2 Timoteo 3

O Tusitusiga Paia

Pe i ai se taimi e te lagona ai le lofituina po o le popole e uiga i le tulaga faaleagaga o i ai le lalolagi i aso nei? I se tusi ia Timoteo, sa valoia ai e Paulo o aso e gata ai o le a aofia ai “taimi faigata” (2 Timoteo 3:1), ae sa ia aoao atu foi ua tuuina atu e le Alii ia te oe le meaalofa o tusitusiga paia e fesoasoani ai ia te oe i taimi faigata (tagai i le 2 Timoteo 3:14–17). O lenei lesona ua faamoemoe e fesoasoani ia te oe e lagona ai se naunautaiga e suesue i tusitusiga paia, lea e mafai ona fesoasoani e puipuia oe mai mea leaga o o tatou aso.

Molimau atu e uiga i faamanuiaga o le suesue i tusitusiga paia i aso taitasi. Molimau atu e le aunoa i faamanuiaga e oo mai i le suesue ai i tusitusiga paia i aso taitasi, ma valaaulia tagata aoga e molimau atu i faamanuiaga latou te maua mai le suesueina o tusitusiga paia.

Sauniuniga a le tagata aoga: Faasoa atu le saunoaga lenei a Peresitene Thomas S. Monson (1927–2018): “O le faaaluina o se taimi i aso taitasi e suesue ai tusitusiga paia o le a, e aunoa ma se masalosalo, e faamalolosia ai o tatou faavae o le faatuatua ma a tatou molimau i le upumoni” (“Le Faavae Malosi,” Ensign po o le Liahona, Nov. 2006, 68). Valaaulia tagata aoga e mafaufau loloto i lenei faamatalaga ma mafaufau i aafiaga patino e faaalia ai e moni.

Gaoioiga e ono Mafai Ona Aoao Ai

O aso e gata ai

Mafaufau e fai i le vasega e tutu i luga. Fai atu ia i latou e vaai faalemafaufau e faapea, o se tasi o puipui i totonu o le potu e faatusa i le lagonaina o le lotofaafetai i le ola ai i lenei taimi i le talafaasolopito o le lalolagi ma le puipui faafeagai e faatusa i le lagona o le popole e uiga i ai. Valaaulia i latou e agai atu i se tasi o puipui pe tutu i se mea i le va o puipui e lua e sili ona faatusa iai i o latou lagona. Valaaulia ni nai tagata aoga e faamatala mai pe aisea ua faapena ai o latou lagona e pei ona iai.

Faitau i le faamatalaga lenei a Elder Neil L. Andersen o le Korama a Aposetolo e Toasefululua, ma mafaufau pe aisea e te lagona ai le lotofaafetai, popole, po o mea uma e lua i le ola ai i lenei taimi.

Ua tatou ola i taimi faatupu lagona, ae o taimi ofoofogia. …

Ua tatou iloa a o tatou latalata atu i le Afio Mai Faalua o le Faaola, o le a tumu lo tatou lalolagi i le vāvaō ma le fenumiai. O le toatele o tagata o le a fulitua i poloaiga a le Atua. E masani ona ou sii maia lenei saunoaga mai ia Peresitene Thomas S. Monson: “I se tasi taimi na tele lava ona tutusa tulaga faatonuina o le Ekalesia ma tulaga faatonuina o malo, ae i le taimi nei o lea ua i ai se vanu tele i le va lea, ma o loo faatupulaia pea lena va.”

(Neil L. Andersen, “A Compensatory Spiritual Power for the Righteous” [faigalotu mo le Vaiaso Aoga o le Iunivesite a Polika Iaga, Aok. 18, 2015], speeches.byu.edu)

• O a ni auala e ofoofogia ai taimi o loo tatou ola ai?

• O le a se mea e te ono lagona ai le popole e uiga i le ola ai i le lalolagi lea na faamatalaina e Elder Andersen?

A o e suesue i lenei lesona, vaavaai mo auala na saunia ai ma le alofa e le Atua le fesoasoani mo le fenumiai, matautia faaleagaga, po o le popole atonu o e lagonaina ona o tulaga o iai le lalolagi.

Faitau le 2 Timoteo 3:1–7, 12–13 ; 4:3–4 , ma vaavaai mo faamatalaga a Paulo o mea matautia i aso e gata ai. Atonu e te manao e faaaoga vaefaamatalaga e fesoasoani e te malamalama ai i nisi o upu faigata.

• O a faataitaiga o tulaga na faamatalaina e Paulo ua e vaaia i le lalolagi i aso nei?

O se meaalofa mai le Atua

E lei tuua lava e le Tama Faalelagi ia na o i tatou e feagai ma faigata o aso e gata ai. I Lona alofa ma le alofa mutimutivale, ua Ia tuuina mai ai ia i tatou le tele o meaalofa ofoofogia.

Na faaauau ona faapea mai Elder Andersen:

A o tatou saili lo tatou ala i se lalolagi e le o matua gauai atu i poloaiga a le Atua, o le a mautinoa lava o le a tatou lototatalo, ae e le tatau ona soona faateia tele i tatou. O le a faamanuia e le Alii Lana Au Paia i le mana faaopoopo faaleagaga e manaomia e faafetaiaia ai luitau o o tatou aso.

(Neil L. Andersen, “A Compensatory Spiritual Power for the Righteous” [faigalotu mo le Vaiaso Aoga o le Iunivesite a Polika Iaga, Aok. 18, 2015], speeches.byu.edu)

Faitau le 2 Timoteo 3:14–17 , ma vaavaai mo se tasi o meaalofa ua saunia e le Atua e fesoasoani ai ia i tatou i faigata o o tatou aso.

2 Timoteo 3:15–17O le o se fuaitau o le atamai i aoaoga faavae. Mafaufau e maka fuaitau o le atamai i aoaoga faavae i se ala iloga ina ia mafai ai ona e mauaina gofie. O le a e aoao atili e uiga i lenei fuaitau o le atamai i aoaoga faavae i le lesona o le a sosoo ai.

Valaaulia tagata aoga e faasoa mai mea na latou maua.

• O a nisi o faamanuiaga e mafai ona tatou maua mai le suesueina o tusitusiga paia na e matauina i nei fuaiupu?

Atonu e fesoasoani le lisiina o faamanuiaga i luga o le laupapa. Afai e faigata i tagata aoga ona faailoa mai faamanuiaga, e mafai ona faaopoopo nisi o mea nei i le lisi.

O le suesue i tusitusiga paia e mafai ona fesoasoani ia te oe e:

1. Faaloloto atili lou faatuatua ia Iesu Keriso.

2. Maua le atamai ma aoaoga i tulaga e te feagai ai.

3. Malamalama i aoaoga faavae po o upumoni o le talalelei.

4. Faasa’o manatu sese po o amioga masani le lelei.

5. Avea atili e pei o Iesu Keriso.

• E faapefea ona e aoteleina mea sa aoao mai e Paulo e uiga i le suesueina o tusitusiga paia?

O se tasi o auala e mafai ona aotele ai e le vasega ia aoaoga a Paulo o le: a o tatou suesue i tusitusiga paia, e mafai ona tatou maua le poto o le a taitai atu ai i tatou i le faaolataga e ala i le faatuatua ia Iesu Keriso. Mafaufau e tusi nisi o aotelega a tagata aoga i luga o le laupapa.

I lau api faamaumauga mo suesuega, tusi e uiga i se taimi na fesoasoani ai tusitusiga paia ia te oe i se tasi o auala na faamatalaina e Paulo. Afai e le mafai ona e mafaufau i se aafiaga, tusi pe aisea e te manatu ai e mafai e tusitusiga paia ona fesoasoani ia te oe i se tasi o auala na faamatalaina e Paulo.

Mafaufau e valaaulia nisi o volenitia e faasoa pe aotele mai mea sa latou tusia.

• O a nisi auala e mafai ona faamanuia ai oe e le Alii a o e suesue i tusitusiga paia?

• Na tuuina atu e le Alii ia te oe le meaalofa o tusitusiga paia e fesoasoani ia te oe i aso e gata ai. O le a se mea o aoao atu e lenei mea ia te oe e uiga ia te Ia?

O le faaaogaina o tusitusiga paia

Mafaufau e faamatuu atu tagata aoga e galulue i ni vaega toalaiti e faamaea ai le gaoioiga lenei.

Ina ia faataitai le faaaogaina o tusitusiga paia e faamalosia ai lou faatuatua ia Iesu Keriso, filifili ni luitau se lua o aso e gata ai na valoia e Paulo i le 2 Timoteo 3:1–7, 12–13 ; 4:3–4 , pe filifili ni luitau eseese e talafeagai ma lou olaga. Saili mo fuaitau o mau e mafai ona fesoasoani i se tasi o loo feagai ma nei luitau. E ono fesoasoani le sailia o upu autu i le Taiala i Tusitusiga Paia o loo maua uma i le ChurchofJesusChrist.org. Pe e mafai foi ona e filifili muamua nisi o mau e te fiafia i ai ona filifili lea po o le fea o luitau o aso e gata ai e mafai ona fesoasoani ia te oe.

• O a fuaitau o mau na e maua e mafai ona fesoasoani i se tasi o loo feagai ma ni luitau patino? Faamatala pe mafai faapefea ona latou fesoasoani.

O lau sini o le suesueina o tusitusiga paia

Tuu atu i tagata aoga se avanoa e manatunatu ai i a latou sini o le suesueina o tusitusiga paia i aso taitasi. O nisi tagata aoga atonu o loo tauivi e tausisia le sini ua latou faatuina. O le aafiaga faaleaoaoga i le lesona o le “Atamai i Aoaoga Faavae: 2 Timoteo 3:15–17” o le a tuu atu ai i tagata aoga se avanoa e mafaufau ai pe faapefea ona faatoilalo mea faalavefau i le suesueina o tusitusiga paia i aso taitasi atonu latou te feagai.

Sa faamanatu atu e Paulo ia Timoteo ua faamanuiaina Timoteo i le iloaina o tusitusiga paia mai le taimi a o laitiiti o ia (tagai i le 2 Timoteo 3:15). E faapena foi, o le a faamanuia oe e le Tama Faalelagi mo le suesueina o tusitusiga paia i lou talavou. Faaaoga ni nai minute e faatu ai ma le agaga tatalo se sini pe mafaufau foi i lau sini o i ai nei mo suesuega faaletagata lava ia o tusitusiga paia i aso taitasi. Mafaufau loloto i fesili nei:

• O faapefea mai le taulimaina o lau sini?

• O faapefea ona fesoasoani lau sini ia te oe e atiina ae ai le faatuatua ia Iesu Keriso ma faatoilalo luitau o o tatou aso?

• O a ni fetuunaiga, pe afai e i ai, i lau sini e te lagona e tatau ona e faia?

Mafaufau e valaaulia tagata aoga e faasoa mai a latou tali i le fesili lona lua o loo i luga.

Valaaulia tagata aoga e auina atu a latou sini pe afai latou te lagona o le a fesoasoani ia i latou e ausia ai.

Mafaufau e tau atu i lou faiaoga, se matua, po o se isi tagata e te faatuatuaina e uiga i lau sini o le suesueina o tusitusiga paia ma valaaulia i latou e faamanatu atu ia te oe.

Tala Auiliili ma Faamatalaga o Talaaga

E mafai faapefea ona ou malamalama i faigata o loo lisiina i le 2 Timoteo 3:1–7 ?

Atonu e aoga faauigaga nei:

• “Aunoa ma se lagona faalenatura” ( 2 Timoteo 3:3) e mafai ona aofia ai amioga e fesootai ma le leai o se lagona po o le popole, lagona o le inoino ma le inosia, po o manaoga tuinanau e taitai atu ai i feusuaiga le mama

• O le uiga o le “le taofia o manao o le tino” ( 2 Timoteo 3:3) o le aunoa ma le amio pulea

• O le uiga o le “soona fai” ( 2 Timoteo 3:4) o lona uiga o le fai faamalosi, lepopoi

• O le uiga o le “faafefeteina” ( 2 Timoteo 3:4) o le faasausili, faamaualuga

E mafai faapefea ona ou malamalama atili i le 2 Timoteo 3:16–17 ?

Mafaufau e faitau le tusiga “Line upon Line: 2 Timothy 3:16–17” (New Era, Ape. 2012, 19), lea o loo i ai upu fesoasoani, faamatalaga faaperofeta, ma faamatalaga e mafai ona fesoasoani e te malamalama atili ai i nei fuaiupu.

E faapefea ona fesoasoani le suesueina o tusitusiga paia ia te au i lou olaga ?

O Elder Richard G. Scott (1928–2015) o le Korama a Aposetolo e Toasefululua sa saunoa mai faapea:

Tatou te talanoa atu i le Atua e ala i le tatalo. E masani lava ona Ia toe fesootai mai ia i tatou e ala i Ana afioga tusitusia. Ina ia iloaina pe faape’i le faalogoina ma le lagonaina o le siufofoga o le Paia, faitau i Ana afioga, suesue i tusitusiga paia, ma mafaufau loloto i ai. Fai ia avea i latou ma se vaega taua o lou olaga i aso uma. …

O le suesue e le aunoa i tusitusiga paia i aso uma, o le a e maua ai le filemu i fesouaiga o siomiaina oe ma le malosi e tetee atu ai i faaosoosoga. O le a e atiaeina le faatuatua malosi i le alofa tunoa o le Atua ma iloa e ala atu i le Togiola a Iesu Keriso o le a faia ai ia tonu mea uma e tusa ai ma le taimi a le Atua.

(Richard G. Scott, “Ia Avea le Faaaogaina o le Faatuatua ma Mea e te Faamuamuaina,” Ensign po o le Liahona, Nov. 2014, 93–94)

E mafai faapefea ona ou lagonaina le faamoemoe e uiga i le lumanai pe afai e foliga mai e feteenai le alafua a tagata ma poloaiga a le Atua?

O Peresitene Boyd K. Packer (1924–2015) o le Korama a Aposetolo e Toasefululua, na fesoasoani e tali lenei fesili i le vitio “I Luga o le Mauga o Siona” mai le faailotaimi 0:00 i le 1:41, o loo maua i le ChurchofJesusChrist.org.

O a nisi o auala e mafai ona ou suesue auiliili ai i tusitusiga paia?

O Elder David A. Bednar o le Korama a Aposetolo e Toasefululua, na taliina lenei fesili i le vitio “Fautuaga mo le Suesueina o Tusitusiga Paia” (2:07), o loo maua i le ChurchofJesusChrist.org.

Galuega Faatino Faaopoopo e Aoao Mai Ai

O le faataitaiga a le Faaola

Toe faamanatu le Mataio 4:1–11 ma le vasega e vaai pe na faapefea ona faaaoga e le Faaola ia tusitusiga paia e faatoilalo ai mea matautia ma faaosoosoga sa feagai ma Ia.

O auala eseese e aoao ai mai tusitusiga paia

A o lei valaauliaina tagata aoga e mafaufau i a latou sini patino o le suesueina o tusitusiga paia, faaali atu le saunoaga lenei a Elder David A. Bednar o le Korama a Aposetolo e Toasefululua. Valaaulia tagata aoga e faailoa mai upu taitasi o loo faamatala ai auala e mafai ona tatou faaaoga ai a tatou tusitusiga paia.

“O oe ma a’u e tatau ona vaavaai ma o atu ia Keriso, o ‘le punavai o vai ola’ ( 1 Nifae 11:25 ; faatusatusa i le Eteru 8:26 ; 12:28), i le faitauina (tagai i le Mosaea 1:5), suesueina (tagai i le [ Mataupu Faavae ma Feagaiga 26:1 ]), sailiiliina (tagai i le Ioane 5:39 ; Alema 17:2), ma le talisua ai (tagai i le 2 Nifae 32:3) i afioga a Keriso e pei ona iai i tusitusiga paia. O le faia ai o ia mea, e mafai ona tatou maua ai le taitaiga ma le puipuiga faaleagaga i la tatou malaga i lenei olaga” (David A. Bednar, “O Se Faatanoa o le Vai Ola” [faeasaite a le Ofisa o Aoga o le Ekalesia mo talavou matutua, Fep. 4, 2007], 2, broadcasts.ChurchofJesusChrist.org).

Fai i le vasega e faamatala mai pe mafai faapefea ona latou faaaogaina i a latou suesuega faaletagata lava ia o tusitusiga paia ia upu taitasi latou te faailoa mai.