1–2 Timoteo; Tito; Filemoni

Vaaiga Aoao

O le suesueina o upu a Paulo i lesona o lenei vaiaso e mafai ona fesoasoani e tali ai le tele o fesili, e pei “O le a le matafaioi a se epikopo?” “O le a se meaalofa faapitoa ua tuuina mai e le Atua e fesoasoani ai ia i tatou e faatoilalo ai luitau o aso e gata ai?” “E faapefea ona tatou tutumau seia oo i le iuga?” I taimi ua tuanai, sa e suesueina ai tusi a Paulo i tagata o le ekalesia i aai eseese. O le vaiaso lenei, o le a e suesue ai i upumoni aoga na tusia e Paulo i tusi i ni tagata se toatolu: Timoteo, Tito, ma Filemoni.

Sauni e Aoao Atu

O le faamatalaga lenei e tuuina atu ai i faiaoga ni manatu i mea e ono manaomia ona muai saunia mo lesona taitasi:

1 Timoteo 3:1–7; Tito 1:6–9

Faamoemoega o le lesona: O lenei lesona ua faamoemoe e fesoasoani ai i tagata aoga ia malamalama atili i uiga o epikopo ma peresitene o paranesi ma le auala e mafai ai e nei auauna a le Alii ona fesoasoani ia i latou i o latou olaga.

Sauniuniga a le tagata aoga: Valaaulia tagata aoga e mafaufau i le fesili lenei ma o mai i le vasega ua saunia e faasoa mai o latou manatu. Ua faapefea ona faamanuiaina oe po o lou aiga e le Tama Faalelagi ma Iesu Keriso e ala i se epikopo po o se peresitene o le paranesi?

Anomea mo tagata aoga: Anomea e tusi ai se faamatalaga po o se tusi i lo latou epikopo
Mea faitino: O se polo

Fautuaga faafaiaoga mo fesootaiga i vitio: Afai e mafai, mafaufau e valaaulia se epikopo o i ai nei po o se epikopo sa i ai muamua e auai i le vasega ma molimau ane i le matafaioi taua a epikopo i le Ekalesia toefuataina. Manatua ia maua mai se faatagaga mai lau taitai faamaopoopo po o le taitai o le polokalama a o lei valaauliaina ni failauga faaaloalogia i le vasega. Afai e te valaauliaina se epikopo sa i ai muamua nai lo se epikopo o i ai nei, ia mautinoa e saili se faatagaga mai le taitai perisitua i le lotoifale a le tagata.

1 Timoteo 4:12–16

Faamoemoega o le lesona: O lenei lesona ua faamoemoe e fesoasoani i tagata aoga ia taumafai e avea ma se faataitaiga o se soo o Iesu Keriso i lo latou talavou.

Sauniuniga a le tagata aoga: Valaaulia tagata aoga e mafaufau e uiga i le fesili lenei ma sauni e faasoa mai o latou manatu: Afai e mulimuli atu se tasi ia te oe mo se vaiaso, o le a se faamaoniga o le a latou iloaina ai o loo e taumafai e mulimuli ia Iesu Keriso?

Vitio: “O le Atotupe ua Leiloa” (2:40)

Fautuaga faafaiaoga mo fesootaiga i vitio: A mafaufau le vasega e uiga i tagata o e na avea ma faataitaiga ia i latou i auala eseese na faamatalaina e Paulo, valaaulia le vasega e tusi i le vaega mo talanoaga tusitusia igoa o se tagata e toatasi pe toalua sa latou mafaufau i ai. O nei igoa e mafai ona aofia ai nisi o le vasega. Ona valaau lea i ni nai tagata aoga e faamatala mai pe aisea na latou tusia ai se tasi o igoa sa latou tusia ma faasoa mai pe na faapefea ona avea ai lena tagata ma se faataitaiga ia i latou. Valaaulia tagata aoga e mafaufau i tagata latou te iloa i le taimi nei ma tagata mai se taimi ua tuanai, aemaise lava le Faaola.

2 Timoteo 3

Faamoemoega o le lesona: O lenei lesona ua faamoemoe e fesoasoani i tagata aoga ia lagonaina se manao e suesue i tusitusiga paia, lea e mafai ona fesoasoani e puipuia i latou mai mea leaga o o tatou aso.

Sauniuniga a le tagata aoga: Faasoa atu le saunoaga lenei a Peresitene Thomas S. Monson (1927–2018) ma tagata aoga: “O le faaaluina o se taimi i aso taitasi e suesue ai tusitusiga paia o le a, e aunoa ma se masalosalo, faamalosia ai o tatou faavae o le faatuatua ma a tatou molimau i le upumoni” (“Le Faavae Malosi,” Ensign po o le Liahona, Nov. 2006, 68). Valaaulia tagata aoga e mafaufau loloto i lenei faamatalaga ma mafaufau i aafiaga patino e faaalia ai e moni.

Fautuaga faafaiaoga mo fesootaiga i vitio: I le amataina ai o le lesona, mafaufau e fai i tagata aoga e tuu i luga ni nai ata faatusa (emojis) i le vaega o talanoaga tusitusia lea e faatusa i o latou lagona e uiga i le ola ai i aso e gata ai. (Mo se faataitaiga, atonu latou te lagonaina le lotofaafetai, popole, po o mea uma e lua.)

Atamai i Aoaoga Faavae: 2 Timoteo 3:15–17

Faamoemoega o le lesona: O lenei lesona o le a fesoasoani i tagata aoga e tauloto lenei tusi faasino o aoaoga faavae ma fasifuaitau autu o le mau mo le 2 Timoteo 3:15–17 , faamatala le aoaoga faavae, ma faaaoga mataupu faavae o le mauaina o le malamalama faaleagaga i tulaga moni o le olaga.

Sauniuniga a le tagata aoga: Valaaulia tagata aoga e mafaufau e uiga i soo se luitau e taofia ai i latou mai le suesueina o tusitusiga paia i aso taitasi. Fautuaina i latou e mafaufau i ni auala e mafai ai e mataupu faavae o le mauaina o le malamalama faaleagaga ona fesoasoani ia i latou e faatoilalo ai o latou faafitauli.

Fautuaga faafaiaoga mo fesootaiga i vitio: Nai lo le valaaulia o tagata aoga e tusi le mau faasino o tusitusiga paia mo le atamai i aoaoga faavae ma le fasifuaitau autu o le mau i se atatusi o se tusi, valaaulia tagata aoga e ta faatolu pe faafa i totonu le mau faasino ma le fasifuaitau autu i le vaega o talanoaga tusitusia. Ia mautinoa e ta’u atu ia i latou e ta i totonu upu taitasi ae aua le tipiina ma faapipii. Atonu e aoga le vaai pe faafia ona ta e tagata aoga le mau faasino ma le fasifuaitau autu i totonu o se taimi faatapulaa faapitoa (mo se faataitaiga, 90 sekone).

2 Timoteo 4

Faamoemoega o le lesona: O lenei lesona ua faamoemoe e fesoasoani i tagata aoga ia avea pe tumau ai le tuuto atu i le avea ma soo ia Iesu Keriso i le olaga atoa.

Sauniuniga a le tagata aoga: Valaaulia tagata aoga e sue se fuaitau o se mau e mafai ona latou faasoa atu i se tasi o loo lagonaina le lotovaivai i a latou taumafaiga e mulimuli ia Iesu Keriso.

Ata e faaali atu: O se ata o se fusuaga ma se ata o se tuuga
Anomea mo tagata o le vasega: Se fasipepa laitiiti mo tagata aoga taitasi

Fautuaga faafaiaoga mo fesootaiga i vitio: Afai e maua, mafaufau e faaaoga se iloiloga e le faailoaina e faataga ai tagata aoga e faasoa mai se tulaga faataitai e ono lagona ai e se tasi le faaosoosoina ia musu e taumafai e mulimuli ia Iesu Keriso. Fai atu i le vasega e mafai foi ona latou filifili e faasoa mai le mafuaaga moni na filifili ai se tasi e pele ia taofia lona mulimuli ia Iesu Keriso.