1 Ioane 2–4

“Le Au Pele e, Ia Tatou Fealofani”

A painting of a mass of people from different ethnic backgrounds. Submission for the 11th Annual Art Competition.

Aisea e faigata ai i nisi taimi ona faaali atu le alofa i isi? E faapefea ona fesootai lo tatou alofa i le Atua i le alofa atu i isi? Na aoao atu e le Aposetolo o Ioane le Au Paia i le ala e mafai ai e le alofa o le Atua mo i latou ona musuia i latou e alolofa i le Atua ma isi (tagai i le 1 Ioane 4:11, 19). O lenei lesona e mafai ona fesoasoani ia te oe ia malamalama ma faaaoga le poloaiga ia alofa atu i isi a o e alofa i le Atua.

O le fesoasoani i tagata aoga ia faia ni faatinoga lelei amiotonu. A o galulue tagata aoga ma le faatuatua e faaaoga mataupu faavae o le talalelei, o le a molimau atu le Agaga Paia ia i latou e uiga i na upumoni (tagai i le Ioane 7:17). Fai ni avanoa mo tagata aoga e faatino ai mataupu faavae i totonu o le vasega ina ia mafai ai e le Agaga Paia ona molioo loloto upumoni i totonu o o latou loto.

Sauniuniga a le tagata aoga: Valaaulia tagata aoga e o mai sauni e faasoa mai ni aafiaga na latou faaalia ai le alofa i isi po o isi na faaalia le alofa ia i latou ma le aafiaga na oo i ai.

Gaoioiga e ono Mafai Ona Aoao Ai

Alofa atu i isi

Mafaufau i ni auala se tele e mafai ona e faaumaina ai fuaiupu nei:

E faigofie ona alofa atu i isi pe a …

E sili atu ona faigata ona alofa atu i isi pe a …

Mafaufau e tusi ia fasifuaitau o loo i luga i le laupapa, ona valaaulia lea nisi o tagata aoga e tusi pe mafai faapefea ona latou faaumaina se tasi o fuaiupu.

Manatunatu loloto i le fesili lenei:

O le a se mea e faaosofia ai oe pe faafaigata ai mo oe ona faaalia le alofa mo isi?

O aoaoga a Ioane e uiga i le alofa

Na aoao atu ma le lototoa le Aposetolo o Ioane e uiga i le manaomia ona alofa atu i isi.

Faitau le 1 Ioane 3:16–17 ; 4:7–11, 19–21 ma faailoga upumoni e te manatu o le a fesoasoani ia te oe a o e mafaufau i luitau o le alofa atu i isi. (Manatua o le upu togiola [ 1 Ioane 4:10 ] o lona uiga o se taulaga togisala e faamalieina ai le faamasinoga tonu a le Atua.)

O le a se mea na e maua e manaia pe anoa mai aoaoga a Ioane? Aisea?

Faalogologo ma le toto’a i tagata aoga. Taumafai e fatu se siosiomaga e mafai ai e tagata aoga ona lagona le toamalie e faasoa mai o latou manatu. Mafaufau e fesili atu pe mafai faapefea e mea na latou maua ona fesoasoani ia i latou e alolofa ai i isi.

O se tasi o upumoni na aoao mai e Ioane i nei fuaitau o le afai tatou te alolofa i le Atua, o le a tatou alolofa foi i isi. Atonu e te manao e faailoga le upumoni lenei i le 1 Ioane 4:21 .

Mafaufau i ni auala e fesoasoani ai i tagata aoga ia malamalama loloto atili i lenei upumoni. E mafai ona faia lenei mea e ala i le talanoaina o ni isi po o fesili uma nei: Aisea e te manatu ai o le alofa mo le Atua e fesootai i le alofa mo isi? E mafai faapefea e le mafaufau i le alofa o le Atua mo oe ma isi ona aafia ai au amioga agai i isi? E mafai faapefea e o tatou olaga ma olaga o i latou o loo siomia i tatou ona ese ma lelei atu pe afai tatou te malamalama ma faaaoga lenei upumoni?

E mafai foi ona aoga i tagata aoga le faamaeaina o se gaoioiga e aoao ai e pei o nei:

Ina ia fesoasoani ia te oe e mafaufau loloto i faamanuiaga o le alofa atu i isi, filifili se tasi o faataitaiga o loo i lalo ma tali fesili o loo mulimuli mai:

Faaali atu filifiliga nei mo tagata aoga ma faamanatu ia i latou a latou sauniuniga mo le vasega. Mafaufau e tuu atu i tagata aoga e filifili se faataitaiga se tasi pe lua, e fai faatasi ma le vasega atoa pe fai taitoatasi.

a. O se faataitaiga mai le soifuaga o le Faaola ina ua Ia faaalia le alofa mo isi
e. O se tasi e te iloa o se faataitaiga faifai pea o le alofa atu i isi
i. O ou lava aafiaga o le taumafai e alofa atu i isi, po o aafiaga na faaalia ai e isi le alofa ia te oe
o. Faataitaiga o le faaalia o le alofa mo isi mai saunoaga o konafesi aoao po o vitio a le Ekalesia, e pei o le “Ave i o Tatou Luga le Suafa o Iesu Keriso” mai le faailotaimi 4:43 i le 6:15 (o loo maua i le ChurchofJesusChrist.org)

Ave i o Tatou Luga le Suafa o Iesu Keriso

O le a le mea na faia e lenei tagata/oe e faaalia ai le alofa?
E faapefea e a latou/au faatinoga ona faaalia ai le alofa mo le Atua?
O a ni taunuuga o le latou/lou faaalia o le alofa?
O le a se mea na e aoaoina mai lenei faataitaiga?

Afai e faamaea taitoatasi e tagata aoga lenei gaoioiga, mafaufau e valaaulia i latou e faasoa mai a latou tali i ni vaega toalaiti pe faatasi ma le vasega.

O le mauaina o faamanuiaga o le alofa atu i isi

Faitau le 1 Ioane 3:17–18 e iloa ai pe na faapefea ona uunaia i tatou e Ioane ia alolofa atu i isi.

O le a sou manatu i le uiga o le alofa atu i isi “i le amio ma le faamaoni”? ( 1 Ioane 3:18).

Atonu foi e aoga le faitau o ni isi o aoaoga a le Faaola e uiga i le alofa o le tasi i le isi o loo tusia i le Mataio 5:43–44 ; 22:37–40 ma le Ioane 13:34 , ma vaavaai pe na faapefea ona aoao mai le Faaola e tatau ona tatou alolofa atu i isi. (Tagai foi i le Ioane 15:12, 17 .)

Fatu se lisi o auala e mafai ona e faaalia ai le alofa mo isi “i le amio ma le faamaoni,” pe e faapei ona alofa mai le Faaola ia i tatou. Atonu e aoga le mafaufau i auala e faaali atu ai le alofa i tagata eseese, e pei o tagata o le aiga, uo, po o tagata o le vasega.

Afai o le a fesoasoani le vaai i ni isi o faataitaiga o le alofa atu i isi “i le amio ma le faamaoni,” mafaufau e matamata i le “Auauna Atu Nei” (2:18) e vaai ai i faataitaiga. O loo maua lenei vitio i le ChurchofJesusChrist.org.

O le fea o manatu o le faaalia o le alofa sa sili ona tulaga ese mai ia te oe? Aisea?
Aisea e taua ai le faamaoni o a tatou amioga?
E mafai faapefea e nei faatinoga faamaoni ona fesoasoani pea lava pea ia i tatou ia avea atili ai faapei o Iesu Keriso?

Faaaogaina

Mafaufau i se tasi e te iloa atonu e finagalo le Alii ia te oe e faaali atu i ai le alofa faateleina. Taumafai e mafaufau i le alofa o le Tama Faalelagi ma le Faaola mo i latou. Mafaufau e tatalo i le Tama Faalelagi. Faalogo ma lagona musumusuga i mea atonu e finagalo o Ia e te faia e faaali atu ai le alofa mo lenei tagata. Atonu e te manao e tatalo mo se fesoasoani i au taumafaiga. E ono fesoasoani foi le faasoa atu o mea ua e fuafua e fai i se tagata matua po o se uo faatuatuaina ma fai atu ia i latou e fesoasoani ia te oe.

Mafaufau e fesili atu pe i ai ni tagata aoga e fia molimau atu i le taua o le alofa atu i isi ma pe faapefea ona faaalia ai lo tatou alolofa mo le Atua. Mafaufau e faasoa atu foi sau molimau patino.

Tala Auiliili ma Faamatalaga o Talaaga

1 Ioane 3:18. O le a le uiga o le alofa atu i “le amio ma le faamaoni”?

Na faamatala mai e Elder Joseph B. Wirthlin (1917–2008) o le Korama a Aposetolo e Toasefululua:

E masani lava, o faaaliga silisili o le alofa o faatinoga faatauvaa o le agalelei ma le agaalofa tatou te faasafua atu ia i latou tatou te feiloai i ai i le ala o le olaga.

(Joseph B. Wirthlin, “O Le Poloaiga Sili,” Ensign po o le Liahona, Nov. 2007, 29)

O a ni isi o faamanuiaga o le alofa atu i isi?

Sa molimau mai Peresitene Dieter F. Uchtdorf, i lena taimi a o i ai i le Au Peresitene Sili, e uiga i faamanuiaga e mafai ona oo mai i le alolofa atu ai i isi.

Ona o le alofa o le poloaiga sili lea, e tatau ona i ai i le totonugalemu o mea uma ma mea uma tatou te faia i o tatou lava aiga, i o tatou valaauga i le Ekalesia, ma i o tatou fatuaiga tausi. O le alofa o le suauu faamalolo lea e faaleleia ai va oia faaletagata ma faaleaiga. O le fusi lea na te tuufaatasia aiga, nuu, ma malo. O le alofa o le mana lea na te faamaite faigauo, onosaiga, va fealoaloai, ma le faaaloalo. O le faapogai lea na te faatoilaloina fevaevaeaiga ma le inoino. O le alofa o le afi lea e faamafanafanaina ai o tatou olaga i le olioli e le mafaatusaina ma le faamoemoe paia. O le alofa e tatau ona avea o la tatou savali ma la tatou upu.

Pe a tatou malamalama moni lava i le uiga o le alofa e pei ona alofa Iesu Keriso ia i tatou, o le a manino le tele o le fenumiaiga ma faatulagatonu a tatou fuafuaga tatau. O la tatou savaliga o ni soo o Keriso e avea ma mea e sili atu ona fiafia. O o tatou olaga o le a maua se uiga fou. O le a sili atu ona loloto lo tatou sootaga ma lo tatou Tama Faalelagi.

(Dieter F. Uchtdorf, “O le Alofa o le Atua,” Ensign po o le Liahona, Nov. 2009, 21)

1 Ioane 3:18. E mafai faapefea ona tatou faaalia le alofa “i le amio ma le faamaoni” i a tatou sootaga faaleaiga?

Matamata i le “O Faamanuiaga e Faavavau o le Faaipoipoga” mai le faailotaimi 6:23 i le 8:41 e vaai ai ia Elder Richard G. Scott (1928–2015) o le Korama a Aposetolo e Toasefululua o loo faamatala mai ni galuega agalelei sa la faafesuiai ma lona faletua, pe matamata i le “E Valavala Uso e Toalua” (6:12), lea e faaalia ai uso e toalua o loo aoao e malamalama ma alofa le tasi i le isi.

1 Ioane 4:12. O le a le uiga o le tala a Ioane ina ua ia fai mai “e lei vaaia le Atua e se tasi [i soo se taimi]”?

“O le Faaliliuga a Iosefa Samita o lenei fuaiupu ua faamanino mai ai le manatu sese faapea e le mafai e tagata soifua ona vaai i le Atua: ‘E leai se tagata ua vaaia le Atua i soo se taimi, sei vagana i latou o e talitonu’ (i le 1 Ioane 4:12 , vaefaamatalaga a). Na faaauau Ioane i le aoao atu: ‘A tatou fealofani, ua tumau le Atua i totonu ia te i tatou, ua atoatoa foi lona alofa i totonu ia i tatou’ ( 1 Ioane 4:12). O Ioane lava ia na vaai i le Atua le Tama (tagai i le Faaaliga 5:1 ; MF&F 67:11). Ina ia faitau atili e uiga i le mafai e tagata faitino ona vaai i le Atua, tagai Ioane 14:23 ; Galuega 7:56 ; MF&F 93:1 ; Iosefa Samita—Talafaasolopito 1:16–17 ” (Tusi Lesona a le Tagata Aoga o le Feagaiga Fou [2014], 517).

1 Ioane 4:20–21. O ai o tatou “uso/tuagane”?

Na faamatala mai e Peresitene Russell M. Nelson:

O a tatou faamuamua aupito maualuluga i le olaga o le alofa lea i le Atua ma alolofa i o tatou tuaoi. O lena mea e aofia faalauaitele ai tuaoi i lo tatou lava aiga, lo tatou nuu, lo tatou atunuu, ma lo tatou lalolagi.

(Russell M. Nelson, “Aoao ia i Matou le Onosai ma le Alofa,” Ensign po o le Liahona, Me 1994, 69)

Galuega Faatino Faaopoopo e Aoao Mai Ai

1 Ioane 3:1–3 ; 4:12. E mafai ona avea i tatou faapei o le Tama Faalelagi e ala i le mama a’ia’i

Afai o le a manuia tagata aoga mai le aoao atili e uiga i le ala e mafai ai ona avea i latou e faapei o le Tama Faalelagi, valaaulia i latou e suesue le 1 Ioane 3:1–3 ma faasoa mai mea ua latou aoaoina mai lenei fuaitau. Faamatala e faapea o “atalii” i le 1 Ioane 3:1 e mafai ona faamatalaina o ni “fanau” (tagai i le 1 Ioane 3:1 , vaefaamatalaga e) ma o fanau a le Atua i le tulaga lenei e faatatau ia i latou ua toe fanaufouina faaleagaga (tagai foi i le Mosaea 5:7).

Valaaulia le vasega e faasoa mai mea ua latou iloa e uiga i le Tama Faalelagi “e pei ona iai o ia” ( 1 Ioane 3:2). Fai atu ia i latou e faasoa mai ni manatu pe mafai faapefea ona tatou “faamamaina ia i tatou lava” ( 1 Ioane 3:3) ina ia mafai ai ona avea i tatou e faapei o le Atua. O se tasi o auala o le taumafai lea e alofa atu e faapei ona alofa le Atua (tagai i le 1 Ioane 4:12).

Faamanatu i tagata aoga e le mafai ona tatou mama e aunoa ma le Faaola. Valaaulia i latou e suesue le tusiga i le Taiala i Tusitusiga Paia ua faaautuina “ Faapaiaina ” (scriptures.ChurchofJesusChrist.org) ma vaavaai mo malamalamaga i auala e mafai ai ona tatou mama atili i le fesoasoani a Keriso. Valaaulia i latou e fai se fuafuaga i le auala e fai ai.