Ioane 14:1–6; 15:1–11

“O A‘u nei le Ala, le Upumoni, ma le Ola”

O Iesu Keriso o loo silasila atu i luga o se vaitafe

I le taimi o Lona afiafi faaiu faatasi ma Ona soo, sa aoao atu ai i latou e Iesu Keriso e uiga i Lona natura ma [Lana] misiona. Sa Ia aoao atu o Ia o le ala e toe foi atu ai i le Tama Faalelagi, ma sa Ia faatusaina le sootaga a Ona soo ia te Ia i lala o se vine. O lenei lesona e mafai ona fesoasoani e te tomanatu ai i lau sootaga ma Iesu Keriso ma pe mafai faapefea ona e mulimuli ia te Ia ma maua Lona malosi ma [Lana] fesoasoani.

O nisi o aoaoga mulimuli a le Faaola i Ona soo sa faamoemoeina e fesoasoani ai ia i latou ia malamalama i lo latou sootaga ma le faalagolago ia te Ia. Sa faatusa e le Faaola o Ia lava i se alasavali, faapea foi i se vine po o se laau ma ona lala. Faaaoga sina taimi e mafaufau ai e uiga i vaega o lou olaga atonu e te manaomia ai le fesoasoani. Atonu e te lagona e pei e te manaomia le fesoasoani a o e taumafai e toe foi atu i le Tama Faalelagi. E ao ina e lagonaina le manaomia o se malosi sili atu e fetaiai ai ma luitau i lou olaga. A o e suesue i aoaoga a le Faaola, vaavaai mo mea ua e aoaoina e uiga ia te Ia ma pe mafai faapefea ona Ia fesoasoani ia te oe.

Suesue se tasi po o vaega uma e lua nei: Manatua e mafaufau loloto pe mafai faapefea ona fesoasoani le Faaola ia te oe i lou olaga i aso taitasi.

O Iesu Keriso o “le ala, ma le upumoni, ma le ola” (Ioane 14:6)

Faitau le Ioane 14:1–6, ma vaavaai pe na faapefea ona folafola atu e le Faaola e fesoasoani ia i latou o e mulimuli ia te Ia.

O a upumoni na aoao mai e le Faaola i nei fuaiupu?
O a ni igoa na ta’u ai e le Faaola o Ia lava i le fuaiupu e 6?
O a ni mea ua aoao mai e nei faalagiga taitasi ia te oe e uiga ia Iesu Keriso ma lou sootaga ma Ia?

Afai na e fatuina se lisi o faalagiga ma matafaioi eseese a Iesu Keriso i lesona talu ai, atonu e te manao e faaopoopo i ai mea na e maua i le Ioane 14.

E mafai e le Tusi a Mamona ona faateleina lou malamalama i mea o loo e suesueina i le Feagaiga Fou. Faitau le Mosaea 3:17, ma mafaufau pe faapefea ona fesoasoani lenei fuaiupu tatou te malamalama atili ai i le Ioane 14:6.

Sa aoao mai Peresitene Dieter F. Uchtdorf, a o avea ma uso o le Au Peresitene Sili:

E finagalo le Atua ia e toe maua lou ala e toe foi atu ai ia te Ia, ma o le Faaola o le ala lea [tagai i le Ioane 14:6]. E finagalo le Atua ia e aoao e uiga i Lona Alo, o Iesu Keriso, ma lagonaina le filemu loloto ma le olioli lea e oo mai i le mulimuli i le ala o se soo paia.

(Dieter F. Uchtdorf, “Mauaina o se Molimau o le Malamalama ma le Upumoni,” Liahona, Nov. 2014, 21)

O anafea na e maua ai pe aafia ai se tasi e te iloa i le filemu loloto ma le olioli lea e sau mai le mulimuli ia Iesu Keriso?

Ina ia vaai i se faataitaiga o se tasi na mauaina le Faaola ma faamanuiaina e ala i le mulimuli ia te Ia, pe a mafai, matamata le vitio “Jesus Christ Is the Way” (5:02), o loo maua i le ChurchofJesusChrist.org.

Jesus Christ Is the Way
Our Heavenly Father sent His Son, Jesus Christ, to be our Savior and show us the way to live according to God's plan.

O a nisi o auala e mafai ona tatou mulimuli ai i le Faaola e toe foi atu ai i le Tama Faalelagi?
E mafai faapefea ona tatou iloa pe o tatou i ai i le ala sa‘o?

O Iesu Keriso “o le vine” (Ioane 15:5)

Sa faaaoga e Iesu Keriso se faatusatusaga e aoao ai Ona soo e uiga i lo latou sootaga ma Ia. Faitau le Ioane 15:1–11, ma vaavaai mo lenei faatusatusaga.

Afai na e fatuina se lisi o faalagiga ma matafaioi eseese a Iesu Keriso i lesona talu ai, atonu e te manao e faaopoopo i ai mea na e maua i le Ioane 15.

O le a sou manatu i le mea o loo aoao mai e Iesu Keriso i lenei faatusatusaga?
O a upumoni e mafai ona e aoaoina mai lenei faatusatusaga e uiga i la tatou sootaga ma Iesu Keriso?

Na faamalamalama mai e Elder Jeffrey R.Holland o le Korama a Aposetolo e Toasefululua e faapea, o le valaaulia a le Faaola ia tumau ia te Ia o se valaaulia mo i tatou “ia tumau, ia … tumau e faavavau” (“Tumau ia te Au,” Liahona, Me 2004, 32). Sa faamalamalama mai e Elder Holland le mafuaaga e taua tele ai mo i tatou le taliaina o le valaaulia a le Faaola e tumau ia te Ia. Atonu e te manao e matamata le vitio “Ia Tumau ia te Au” mai le faailotaimi 13:26 i le 14:23, pe faitau le faamatalaga lenei.

"Abide in Me"
For the fruit of the gospel to blossom and bless our lives, we must be firmly attached to Him, the Savior of us all.

Na fetalai Iesu, “E le mafai e outou ona faia o se mea e tasi pe a a’u le i ai” [Ioane 15:5]. Ou te molimau atu o le upumoni lena a le Atua. O Keriso o mea uma ia i tatou ma e tatau ona tatou “tumau” ai pea ia te Ia, ia mausali, e le liua, e faavavau. Mo le fua o le talalelei ia fua tele ma faamanuiaina ai o tatou olaga, e tatau ona tatou pipii mau atu ia te Ia, le Faaola o i tatou uma, ma i lenei, o Lana Ekalesia, lea o loo tauaveina Lona suafa paia. O Ia o le vine o le faapogai moni o le malosi ma na o le pau lea o le faapogai o le ola e faavavau. E le gata o le a tatou tumau ia te Ia ae o le a tatou malo ma manumalo i lenei savali paia lea o le a le faatoilaloina lava i tatou.

(Jeffrey R. Holland, “Ia Tumau ia te A’u,” Liahona, Me 2004, 32)

E mafai ona fesoasoani le Tusi a Mamona ia te oe e faateleina lou malamalama i mea o loo e suesueina i le Feagaiga Fou. Faitau le Alema 26:12, ma mafaufau pe faapefea ona fesootai i le Ioane 15:1–11.

O a nisi o fua (taunuuga po o faamanuiaga) ua e vaaia i lou olaga a o e taumafai e tumau ia Iesu Keriso?
O a nisi o faatinoga e mafai ona e faia e fesoasoani ai ia te oe e tumau ia Iesu Keriso?

Tuu i le faitalia: O e Manao e Aoao Atili?

O le a le uiga o le, e tele mea e nonofo ai i le maota o le Tama faalelagi?

Sa aoao mai le Perofeta o Iosefa Samita (1805–44):

[O le faamatalaga] “E tele mea e nonofo ai i le maota o lo’u Tama” [Ioane 14:2] … e tatau ona faapea---“I le malo o lo’u Tama e tele malo o loo i ai,” ina ia mafai ai ona avea outou ma suli o le Atua ma suli faatasi ma a’u. … E i ai mea e nonofo ai i latou o e usiusitai i se tulafono selesitila, ma e i ai foi mea e nonofo ai i latou e le atoatoa i le tulafono, o tagata uma i lana lava faatulagaga.

(Aoaoga a Peresitene o le Ekalesia: Iosefa Samita [2007], 219)