Luka 22:47–71; Ioane 18:1–27

“Ou Te Le Inu Ea i Le Ipu Ua Aumai Ia te A’u e Lo’u Tama?”

o fitafita o loo pue faapagotaina Iesu Keriso

Sa tuuto atoatoa atu Iesu Keriso i le faia o le finagalo o le Tama Faalelagi. Ua manino lava lenei mea i Ona puapuaga i le Faatoaga o Ketesemane, o Lona pue faapagotaina lea na sosoo ai, ma mea na tutupu e tau atu i le faasatauroga faatasi ma le taimi o Lona Faasatauroga. O lenei lesona e mafai ona fesoasoani ia te oe e mulimuli ai i le faataitaiga a Iesu Keriso e ala i le filifilia o le finagalo o le Tama Faalelagi i lou olaga.

O le faasiliina o le finagalo o le Tama Faalelagi nai o tatou lava loto

Manatu faapea sa e tu i luma o ni faitotoa se lua. O le filifili ai e ulu atu i le faitotoa muamua, o le a e mulimuli ai i le finagalo o le Tama Faalelagi, ae o le a e feagai ma se tofotofoga faigata. Afai e te filifili e te ulu atu i le faitotoa lona lua, o le a e solaese mai le tofotofoga, ae o le a e le faia le mea na finagalo i ai le Tama Faalelagi mo oe.

Aisea e ono filifili ai e se tasi le faitotoa muamua? faitotoa lona lua?
O le a se mea ua e iloa e uiga i le Tama Faalelagi e mafai ona fesoasoani ia te oe e filifili ai e ulu atu i le faitotoa muamua?

Faaaoga sina taimi e toe manatunatu ai i le soifuaga o Iesu Keriso ma le ala e talitutusa ai le filifilia o le faitotoa muamua ma le auala na Ia filifili e soifua ai. I le lesona o le aso, o le a e maua ai le avanoa e faitau ai e uiga i filifiliga na faia e le Faaola agai atu i le faaiuga o Lona soifuaga i la le tino. A o e suesue, vaavaai mo mea e musuia ai oe e uiga i faatinoga a Iesu Keriso.

Ua faalataina Iesu Keriso ma pue faapagotaina i Ketesemane

I le Faatoaga o Ketesemane, sa ole atu ai Iesu Keriso i Lona Tama e “aveese lenei ipu ia te a’u,” ae sa Ia faamanino mai sa Ia tuuto atu e faia le finagalo o le Tama ina ua Ia fetalai, “Ae aua le faia lo’u loto, a o lou finagalo” (Luka 22:42). O le ipu na talanoa e uiga i ai Iesu e faatatau i Ona puapuaga ma [Lona] maliu.

Faitau i le Ioane 18:1–4, ma vaavaai pe na faapefea ona faaauau e le Faaola ona faaalia Lana tautinoga i le faia o le finagalo o le Tama Faalelagi.

Fai se lisi o nisi o mea faigata na silafia e Iesu o le a “oo mai i Ona luga” i itula o le a oo mai ae sa Ia taliaina (fuaiupu 4).

Faitau i le Ioane 18:5–11, ma vaavaai pe na faapefea ona tali atu le Faaola i le au faatupu faalavelave faaauupegaina na o mai e ave atu o Ia.

Mo auiliiliga faaopoopo e le o tusifaamaumauina e Ioane o loo faaalia ai le alofa ofoofogia ma le filima’oti o Iesu Keriso, faitau i le Mataio 26:52–54 ma le Luka 22:50–51. Atonu foi e te manao e matamata i le ““The Savior Suffers in Gethsemane” mai le faailo taimi 5:55 e oo i le 8:30, o loo maua i le ChurchofJesusChrist.org.

O le a se mea na faagaeetia ai oe e uiga i le fetaiaiga a Iesu ma le au faatupu faalavelave faaauupegaina?
O le a se mea ua fesoasoani le faataitaiga a Iesu Keriso e te malamalama ai e uiga i le feagai ai ma mea faafeagai?
Aisea e te manatu ai na mafai e le Faaola ona taulimaina nei tulaga i le ala na Ia faia ai? O le a se mea o aoao atu e lenei mea ia te oe e uiga ia te Ia?

Ua aumaia Iesu Keriso i le faamasinoga

Ina ua uma ona pue faapagotaina Iesu, sa aumaia o ia i luma o le faitaulaga sili, o Kaiafa, ma isi taitai Iutaia. Faitau i le Luka 22:63–65 e iloa ai nisi o faiga le tonu na maua e Iesu mai ia i latou. Atonu foi e te manao e matamata le vitio “Jesus Is Tried by Caiaphas, Peter Denies Knowing Him” mai le faailotaimi 0:00 e oo i le 1:39, o loo maua i le ChurchofJesusChrist.org.

Ua Faamasinoina Iesu e Kaiafa, Ua Faafiti Peteru Na te Le Iloaina o Ia

Aisea e te manatu ai sa finagalo naunau le Faaola e onosaia sea ituaiga faiga saua ma le amioletonu?

I le Tusi a Mamona, na aoao mai ai Nifae ma Apinati e uiga i le mafuaaga na gauai ai ma le lotomalie le Faaola i ia ituaiga faiga. Faitau i le 1 Nifae 19:8-9 ma le Mosaea 15:5–7 e saili ai po o a mafuaaga na laua lisiina.

I lau api faamaumau mo suesuega, tusi i lalo po o a lesona e mafai ona e aoaoina e uiga pe mai ia Iesu Keriso mai nei fuaiupu.

Atonu e te manao e tusi i lalo ni nai mafuaaga e taua ai pe anoa ia te oe le malamalama i nei lesona.

O le lesona e tasi e taua ona malamalama i ai mai nei fuaiupu o le, na gauai atu Iesu Keriso i le finagalo o Lona Tama i mea uma.

O le a sou manatu o le a le mea na malamalama i ai Iesu e uiga i le Tama Faalelagi o le a mafai ai ona gauai atoatoa atu ai o Ia i Lona finagalo?

Mafaufau i se taimi na e filifili ai e mulimuli i le finagalo o le Tama Faalelagi nai lo le ave o le faamuamua i le faaletagata lava ia.

O le a se mea na faigata e uiga i le filifilia o le finagalo o le Atua nai lo le mea atonu na e manao ai?

O a faamanuiaga ua e maua e ala i le filifili e mulimuli i le finagalo o le Tama Faalelagi e tusa lava pe sa faigata?

Na fesiligia e Peresitene Russell M. Nelson ni fesili e uiga i lo tatou naunau e gauai atu i le finagalo o le Atua. Faaalu sina taimi e mafaufau loloto ai pe mafai faapefea ona e taliina ma le faamaoni nei fesili. Mafaufau po o le a se mea e te ono manaomia ina ia mafai ai ona e fai atu ioe i fesili taitasi.

O e loto e faamuamua le Atua i lou olaga? O e loto e avea le Atua ma aafiaga sili ona taua i lou olaga? Pe o le a e faatagaina Ana afioga, Ana poloaiga, ma Ana feagaiga e faatosinaina mea e te faia i aso taitasi? Pe o le a e faatagaina Lona siufofoga ia faamuamua i lo se isi lava leo? O e loto e faataga soo se mea o finagalo o Ia e te faia ia faamuamua i lo isi faamoemoega uma? O e loto e tofatumoanaina lou loto i Lona finagalo?

(Russell M. Nelson, “Ia Faamuamua le Atua,” Liahona, Nov. 2020, 94.)

Tuu i le faitalia: O e Manao e Aoao Atili?

O le a se mea e mafai ona tatou aoaoina e uiga i le Faaola mai Lona naunau e gauai atu i le Tama Faalelagi?

Na a’oa’o mai Elder David A. Bednar o le Korama a Aposetolo e Toasefululua e faapea, o le agamalu o le Faaola o le uiga faaalia autu lea na mafai ai e Ia ona gauai atu Lona loto i le finagalo o le Tama Faalelagi.

O le gauai atu faifai pea ma le finagalo i ai o le Alii ma le malosi o le loto pulea e faagaeetiaina uma ai ma aoga mo i tatou uma. Ina ua taunuu atu se vaega faaauupegaina o leoleo o le malumalu ma fitafita Roma i Ketesemane e taofia ma pue faapagotaina Iesu, sa se’i e Peteru lana pelu ma tipi ese ai le taliga taumatau o le auauna a le ositaulaga sili [tagai i le Ioane 18:10]. Ona pa’i atu lea o le Faaola i le taliga o le auauna ma faamalolo ia te ia [tagai i le Luka 22:51]. Faamolemole ia matau sa Ia aapa atu ma faamanuia i lē o le a pueina o Ia e faaaoga ai le mana faalelagi lava e tasi lea semanu na mafai ona faasaoina ai o Ia mai le pueina ma faasatauroina.

… O le agamalu o le Faaola sa manino lava i Lana tali faautauta, malosi o le loto pulea, ma le le loto e faaaoga Lona mana lemafuatia mo lona lava ia lelei.

(David A. Bednar, “Agamalu ma Maualalo o le Loto,” Liahona, Me 2018, 33.)

Aisea o le a ou manao ai e gauai atu lo’u loto i le Atua?

Na aoao mai Elder Neal A. Maxwell (1926-2004) o le Korama a Aposetolo e Toasefululua:

E toatele i tatou … ua tatou manatu sese e faapea, i se isi itu, o le faataga o o tatou loto ia tofatumoanaina i le finagalo o le Atua, tatou te faamaumau ai i tatou lava (tagai i le Mosaea 15:7). O le mea moni lava o loo tatou popole ai, e le o le faamatuuina atu o le tagata lava ia, ae o mea ua manatu faapito i ai—e faapei o a tatou matafaioi, o o tatou taimi, o o tatou mamalu, ma a tatou meatotino. E leitioa faatonuina i tatou e le Faaola ia faamaumau o tatou lava tagata (tagai i le Luka 9:24). Ua na ona talosaga mai o Ia e faamaumau o tatou tagata tuai ina ia maua ai o tatou tagata fou. E le o se fesili o le lafoaia ai o se faasinomaga o se tagata ae o le mauaina o lona faasinomaga moni! …

… O le gauai atu o le loto o se tasi, o le mea moni e na o le pau lea o le mea e tulagaese le patino e tatau ona tatou tuu i luga o le fata faitaulaga a le Atua. O isi mea e tele tatou te “avatu”, uso e ma tuafafine, o le mea moni, o mea ia ua uma ona Ia tuuina mai pe nonoina mai ia i tatou. Ae ui i lea, a iu ina tuuina atu e oe ma a’u i tatou lava, e ala i le gauai atu o tatou loto taitoatasi ia tofatumoanaina i le finagalo o le Atua, o lona uiga o loo tatou tuuina moni atu se mea ia te Ia! E na o le pau lena o le meatotino moni, e ia i tatou e tuuina atu!

(Neal A. Maxwell, “Swallowed Up in the Will of the Father,” Liahona, Nov. 1995, 23, 24)