Lucas 23:33–46; Juan 19:26–30

Ang Kalooy sa Manluluwas didto sa Krus

Ang mga butang nga gisulti ni Jesus samtang Siya anaa sa krus nagpakita sa Iyang kinaiya ug balaan nga mga hiyas. Samtang ikaw magtuon, paningkamot nga mapalambo ang imong tinguha nga mas mahimong sama kang Jesukristo samtang ikaw nagkat-on gikan sa Iyang ehemplo sa Iyang pagkalansang sa krus.

Pag-atiman sa uban

Pamalandongi ang mosunod nga mga pangutana: Kanunay ka ba nga nagpakita og kalooy ngadto sa uban? Ngano man o nganong wala?

1. Sa imong journal sa pagtuon, ilista ang mga sitwasyon diin lagmit lisod alang kanimo ang pagpakabana sa mga kabalaka ug kaayohan sa uban. Ipasabot nganong kadto nga mga sitwasyon makapalisod kanimo sa pagbuhat sa ingon.

Ikonsiderar ang pagtubag sa mosunod nga pag-aghat diha sa imong journal sa pagtuon:

• Sa unsang paagi mahimong mas maayo ang imong kinabuhi kon magpakita ka og kalooy sa uban bisan kon anaa ka sa lisod nga mga kahimtang?

Niini nga leksiyon ikaw adunay kahigayonan sa pagtuon sa ehemplo sa Manluluwas sa pagtabang sa uban bisan sa panahon sa Iyang masakit nga kasinatian sa krus. Sa inyong pagtuon sa ehemplo sa Manluluwas, pangita sa giya sa Espiritu Santo aron matabangan ka nga magtinguha nga mas mahisama Kaniya.

Mga kasinatian sa wala pa ug atol sa Paglansang sa Krus

Hinumdomi ang mga kasinatian sa Manluluwas sa wala pa ug atol sa Iyang Pagkalansang sa Krus:

• Siya nag-antos alang sa mga sala sa kalibotan didto sa Getsemani (tan-awa sa Lucas 22:39–44).

• Siya gibudhian ni Hudas ug gibiyaan sa Iyang Apostoles (tan-awa sa Marcos 14:43–50).

• Siya gitaral, gidagmalan, ug gilud-an sa mga lider sa Judio (tan-awa sa Mateo 26:57–68).

• Siya gipangutana nila ni Pilato ug ni Herodes ug gibiaybiay ni Herodes ug sa iyang mga sundalo (Lucas 23:1–24).

• Siya grabe nga gidagmalan ug gilatos sa mga Romanong sundalo (tan-awa sa Mateo 27:26–31).

• Iyang gidala ang Iyang krus sa pila ka bahin paingon sa Golgota (tan-awa sa Juan 19:16–17).

• Gipalapos ang mga lansang sa Iyang mga kamot ug mga tiil ug gilansang sa krus taliwala sa duha ka mga kawatan (tan-awa sa Lucas 23:33; tan-awa usab sa Juan 20:25).

• Siya nagbitay sa krus (tan-awa sa Mateo 27:45–50; Marcos 15:25).

Paghunahuna mahitungod sa unsang paagi kini nga mga hitabo nakaapekto sa inyong pagbati ngadto sa Manluluwas ug unsa ang Iyang giantus alang kanimo. Basaha ang mosunod nga mga tudling, nga naglakob og mga pamahayag sa Manluluwas samtang Siya anaa sa krus. Ilha ang mga kamatuoran mahitungod ni Jesukristo gikan sa Iyang mga pamahayag, ug ilista kini diha sa imong journal sa pagtuon.

• Lucas 23:33–34. Ang Manluluwas misulti niini nga mga pulong mahitungod sa mga sundalo nga naglansang Kaniya (tan-awa sa Joseph Hubad ni Joseph Smith bahin niining bersikulo diha sa Lucas 23:34, footnote c).

• Lucas 23:39–43. Kini nga mga bersikulo nagrekord unsa ang gisulti sa mga kawatan nga gilansang uban sa Manluluwas ug giunsa pagtubag sa Manluluwas. (Hinumdomi nga ang Propeta Joseph Smith nagtudlo nga kon ang Manluluwas nagpasabot niini nga kawatan nga mouban kaniya sa paraiso, Siya nagtudlo kaniya nga “I will be with thee in the world of spirits & will teach thee or answer thy inquiries” [“Discourse, 11 June 1843–A, as Reported by Wilford Woodruff,” 44, josephsmithpapers.org]).

• Juan 19:26–27. Kini nga mga bersikulo nagrekord unsa ang gisulti sa Manluluwas ngadto sa Iyang inahan, si Maria, ug sa Apostol nga si Juan.

2. Tubaga ang mosunod nga mga pangutana diha sa imong journal sa pagtuon:

• Unsa man ang imong nakat-onan mahitungod kang Jesukristo nga labing makahuluganon kanimo? Ngano man?

• Sa unsang mga paagi gusto nimong mahisama sa Manluluwas? Ngano man?

Ang Manluluwas wala lang maghunahuna mahitungod sa Romanong mga sundalo, sa mga kawatan, ug sa Iyang inahan samtang anaa sa krus. Si Presidente Russell M. Nelson nagtudlo og usa ka dugang nga paagi nga ang Manluluwas nagtutok sa uban samtang Siya anaa sa pag-antos.

Sama diha sa tanang butang, si Jesukristo mao ang atong labing halangdon nga ehemplo, ‘tungod sa kalipay nga gibutang sa iyang atubangan, giantos niya ang krus’ [Mga Hebreo 12:2]. Hunahunaa kana! Aron Iyang maantus ang pinakasakit nga kasinatian nga nalahutay sukad dinhi sa yuta, ang atong Manluluwas nagtutok sa kalipay!

Ug unsa man ang kalipay nga giandam diha sa Iyang atubangan? Siguradong naglakip kini sa kalipay sa paglimpyo, pag-ayo, ug paglig-on kanato; sa kalipay gumikan sa pagbayad sa mga sala sa tanan kinsa maghinulsol; sa kalipay sa paghimong posible alang kaninyo ug kanako nga makauli—limpyo ug takos—aron nga mopuyo uban sa atong Langitnong mga Ginikanan ug mga pamilya.

(Russell M. Nelson, “Hingpit nga Kalipay ug Espirituhanon nga Pagsugakod,” Liahona, Nob. 2016, 82–83).

• Unsa ang gitutokan sa Manluluwas samtang nag-antos Siya alang kanato?

• Unsa ang gitudlo ni Presidente Nelson nimo mahitungod sa mga tinguha sa Manluluwas alang kanimo?

Pamalandong sa makadiyot ang kamatuoran nga samtang ang Manluluwas anaa sa krus, Siya nagtutok kanimo ug sa kalipay sa pagtabang nimo nga mobalik sa Langitnong Amahan.

• Unsa nga kalainan ang mahimo niini diha sa imong kinabuhi aron masabtan kini nga kamatuoran? Ngano nga kining kahibalo makahimo og kalainan sa imong kinabuhi?

3. Tubaga ang mosunod nga mga pangutana diha sa imong journal sa pagtuon:

• Kanus-a ka nakatabang og usa ka tawo samtang ikaw nakasinati og kalisud, o kanus-a nga ang usa ka tawo mibuhat niini kanimo?

Kon makatabang kini aron makita ang usa ka ehemplo, tan-awa ang “Love One Anoth¬er as He Has Loved Us,” nga anaa sa ChurchofJesusChrist.org, gikan sa time code 3:22 hangtod sa 7:54.Love One Another as He Has Loved Us

Maghigugmaay sa Usag Usa sama nga Siya Nahigugma Kanato

Si Elder Alonso nagtudlo kanato unsaon nato sa pagsunod sa ehemplo sa gugma sa Manluluwas pinaagi sa pagserbisyo ug pagpasaylo sa uban.

Tinguhaa ang inspirasyon sa Espiritu Santo pinaagi sa pagpamalandong sa ehemplo sa Manluluwas ug unsa ang imong nabati karon. Ilha ang mga paagi nga kamo mas mahimong mahisama ni Jesukristo diha sa pagpakita og gugma ug kalooy sa uban bisan sa panahon sa imong kaugalingong mga hagit. Dayon isulat kini nga mga paagi diha sa imong journal sa pagtuon. Rebyoha ang lista nga imong nahimo, ug mainampoon nga mopili og usa sa mga paagi nga mas mahimong mahisama kang Jesukristo. Ilha kini diha sa imong entry sa journal. Pag-ampo ug pangita og mga oportunidad sa pagpadayon niini nga buhat.

“Natapos na”

Human mag-antos og daghang mga oras diha sa krus, ang Manluluwas misulti sa Iyang kataposang mga pulong.

Basaha ang Juan 19:28–30 ug Lucas 23:46. Markahi ang kataposang mga pamahayag sa Manluluwas sa mortalidad.

• Unsa ang matabang niini nga mga pamahayag ngari kanato aron masabtan ang mahitungod sa Manluluwas ug sa Iyang misyon?

Sama sa Manluluwas, makompleto nato unsa ang gusto sa Amahan alang sa atong kinabuhi. Hinumdomi kini samtang ikaw magtinguha sa pagsunod sa unsa ang imong nahukman nga buhaton karon.

Opsiyonal: Gustong Makakat-on pa og Dugang?

Juan 19:27. Unsa ang atong makat-onan gikan sa pamahayag sa Manluluwas nga “Tan-awa ang imong inahan”?

Makasunod kita sa ehemplo ni Jesukristo samtang kita maningkamot nga moila, mohigugma, ug moatiman sa atong mga inahan. Si Elder Jeffrey R. Holland sa Korum sa Napulog Duha ka Apostoles naghatag og pasidungog sa matarong nga mga inahan ug gitandi ang ilang gugma ngadto sa gugma sa Manluluwas.

Tan-awa ang “Behold Thy Mother [Tan-awa ang Imong Inahan],” anaa sa ChurchofJesusChrist.org, gikan sa time code 0:20 hangtod sa 2:53.

Tan-awa ang Imong Inahan

Si Jeffrey R. Holland mipasidungog sa kalig-on, dedikasyon, impluwensya, ug gugma sa mga inahan.

Sa unsang paagi ang pagtabang sa uban bisan kon kita nanlimbasog makahulma kon kinsa kita nga mamahimo?

Si Elder David A. Bednar sa Korum sa Napulog Duha ka Apostoles nagtudlo:

Ang kinaiya mapadayag … pinaagi sa gahom sa pagsabot sa pag-antos sa ubang tawo samtang kita mismo anaa sa pag-antos; sa abilidad nga mabatyagan ang kagutom sa uban samtang kita gigutom; ug pinaagi sa gahom sa pagtabang ug pagpakita og kalooy sa espirituhanong pag-antos sa uban samtang kita mismo naa taliwala sa atong kaugalingong espirituhanon nga pag-antos. Sa ingon, ang kinaiya mapakita pinaagi sa pagtan-aw ug pagtabang sa uban kon ang natural ug kinaiyanhon nga pagtubag motuhop sa kaugalingon. Kon ang maong kapasidad mao gayod ang sukod sa moral nga kinaiya, nan ang Manluluwas sa kalibotan maoy hingpit nga ehemplo sa ingon nga pagkamakanunayon ug pagkamanggiloy-ong kinaiya.

(David A. Bednar, “The Character of Christ [Ang Kinaiya ni Kristo]” [Brigham Young University–Idaho devotional, Ene. 25, 2003], byui.edu)

Unsa nga mga panalangin ang moabot samtang kita moserbisyo sa uban sa dihang ang mga butang lisod alang kanato?

Si Presidente Henry B. Eyring sa Unang Kapangulohan nagtudlo:

Kinahanglan gayod kitang motimaan sa kalisdanan sa uban ug mosulay sa pagtabang. Kana lisod gayod kaayo kon kita mismo grabe nga gisulayan. Apan atong madiskobrihan samtang moalsa kita sa palas-anon sa laing tawo, bisan gamay lang, nga ang atong likod malig-on ug makabantay kita og kahayag diha sa kangitngit.

(Henry B. Eyring, “Nasulayan, Napamatud-an, ug Nahashasan,” Liahona, Nob. 2020, 98)