Mateo 27:24–66; Marcos 15:15–38
Samtang ang Manluluwas nakasinati og grabe nga kasakit diha sa pagbitay sa krus, gitamay Siya sa mga kaaway ug giingnan Siya nga luwason ang Iyang kaugalingon gikan sa pagpasakit. Apan Siya matinud-anon nga milahutay, mipadayon sa Iyang pag-antos alang kanato. Kini nga leksiyon mahimong makatabang nimo nga mas makasabot ug magmapasalamaton sa pag-antos ug kamatayon sa Manluluwas didto sa krus isip importanteng bahin sa Iyang Pag-ula.
Jesukristo mihatag sa Iyang kinabuhi alang kanato
Niini nga leksiyon imong tun-an ang mahitungod sa kamatayon ni Jesukristo. Paggahin og higayon sa pagpamalandong unsa ang imong nahibaloan mahitungod sa kamatayon sa Manluluwas ug unsa ang imong nabati mahitungod niini. Motuo ka ba nga Siya namatay aron sa pagluwas kanimo? Kon mao, sa unsang paagi nga ikaw makapakita sa imong kamapasalamaton alang sa Iyang sakripisyo? Sa imong pagtuon, tinguhaa ang giya sa Espiritu Santo aron matabangan ka sa pagtubag niining mga pangutana.
Ang Pagpalansang ni Jesukristo
Human ang Manluluwas gitaral sa mga Judio ug dayon ni Herodes ug Pilato, brutal Siya nga gibunalan ug gidala sa Golgota (nailhan usab nga Kalbaryo) aron ilansang sa krus.
Ikonsiderar ang pagmarka sa hugpong sa mga pulong “Unya gilansang nila siya sa krus” diha sa Mateo 27:35. Basaha ang Giya ngadto sa mga Kasulatan o Bible Dictionary ubos sa “Paglansang diha sa Krus” aron makita unsa ang nalakip niini nga buhat.
Basaha ang mosunod nga mga bersikulo mahitungod sa Paglansang sa Krus sa Manluluwas. Markahi ang mga detalye nga sa imong pamati importante.
-
Mateo 27:27–31. Ang Romanong mga sundalo nagbugalbugal sa Manluluwas.
-
Mateo 27:35–44. Ang Manluluwas gibugalbugalan diha sa krus.
-
Mateo 27:45–46, 50. Ang Manluluwas nag-antos ug namatay diha sa krus. Timan-i: Si Jesus gilansang sa “ikatulong oras” (alas 9:00 sa buntag; tan-awa sa Marcos 15:25). “Ang ikaunom nga oras” nagpasabot sa alas 12:00 sa udto; “ang ikasiyam nga oras” nagpasabot sa alas 3:00 sa hapon.
Sa pagtabang nimo nga ma-visualize kini nga mga panghitabo, pwede nimo tan-awon ang “Jesus Is Scourged and Crucified,” makita sa ChurchofJesusChrist.org, gikan sa time code 1:04 hangtod sa 4:48.
Jesus Is Scourged and Crucified
A band of soldiers strips Jesus of His clothes, scourges Him, and mocks Him. He then carries His cross to Golgotha and is crucified by Roman soldiers. Matthew 27:26–50
Si Elder Jeffrey R. Holland sa Korum sa Napulog Duha ka Apostoles nagpasabot nganong ang Manluluwas nangutana, “Dios ko, Dios Ko, nganong gibiyaan mo ako?” (Mateo 27:46).
Tanawa ang “None Were with Him,” makita sa ChurchofJesusChrist.org, gikan sa time code 9:00 hangtod sa 12:46, o basaha ang mosunod nga pahayag.
None Were with Him
Trumpeted from the summit of Calvary is the truth that we will never be left alone nor unaided, even if sometimes we may feel that we are.
Sa bug-os nga pagsalig sa akong kalag ako mopamatuod nga … ang perpekto nga Amahan wala mobiya sa Iyang Anak niana nga oras. Sa pagkatinuod, personal nako kini nga pagtuo nga sa tanang mortal nga pangalagad ni Kristo ang Amahan wala pa gayod sukad mahimong suod kaayo sa Iyang Anak kay sa niadtong kinasakitan nga kataposang gutlo sa pag-antos. Bisan pa man, … ang Amahan sa mubong higayon mitangtang gikan kang Jesus sa kahupayan sa Iyang Espiritu, mitangtang sa Iyang personal nga presensiya. Kadto gikinahanglan, sa pagkatinuod mao kadto ang sentro sa kamahinungdanon sa Pag-ula, nga kining perpekto nga Anak kinsa wala gayod makapamulong og dautan, wala makabuhat og sayop, wala makahikap og mga hugaw nga butang, kinahanglang masayod kon unsay bation sa ubang tawhanong kaliwat—kitang tanan—kon kita makabuhat sa ingon nga mga sala. Aron mahimo ang Iyang Pag-ula nga walay kinutoban ug mahangtoron, kinahanglan Siyang motagamtam kon unsay bation sa pagkamatay dili lamang sa pisikal apan usab sa espirituhanong paagi, aron mabatyagan unsay bation kon ang balaang Espiritu mobiya, unsay bation kon siya gitalikdan sa hingpit, kapait ug kawalay paglaom nga pag-inusara.
(Jeffrey R. Holland, “Walay Bisan Usa nga Nakig-uban Kaniya,” Liahona, Mayo 2009, 87-88)
-
Unsa ang natabang ni Elder Holland aron nga mas makasabot ka bahin sa Langitnong Amahan ug ni Jesukristo?
-
Unsay nakapadani kaayo kanimo kabahin ni Jesukristo gikan niini nga mga panghitabo? Ngano man?
Mga Cross-Reference
Ang Manluluwas adunay gahom sa pagluwas sa Iyang kaugalingon gikan sa pagpakaulaw ug brutal nga pagpasakit nga kasinatian didto sa krus (tan-awa sa Mateo 26:52–54), apan wala Niya buhata.
Basaha ang labing menos tulo sa mosunod nga mga kasulatan aron madiskobre ngano. Ikonsiderar ang paghimo og tsart sama sa mosunod aron mahan-ay ang imong mga hunahuna ug mga pagbati. Mahimo usab nimo nga i-link o i-cross-reference kini nga mga tudling ngadto sa Mateo 27:26 o maghimo og ilhanan uban niini nga mga pakisayran nga adunay ulohan nga imong gusto.
|
Nganong ang Manluluwas mitugot sa pagpalansang sa krus |
Ang mga panalangin nga madawat nato tungod kay Iyang gibuhat |
|---|---|
Nganong ang Manluluwas mitugot sa pagpalansang sa krus | Ang mga panalangin nga madawat nato tungod kay Iyang gibuhat |
Doktrina ug mga Pakigsaad 35:2
Doktrina ug mga Pakigsaad 76:40–42
-
Hain nga mga tudling ang labing makahuluganon kanimo? Ngano man?
-
Unsa ang imong nakat-onan mahitungod kon nganong ang Manluluwas andam magpalansang sa krus alang kanato?
-
Hain sa mga panalangin nga nalista niining mga kasulatan diin ikaw labing mapasalamaton? Ngano man?
Importante nga masabtan nga isip kabahin sa Iyang Pag-ula, si Jesukristo gilansang sa krus alang sa mga sala sa kalibotan. Ang pag-antos nga gisugdan sa Manluluwas didto sa Tanaman sa Getsemani nakompleto didto sa krus sa Golgota. Kon ang Manluluwas wala namatay alang sa atong mga sala, dili kita makabalik ngadto sa atong Amahan sa Langit.
-
Unsaon nimo pagpasabot sa usa ka tawo giunsa nga ang Paglansang sa Krus sa Manluluwas kabahin sa Iyang Pag-ula? Unsaon nimo pagpasabot nganong makahuluganon man kini kanimo?
Si Bishop Gérald Caussé mipasabot kon sa unsang paagi ang Pag-ula sa Manluluwas nahimong personal alang sa matag usa kanato.
Bisan kon kini walay kinutoban ug malukpanon, ang pag-ula sa Ginoo sa talagsaong paagi personal ug hinasa nga gasa, nga moangay sa matag usa kanato. Sama sa pagdapit ni Jesus sa matag usa sa Nephite nga mga disipulo nga mobati sa Iyang mga samad, namatay Siya alang sa matag usa kanato, sa personal nga paagi, sama nga kamo o ako ra ang tawo sa yuta. Iyang gipadangat kanato ang personal nga pagdapit nga moduol Kaniya ug mogamit sa talagsaong mga panalangin sa Iyang Pag-ula.
(Gerald Caussé, “Usa ka Buhi nga Saksi sa Buhi nga Kristo,” Liahona, Mayo 2020, 40)
-
Nganong sa imong pamati importante nga maila ang personal nga kinaiyahan sa Pag-ula sa Manluluwas?
1. Aron matabangan kamo nga mabati ug mahinumdom sa personal nga kinaiyahan sa Pag-ula sa Manluluwas alang kanimo, pagsulat og entry sa journal. Ikosiderar ang pag-apil sa mosunod:
-
Mga panalangin nga imong madawat tungod sa pag-antos sa Manluluwas ug kamatayon didto sa krus alang kanimo
-
Unsa ang kahulugan alang kanimo nga Siya personal nga namatay alang kanimo
-
Mga hunahuna ug mga impresyon nga imong nadawat gikan sa Espiritu Santo
Opsiyonal: Gustong Makakat-on pa og Dugang?
Unsa ang importansya sa lugar ug oras sa Paglansang sa Krus sa Manluluwas?
Si Presidente Russell M. Nelson mipasabot:
Ang ikaduhang hugna sa Iyang Pag-ula nagmalamposon didto sa krus. …
Si Pilato naghatod sa Kordero sa Dios ngadto sa pagpalansang sa krus sa samang oras ang mga Nating karnero sa duol giandam alang sa pagsakripisyo. (Tan-awa sa Juan 19:13–14.)
Ang Paglansang nahitabo sa usa ka bungtod nga gitawag og Golgotha (Griyego) o Kalbaryo (Latin) nagpasabot og “ang kalabera.” Ang kalabera nagsimbolo og kamatayon. Sa usa ka dapit nga sama niini, ang maulaong sakripisyo nakompleto. Diha sa krus, ang Manluluwas sa kalibotan gibayaw sa kamatayon sa labing dakong posible nga kahulugan—ang pagkaamgo ug pagkatinuod sa gahom sa Ginoo ibabaw sa kamatayon.
(Russell M. Nelson, “Why This Holy Land?,” Ensign, Dis. 1989, 18–19)
Nganong wala man luwasa ni Jesukristo ang Iyang kaugalingon?
Si Elder Ronald A. Rasband sa Korum sa Napulog Duha ka Apostoles mipasabot:
“Kanaog sa krus,” ang pundok sa mga dili tumutuo mibiay-biay Kaniya didto sa Kalbaryo [Mateo 27:40]. Makahimo unta Siya didto og usa ka milagro. Apan nakahibalo Siya sa kataposan gikan sa sinugdanan, ug Siya nagtinguha nga magmatinud-anon sa plano sa Iyang Amahan. Kana nga ehemplo kinahanglan nga dili mawala diha kanato.
(Ronald A. Rasband, “Tan-awa! Ako Mao ang usa ka Dios sa mga Milagro,” Liahona, Mayo 2021, 111)
Pila ka mga tawo ang naapektohan pinaagi sa pag-antos sa Manluluwas ug Pagpalansang sa Krus?
Si Elder Quentin L. Cook sa Korum sa Napulog Duha ka Apostoles mipasabot:
Ang Manluluwas … [nag]antos sa dili mahulagway nga kasakit didto sa Getsemani ug sa krus aron mahingpit ang Iyang pag-ula. … Gibuhat Niya kini alang sa matag lalaki ug babaye nga gilalang o ilalang pa sa Dios.
(Quentin L. Cook, “Ang Mahangturong mga Butang nga Nahitabo Kada Adlaw,” Liahona, Nob. 2017, 52)
Unsa kaha ang nasinati sa Manluluwas didto sa krus?
Si Elder James E. Talmage (1862–1933) Korum sa Napulog Duha ka Apostoles mipasabot:
Ingon og, nga dugang pa sa makahadlok nga pag-antos sa paglansang, ang panghingutas didto sa Getsemani nahisgotan pag-usab, mas midako pa lapas sa tawhanong gahom sa paglahutay. Nianang labing mapait nga takna ang himatyon nga Kristo nag-inusara, nag-inusara sa labing mapait nga kamatuoran. Aron ang labing dakong sakripisyo sa Anak matuman sa tibuok kahingpitan niini, ang Amahan ingon og mihunong sa suporta sa Iyang Presensiya, gisalig ngadto sa Manluluwas sa mga tawo ang himaya sa kompleto nga kadaugan batok sa mga gahom sa sala ug sa kamatayon.
(Jesus the Christ [1916], 661)
Si Elder Bruce R. McConkie (1915–85) sa Korum sa Napulog Duha ka Apostoles nagtudlo:
Dayon ang kalangitan midag-om. Ang kangitngit mitabon sa yuta sulod sa tulo ka oras, sama usab nga nahitabo diha sa mga Nephite. Adunay kusog nga unos, sama nga ang Dios mismo sa kinaiyahan naghingutas.
Ug sa tinuoray Siya naghingutas gayod, samtang Siya nagbitay diha sa krus sulod sa misunod pang tulo ka oras, gikan sa udto hangtod sa 3:00 sa hapon, ang tanang walay kataposang paghingutas ug walay kaluoy nga kasakit sa Getsemani nahitabo pag-usab.
(Bruce R. McConkie, “The Purifying Power of Gethsemane,” Ensign, Mayo 1985, 10)