1 Иохан 2–4; 2 Иохан
Тэнгэрлэг Эцэг, Есүс Христ хоёрт хайраа харуулах
Хүн хайрыг мэдэрч эсвэл өөр хэн нэгнийг хайрладаг болохоороо үйлдэл нь ихэвчлэн өөрчлөгддөг. Тэнгэрлэг Эцэг, Есүс Христ хоёрыг гэх бидний хайр Тэдний зарлигуудыг сахих сэдлийг бидэнд төрүүлдэг хэмээн Иохан заасан. Энэ хичээл нь зарлигуудыг сахих замаар Тэнгэрлэг Эцэг, Есүс Христ хоёрт хайраа хэрхэн харуулж болох талаар ойлгоход танд туслах зорилготой.
Есүс Христтэй илүү адилхан болоход суралцагчдыг урих. Суралцагчдыг хэцүү зүйлс хийхийг урих нь тэдэнд өсөж хөгжиж, Тэнгэрлэг Эцэг, Есүс Христ хоёртой илүү адилхан болоход тусална. Урилгыг өгөхдөө суралцагчдын сонгох эрхийг хүндлэн, хүлээн авахгүй байсан ч хайраа харуул.
Суралцагчийн бэлтгэл: Зарлигуудыг сахих талаарх бодол санаагаа тунгаан бодоход суралцагчдыг урь. Тэд мөн таньдаг хүмүүсээсээ юу тэдэнд зарлигуудыг сахих сэдлийг өгдөг болохыг асууж болно.
Боломжит суралцах үйл ажиллагаа
Бурханы хайраар дүүрэн хамгаалалтууд
Дараах видеог үзүүл эсвэл уг түүхийг хэдэн хэсэгт хуваан суралцагчдаар чанга уншуул.
Далын ахлагч Вон Г.Кийч (1960–2018) Австралийн далайн эрэг дээр байхдаа амьдралд цор ганц тохиох аялалд гаран тэнд очсон серферүүдтэй тааралджээ. Тэд том давалгаанд серфинг хийхэд нь саад болж байсан усанд тавьсан хүнд торон хаалтуудын талаар гомдоллож байв.
Юу болсныг олж мэдэхийн тулд “Бурханы зарлигуудыг сахидаг хүмүүс адислагдаж, аз жаргалтай байдаг” (5:41) видеог цагийн код 0:00-оос 2:34 хүртэл үзнэ үү. Энэ видео ChurchofJesusChrist.org дээр байгаа. Эсвэл дараах түүхийг уншина уу.
Америк серферүүд улам их гомдоллож эхлэх үед, ойрхон байсан, нутгийн, ахимаг насны нэг серфер анхаарлыг минь татав. Тэр тавигдсан хаалтын талаар гомдоллосон яриа нэмэгдэхийг сонсох тусам тэвчээр нь алдагдаж буй мэт харагдаж байв.
Эцэст нь тэрээр босоод, уг бүлэг хүн рүү дөхөн ирсэн юм. Тэр юу ч хэлэлгүй, үүргэвчнээсээ дуран гаргаж ирээд, серферүүдийн нэгэнд өгөн, далайд тавигдсан хаалтын зүг заав. Серфер бүр дурангаар ээлжлэн харлаа. Тэгээд миний ээлж ирж, би томруулах дурангийн тусламжтайгаар, өмнө нь харж чадахгүй байсан нэгэн зүйлийг харсан юм. Хаалтын нөгөө талд, усан доторх хадны ойролцоо хооллож буй аварга загаснуудын нурууны сэрвээг олж харав.
Тэд тэр даруй таг чимээгүй болов. Уг настай серфер дурангаа буцааж аваад, биднээс холдон одохдоо хэлсэн үгийг нь би хэзээ ч мартахгүй. Тэр “Хаалт хориг тавьсанд битгий шүүмжлэлтэй ханд. Энэ нь та нарыг аварга загасанд идүүлэхээс хамгаалж байгаа цорын ганц зүйл нь юм шүү” гэж хэлж билээ.
Бид тэр үзэсгэлэнт далайн эрэг дээр зогсох үед бидний бодол гэнэт өөрчлөгдсөн байв. Том давлагаанууд дээр гулгах баяр хөөр, таашаалыг үгүй болгосон уг хориг нь хязгаарлалт, саад мэт санагдаж байсан бол одоо огт өөр санагдаж байв. Усны мандлын доохно нүүрлэсэн аюулыг ойлгосон болохоор уг хориг одоо аюулгүй байдал, хамгаалалт, амар амгаланг өгч байгаа мэт санагдаж байлаа.
(Вон Г.Кийч, “Бурханы зарлигуудыг сахидаг хүмүүс адислагдаж, аз жаргалтай байдаг,” 2015 оны 10-р сарын Ерөнхий чуулган, 110–111)
-
Бурханы зарлигуудыг сахих тал дээр хүмүүс ямар ямар хандлагатай байж болох вэ?
Судлах тэмдэглэлдээ дараах асуултуудад хариулж бичих талаар бодож үз.
-
Би Бурханы зарлигуудын талаар ямар үзэл бодолтой байдаг вэ? Би яагаад тэдгээрийг сахидаг эсвэл сахидаггүй вэ?
Бурханы зарлигуудыг сахих
Бурханы зарлигуудыг сахих эсэхэд нөлөөлдөг өөрсдийн гэсэн учир шалтгаан бидэнд байдаг. Дараах шүлгүүдийг уншаад, тэдгээрийг сахих сэдлийг юу бидэнд төрүүлж болох талаар төлөөлөгч Иохан юу гэж заасныг олж мэд. Иохан хуурамч сургаалтай нүүр тулсан итгэгчдэд зориулж захиагаа бичсэнийг санах нь тустай байж болох юм.
Суралцагчдыг хамтран ажиллаж судрын хэсгүүдийг уншихад урих талаар бодож үз. Суралцагч бүр аль нэгэн хэсгийг нь уншаад, дараа нь олж мэдсэн зүйлээ нэг нэгэнтэйгээ хуваалцаж болно.
(Мөн Иохан 14:15, 23–24 дээрх Аврагчийн сургаалуудыг унших нь мөн тустай байж болно.)
-
Та ямар ямар үнэнийг олсон бэ?
Суралцагчид янз бүрийн зарчмыг тодорхойлсон байж болно. Дараах асуултуудтай адил дагалдах асуултуудыг асууж болно.
-
Эдгээр үнэнийг мэдэх нь хэн нэгний зарлигуудыг сахих хүслийг хэрхэн нэмэгдүүлж болох вэ?
Иохан эдгээр шүлэгт янз бүрийн үнэнийг заасан. Та бид Тэнгэрлэг Эцэг, Есүс Христ хоёрын талаар хэдий чинээ сайн мэдэж, хайрлана Тэдний зарлигуудыг сахих хүсэл маань төдий чинээ их байх болно гэсэн үнэнийг тодорхойлсон байж болох юм ( 1 Иохан 1:5–7 ; 2:3–6 ; 2 Иохан 1:6–9 -ийг үзнэ үү).
Боломжтой бол технологи ашиглан дараах үйл ажиллагааг тохируулан өөрчилж болно. Жишээлбэл: Суралцагчид видео хийж, олон нийтийн мэдээллийн хэрэгсэл дээр пост оруулж аль эсвэл хариултаа мессежээр хуваалцаж болно. Энэ нь суралцагчдын оролцоог нэмэгдүүлж, Тэнгэрлэг Эцэг, Есүс Христ хоёрын талаарх суралцагчдын захиасыг илүү олон хүнд хүргэх боломжийг олгоно.
Эсвэл суралцагчид Ням гаргийн ангийн багш нь ангийнхаа гишүүдэд зарлигуудыг сахих сэдэл төрүүлэн туслахыг хүсэж байна гэж төсөөлж болно. Тэр суралцагчдаас дараах асуултуудыг тунгаан бодож, бодол санаагаа хичээл дээр хуваалцахаар бэлдэж ирэхийг хүсэв.
Суралцагчид юу хэлэхээ бэлдэхдээ суралцагчийн бэлтгэл үйл ажиллагаанаас олж авсан ойлголтоо багтааж болно.
-
Яагаад зарлигуудыг сахих нь Есүс Христ, Тэнгэрлэг Эцэг хоёрт хайраа харуулах арга зам бэ?
-
Та Есүс Христ, Тэнгэрлэг Эцэг хоёрын зарлигуудыг сахих сэдлийг төрүүлдэг юуг Тэдний талаар мэдэх вэ? Үүнийг мэдэх нь яагаад танд зарлигуудыг сахих сэдлийг төрүүлдэг вэ?
-
Та Тэдний зарлигуудыг сахиснаар Тэдний талаар юуг олж мэдсэн бэ?
Бэлтгэсэн зүйлээ сайн дураараа хуваалцахад суралцагчдыг урь. Үүнийг ангиараа эсвэл жижиг бүлгээр хийж болно. Суралцагчдыг хуваалцсаны дараа “Таны хуваалцсан зүйл хэрхэн хэн нэгэнд зарлигуудыг сахихад туслах вэ?” гэх мэт дагалдах асуултуудыг асууж болно.
Суралцагчдыг бодол санаагаа ангиас гадуур өөр хэн нэгэнтэй хуваалцахад урьж болно.
Та Тэнгэрлэг Эцэгт хайраа хэрхэн харуулах вэ?
Энэ зургийг хараад, Тэнгэрлэг Эцэг, Есүс Христ хоёрын талаар мэддэг зүйлээ мөн Тэд таны талаар юу гэж боддог талаар бодож үз. Та мөн Тэдний талаарх бодол санаагаа бодож болох юм.
Дараах зургийг үзүүлнэ үү.
Тэнгэрлэг Эцэг, Есүс Христ хоёр бидэнтэй биеэрээ хамт байхгүй тул Тэдэнд хайраа харуулах амаргүй мэт санагдаж болох ч бид Тэдний зарлигуудыг сахих замаар хайраа харуулах боломжтой. Цаг гарган энэ хичээлийг авснаар та юуг санахыг эсвэл юуг хийхийг хүсэж байгаагаа тунгаан бод. Та үүнийг дараах арга замаар хийж болох юм. Үүнд:
-
Тэнгэрлэг Эцэг, Есүс Христ хоёрыг таньж мэдэн, хайрлахыг хүсэж байгаа нэг арга замаа бич.
-
Яг одоо сахиж байгаа зарлигуудаа мөн яагаад тэдгээрийг сахиж байгаагаа бод. Та Тэнгэрлэг Эцэг, Есүс Христ хоёрыг хайрладаг учраас ийм сэдэл төрж байна уу аль эсвэл энэ тал дээр ажиллах хэрэгтэй байна уу гэдгээ бодож үз.
-
Тэнгэрлэг Эцэг, Есүс Христ хоёрт хайраа харуулахын тулд илүү бүрэн дүүрэн сахих боломжтой нэг эсвэл хэдэн зарлигийг тодорхойл. Эдгээр зарлигийг хэрхэн илүү бүрэн дүүрэн сахих төлөвлөгөө гарга.
Суралцагчдыг Тэнгэрлэг Эцэг, Есүс Христ хоёрт хайраа харуулах тал дээр хүлээн авсан мэдрэмж, төрсөн сэтгэгдлийнхээ дагуу үйлдэхэд урамшуул. Энэ хичээлээр заасан зарчмуудын талаарх гэрчлэлээ хуваалц.
Тайлбар ба нөхцөл байдлын талаарх мэдээлэл
Зарлигууд нь хэрхэн бидний Бурханыг гэсэн хайрын илрэл вэ?
Ерөнхийлөгч Томас С.Монсон (1927–2018) ийн хэлсэн.
Бурханы зарлигууд нь биднийг хааж боох эсвэл бидний аз жаргалд саад болохын тулд өгөгдөөгүй. Харин ч үүний эсрэг зорилгоор өгөгдсөн. Биднийг бүтээж, төгс хайрладаг Бурхан бидний хамгийн эрхэм аз жаргалыг олж авахын тулд хэрхэн амьдрах хэрэгтэйг сайн мэднэ. Тэр бидэнд заавар өгсөн бөгөөд хэрэв бид түүнийг дагаж чадвал ихэнхдээ аюултай байдаг энэхүү мөнх бус аяллын турш хамгаалагдах болно. …
… Бид зарлигуудыг сахивал амьдрал маань илүү аз жаргалтай, утга учиртай, ээдрээ багатай болно гэдгийг Тэр мэддэг. Бидний бэрхшээл, асуудлуудаа давж гарахад илүү амар болж, бид Түүний амласан адислалыг хүлээн авах болно.
(Томас С.Монсон “Зарлигуудыг сахь,” 2015 оны 10-р сарын Ерөнхий чуулган, 69)
Зарлигуудыг сахих нь хэрхэн миний Бурханыг гэх хайрыг харуулдаг вэ?
Далын ахлагч Вон Г.Кийч (1960–2018) ийн хэлсэн.
Бид Бурханы бидэнд зориулан тавьсан замыг өдөр бүр дагаж, Түүний бидэнд өгсөн зарлигуудыг хамгийн сайнаараа сахиснаар Түүнийг хайрлах хайр, Түүнд итгэх итгэлээ харуулдаг. Ялангуяа бид Бурханы зарлигуудыг яагаад дагах ёстойгоо ойлгоогүй эсвэл биднээр хийлгэхийг хүссэн тодорхой нэг зүйлийг нь бүрэн ухаараагүй үедээ итгэл ба хайраа илүү үзүүлдэг.
(Вон Г.Кийч, “Бурханы зарлигуудыг сахидаг хүмүүс адислагдаж, аз жаргалтай байдаг,” 2015 оны 10-р сарын Ерөнхий чуулган, 111)
Би Бурханыг гэх хайраа хэрхэн өсгөн нэмэгдүүлж чадах вэ?
Тэргүүн Зөвлөлийн ерөнхийлөгч асан Дийтр Ф.Угдорф ийн тайлбарласан.
Бид бодол санаа, үйл хэргээ Бурханы үгтэй нийцүүлснээр Тэнгэрлэг Эцэгийг хайрлах хайрыг өсгөн нэмэгдүүлж, хайраа харуулдаг. Түүний цэвэр ариун хайр биднийг илүү цэвэр ариун болоход чиглүүлж, урамшуулан дэмжиж байдаг билээ. Энэхүү хайр үүрэг хүлээхээс айж эмээх бус харин зөв шударгаар амьдрах, Түүнтэй илүү адилхан болох бидний чинхүү хүсэлд сүнслэгээр нөлөөлдөг.
(Дийтр Ф.Угдорф, “Бурханы хайр,” 2009 оны 10-р сарын Ерөнхий чуулган, 24)
Нэмэлт суралцах үйл ажиллагаа
3 Иохан 1:1–4. Биднийг бусдад “үнэн дотор явахад” нь туслахад баяр баясгалан ирдэг.
Хэрэв сайн мэдээг бусадтай хуваалцах талаар судлах нь суралцагчдад тустай гэж үзвэл Аврагч руу ирэхэд бусдад туслахад нь Иоханд төрсөн мэдрэмжийг 3 Иохан 1:1–4 -өөс уншиж болно. Тэд дараа нь эдгээр шүлгийг Сургаал ба Гэрээ 18:15–16 -тай холбож болно.
Суралцагчдаас Аврагч руу ойртоход урих хэрэгтэй гэж бодож байгаа таньдаг хүмүүсийнхээ талаар бодохыг хүс. Тэр хүмүүсээ урих төлөвлөгөө гаргахад тэднийг урамшуул.
