Mataio 27:24–66; Mareko 15:15–38

O Iesu o loo tautau i luga o le satauro i le va o tagata gaoi e toalua

A o feagai le Faaola ma le tiga matautia o le tautau ai mai se satauro, sa faatauemu fili ia te Ia ma fai atu ia te Ia e laveai o Ia lava mai sauaga. Ae sa Ia onosaia ma le amiotonu, ma faaauau pea Ona puapuagatia mo i tatou. O lenei lesona e mafai ona fesoasoani ia te oe e malamalama lelei ai ma talisapaia puapuaga ma le maliu o le Faaola i luga o le satauro o se vaega taua o Lana Togiola.

Na foai mai e Iesu Keriso Lona soifua mo i tatou

I lenei lesona o le a e suesue ai e uiga i le maliu o Iesu Keriso. Faaalu sina taimi e mafaufau loloto ai i mea ua e iloa e uiga i le maliu o le Faaola ma ou lagona e uiga i ai. E te talitonu na maliu o Ia ina ia laveaiina ai oe?” Afai o lea, e mafai faapefea ona e faaalia lou talisapaia o Lana taulaga? A o e suesue ai, saili le taitaiga a le Agaga Paia e fesoasoani ia te oe e tali fesili nei.

O Le Faasatauroga o Iesu Keriso

Ina ua uma ona faamasinoina le Faaola e tagata Iutaia sosoo ai lea e Herota ma Pilato, sa sasaina faatigaina o Ia ma aumaia i Kolokota (e taua foi o Kalevaria) ina ia faasatauroina.

Fuafua e maka le fasifuaitau “Ua latou faasatauroina foi o ia” i le Mataio 27:35. Faitau le Taiala mo Tusitusiga Paia po o le Bible Dictionary i lalo o le ulutala “Faasatauroga” e vaai ai po o le a le uiga o mea e faatatau i lenei faiga.

Ua faasatauroina Iesu Keriso ma tagata gaoi e toalua

Faitau fuaiupu nei e uiga i le Faasatauroga o le Faaola. Faailoga faamatalaga auiliili e te lagona e taua.

Mataio 27:27–31. Sa faatauemu fitafita Roma i le Faaola.
Mataio 27:35–44. Sa tauemuina le Faaola i luga o le satauro.
Mataio 27:45–46, 50. Na tigaina ma maliu le Faaola i luga o le satauro. Manatua: Sa faasatauroina Iesu i le “itula lona tolu” (9:00 i le taeao; tagai Mareko 15:25). “O le itula lona ono” e faasino i le 12:00 i le aoauli; “o le itula lona iva” e faasino i le 3:00 i le afiafi.

Ina ia fesoasoani ia te oe e vaai faalemafaufau i nei mea na tutupu, atonu e te manao e matamata i le “Jesus Is Scourged and Crucified,” o loo maua i le ChurchofJesusChrist.org, mai le faailotaimi 1:04 e oo i le 4:48.

Jesus Is Scourged and Crucified
A band of soldiers strips Jesus of His clothes, scourges Him, and mocks Him. He then carries His cross to Golgotha and is crucified by Roman soldiers. Matthew 27:26–50

Sa faamatala mai e Elder Jeffrey R. Holland o le Korama a Aposetolo e Toasefululua le mafuaaga na faatoga ai le Faaola, “Lo‘u Atua e, lo’u Atua e, se a le mea ua e tuulafoai mai ai ia te au?” (Mataio 27:46).

Matamata i le vitio “None Were with Him,” o lo o maua i le ChurchofJesusChrist.org, mai le faailotaimi 9:00 e oo i le 12:46, pe faitau le faamatalaga o mulimuli mai.

Sa Leai Se Tasi na I Ai Faatasi ma Ia
Trumpeted from the summit of Calvary is the truth that we will never be left alone nor unaided, even if sometimes we may feel that we are.

Faatasi ai ma le talitonuga maumaututu uma o lo’u agaga ou te molimau atu ai … o se Tama atoatoa sa lei tuulafoaina Lona Atalii i lena ituaso. Ioe o lou lava talitonuga patino, i le galuega atoa a Keriso i le olaga nei atonu e lei sili atu ona latalata ai le Tama i Lona Alo nai lo nei toe taimi mafatia tele o puapuaga. Ae ui i lea, … sa aveese mo sina taimi e le Tama mai ia Iesu le mafanafana o Lona Agaga, le lagolago o Lana mafutaga patino. Sa manaomia, ioe sa totonugalemu i ai le taua o le Togiola, e faapea o lenei Alo atoatoa o le sa lei tautala i se upu leaga pe faia se mea sese pe pa’i atu foi i se mea le mama, sa ao ona ia silafia pe faapeī ni lagona o tagata---o i tatou, i tatou uma lava---pe a tatou faia ia ituaiga o agasala. Mo Lana Togiola ina ia le gata ma faavavau, na ao ona Ia lagona pe faapeī le oti e le nao le faaletino ae faaleagaga, ia iloa ai pe na faapeī pe a aveesea le Agaga paia, ma le tuua toatasi ai o se tasi e lagonaina le matua tuulafoaiina, matagā, ma le aunoa ai ma se faamoemoe.

(Jeffrey R. Holland, “None Were with Him,” Liahona, Me 2009, 87--88)

O le a se mea na fesoasoani ai Elder Holland ia te oe e te malamalama lelei ai e uiga i le Tama Faalelagi ma Iesu Keriso?
O a mea e sili ona faagaeetiaina ai oe e uiga ia Iesu Keriso mai nei mea na tutupu? Aisea?

Mau Fesootai

Sa i ai i le Faaola le mana e laveai ai o Ia lava mai le aafiaga tiga matuia ma le maasiasi i luga o le satauro (tagai i le Mataio 26:52–54), ae Na te lei faia.

Faitau ia le itiiti ifo ma le tolu nisi o mau nei e iloa ai pe aisea. Mafaufau e fatu se siata e pei o lea e faavasega ai ou manatu ma lagona. E mafai foi ona e faafesootaia pe fefaasinoa‘i nei fuaitau i le Mataio 27:26 pe fatu se faailo mai mau faasino nei ma se ulutala e te filifilia e oe lava.

Aisea na gauai atu ai le Faaola i le faasatauroga	O faamanuiaga ua avanoa mo i tatou ona sa Ia faia
Aisea na gauai atu ai le Faaola i le faasatauroga	O faamanuiaga ua avanoa mo i tatou ona sa Ia faia

Mataupu Faavae ma Feagaiga 35:2

Mataupu Faavae ma Feagaiga 76:40–42

O le fea fuaitau sa sili ona anoa ia te oe? Aisea?
O le a se mea na e aoaoina e uiga i le mafuaaga na naunau ai le Faaola ia faasatauroina [o Ia] mo i tatou?
O le fea o faamanuiaga o loo lisiina i nei mau e sili ona e faafetai ai? Aisea?

E taua le malamalama o se vaega o Lana Togiola, sa faasatauroina ai Iesu Keriso mo agasala a le lalolagi. O puapuaga sa amatalia e le Faaola i le Faatoaga o Ketesemane sa faamaeaina i le satauro i Kolokota. Ana faapea e le maliu le Faaola mo a tatou agasala, semanu e le mafai ona tatou toe foi atu i lo tatou Tama oi le Lagi.

O le a faapefea ona e faamatalaina i se tasi le ala ua avea ai le Faasatauroga o le Faaola o se vaega o Lana Togiola? O le a faapefea ona e faamatalaina pe aisea e taua ai ia te oe?

Sa faamalamalama e Epikopo Gérald Caussé le ala e patino ai le Togiola a le Faaola mo i tatou taitoatasi.

E ui e le iu ma e lautele lona aafiaga, ae o le Togiola a le Alii o se meaalofa ofoofogia patino ma vavalalata, e talafeagai mo i tatou taitoatasi. E pei lava ona valaaulia e Iesu soo taitoatasi o sa Nifae ia tagotago i Ona manu’a, sa faapea foi ona Ia maliu mo i tatou taitoatasi, patino, e peiseai na o oe po o a’u le tagata na i ai i le lalolagi. Ua Ia tuuina mai ia i tatou se valaaulia patino ia o atu ia te Ia ma utuvai mai faamanuiaga ofoofogia o Lana Togiola.

(Gérald Caussé, “O Se Molimau Ola o le Keriso Soifua,” Liahona, Me 2020, 40)

Aisea e te manatu ai e taua le iloa o le natura patino o le Togiola a le Faaola?

Tuu i le faitalia: O e Manao e Aoao Atili?

O le a le mea e taua e uiga i le nofoaga ma le taimi o le Faasatauroga o le Faaola?

Na faamatala mai e Peresitene Russell M. Nelson:

O le vaega lona lua o Lana togiola sa faatinoina i luga o le satauro.

Na tuuina atu e Pilato le Tamai Mamoe a le Atua ina ia faasatauroina i le taimi lava e tasi na saunia ai lata ane ia tamai mamoe o le Paseka mo osigataulaga. (Tagai i le Ioane 19:13–14.)

O le Faasatauroga sa faia i se mauga na ta’ua o Kolotoka (Eperu) po o Kalevaria (Latina) o lona uiga “o le ulupoo.” O le ulupoo na faatusa i le oti. I se nofoaga faapenei, sa faamaeaina ai le taulaga togiola. I luga o le satauro, sa siiae ai le Faaola o le lalolagi i luga a’e o le oti i le tulaga taua e aupito maoae i tulaga taua uma e mafai ona maua—o le iloaina ma le moni aiai o le mana o le Alii e malosi atu i le oti.

(Russell M. Nelson, “Why This Holy Land?,” Ensign,Tes. 1989, 18–19)

Aisea na le faasaoina ai e Iesu Keriso o Ia lava?

Na faamalamalama mai e Elder Ronald A. Rasband o le Korama a Aposetolo e Toasefululua:

“Ina alu ifo ia mai le satauro,” sa faatauemu atu ai le motu o e le talitonu ia te Ia i luga o Kalevaria [Mataio 27:40]. Sa ono mafai lava ona Ia faia se vavega. Ae sa Ia silafia le gataaga mai le amataga, ma sa Ia faamoemoe ia faamaoni i le fuafuaga a Lona Tama. O lena faataitaiga e le tatau ona pogisa ai i tatou.

(Ronald A. Rasband, “Faauta! O Au o se Atua o Vavega,” Liahona, Me 2021, 111)

E toafia tagata o loo aafia i puapuaga ma le Faasatauroga o le Faaola?

Na faamalamalama mai e Elder Quentin L. Cook o le Korama a Aposetolo e Toasefululua:

O le Faaola … [ua/na]puapuagatia i le tiga e le mafaamatalaina i Ketesemane ma luga o le satauro ina ia mafai ai ona faaatoatoaina Lana Togiola. … Na Ia faia lenei mea mo alii ma tamaitai uma ua foafoaina ma o le a foafoaina e le Atua.

(Quentin L. Cook, “O le Faavavau o Aso Uma,” Liahona, Nov. 2017, 52)

Mata o le a se mea atonu na tupu i le Faaola i luga o le satauro?

Na faamalamalama mai e Elder James E. Talmage (1862–1933) o le Korama a Aposetolo e Toasefululua:

E foliga mai, e faaopoopo atu i le puapuagatia matautia na tupu i le faasatauroga, o le tiga o Ketesemane na toe tupu, na faateteleina e sili atu nai le malosi o le tagata e onosaia ai. I lena itula sili ona oona, sa tuuatoatasi ai le Keriso o le a oti, na o ia lava i se tulaga moni sili ona leaga. Ina ia mafai ona faataunuuina le taulaga sili a le Alo i lona atoaga atoa, e foliga mai ua aveesea e le Tama le lagolago o Lona Mafuta atu i le taimi lava lea, ma tuu atu ai i le Faaola o tagata le mamalu o le manumalo atoatoa i aave o le agasala ma le oti.

(Jesus the Christ [1916], 661)

Na aoao mai foi faapea Elder Bruce R. McConkie (1915–85) o le Korama a Aposetolo e Toasefululua:

Ona pogisa ai lea o le lagi. Sa ufitia e le pogisa le laueleele mo le umi e tolu itula, e pei ona sa i ai i totonu o sa Nifaē. Sa i ai se afā malosi, na peiseai na tiga le Atua lava o le Natura.

Ma e moni lava sa tiga o Ia, aua a o tautau o Ia i luga o le satauro mo le isi tolu itula, mai le aoauli e oo i le 3:00 i le afiafi, sa toe foi mai ai puapuaga e le mafaitaulia ma tiga faalealofa o Ketesemane.

(Bruce R. McConkie, “The Purifying Power of Gethsemane,” Ensign, Me 1985, 10)