Juan 18:33–40; Lucas 23:8–11

Jesus Gitaral ug Gibunalan

Human si Jesus gidakop ug bakak nga gitaral atubangan sa mga lider sa Judio, Siya gidala aron hukman ni Pilato, kinsa adunay Romanong hurisdiksiyon. Ang Manluluwas maaghop nga mitugyan sa mga Romano ug masakit nga gibunalan ug gisentensiyahan og kamatayon. Kini nga leksiyon gituyo aron sa pagtabang kanimo nga mas makat-on pa mahitungod sa gugma sa Manluluwas alang sa tanan ug sa Iyang hingpit nga kinaiya ug unsaon nimo nga mas makasunod sa Iyang ehemplo.

Mibati nga gidaugdaog

• Unsa ang pipila ka komon nga mga sitwasyon diin ang usa ka tin-edyer mahimong biaybiayon, bakak nga akusahan, o gidaugdaog?

• Unsa ang pipila ka paagi nga ang usa ka kasagaran nga tin-edyer mahimong motubag ngadto sa samang pagtagad?

Ang Ginoo mahimong mouban kanato ug motabang kanato sa paglambo gikan sa malisod nga mga kasinatian. Siya makatabang nato sa pagsagubang sa kalisod ug pagsulay sa Kristonanon nga mga paagi. Hunahunaa ang imong kaugalingon nga mga kasinatian nga gibiaybiay, bakak nga giakusahan, o gidaugdaog, lakip na kon giunsa nimo sa pagsagubang ug ngano.

Sa dihang si Jesukristo haduol na sa Iyang kataposang mga yugto sa Iyang kinabuhi, Siya gibiaybiay, bakak nga giakusahan, ug gidaugdaog. Samtang imong tun-an kining kataposan nga mga yugto sa kinabuhi sa Manluluwas, pangita og mga kinaiya nga nakatabang Kaniya aron matinud-anong molahutay ug mokompleto sa Iyang misyon. Usab mainampoong ikonsiderar unsaon ninyo pagsunod sa Iyang ehemplo.

Si Jesus dili makiangayong gitaral ug gihukman sa kamatayon

Human si Jesus nag-antos sa Tanaman sa Getsemani, Siya gidakop, ug ang mga lider sa Judio (ang Sanhedrin) dili makiangayong mitaral Kaniya ug mihukom Kaniya sa kamatayon. Apan, tungod kay ang Israel anaa ubos sa Romanong pagmando, ang pagpatay mahimo lamang itugot pinaagi sa mga Romano. Tungod niini nga rason, gidala sa mga Judio si Jesus ngadto kang Pilato, ang Romanong lider sa Judea, nag-akusa Kaniya og pagrebelde batok sa Romanong gobyerno diha sa pag-angkon nga “ang Hari sa mga Judio” (tan-awa sa Marcos 15:2). Gipadala ni Pilato si Jesus ngadto kang Herodes Antipas, kinsa anaa sa Jerusalem alang sa Pangilin sa Pagpalabay, naglaom nga itaral Siya ni Herodes didto sa Galilea, apan gipadala ni Herodes og balik si Jesus ngadto kang Pilato.

Pagbasa og duha o daghan pa sa mosunod nga mga asoy, nga nag-asoy kon giunsa nga dili makiangayon nga giakusahan si Jesus ug sa kataposan gihukman. Sa imong pagbasa, pangitaa kon giunsa ni Jesus pagtubag ang matag usa niini nga mga sitwasyon. Hinumdomi nga Siya adunay gahom sa pagpalingkawas sa Iyang kaugalingon gikan niini nga mga kahimtang (tan-awa sa Mateo 26:52–54).

1. Si Jesus gisukitsukit sa mga Sanhedrin. Basaha ang Mateo 26:57–68, o tan-awa ang bidyo “Jesus Is Tried by Caiaphas, Peter Denies Knowing Him [Si Jesus Gitaral ni Caiaphas, Si Pedro Milimod nga Nakaila Kaniya]” gikan sa time code 0:00 hangtod sa 1:39. Kini nga bidyo anaa sa ChurchofJesusChrist.org.

   Jesus Is Tried by Caiaphas, Peter Denies Knowing Him

   Jesus is tried before Caiaphas and the chief priests. Peter denies knowing Him and weeps bitterly.

2. Si Jesus gisukitsukit ni Pilato. Basaha ang Juan 18:33–40, o tan-awa ang “Jesus is Condemned Before Pilate” (3:19), anaa sa ChurchofJesusChrist.org, aron sa usa ka paghulagway sa pagtaral atubangan ni Pilato.

   Jesus Is Condemned before Pilate

   Jesus is arraigned and questioned before Pilate, who finds no fault in Him. Yielding to the multitude, Pilate allows Barabbas to be released and Jesus to be crucified. Matthew 27:1–2, 11–25

3. Si Jesus miatubang ni Herodes. Basaha ang Lucas 23:8–11.

4. Si Jesus gibunalan sa mga Romanong sundalo ug unya gisukitsukit ni Pilato sa ikaduhang higayon. Basaha ang Juan 19:1–16, o tan-awa ang “Jesus is Scourged and Crucified” gikan sa time code 0:00 hangtod sa 2:03, anaa sa ChurchofJesusChrist.org. Mahimong makatabang ang pagkahibalo nga ang gibunal usa ka latos nga kasagarang naglakip og hait nga mga butang (sama sa mga bato, puthaw, o bukog) gitagik sa pipila sa mga lugas [strand]. Daghang tawo ang wala makaagwanta sa pagbunal tungod sa grabe nga pisikal nga kasakit nga dala niini.

   Jesus Is Scourged and Crucified

   A band of soldiers strips Jesus of His clothes, scourges Him, and mocks Him. He then carries His cross to Golgotha and is crucified by Roman soldiers. Matthew 27:26–50

1. Tubaga ang mosunod nga pangutana diha sa imong journal sa pagtuon:

• Giunsa sa Manluluwas pagtubag niini nga mga sitwasyon?

• Ngano kaha nga ang Manluluwas mitubag sa maong paagi?

Kinaiya ni Jesukristo

Basaha ang 1 Nephi 19:9 ug ang mosunod nga mga pahayag, nga mangita og mga panabot sa kinaiya sa Manluluwas.

Si Elder Robert D. Hales (1932–2017) sa Korum sa Napulog Duha ka Apostoles mipaambit sa mosunod:

Ang pagtubag sa paagi nga sama kang Kristo dili kahimoan og tamdanan o pinasikad sa usa ka pormula. Ang Manluluwas mitubag sa lahing paagi sa matag sitwasyon. Dihang Siya miatubang sa daotan nga si Haring Herod, nagpabilin Siyang nagpakahilom. Dihang Siya miatubang ni Pilato, Siya mihatag og yano ug talagsaon nga pagpamatuod sa Iyang kabalaan ug tumong. …

Ang uban nga mga tawo nagtuo nga ang mga tubag sama sa pagpakahilom, kamapuangoron, pagpasaylo, ug paghatag og yano nga pagpamatuod mao ang mga tubag nga uyon-uyon lang o huyang. Apan ang “paghigugma sa [atong] mga kaaway, pagpanalangin kanila nga nanghimaraot [kanato], pagbuhat og maayo kanila nga nasilag [kanato], ug pag-ampo alang sa magalutos [kanato]” ( Mateo 5:44) nagkinahanglan og hugot nga pagtuo, kalig-on, ug, labaw sa tanan, Kristohanong kaisog.

(Robert D. Hales, “Kristohanong Kaisog: Ang Bugti sa Pagkadisipulo,” Liahona, Nob. 2008, 72)

Si Elder David A. Bednar sa Korum sa Napulog Duha ka Apostoles nagtudlo:

Hunahunaa usab kon giunsa ang Agalon sa pagpasangil ug panghimaraot atubangan ni Pilato aron ilansang sa krus [tan-awa sa Mateo 27:2, 11–26]. … Ang kaaghop sa Manluluwas gipakita sa Iyang disiplinado nga pagtubag, lig-on nga pagpugong sa kaugalingon, ug dili buot mogamit sa Iyang walay kinutubang gahom alang sa personal nga kaayohan.

(David A. Bednar, “Maaghop ug Mapaubsanon sa Kasingkasing,” Liahona, Mayo 2018, 33)

2. Tubaga ang mosunod nga pangutana diha sa imong journal sa pagtuon:

• Unsay inyong nakat-onan mahitungod sa Manluluwas gikan sa pamaagi sa Iyang pagtubag niini nga mga kahimtang?

• Giunsa sa mga buhat sa Manluluwas pagpakita sa Iyang “mahigugmaon nga pagbati … ngadto sa mga katawhan”? (1 Nephi 19:9).

• Sa unsang paagi kaha nga ang kahibalo nga si Jesukristo aduna niini nga mga kinaiya makatabang kaninyo nga mas higugmaon ug saligan Siya?

Importanteng hinumdoman nga sa daghang mga okasyon ang Manluluwas maisogon nga mihimo sa uban nga adunay tulubagon sa ilang mga buhat (tan-awa sa Marcos 11:15–17, Juan 2:13–16, Doktrina ug mga Pakigsaad 133:48–51). Isip mga sumusunod ni Jesukristo, gusto natong motubag sa pagbiaybiay, bakak nga mga akusasyon, o pagdaugdaog nga adunay pagmahal, kaisog, ug kaaghop. Hinoon, wala kini magpasabot nga atong tugotan ang uban sa pag-abuso ug pagpasakit kanato. “Ang Ginoo nagkondinar sa abusadong kinaiya sa bisan unsang matang—lakip ang pagpasagad ug pisikal, sekswal, o berbal [verbal] nga pag-abuso” (Sulat sa Unang Kapangulohan, “Preventing and Responding to Abuse,” Mar. 26, 2018). Kon kita giabusohan, importante nga mangita ta og hinanali nga tabang gikan sa sinaligang hamtong.

3. Kompletoha ang usa sa mosunod nga mga kalihokan diha sa imong journal sa pagtuon:

1. Hunahunaa pag-usab kanus-a nimo gibati nga gibiaybiay, bakak nga giakusahan, o gidaugdaog. Pangita og tabang sa Langitnong Amahan pinaagi sa Espiritu Santo aron mahibaloan ang angay nga Kristohanong mga paagi nga ikaw makatubag niini nga sitwasyon. Isulat ang unsay maayo nimo nga nabuhat ug sa unsang paagi nimo gusto nga molambo.

2. Isulat ang duha ka ehemplo sa mga panahon o mga sirkumstansiya diin ang paghinumdom sa kinaiya ni Kristo nakatabang o makatabang kanimo. Sa unsang paagi kaha ang imong kinabuhi mahimong lahi kon kanunay ka nga mosulay sa pagpalambo og Kristohanon nga mga kinaiya?

3. Pagpili og usa ka Kristohanong kinaiya nga gusto nimong mas mapalambo. Hunahunaa ang mga higayon sa imong adlaw diin makahimo ka sa pagbansay sa paggamit niini nga kinaiya.

Opsiyonal: Gustong Makakat-on pa og Dugang?

Juan 18:36. Unsa ang gingharian nga gipasabot ni Jesus?

Si Elder D. Todd Christofferson mitudlo:

Sa dihang gihubad ni Daniel ang damgo ni Hari Nabucodonosor, nagpahibalo sa hari sa “mahitabo sa umaabot nga mga adlaw” [Daniel 2:28], siya mideklarar nga “ang Dios [magtukod] og usa ka gingharian nga dili gayod malumpag, ug ang iyang gahom dili maagaw sa lain nga katawhan: dugmokon niya kining [mga] ginghariana, ug kini maoy ilang kataposan ug kining maong gingharian mobarog hangtod sa kahangtoran” [Daniel 2:44]. Ang Simbahan mao [kanang] gipanagna nga gingharian sa ulahing mga adlaw, wala gilalang og tawo apan gitukod sa Dios sa langit ug [miligid] sama sa bato nga “gisapsap nga walay kamot gikan sa bukid” nga mopuno sa yuta [Daniel 2:45; tan-awa usab sa bersikulo 35].

Ang padulngan niini mao ang pag-establisar sa Zion agig pagpangandam sa pagbalik ug pagdumala ni Jesukristo sa milenyum. Sa dili pa kana nga adlaw, dili kini gingharian sa politikanhong pagsabot—sama sa gisulti sa Manluluwas, “Ang akong pagkahari dili iya niining kalibotana” [Juan 18:36]. Hinoon, kini ang tinubdan sa Iyang awtoridad dinhi sa yuta, ang tigdumala sa Iyang balaan nga mga pakigsaad, ang tigbantay sa Iyang mga templo, ang tigpanalipod ug tigpahayag sa Iyang kamatuoran, ang dapit sa pagpundok sa nagkatibulaag nga Israel, ug “usa ka panalipod, ug … usa ka dangpanan gikan sa unos, ug gikan sa kaligutgot sa diha nga kini ibubo nga walay pagkuto diha sa tibuok yuta” [Doktrina ug mga Pakigsaad 115:6].

(D. Todd Christofferson, “Nganong Anaa ang Simbahan,” Liahona, Nob. 2015, 111)