Filipi 3

“Ua Ou Faaleaogaina Mea Uma … Ina Ia Ou Maua Keriso”

Ata 1: O se faatusa agalelei o Keriso, o loo silasila atu fofoga agai i le tagata faitau. Ata lona 2: fetu ma le aniva

O le a se mea ua e naunau e ositaulaga e mulimuli ai ia Iesu Keriso ma avea ai ma Ona soo? Sa tele mea na lafoai e le Aposetolo o Paulo ina ua ia filifili e mulimuli i le Faaola, e aofia ai lona tulaga iloga i le nuu o Iutaia o se Faresaio (tagai Filipi 3:5). O lenei lesona e mafai ona fesoasoani e te malamalama ai i le taua o le faia o osigataulaga ia iloa ai Iesu Keriso.

O le a se mea e te tuuina atu?

Faitau pe matamata i le tala lenei mai ia Peresitene Dallin H. Oaks o le Au Peresitene Sili e uiga i se alii talavou sa faasoa atu ia Peresitene Gordon B. Hinckley (1910–2008) ia osigataulaga sa ia naunau e fai ina ia avea ai ma se tagata o le Ekalesia.

taulaga
O o tatou olaga o le auauna atu o faaaliga aupito talafeagai ia o la tatou tautinoga e auauna atu i le Matai ma o tatou uso a tagata.

I le tele tausaga ua mavae, sa faafofogaina ai i lenei konafesi se alii talavou sa mauaina le talalelei toefuataiina a o a’oga o ia i le Iunaite Setete. Ina ua oo i le taimi e toe taliu ai lenei alii i lona atunuu moni, sa fesili Peresitene Gordon B. Hinckley ia te ia po o le a se mea o le a tupu ia te ia pe a toe taliu atu i lona aiga a ua avea ma Kerisiano. “O le a le fiafia lo’u aiga,” na tali mai ai le alii talavou. “Atonu latou te tuliesea au ma manatu faapea ua ou oti. Ae mo lo’u lumanai ma la’u galuega, e mafai ona muaitapunia avanoa uma e faasaga mai ia te a’u.”“O e naunau e totogi se tau tele mo le talalelei?” Sa fesili ai Peresitene Hinckley.

(Dallin H. Oaks, “Ositaulaga,” Liahona, Me 2012, 21)

O le a sou manatu na faapefea ona tali mai le alii talavou? Aisea?
O le a se mea e ono uunaia ai se tagata e lafoai ni mea e tele ina ia mulimuli atu ia Iesu Keriso?

A o e suesueina le Filipi 3, mafaufau pe o le a se mea ua e ositaulagaina mo le talalelei a Iesu Keriso ma pe na faapefea ona faamanuiaina oe i le faia o lena mea. I se isi itu, o le ositaulaga ina ia latalata atili atu i le Faaola atonu o se manatu faavae e te le masani i ai. Po o a lava ou tulaga, e naunau lava le Faaola e fesoasoani ia te oe ia alualu i luma. I le faagasologa o le lesona, ia gauai atu i mafaufauga ma lagona mai le Agaga Paia lea e mafai ona fesoasoani ia te oe e malamalama ai i le matafaioi e tatau ona faia e le osigataulaga i lou olaga.

E matuai aoga osigataulaga uma mo le talalelei a Iesu Keriso

Manatua a o lei liua Paulo ia Iesu Keriso i le ala i Tamaseko (tagai i le Galuega 9), sa avea o ia o se Faresaio, o se tagata e maualuga lona tulaga faalelotu ma faaagafesootai i tagata Iutaia (tagai i le Filipi 3:5). Ona sa ia filifili e mulimuli ia Iesu Keriso ma faaaoga lona olaga e talai atu ai le talalelei, sa oo Paulo i sauaga matuia, puapuaga, tiga faaletino, ma le atuatuvale faalelagona (tagai i le 2 Korinito 11:23–28). Tatou te faitau i le Filipi 3:7–17 i lagona o Paulo e faatatau i le lafoai o lona olaga sa i ai muamua ae mulimuli ia Iesu Keriso ma faamanuiaga na iu ina oo i ai.

Faitau le Filipi 3:7–14, ma vaavaai mo mea na naunau Paulo e lafoai ina ia iloa ma mulimuli ia Iesu Keriso. Ia maitau o le upu faatusaina i le fuaiupu 10 o lona uiga o le ioeina, o le fasifuaitau “tausisi atu pea” i le fuaiupu 12 o lona uiga o le fetaomi atu i luma, ma o le upu maua i le fuaiupu 12 o lona uiga ia ausia.

Tusitusi i luga o se fasipepa i se peni po o se penitala.

O se mataupu faavae e tasi e mafai ona tatou aoao mai le faataitaiga a Paulo e faapea, afai tatou te lafoai mea uma e ono manaomia mai ia i tatou ina ia mulimuli ai ia Iesu Keriso ma fetaomi atu i luma i le faatuatua, e mafai ona tatou iloa o Ia ma maua le ola e faavavau. Mafaufau e tusi lenei mataupu faavae i au tusitusiga paia po o lau api talaaga mo suesuega.

Faaalu sina taimi e mafaufau loloto ai pe faapefea ona fesootai lenei mataupu faavae ia te oe.

O a ni ou manatu, fesili, po o lagona o i ai?

Ositaulaga patino

Toe faamanatu le fesili na tuuina atu e Peresitene Hinckley i le amataga o le lesona e faatatau i le naunau o le alii talavou e ositaulaga le tele o mea mo le talalelei. Faitau le vaega o totoe o le tala na faasoa mai e Peresitene Dallin H. Oaks.

Sa tali mai le alii talavou ma loimata, “E moni, a ea?” Ina ua faamautinoa atu lena mea, sa ia tali mai, “O le a la se isi mea e toe popole ai?” O le agaga lena o le ositaulaga i le toatele o tagata fou o le ekalesia.

(Dallin H. Oaks, “Osigataulaga,” Liahona, Me 2012, 21)

O le a se mea ua faagaeetia ai oe e uiga i lenei alii talavou?
O faapefea ona avea le soifuaga, auaunaga, ma le Togiola a le Faaola ma faataitaiga sili o le ositaulaga?
O a ni ou manatua po o lagona pe a e mafaufau loloto i mea sa naunau Iesu Keriso e ositaulaga mo oe?

Tuu i le Faitalia: O e Manao e Aoao Atili?

Filipi 3:14. O le a le uiga o le tala a Paulo ina ua ia fai mai, “Ou te tausisi atu i le faailoga”?

Na aoao mai e Elder Edward Dube o le Fitugafulu mea nei.

O le tausisi atu i le faailoga o le faaauau pea lea ma le faamaoni i luga o le “ala lauitiiti ma le vaapiapi lea e tau atu i le ola e faavavau” [2 Nifae 31:18] faatasi ma lo tatou Faaola ma lo tatou Tama o i le Lagi. Sa vaai Paulo i ona mafatiaga “e le tatau ona faatusaina i le mamalu o le a faaalia mai ia te i tatou” [Roma 8:18; tagai foi i le 2 Korinito 1:3–7]. O le tusi a Paulo i le au Filipi, lea na ia tusia a o noatia o ia i le falepuipui, o se tusi o le lofituina i le olioli ma le fiafia, ma le faamalosiauga ia i tatou uma, aemaise i lenei taimi faigata o le le mautonu. …

E malie, o loo apoapoai mai Paulo ia i tatou e fetuleni atu i luma, a o valaau mai ia i tatou e faagalo i mea ua tuanai—o o tatou popolega ua te’a, o o tatou taulaiga ua tuanai, o o tatou toilalo ua mavae atu, ma o tatou faanoanoaga ua mou atu.

(Edward Dube, “Tausisi atu i le Faailoga,” Liahona, Me 2021, 90, 91)

E mafai faapefea ona ou iloa po o a osigataulaga e tatau ona ou faia e faalatalata atili atu ai ia Iesu Keriso?

Na aoao mai Elder Larry R. Lawrence o le Fitugafulu e faapea, o se taimi lelei lava e mafaufau ai ma le migao po o a osigataulaga e mafai ona tatou faia mo le Alii o le taimi lea o le sauniga o le faamanatuga.

I lea siosiomaga migao, a o liliu atu o tatou manatu i le lagi, e mafai e le Alii ona fetalai malu mai ia i tatou i mea e manaomia ona tatou galulue i ai i le isi taimi e sosoo ai. E pei o outou, ua ou mauaina le tele o savali mai le Agaga i le tele o tausaga e faaali mai ia te a’u le auala e mafai ai ona ou alualu i luma. …

Atonu e ta’u atu e le Agaga ia te oe ua manaomia ona e faamagalo se tasi. Pe e te ono mauaina se savali ina ia sili atu ona faaeteete i ata tifaga e te matamata ai po o musika e te faalogologo i ai. Atonu e te lagonaina le musuia ina ia faamaoni atili i au feutagaiga faapisinisi pe ia sili atu ona limafoai i au taulaga anapogi. E tele avanoa eseese.

(Larry R. Lawrence, “Se A se Mea o Totoe Ou Te Lei Faia?” Liahona, Nov. 2015, 34–35)

O a nisi o osigataulaga ua faia e tagata O Le Ekalesia a Iesu Keriso o le Au Paia o Aso e Gata Ai e mulimuli ai i le Faaola?

Sa lisiina e Peresitene Dallin H. Oaks o le Au Peresitene Sili le tele o osigataulaga e faia e tagata o le Ekalesia toefuataiina a le Alii. E mafai ona e faitau i lana lauga “Ositaulaga,” Liahona, Me 2012, 19–22, pe matamata le vitio “Ositaulaga” (16:30), o loo maua i le ChurchofJesusChrist.org.