Luka 22:28–34, 54–61

“A Ua Ou Faatoga mo Oe, Ina Nei Mavae Lou Faatuatua”

O Iesu ma Peteru o loo savalivali ma talatalanoa

Na faatoa mavae lava ona muai faailoa atu e Iesu Keriso o le faamanatuga i Ona soo ae amata loa ona latou talanoa po o ai o le a faalataina le Matai ma le ala e sili atu ai le auauna atu i isi nai lo le talitalia o auaunaga mai isi. I le totonugalemu o nei talanoaga i le afeafe pito i luga lea na fai ai le tausamiga a Iesu ma Aposetolo o le Tausamaaga Mulimuli, sa fesoasoani Iesu ia Peteru ia ona malamalama i le faatauteega o le a feagai ma ia i lona olaga atoa. Sa aoao e le Faaola ia Peteru o le a mafai ona ia fesoasoani atu i isi i le mavae ona ia faamalosia o lona lava faatuatua ia Iesu Keriso. O lenei lesona ua faamoemoe e fesoasoani ia te oe e iloa ai lou manaomia ona faalagolago ia Iesu Keriso ma faaauau pea ona faamalosia lou faatuatua ia te Ia.

Faamalosia lou gafatia

Fai se lisi o tomai po o gafatia e mafai ona galo e se tasi pe afai latou te le faaaogaina pea pe faamalosia na gafatia (mo se faataitaiga, tomai faaafeleti po o tomai tusitusi).

E ono mafai faapefea ona faatatau lenei mea i lou gafatia ona maua le faatuatua ia Iesu Keriso?

I le lesona o le aso, o le a e aoao ai e uiga i le auala e finagalo ai Iesu Keriso e te faamalosia ai lou gafatia ona faatuatua ia te Ia.

Faaaoga se minute e mafaufau loloto ai i mea o loo e faia i le taimi nei pe e te manao e fai e faatupulaia ai lou faatuatua ia Iesu Keriso. E mafai ona e tusia i lau api faamaumau mo suesuega e uiga i mea o loo e faia i aso taitasi, faalevaiaso, pe faalemasina foi. O nei faatinoga e ono aofia ai ni sini o loo e galue ai i le taimi nei.

A o e suesue i le asō, vaavaai mo suiga po o faaleleiga e mafai ona e faia e faamalosia ai lou faatuatua ia Iesu Keriso ina ia mafai ai ona e faalagolago ia te Ia e tusa lava po o a tulaga o feagai ma oe i le olaga.

E malamalama Iesu Keriso i o tatou manaoga ma o le a fesoasoani ia i tatou

Sa tau atu e Iesu Keriso i Ona soo le malo i le lumanai o loo faatalitali mai mo i latou aua sa latou faaauau pea ona savavali faatasi i le faatuatua ma Ia (tagai i le Luka 22:28–30). Peitai, sa fesoasoani foi le Alii ia Simona Peteru e saunia mo le malaga faigata faaleagaga o le a le pine ona feagai ma ia.

Faitau i le Luka 22:31–34, ma vaavaai mo mea na finagalo le Alii e fesoasoani ia Peteru ia malamalama i ai.

Ina ia malamalama atili i le uiga o le manao o Satani e “lulu [Peteru] e pei o le saito” (fuaiupu 31), faitau le faamalamalamaga i le vaega “Tuu i le Faitalia: Manao e Aoao Atili?” i le faaiuga o le lesona.

O a ni mea ua e matauina e uiga i le malamalama o le Faaola ia Peteru? E faapefea ona ese mai i le ala na vaai ai Peteru ia te ia lava?
E mafai faapefea e mea na e aoaoina e uiga i le sootaga a Peteru ma Iesu Keriso ona fesootai foi i lau sootaga ma le Faaola?
Ina ua uma ona folafola atu e Peteru lona faatuatua ma le faamaoni ia Iesu Keriso, o le a le mea na faaalia e le Faaola o le a faia e Peteru?

Mulimuli ane i lena po, ina ua pue faapagotaina Iesu Keriso ma avatu i le fale o le ositaulaga sili e faamasinoina ai, sa mulimuli mamao atu Peteru (tagai i le Luka 22:54).

Faitau le Luka 22:55–62 e aoao ai pe na faapefea ona faataunuuina le valoaga a Iesu e uiga ia Peteru.

O le a se mea na e aoaoina e uiga i le Faaola mai Ana fegalegaleaiga ma Peteru lea e mafai ai ona e faatuatua ia Iesu Keriso?

Faamalosia o lo tatou faatuatua ia Iesu Keriso

E pei ona fesoasoani le Faaola ia Peteru ia malamalama i faanaunauga o Satani (tagai i le Luka 22:31), na lapataia i tatou e Peresitene Russell M. Nelson e faapea “ua faateleina e le fili ana osofaiga i le faatuatua ma i o tatou luga ma o tatou aiga i se saoasaoa tele” (Russell M. Nelson, “Malelega Amata,” Liahona, Nov. 2018,7). Sa ia aoao mai foi e faapea “ua faafaina e le fili ana taumafaiga e faalavelave i molimau ma taofia le galuega a le Alii” (Russell M. Nelson, “E Mafai Ona Tatou Faia ia Lelei Atu ma Ia Tatou Lelei Atu,” Liahona, Me 2019, 68).

O a nisi o auala o loo saili ai Satani e faaumatia lo tatou faatuatua ia Iesu Keriso i aso nei?

O le a se mea na fesoasoani ia te oe e faamalosia ai lou faatuatua ia Iesu Keriso?

Na faasoa mai e Elder Neil L. Andersen o le Korama a Aposetolo e Toasefululua nisi o auala e mafai ona tatou faamalosia ai lo tatou faatuatua ia Iesu Keriso.

O le a le faafuasei ona tuputupu ae lo outou faatuatua, ae e ala i filifiliga.

O le ala tatou te ola ai i o tatou olaga e faateleina pe faaitiitia ai foi lo tatou faatuatua. O le tatalo, usiusitai, faamaoni, mama a’ia’i o mafaufuaga ma galuega, ma le le manatu faapito e faateleina ai le faatuatua. A aunoa ma uiga nei, o le a faaitiitia lo tatou faatuatua. Aisea na fetalai atu ai le Faaola ia Peteru, “Ua ou faatoga mo oe, ina ne’i mavae lou faatuatua”? (Luka 22:32). Ona o loo i ai se fili ua fiafia e faaumatia lo tatou faatuatua! Ia tinoū i le puipuia o lou faatuatua.

(Neil L. Andersen, “O Le Faatuatua E Le Tupu Faafuasei, ae e ala i Filifiliga,” Liahona, Nov. 2015, 66)

Tuu i le faitalia: O e Manao e Aoao Atili?

Luka 22:31. O le a le uiga o le fetalaiga a le Faaola ina ua Ia ta‘u atu ia Peteru sa manao Satani e “lulu [o ia] e pei o le saito”?

Ina ia luluina le saito, o fatu saito aoga e tuueseese mai vaega e le faaaogaina o le laau. Sa faaaoga e Iesu lenei talafaatusa e fesoasoani ai ia Peteru (ma i tatou taitoatasi) ia iloa taumafaiga a Satani e faatamaia lo tatou faatuatua ma taofia ai i tatou mai le avea ma se vaega taua o le malo o le Atua.

O le a se mea e mafai ona faamalosia lo‘u faatuatua ia Iesu Keriso?

Ua aoao mai Elder Neil L. Andersen o le Korama a Aposetolo e Toasefululua:

O lo tatou faatuatua ua totonugalemu i le Atua lo tatou Tama ma Lona Alo, o Iesu Keriso, o lo tatou Faaola ma le Togiola. Ua faamalosia e lo tatou malamalama e faapea ua toefuataiina mai le atoatoaga o le talalelei i le lalolagi; o le Tusi a Mamona o le afioga a le Atua, ma o loo umia e perofeta ma aposetolo o aso nei ia ki o le perisitua. Tatou te faatauaina lo tatou faatuatua, o galuega e faamalolosia ai lo tatou faatuatua, tatalo mo le faatuatua faateleina, ma le faia o mea uma i lo tatou malosi e puipuia ma faasaogalemu ai lo tatou faatuatua. …

… E te faatofu oe lava ia i mea lava ia o loo fesoasoani e fausia le fatu o lou faatuatua: e te faatinoina le faatuatua ia Keriso, e te tatalo, e te mafaufau loloto i tusitusiga paia, e te salamo, e te tausi i poloaiga, ma e auauna atu i isi.

(Neil L. Andersen, “Tofotofoina o lo Outou Faatuatua,” Liahona, Nov. 2012, 39--40)

O le a se mea e mafai ona faatamaia ai lo‘u faatuatua ia Iesu Keriso?

Na a’oa’o mai Ahmad S. Corbitt, Fesoasoani Muamua i le Au Peresitene Aoao o Alii Talavou:

Au uo e, o le vaai faalemafaufau ma le loto i ai po o le vaai atu i mea e feteenai ma lou lava tagata moni, aemaise o ponokalafi, o le a faavaivaia ai lou faatuatua ia Keriso ma, a aunoa ma le salamo, e mafai ona faatamaia ai.

(Ahmad S. Corbitt, “E Mafai ona E Faapotopotoina Isaraelu!,” Liahona, Me 2021, 62)

Luka 22:32. O le a se mea e mafai ona tatou aoao mai e uiga i le liua mai le malamalama i le fetalaiga a le Faaola o loo ta‘u mai ai e lei liua atoatoa Peteru?

Na a’oa’o mai Elder David A. Bednar o le Korama o Aposetolo e Toasefululua:

O le mea mataina, o lenei Aposetolo maoae sa talanoa ma savavali faatasi ma le Matai, sa molimauina le tele o vavega, ma e i ai se molimau malosi i le paia o le Faaola. Ae na oo lava ia Peteru sa moomia se aoaoga faaopoopo mai ia Iesu e uiga i le mana o le Agaga Paia e faaliliuina ma faamamaina, ma lana matafaioi e auauna atu ai ma le faamaoni.

O le natura lava o le talalelei a Iesu Keriso e manaomia ai se suiga faavae ma le mausali i lo tatou lava natura lea e mafai e ala i le Togiola a le Faaola. O le liua moni e aumaia ai se suiga i lou talitonuga, o lou loto, ma le olaga e talia ai ma usitai atu i le finagalo o le Atua (tagai Galuega 3:19; 3 Nifae 9:20) ma e aofia ai se tautinoga maua’i e avea ma soo o Keriso.

(David A. Bednar, “Faaliliuina i le Alii,” Liahona, Nov. 2012, 106–7)