Ioane 17

O Le Tatalo Faapuluvaga Sili a le Faaola

O Iesu Keriso o loo tatalo faatasi ma so’o

O le Iloa Patino o le Tama Faalelagi ma Iesu Keriso

Mafaufau i se tagata taua i le talafaasolopito o lou lava atunuu.

O a nisi o mea e te iloa e uiga i lena tagata?
E faapefea ona e faamatalaina le eseesega i le va o lou malamalama e uiga i le tagata i le talafaasolopito ma le lelei o lou iloa o se tagata vavalalata o le aiga?

Faaaoga se taimi e tusi ai i lau api faamaumau mo suesuega ou lagona e uiga i lou malamalama i le Tama Faalelagi ma Iesu Keriso. Pe ua na ona faavae i mea moni ua e iloa e uiga ia i Laua, pe o le a sili atu ona patino nai lo lena? O le a sou manatu o le a faapefea ona faamanuiaina lou olaga i le iloaina o i Laua i se tulaga e matua sili atu ona patino?

Sa tatalo Iesu mo Ona soo

I le po a o lumanai Ona puapuaga i Ketesemane, faalataina, ma le Faasatauroga, sa fofoga atu ai ma le leotele e le Faaola se tatalo paia ua taua o le Tatalo Faapuluvaga sili. Sa Ia tatalo i le Tama Faalelagi e aioi atu ai mo Ona soo, e aofia ai Ona soo o e ola i o tatou aso (tagai i le Ioane 17:20). Taumafai e vaai faalemafaufau pe mata o a ni lagona o Aposetolo i le faalogo atu o tatalo Iesu mo i latou i lena po paia.

O le a se mea e mafai ona tatou aoaoina e uiga i le Faaola mai Lana faataitaiga o le tatalo mo Ona soo ma i latou uma o e mulimuli ia te Ia a o lei oo i Ona puapuaga i Ketesemane ma le pueina faapagota?

O leIoane 17:3 o se fuaitau o le atamai i aoaoga faavae. Mafaufau e makaina fuaitau o le atamai i aoaoga faavae i se ala iloga ina ia mafai ai ona e maua gofie. O le a e aoao atili e uiga i lenei fuaitau o le atamai i aoaoga faavae i le lesona e sosoo ai.

Faitau i le Ioane 17:1–3, ma vaavaai mo faamanuiaga na tatalo Iesu Keriso ina ia maua e Ona soo.

O le a le mea ua finagalo ai Iesu Keriso mo Ona soo?

O fasifuaitau o le “ola e faavavau” ma le “olaga e faavavau” (fuaiupu 2–3) e masani ona sese le malamalamaga i ai ia na ona faapea o le ola ai e faavavau. Sa tatalo le Faaola ina ia tele atu mea tatou te maua nai lo o lena. O le “ola e faavavau” o le “tulaga o le olaga o loo soifua ai lo tatou Tama Faavavau. … O le ola e faavavau, po o le faaeaga o le ola lea i le afioaga o le Atua ma faaauau ai o ni aiga (tagai i le Mataupu Faavae ma Feagaiga 131:1–4)” (Autu o le Talalelei, “Ola e Faavavau,” topics.ChurchofJesusChrist.org). Mafaufau e tusi le faauigaga lenei i au tusitusiga paia i autafa o le fuaiupu 3.

E tusa ai ma le fuaiupu 3, o le a se tasi o mea tatou te manaomia ina ia maua ai le ola faavavau?

O se tasi o upumoni tatou te aoao mai le tatalo a le Faaola o le ina ia maua le ola faavavau, e tatau ona tatou iloa le Tama Faalelagi ma Iesu Keriso.

Aisea e te manatu ai e manaomia ona tatou iloa moni le Tama Faalelagi ma Iesu Keriso ina ia maua ai le ola faavavau?

Na faamatala mai e Elder Michael John U. Teh o le Au Fitugafulu le taua o le iloaina o le Faaola:

E manaomia ona tatou iloa o le iloaina o le Faaola o le sailiga aupito sili lea ona taua o o tatou olaga. E tatau ona faamuamua i lo o se isi lava mea.

(Michael John U. Teh, “O lo Tatou Faaola Patino,” Liahona, Me 2021, 99)

Aisea e te manatu ai o le iloaina o le Faaola o le sailiga aupito sili ona taua lea o o tatou olaga?
O le a se mea e mafai ona faigata ai ona faamuamua le iloaina o le Faaola nai lo isi sailiiliga i lou olaga?

Mafaufau mo sina taimi e uiga i le auala na atiae ai se sootaga vavalalata ma se tagata o lou aiga po o se uo. O le a se mea na e faia ia iloa lelei ai i latou? Pe sa i ai ni aafiaga autu na fesoasoani ia te oe e te iloa lelei ai i latou? O le a le umi na atiina ae ai le sootaga?

O le iloa o le Faaola e ala i Lana tatalo

O se tasi o auala e iloa ai le Faaola e ala lea i Ana tatalo. Faaalu ni nai minute e aoao lelei ai po o ai le Faaola e ala i le suesueina o mea sa Ia tatalo ai i le Ioane 17. O nisi o fuaiupu e mafai ona e filifili e taulai atu i ai o le Ioane 17:4–11, 20–26.

Vaai faalemafaufau pe faape’i le latalata tele atu i le Tama Faalelagi ma le Faaola e mafai ai ona faamatalaina la outou sootaga o le tasi ma i Laua. O a ni ou lagona i lena mea? O le a faapefea ona lelei atu lou olaga? E alofa tele le Tama Faalelagi ma Iesu Keriso ia te oe ma naunau ina ia tasi ma oe. Sa tatalo Iesu Keriso i le Tama Faalelagi e fesoasoani ia te oe ia maua se sootaga vavalalata ma i Laua. Ia manatua o lena sootaga o le a alu ai se taimi ma se taumafaiga e atiina ae, i lenei olaga atoa ma le isi olaga.

Faamaumau i lau api faamaumau mo suesuega mea ua e naunau e fai ia iloa lelei ai le Tama Faalelagi ma Iesu Keriso. Ia aofia ai le auala e te manatu o le a e iloa ai o loo tuputupu ae malosi atili lou sootaga ma i Laua ma le auala e te talitonu ai o lena sootaga o le a faamanuiaina ai lou olaga.

Faitalia pe Fai: O e Manao e Aoao Atili?

O le a se mea e mafai ona tatou faia ia iloa atili ai le Tama Faalelagi ma Iesu Keriso?

Sa aoao mai Peresitene Henry B. Eyring o le Au Peresitene Sili:

Afai e te fia faalatalata pea i se tasi e pele ia te oe, ae o loo mamao ese mai ia te oe, e te iloa lava le ala e fai ai. O le a e sailia se ala e te talanoa atu ai ia te i latou, o le a e faalogo atu ia te i latou, ma o le a e iloa foi ni ala e faia ai ni mea mo i latou taitoatasi. O le faateleina o le tupu soo o lena mea, o le umi atu foi lena e faaauau ai, o le loloto atili foi lena o le sootaga o le alofa. Afai e tele se taimi e alu e aunoa ma se toe talanoa atu i ai, faalogo atu i ai, ma faia se mea mo i latou, o le a faavaivaia lea sootaga.

E atoatoa ma mamana le Atua, a o oe ma au o ni tagata faaletino. Ae o ia o lo tatou Tama, e alofa o ia ia i tatou, ma ua ia ofoina mai lea lava avanoa e tasi e faalatalata atu ai ia te ia e pei ona faia i se uo pele. Ma o le a e faia i le ala lava e tasi: tautala, faalogo, ma faatino.

(Heny B. Eyring, “To Draw Closer to God,” Ensign, Me 1991, 66)

Sa faamalamalama mai e Elder C. Scott Grow o le Au Fitugafulu:

Au uo talavou, e mafai ona tatou amata iloa le Atua e ala i le tatalo. …

… A o e suesueina tusitusiga paia i aso taitasi, na o oe ma faatasi ai ma lou aiga, o le a e aoao e iloa le siufofoga o le Agaga ma o le a oo ai ina [e] iloa le Atua. …

A o tatou saili e faia le finagalo o le Atua e ala i le auauna atu ma le faatuatua ia te Ia ma o tatou uso a tagata, tatou te lagona Lana faamaoniga ma oo moni ina iloa o Ia.

Ua ta’u mai e le Faaola ia i tatou o le auala sili e iloa ai le Atua o le avea lea e pei o Ia. Sa Ia aoao mai: “O lea, o a ituaiga o tagata e tatau ona outou i ai? E moni, ou te fai atu ia te outou, e pei lava o a’u nei” [3 Nifae 27:27].

E taua le agavaa ina ia avea ai e pei o Ia.

E silafia outou e le Atua, ma valaaulia outou ia iloa o Ia. Tatalo i le Tama, suesue tusitusiga paia, saili e faia le finagalo o le Atua, taumafai e avea e faapei o le Faaola, ma mulimuli i faufautua amiotonu. A o outou faia, o le a oo ina outou iloa le Atua ma Iesu Keriso, ma o le a outou maua le ola faavavau.

(C. Scott Grow, “O Le Ola e Faavavau Foi Lenei,” Liahona, Me 2017, 121–24)