2 Timoteo 4

“Ua Ou Taofi i le Upu o le Faatuatua”

O le ola ai i le talalelei a Iesu Keriso e faamanuiaina ai i tatou i auala e tele. E ui o le a tatou feagai ma tofotofoga ma sauaga, e ala i le faatuatua ia Iesu Keriso, e mafai ona tatou tumau i le lototoa e oo i le iuga. Ina ua mavae le tele o tausaga o taumafai Paulo e mulimuli i le Faaola, sa iloa e ia o le a vave oo mai le taimi e fasiotia ai o ia. I lana tusi faaiu ia Timoteo, sa ia faailoa atu ai le mafuaaga na aoga ai lona tumau i le faatuatua atoa ma i latou uma o e filifili e tumau i le faatuatua. O lenei lesona ua faamoemoe e fesoasoani ia te oe e avea pe tumau ai le tuuto atu e avea ma soo i le olaga atoa ia Iesu Keriso.

Fesoasoani i tagata aoga ia iloa valaaulia o “vaavaai mo”. E latalata i le amataga o se lesona, e masani lava ona i ai se valaaulia mo tagata aoga e mataitu aoaoga faavae, upumoni, po o mataupu faavae o le a tulai mai i anotusi o mau. Atonu e aoga le faaali atu o mea e te manao ia vaavaai i ai tagata aoga. O le faia o lea e mafai ona fesoasoani i tagata aoga e tausia ai le vaavaai mo valaaulia i o latou mafaufau a o latou suesueina le poloka mau.

Sauniuniga a le tagata aoga: Valaaulia tagata aoga e sue se fuaitau o se mau e mafai ona latou faasoa atu i se tasi o loo lagonaina le lotovaivai i a latou taumafaiga e mulimuli ia Iesu Keriso.

Gaoioiga e ono Mafai Ona Aoao Ai

Tumau ai faamaoni

I le taimi o le gaoioiga lenei, ia manatu magafagafa i tagata aoga o e atonu ua mama’i tigaina pe i ai se uo po o se tagata o le aiga na maliu talu ai nei.

Vaai faalemafaufau pe faape’i le iloa e faapea ua lata le taimi e te oti ai.

Mafaufau e valaaulia tagata aoga e tusi a latou tali i fesili nei i a latou api faamaumau mo suesuega. Ona mafaufau lea e valaaulia ni nai tagata aoga e faasoa mai i le vasega a latou tali i le fesili mulimuli.

• O le a se mea o le a e faamoemoe e mafai ona e fai atu ai e uiga i lou olaga pe a oo mai lena aso?

• O le a se mea o le a taua ia te oe i lena taimi? O le a se mea o le a le taua?

• O le a sou manatu e faapefea ona aafia oe i lena taimi ona o au taumafaiga e mulimuli i le Faaola i lou olaga atoa?

Ina ua mavae le tele o tausaga o auaunaga lototoa a Paulo o se soo o Iesu Keriso, sa tusi atu o ia ia Timoteo mai se falepuipui i Roma ma le iloa o le a lata ona fasiotia o ia. E foliga mai o le tusi mulimuli lea na tusia e Paulo o loo aofia ai i le Feagaiga Fou. Ua faamanuiaina i tatou i le mafai ona faitau i nisi o manatu mulimuli o lenei tamalii maoae a o ia tomanatu i lona olaga ma lona maliu ua lata mai.

Sa faatusatusa e Paulo ana taumafaiga e tumau faamaoni i faatinoga eseese e lua. Faitau le 2 Timoteo 4:6–7 , ma vaavaai mo faatusatusaga a Paulo.

Mafaufau e faaali atu nei ata e lua a o talanoaina e tagata aoga le fesili lenei.

• Aisea e ono avea ai le tauivi i se taua lelei ma le faaumaina o se tuuga ma ni faatusatusaga aoga i le faatumauina o lo tatou faatuatua ia Iesu Keriso i o tatou olaga atoa?

Mafaufau loloto mo se minute pe o a mai oe i lenei taimi i lou olaga i lau tuuga pe i lau taua e tumau faamaoni ai ia Keriso. Pe na i ai se taimi na e lagona ai le vaivai, sauaina, po o le faamanu’alia? Pe na i ai se taimi na faaosooso ai oe e togi le solo? Na faapefea ona fesoasoani le Faaola ia te oe i nei tulaga? A o e suesue i le aso, mafaufau pe aisea o le a aoga ai mo oe le faaauau pea ona tamoe i le tuuga pe tauivi i le taua o le avea ma soo.

O mea e ofoina atu e le Faaola i e faamaoni

Faitau le 2 Timoteo 4:8 , ma vaavaai mo faamanuiaga na saunia e le Faaola mo Paulo ma i latou uma o e tumau ma le faamaoni.

O lenei palealii o se faatusa mo le ola e faavavau faatasi ma le Tama Faalelagi ma Iesu Keriso, ua taua foi o le faaeaga.

• Aisea e te manatu ai o le a ono faamatalaina e Paulo lenei faamanuiaga ua ofoina mai e Iesu Keriso ia i tatou o “se pale o le amiotonu”?

O se tasi o upumoni e mafai ona tatou aoao mai lenei fuaitau o le: Ona o Iesu Keriso, o i latou uma o e tumau faamaoni e oo i le iuga o le a maua le ola faavavau.

• O le a le uiga ia te oe o le fasifuaitau “tumau e oo i le iuga”? O a ni auala e tatau ona e tumau ai i le taimi nei? O le a se mea e avea ai le tumau e oo i le iuga ma se luitau?

• O a ni auala ua avea ai le Faaola ma faataitaiga atoatoa o le tumau e oo i le iuga? (tagai i le Mataupu Faavae ma Feagaiga 19:16–19).

• Na faapefea e le tumau ai o le Faaola e oo i le iuga ona aafia ai i tatou?

Faaaoga sina taimi e mafaufau ai po o ai e ono aafia i lau filifiliga e tumau e oo i le iuga.

Mafaufau e tuu atu i tagata aoga taitasi se fasi pepa laitiiti. Valaaulia tagata aoga taitasi e tusi faalilolilo i lalo ma tuuina mai se tulaga faataitai puupuu o lagona ai e se tasi le faaosoosoina e taofia le taumafai e mulimuli ia Iesu Keriso. (E mafai foi ona faaaoga se mafuaaga moni na filifili ai se tasi e pele ia te ia e taofia le mulimuli ia Iesu Keriso.) O nei pepa e mafai ona toe tufaina i se taimi mulimuli ane i le lesona pe faitau ma faaaoga i isi auala e fesoasoani ai i tagata aoga e faatatau le lesona i o latou olaga.

O lo tatou faamoemoe o loo ua taoto ia Iesu Keriso

O Elder L. Tom Perry (1922–2015) o le Korama a Aposetolo e Toasefululua na faamalamalama mai e faapea, ona o le auala e luitauina ai le tumau e oo i le iuga, e le mafai ai ona tatou ausia na o i tatou. Sa ia aoao mai:

O le tumau e oo i le iuga e mautinoa lava e le o se galuega faatino e fai na o oe lava ia. … E manaomia ai le mana togiola o le Faaola.

(L. Tom Perry, “O Le Talalelei a Iesu Keriso,” Ensign po o le Liahona, Me 2008, 46)

E pei o Paulo, e toatele isi na tumau e oo i le iuga faatasi ai ma le fesoasoani a le Faaola. Faitau ia le itiiti ifo ma le lua ni fuaitau nei o le Tusi a Mamona. Vaavaai pe na faapefea e se sootaga ma le Faaola ona aafia ai nei perofeta taitasi a o latou tutumau ai ma le faamaoni seia oo atu ai i lo latou oti.

E mafai foi ona valaaulia tagata aoga e faasoa mai ni faataitaiga mai o latou lava aiga o le filemu lea e mafai ona lagonaina a o latalata atu se tasi i le oti ina ua mavae se olaga o le taumafai e mulimuli ia Iesu Keriso.

Liae: 2 Nifae 1:14–15

Enosa: Enosa 1:27

Moronae: Moronae 10:32–34

• Na faapefea ona faamatala e nei soo lo latou sootaga ma Iesu Keriso?

• Na faapefea e lena sootaga ona aafia ai o latou lagona e uiga i lo latou oti?

O le a se fautuaga o le a e tuuina atu?

Mafaufau e toe tufa atu i tagata aoga eseese ia pepa na sa tuuina mai e tagata aoga e uiga i tulaga e mafai ona faaosoosoina ai se tasi ina ia faamutaina lo latou taumafai e mulimuli ia Iesu Keriso.

Faaali atu fesili nei, ma tuu atu i tagata aoga se taimi e mafaufau loloto i ai a o manatunatu i le tulaga faataitai. Ona valaaulia lea o volenitia e faasoa mai mea latou te ono fai atu i se tasi o loo iai i lena tulaga, e tusa lava pe le o taliina faatatau tonu i fesili. Valaaulia i latou na faamaeaina sauniuniga a le tagata aoga e faasoa mai foi le mau na latou mauaina.

• O le a se fautuaga o le a e tuuina atu i se tagata faamaoni o loo popole e le lava lo latou malosi e tutumau ai?

• Mata o le a sau tala e fai atu i se tasi ua le o toe mulimuli i le Faaola ma ua lagona nei ua tuai tele ona toe amata? E mafai faapefea ona e faaaogaina le faataitaiga o le olaga o Paulo e fesoasoani ai ia latou iloa e mafai e le Faaola ona fesoasoani ia i tatou e suia ma toe amata?

• O a laasaga e mafai ona latou faia e liliu atu ai i le Faaola mo se fesoasoani?

O le a le feau mo oe?

Toe foi i le 2 Timoteo 4 ma faitau fuaiupu 6–8, 18. Vaai faalemafaufau ia te oe lava i le lumanai, i le mafai ai ona e tautala i mea na fai mai ai Paulo a o e latalata atu i le iuga o lou olaga. Ona tali lea o fesili nei:

• O le a sou lagona o le a se feau a le Tama Faalelagi mo oe?

• Na faapefea e mea ua e aoaoina ma lagonaina i le aso ona fesoasoani ia te oe e malamalama atili i lou manaomia ai o Iesu Keriso?

• O le a se mea ua e lagona ua musuia ai oe ia faia?

Tala Auiliili ma Faamatalaga o Talaaga

E faapefea ona tatou tutumau e oo i le iuga?

O Elder L. Tom Perry (1922–2015) o le Korama a Aposetolo e Toasefululua, na faamalamalama mai:

O le tumau e oo i le iuga e manaomia ai le faamaoni e oo i le iuga, e pei o le tulaga o Paulo, lea na tau atu ia Timoteo, “Ua ou tau le taua lelei, ua iu ia te au le tausinioga, ua ou taofi i le faatuatua” ( 2 Timoteo 4:7). E le taumateina lava, ua le o se galuega faigofie lenei mea. Ua faamoemoeina ina ia faigata, luitauina, ma, i lona faatumutumuga, ia faaleleia a o tatou saunia e toe foi atu e nonofo faatasi ma lo tatou Tama o i le Lagi ma maua faamanuiaga e faavavau.

(L. Tom Perry, “O Le Talalelei a Iesu Keriso,” Ensign po o le Liahona, Me 2008, 46)

Maimoa i le vitio “Tumau e oo i le Iuga” (2:04), o loo maua i le ChurchofJesusChrist.org, ma vaavaai pe na faapefea e Peresitene Dieter F. Uchtdorf, a o i ai i le Au Peresitene Sili, ona fesoasoani e tali le fesili lenei.

//media.ldscdn.org/webvtt/scripture-and-lesson-support/doctrine-and-covenants-visual-resource/2010-07-019-endure-to-the-end-en.vtt

Ae faapefea pe afai e faigata i nisi taimi ona vaai i faamanuiaga o le tumau ai faamaoni?

O Elder Jeffrey R. Holland o le Korama a Aposetolo e Toasefululua, sa molimau mai:

Aua e te fiu. Savali pea. Taumafai pea. O loo i ai le fesoasoani ma le fiafia i luma atu. … O le a lelei mea uma i le iuga. Ia talitonu i le Atua ma talitonu i mea lelei o le a oo mai.

… E vave oo mai nisi faamanuiaga, o nisi e tuai mai, o nisi e le oo mai vagana i le lagi; ae mo i latou e opogi le talalelei a Iesu Keriso, e oo mai lava.

(Jeffrey R. Holland, “An High Priest of Good Things to Come,” Ensign, Nov. 1999, 38)

Galuega Faatino Faaopoopo e Aoao Mai Ai

O le tusi a Filemoni e mafai ona aoaoina ai i tatou e uiga i le Faaola

Valaaulia se tagata aoga e faitau leotele le faamatalaga lenei e uiga i le tulaga sa tautalagia e Paulo i le tusi lenei:

Sa i ai se auauna a Filemoni, po o se pologa, e igoa ia Onesemo sa sola ese i Roma ma atonu na ia gaoia se mea mai ia Filemoni (tagai i le Filemoni 1:18). O pologa sa lei manatu i ai o se mea leaga i le aganuu a tagata Iutaia-Kerisiano i aso a Paulo, ma sa lagolagoina e le tulafono a Roma. O faasalaga mo tagata pologa ua sosola e aofia ai le matuai sasaina, faailogaina le muaulu, pe fasiotia foi. Ina ua sola ese, sa fetaiai Onesemo ma le Aposetolo o Paulo ma sa liua i le talalelei a Iesu Keriso. Sa fautuaina e Paulo ia Onesemo e toe foi ia Filemoni.

Valaaulia se tagata aoga e faitau leotele le Filemoni 1:8–12. Fai atu i le vasega e mulimuli i le faitauga, ma vaavaai po o le a le mea na ole atu ai Paulo, pe poloaiina, ia Filemoni e fai.

Ona valaaulia lea o le vasega e faitau le Filemoni 1:15–19 ma faatusatusa mea na tautala ai Paulo ma mea na ia ofoina atu e fai ma sui o Onesemo i mea e faia e le Faaola mo i tatou taitoatasi.

2 Timoteo 4:8. Ua tuuina mai e Iesu Keriso ia i tatou le faamoemoe mo lo tatou lumanai e ui i a tatou mea sese ua tuanai

Fesoasoani ia malamalama le vasega o le faamautinoaga a Paulo i se taui e faavavau (tagai i le 2 Timoteo 4:8) e lei oo mai ona e faapea na te lei faia lava ni mea sese. O le mea moni, i le amataga o lona olaga, ina o lauiloa ai o ia o Saulo, sa faasagatau o ia i le Ekalesia a le Faaola (tagai i le Galuega 8:3 ; 9:1–2). I le toe tepa i tua i lona olaga, sa faamatala ai e Paulo lona tagata laitiiti o le “sili musa” o tagata agasala (tagai i le 1 Timoteo 1:15). Atonu na faaosoosoina gofie Paulo e faavaivai ona o ana agasala ma vaivaiga ua tuanai.

Valaaulia le vasega e faitau le 1 Timoteo 1:12–17 ma faailoga se mea i fuaiupu taitasi o loo faaalia ai le faalagolago o Paulo ia Iesu Keriso e laveai o ia, nai lo o lona lava malosi.

Fai atu i tagata aoga e faasoa mai po o fea o nei fuaiupu e sili ona anoa mo i latou ma pe aisea foi.

Valaaulia i latou eaotele le savali a Paulo i se tasi ua lagona le faavaivai ona o a latou mea sese ua tuanai po o vaivaiga o i ai nei.