Toefaamanatu 23 o le Atamai i Aoaoga Faavae
Malamalama ma Faamatala
O se tasi o faamoemoega o le atamai i aoaoga faavae o le fesoasoani lea ia e malamalama i aoaoga faavae o loo i ai i fuaitau o le atamai i aoaoga faavae ma mafai ona faamatala le aoaoga faavae i au lava upu. O lenei lesona o le a tuuina atu ai ia te oe se avanoa e faalolotoina ai lou malamalama ma faamatala ai upumoni o loo maua i fuaitau e 13 o le atamai i aoaoga faavae mai le afa lona lua o le Feagaiga Fou.
O le uunaiina o suesuega e le aunoa ma le toefaamanatuina o fuaitau o le atamai i aoaoga faavae. O le taulotoina, malamalama ai, faamatalaina, ma le faaaogaina o fuaitau o le atamai i aoaoga faavae e manaomia ai le suesue ma le faatino. Aoao atu faalevaiaso se lesona o le atamai i aoaoga faavae, ma fautuaina tagata aoga e toefaamanatu e le aunoa mea sa latou aoaoina. Manatua o le polokalama o le Atamai i Aoaoga Faavae o se punaoa taua lea e mafai ona fesoasoani i tagata aoga e faaauau ai ona suesue i fuaitau o le atamai i aoaoga faavae.
Sauniuniga a le tagata aoga: Valaaulia tagata aoga e toefaamanatu faapuupuu fuaitau e 13 o le atamai i aoaoga faavae mai le afa lona lua o le Feagaiga Fou ona filifili lea o se tasi latou te fia malamalama lelei atili i ai.
Gaoioiga e ono Mafai ona Aoao Ai
O se lesona i fuaitau o le atamai i aoaoga faavae atonu e manaomia ona aoao atu e suitulaga i lenei lesona toe faamanatu. Tagai i le faasologa faatulagaina o lesona ua saunia e le faatonu po o le taitai faamaopoopo o le eria po o le risone ina ia mautinoa o lesona taitasi o fuaitau o le atamai i aoaoga faavae o le a aoaoina a o faia vasega seminare.
Fai atu o fesili
-
O anafea na e lagona ai le loto faafetai ona sa e fai atu se fesili i se tasi? (Mo se faataitaiga, atonu na e aoaoina se mea e ala i le fai atu o se fesili, pe atonu na e mauaina se fautuaga taua ina ua e sailia se fautuaga mai se uo po o se matua.)
Mafaufau e faasoa atu se aafiaga patino e fesoasoani ai i tagata aoga e mafaufau ai i o latou lava aafiaga.
-
O a nisi o mafuaaga e taua ai le fai atu o fesili pe a aoaoina le talalelei a Iesu Keriso?
Na saunoa Peresitene Henry B. Eyring o le Au Peresitene Sili: “O le fesili ma le tali i fesili o loo i le fatu o le aoaoina mai ma le aoaoina atu uma” (“The Lord Will Multiply the Harvest” [o se afiafi ma se Pulega Aoao, 6 Fep, 1998], 5–6, i le Teaching Seminary: Preservice Readings [2004], 98).
O le faia o fesili e uiga i fuaitau o le atamai i aoaoga faavae e mafai ona fesoasoani tatou te malamalama atili ai ma valaaulia atoatoa ai le fesoasoani a le Faaola i o tatou olaga.
Mafaufau e faaali atu tusi faasino o mau uma e 13 o le atamai i aoaoga faavae pe faaali atu i tagata aoga le mea e mafai ona latou vaaia ai. Afai e manaomia, faaaoga fuaitau uma e 24 o le atamai i aoaoga faavae o le Feagaiga Fou mo lenei toefaamanatu, pe filifili na o ni nai fuaitau, e fuafua i manaoga o le vasega.
Atamai i Aoaoga Faavae mo le Feagaiga Fou: 1 Korinito–Faaaliga
|
“O lou tino o le malumalu o le Agaga Paia.” | |
|
“E leai se tane pe a le o i ai le fafine, e leai foi se fafine pe a le o i ai le tane, i le Alii.” | |
|
“Aua faapei ona oti uma ia Atamu, e faapea foi ona faaolaina uma ia Keriso.” | |
|
I le Toetu, e tolu tikeri o le mamalu. | |
|
“I le tisipenisione o le atoaga o taimi, o le a faapotopoto faatasi ai e Ia mea uma ia Keriso.” | |
|
O le Ekalesia o loo ua “atiina ae i luga o le faavae o le au aposetolo ma perofeta, o le maa tulimanu o Iesu Keriso lava lea.” | |
|
“O le aso o Keriso … e le oo mai lena aso, seia muai ona taunuu o le tete’a ese.” | |
|
“O tusitusiga paia … e mafaia ona faapoto ai ia te oe e iu ai i le faaolataga.” | |
|
O lo tatou Tama Faalelagi o “le Tama o o tatou agaga.” | |
|
“A e afai ua leai se poto i so outou, ina ole atu ia i le Atua.” | |
|
“O le faatuatua, pe afai e le i ai ni galuega, e mate lava.” | |
|
“[Na] folafola atu foi le talalelei i e ua oti.” | |
|
“Ona faamasinoina lea o e na oti … e tusa ai ma a latou galuega.” |
Mafaufau e fai le gaoioiga lenei faatasi ma le vasega e faaaoga ai se tasi o fuaitau o le atamai i aoaoga faavae, ona valaaulia lea o tagata aoga e toe fai le gaoioiga e faaaoga ai se fuaitau ese o le atamai i aoaoga faavae ua latou filifilia. E mafai e tagata aoga ona galulue i vaega, i paga, pe taitoatasi, e fuafua i manaoga o le vasega.
Ina ia vaai i se faataitaiga o se gaoioiga faapena, a o lei amataina le vasega mafaufau e matamata le vitio “2.7 Iloiloina o se Fuaitau” (8.11), o loo maua i le ChurchofJesusChrist.org.
Filifili se tasi o fuaitau e 13 o le atamai i aoaoga faavae e te manao e malamalama lelei atili i ai. Faitau totoa i ai. Iloilo upu ma fasifuaitau o le atamai i aoaoga faavae, ma maitau mea ua e malamalama i ai e uiga i le fuaitau ma po o a fesili e te ono fesili ai, pe fesili ai se isi tagata e uiga i le fuaitau. Mo se faataitaiga, o se mea e ono e fesili ai e uiga i le Efeso 2:19–20 o le “O le a le maa tulimanu ma aisea ua faatusaina i ai Iesu Keriso?” Pe atonu foi e te tau mafaufau po o le a le uiga o le fasifuaitau “tete‘a ese” i le 2 Tesalonia 2:1–3 .
Tusi ni fesili se tele e te mafai ona fai.
E mafai e tagata aoga ona tusi le fuaitau o le atamai i aoaoga faavae sa latou filifilia i a latou api faamaumau mo suesuega po o i se fasipepa ona tusi faataamilo ai lea o a latou fesili.
A uma loa ona e tusia le tele o fesili e te mafai ona fai, filifili ni nai fesili e te manatu e sili ona taua ona malamalama i ai, ma taliina e faaaogaina ai fesoasoaniga faaagaaga mo le suesueina o tusitusiga paia. O nei fesoasoaniga e aofia ai le Taiala i Tusitusiga Paia, Taiala mo Autu, Bible Dictionary, vaefaamatalaga o tusitusiga paia, polokalama o le Potutusi o le Talalelei, po o lauga o konafesi aoao. E mafai foi ona e filifili e faaaoga ni isi o faiga mataalia e suesue ai tusitusiga paia ua e aoaoina i lenei tausaga, e pei o le faitauina o fuaiupu o loo siomia ai po o le taumafai ia malamalama i le faatatauga atoa o le mau. Tusifaamaumau au tali i totonu o lau api faamaumau mo suesuega.
Manatua e le o fesili uma e ono faigofie ona taliina ma o nisi atonu e manaomia ai se taimi faasili ma suesuega ma le agaga tatalo ma le mafaufau loloto.
Ina ia faaaofia atili tagata aoga ma fatufatu ni vaega eseese, mafaufau e fai atu ia i latou e tusi le fuaitau o le atamai i aoaoga faavae na latou filifilia ma a latou fesili i se isi fasipepa faatasi ma o latou igoa. Ona valaaulia lea o tagata aoga e faafesuiai a latou pepa ma se isi tagata aoga. I se isi foi faiga, valaaulia tagata aoga e tuuina atu a latou pepa i luma ina ia mafai ona faafefiloi ma tufatufa atu i soo se isi tagata aoga.
Tuu atu i tagata aoga se taimi e faaaoga ai fesoasoaniga mo le suesuega o tusitusiga paia e sueina ai tali i fesili o loo i luga o pepa na latou mauaina ma tusia na tali i luga o le pepa. A uma ua lava se taimi, valaaulia tagata aoga e toe tufa atu pepa i tagata aoga o loo iai o latou igoa i luga o pepa.
Valaaulia ni nai tagata aoga e faasoa mai le fuaitau o le atamai i aoaoga faavae na latou filifilia, o nisi o fesili na latou tusia, ma tali na mauaina e i latou po o a latou uo i le vasega. E mafai foi ona e fesili atu ia i latou po o le a le mea ua fesoasoani le fuaitau o tusitusiga paia latou te malamalama ai e uiga i le Faaola po o Lana talalelei.
Afai e lava le taimi (po o se isi aso), mafaufau e valaaulia tagata aoga e toe fai le gaoioiga e faaaoga ai se isi fuaitau o le atamai i aoaoga faavae.