e fesoasoani ia e iloa ai e alolofa i Laua ia te oe? O le a se mea o faaali atu ai ia te oe lo laua finagalo mo oe?
O se molimau mai le Agaga Paia
Na aoao mai le Faaola o le a molimau mai le Agaga Paia ma vivii atu ia te Ia (tagai i le Ioane 15:26; 16:13–14).
Na ta’ua e Peresitene Russell M. Nelson:
Ata
Peresitene Russell M. Nelson
O le upumoni aupito sili ona taua o le a molimau atu ai le Agaga Paia ia te oe e faapea o Iesu o le Keriso, le Alo o le Atua soifua.
2. Tali se fesili e tasi pe sili atu o fesili nei i totonu o lau api faamaumau mo suesuega:
O le a se taimi na e lagona ai le aoao ma le molimau mai o le Agaga Paia ia te oe e uiga i le Tama Faalelagi ma Iesu Keriso? Na faapefea ona aoao atu ma molimau atu le Agaga Paia ia te oe?
O le a se mea e ono fai e se tasi e valaaulia ai le Agaga Paia e aoao i latou e uiga i le Tama Faalelagi ma Iesu Keriso? (tagai i le Ioane 7:17; 14:13).
Aafiaga patino ma le Agaga Paia
Faaopoopo se koluma lona tolu i lau siata, ma faaigoa “O le ala na faia ai e le Agaga Paia lenei mea mo au po o se tasi ou te iloa.” Mo mau taitasi i le siata, mafaufau ma tusi e uiga i soo se aafiaga na e maua, se tagata o le aiga, po o se tasi i tusitusiga paia i le faataunuuina e le Agaga Paia o lena matafaioi. Afai e te le iloaina pe manatua se aafiaga patino mo matafaioi taitasi a le Agaga Paia na faamamafa mai e le Faaola i nei fuaiupu, e le afaina lena mea. A o e taumafai e faamaoni ma vaavaai mo nei aafiaga i lou olaga, o le a fesoasoani le Tama Faalelagi ia te oe e iloa i latou.
Faitalia pe Fai: O e Manao e Aoao Atili?
O le a le mea e fai e le Agaga Paia?
Na aoao mai Peresitene Dallin H. Oaks:
Ata
Peresitene Dallin H. Oaks
O le sui lona tolu o le Aiga Atua o le Agaga Paia, ua faasino atu foi i ai o le Agaga Paia, le Agaga o le Alii, ma le Faamafanafana. O Ia o le sui o le Aiga Atua o le puna o faaaliga patino. I le avea ai ma se peresona o agaga (tagai i le MF&F 130:22), e mafai ona afio o Ia i totonu o i tatou ma faatino le matafaioi taua o fesootaiga i le va o le Tama ma le Alo ma le fanau a le Atua i luga o le fogaeleele. E tele mau ua aoao mai ai o Lana misiona o le molimau mai e uiga i le Tama ma le Alo (tagai Ioane 15:26; 3 Nifae 28:11; MF&F 42:17). Sa folafola mai e le Faaola o le Faamafanafana o le a aoao mai ia i tatou mea uma, faamanatu mai ia i tatou mea uma, ma taitai atu i tatou i upumoni uma (tagai i le Ioane 14:26; 16:13). O lea, ua fesoasoani ai le Agaga Paia ina ia tatou iloatino le va o le mea moni ma le mea sese, taiala i tatou i a tatou faaiuga taua tetele, ma fesoasoani ia i tatou i o tatou luitau o le olaga faaletino. O Ia foi le ala e faapaiaina ai i tatou, o lona uiga, o le faamamaina ma le faapaiaina mai le agasala (tagai 2 Nifae 31:17; 3 Nifae 27:20; Moronae 6:4).
Aisea e taua ai lo tatou iloa o le talanoa mai o le Agaga Paia ia i tatou?
Sa aoao mai Peresitene Dallin H. Oaks o le Au Peresitene Sili:
Ata
Peresitene Dallin H. Oaks
O lenei laina patino o fesootaiga ma lo tatou Tama Faalelagi e ala mai i Lona Agaga Paia, o se puna o la tatou molimau o le upumoni, o lo tatou malamalama, ma lo tatou taitaiga patino mai se Tama Faalelagi agaalofa. O se mea taua lea o Lana fuafuaga ofoofogia o le talalelei, lea e mafai ai e tagata taitoatasi uma o Lana fanau ona maua se molimau patino i lona moni.
Ioane 14:27. E mafai faapefea ona ou lagonaina le filemu mai le Agaga Paia pe afai ou te tauivi ma le soifua maloloina faalemafaufau?
Afai e te oo i luitau o le soifua maloloina faalemafaufau e pei o le popole po o le atuatuvale, atonu e te lagona le faigata tele ona lagonaina le Agaga Paia. E le o oe e sese. Ua silafia e lo tatou Tama Faalelagi ma Lona Alo o Iesu Keriso nei tauiviga, ma La te mananao e fesoasoani ia te oe. Mafaufau e iloilo se tasi pe lua o punaoa nei mo nisi faamatalaga i le auala e lagona ai le filemu mai le Agaga Paia pe a e tauivi ma faafitauli o le soifua maloloina faalemafaufau.
Vitio: “Like a Broken Vessel” (11:36; o loo maua i luga o le ChurchofJesusChrist.org)
Ioane 16:7. O le a le uiga o le fetalaiga a le Faaola ina ua Ia fetalai, “Afai ou te le alu ese, o le a le sau le Faamafanafana ia te outou”?
E le o mailoa le mafuaaga na le faamatala atoa ai i tusitusiga paia, o le Agaga Paia e lei galue i le atoatoaga i tagata Iutaia i le taimi o femaliuai ai Iesu i le olaga nei ( Ioane 7:39; 16:7). O faamatalaga i le aafiaga o le Agaga Paia e lei oo mai seia vagana ai ina ua toetu Iesu atonu na tatau ai ona faasino na o lena tisipenisione faapitoa, aua ua matua manino lava na galue le Agaga Paia i tisipenisione na muamua atu. E le gata i lea, o loo i ai se faasinoga i le na o le meaalofa o le Agaga Paia e le o i ai, talu ai o le mana o le Agaga Paia sa galue i le taimi o galuega a Ioane le Papatiso ma Iesu; semanu e leai se tasi e mauaina se molimau i upumoni sa aoaoina e nei tamalii ( Mataio 16:16–17; tagai foi i le 1 Kor. 12:3).