Atamai i Aoaoga Faavae—Ioane 17:3

O le Iloaina Ai o le Tama Faalelagi ma Iesu Keriso

se tamaitai talavou o loo faitau ana tusitusiga paia

I le lesona ua mavae atu, “Ioane 17,” na e aoaoina ai e mafai ona tatou alualu agai i luma i le ola faavavau e ala i le iloaina o le Tama Faalelagi ma Iesu Keriso. O lenei lesona o le a fesoasoani ia te oe e tauloto ai mau tauloto faaleaoaoga faavae ma le fasifuaitau autu o tusitusiga paia mo le Ioane 17:3, faamatala le aoaoga faavae, ma faaaoga mataupu faavae o le mauaina o le malamalama faaleagaga i se tulaga moni o le olaga.

Tauloto ma faamatala

Tauloto leotele mo ni taimi le mau o le atamai i aoaoga faavae Ioane 17:3 ma lona fasifuaitau autu o le mau: “O le ola e faavavau foi lenei, ia latou iloa oe le Atua moni e toatasi, ma Iesu Keriso.” I luga o se isi fasipepa, tusi ai le mau faasino Ioane 17:3 ma mataitusi muamua o upu taitasi i le fuaiupu: O l o e f f l i l i o l A m e t m I K. I le faaaogaina na o mataitusi muamua o le fuaiupu, taumafai e tauloto le mau ma le fasifuaitau autu o le mau. A o faateleina lou to’a, taumafai e tauloto mai le mau faasino ma le fasifuaitau mai mea e manatua.

Faataitai le faaaogaina

Toe faamanatu ia parakalafa 5-12 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022). Mafaufau pe mafai faapefea ona e faamalamalama atu nei mataupu faavae taitasi i se tasi e lei faalogo muamua lava i ai.

Faitau le tulaga faataitai lenei:

Ina ua maea le sauniga anapogi ma molimau, ua e matauina ai ua foliga faanoanoa lau uo o Iulia. A o lua savavali faatasi atu i le fale, sa fai mai o ia, i le taimi o le sauniga i le asō sa ia iloa ai na te le iloa lelei le Tama Faalelagi ma Iesu Keriso e faapei ona ia manao i ai. Na ia faamatalaina se lagona o le tuuatoatasi ma se naunautaiga faananau mo le ituaiga o sootaga ma i Laua lea na ia lagonaina i nisi o i latou na faasoa mai a latou molimau. Ua e filifili e mafaufau loloto ma tatalo i nai aso o sosoo ai e uiga i le auala e fesoasoani ai ia Iulia.

Faaaoga mataupu faavae o le mauaina o le malamalama faaleagaga ma fesili ma gaoioiga nei e fesoasoani ia te oe e mafaufau ai i mea e te ono tautala atu ai ma fai e fesoasoani ai ia Iulia. Atonu e te manao e tusi i lalo mea ua e aoaoina ma soo se uunaiga e te maua a o e sauniuni.

Iloilo manatu ma fesili faatasi mai se vaaiga e faavavau

Aisea e te manatu ai e finagalo le Tama Faalelagi ia tatou iloa o Ia ma Lona Alo, o Iesu Keriso?
Aisea e te manao ai ia iloa lelei foi i Laua ao mafai ona e faia i lenei olaga?

Saili le malamalama atili e ala i punavai paia ua atofaina

E mafai faapefea e le suesueina o le tatalo a le Faaola i le Ioane 17:3 ona fesoasoani ia Iulia i ona manaoga?

Fai se lisi o ni punavai lelei e ono fesoasoani ia Iulia e iloa ai le Tama Faalelagi ma Iesu Keriso.

E mafai faapefea e Iulia ona faaaoga punaoa o loo maua e fesoasoani ai ia te ia ia iloa atili le Tama Faalelagi ma Iesu Keriso? (Mo se faataitaiga, o a upu autu e mafai ona ia sailia i le Taiala i Tusitusiga Paia, i le Topical Guide, i ChurchofJesusChrist.org, po o luga o le polokalama o le Gospel Library?)

Faaalu ni nai minute e suesue ai punavai paia ua atofaina e aoao atili ai e uiga i le Tama Faalelagi ma Iesu Keriso ma le auala e iloa atili ai i Laua.

Faatino i le faatuatua

E faapefea ona avea o se faatinoga o le faatuatua le taumafai ia iloa le Tama Faalelagi ma Iesu Keriso?
O le a se mea ua e faia po o se tasi e te iloa ina ia iloa atili ai le Tama Faalelagi ma Iesu Keriso e mafai ona e fautuaina atu ia Iulia?
O a fasifuaitau e te maua i parakalafa 57 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022) e mafai ona fesoasoani i se tasi sa faia mea sao ae le o lagonaina pea le latalata atu i le Atua e pei ona latou mananao ai?

Faitalia pe Fai: O e Manao e Suesue Atili?

O le a le ola faavavau?

O le ola faavavau o le fuaitau lea o loo faaaogaina i tusitusiga paia e faauiga ai le olaga o loo soifua ai lo tatou Tama e Faavavau. … O le ola faavavau, po o le faaeaga, o le nofo lea i le afioaga o le Atua ma faaauau ai o ni aiga (tagai i le Mataupu Faavae ma Feagaiga 131:1–4).

(Autu o le Talalelei,“Ola e Faavavau,” topics.ChurchofJesusChrist.org)

E mafai faapefea ona tatou iloa le Tama ma le Alo mo i tatou lava?

Na taliina e Elder Robert D. Hales (1932–2017) o le Korama a Aposetolo e Toasefululua lenei fesili:

E ala i faaaliga faaletagata lava ia. O faaaliga faaletagata lava ia o le ala lea e fesoasoani ai le Tama Faalelagi ia i tatou ia iloa o Ia ma Lona Alo, aoao ma ola i le talalelei, tumau e oo i le iuga i le amiotonu, ma agavaa ai mo le ola faavavau—e toe foi atu ai i lo La’ua afioaga.

(Robert D. Hales, “Faaaliga Faaletagata: O Aoaoga ma Faataitaiga a Perofeta,” Liahona, Nov. 2007, 87)

O le a se mea e tatau ona ou faia pe afai ou te le o mautinoa pe ou te talitonu i le Atua?

Na saunoa mai Elder Robert D. Hales (1932–2017) o le Korama a Aposetolo e Toasefululua:

Afai e le mafai ona e manatua le talitonu i le Atua pe ua e le toe talitonu pe ua e talitonu ae e aunoa ma se talitonuga maumaututu moni, ou te valaaulia oe e saili se molimau i le Atua i le taimi nei. …

… Faatasi ai ma lau lava molimau e uiga i le Atua, o le a mafai ai ona e faamanuiaina lou aiga, au fanau, au uo, lou lava olaga—i latou uma e te alofa i ai. O lou malamalama patino i le Atua e le gata o le meaalofa silisili lea o le a e foai atu, ae o le a aumaia ai ia te oe le olioli silisili e mafai ona e maua.

… Ou te folafola atu afai o le a outou sailia o Ia ma i latou tou te alolofa i ai i le lotomaualalo, faamaoni, ma le filiga, o le a outou iloa foi ma le mautinoa. O le a o’o mai lau molimau.

(Robert D. Hales, “Saili ia Iloa le Atua, Lo Tatou Tama Faalelagi, ma Lona Alo o Iesu Keriso,” Liahona, Nov. 2009, 32)