Iloilo Lou Aoaoina 10

Kalatia–2 Tesalonia

O lenei lesona ua faamoemoe e fesoasoani ia te oe e iloilo ai sini na e faatuina ma lou tuputupu a’e patino na e mauaina i le faagasologa o lou suesueina o le Feagaiga Fou. 

O le faatauaina o faasoa a tagata aoga. Ua i ai i tagata aoao taitoatasi le gafatia e fesoasoani ai i le aoaoina o isi. Fesoasoani ia i latou ia malamalama a o latou auai i le vasega, e mafai ona i ai so latou aafiaga lelei i isi tagata aoga. Fautuaina le vasega e faalogo ma le faamaoni pe a tautatala a latou uo ma tali atu i manatu faaalia o le tasi ma le isi. E aumaia e tagata aoga taitasi se vaaiga tulaga ese i le vasega e mafai ona faamanuiaina ai isi tagata aoga.

Sauniuniga a le tagata aoga: Valaaulia tagata aoga e mafaufau e uiga i sini na latou faatuina a o latou suesueina le Kalatia e oo i le 2 Tesalonia. Fai atu ia i latou e o mai saunia e faasoa mai le alualu i luma sa latou oo iai ma faafitauli sa latou fetaiai a o latou galulue e ausia na sini.

Gaoioiga e ono Mafai Ona Aoao Ai

O lou alualu i luma faaleagaga

Ua faamoemoeina lenei lesona e fesoasoani i tagata aoga e iloilo sini na latou faatuina, o lo latou gafatia e faamatala aoaoga i le Feagaiga Fou, ma pe o suia faapefea o latou uiga, manaoga, ma le gafatia o le ola ai i le talalelei. O le suesuega a le vasega i le Kalatia–2 Tesalonia sa ono faamamafaina ai isi upumoni nai lo o upumoni o loo iai i nei gaoioiga. Afai o lea, e mafai ona fetuunai gaoioiga e faaaofia ai na upumoni.

Mafaufau i se tomai, taleni, po o se amio o loo e atiina ae lea e manaomia ai taumafaiga faifai pea ma maumaututu.

• O le a se mea e faaosofia ai oe e faaalu le taimi ma taumafaiga e manaomia ina ia faaleleia atili ai?

• A o e galue malosi ina ia alualu i luma, o le a se mea ua e faamoemoe e tupu e fesoasoani e te iloaina ai o lo o aoga au taumafaiga?

Ua tatou maua le tele o avanoa i o tatou taimi i le lalolagi e galulue ai agai atu i le avea atili e faapei o le Faaola, lea e saunia ai i tatou e toe foi atu e mau faatasi ma Ia ma lo tatou Tama Faalelagi. E mafai ona fesoasoani le iloilo faavaitaimi o lo tatou alualu i luma ma faia soo se fetuunaiga e manaomia.

O le faamoemoega o lenei lesona o le tuu atu lea ia te oe o avanoa e iloilo ai lou alualu i luma faaleagaga. O le a e maua le avanoa e iloilo ai mea ua e aoaoina mai le Feagaiga Fou ma iloilo lou alualu i luma e faatatau i sini atonu na e faatuina e afua i mea na e aoaoina.

Faaaoga sina taimi e mafaufau ai e uiga i lau suesuega talu ai nei o le Feagaiga Fou ma faatinoga na e faia ona o mea sa e aoaoina. Atonu e te manao e toe faamanatu mea na e tusia i lau api talaaga po o mea na e makaina i au tusitusiga paia talu ai nei e faailoa ai sini ua e faatuina ma lagona ua e mauaina.

E mafai e tagata aoga ona faamaumauina o latou manatu i a latou api faamaumau mo suesuega. Ina ua lava se taimi na tuuina atu i le vasega, valaaulia lea o i latou e faasoa mai mea sa latou tusia. O fesili nei e mafai ona fesoasoani i tagata aoga e iloa ai mea e faasoa atu.

• O le a se mea ua e aoaoina mai le Feagaiga Fou ua fesoasoani ia te oe e faalatalata atili atu ai ia Iesu Keriso?

• O le a se mea ua e aoaoina e uiga ia te Ia mai le Feagaiga Fou ua tulaga ese ia te oe?

Afai e faasoa mai e tagata aoga ni aafiaga faaleaoaoga taua e ese mai ia i latou o loo lisi atu i lalo, faaaoga se taimi e fesoasoani ai ia i latou e iloilo mea sa latou aoaoina ma le ala ua latou tuputupu ae ai ona o o latou aafiaga. A le o lena, faaaoga se tasi o gaoioiga nei po o gaoioiga uma foi.

Gaoioiga A: O le faamalamalamaina o le Liliuese Tele ma le Toefuataiga

Vaai i ata nei e lua, ma mafaufau po o le a le uiga o le toefuatai mai o se mea.

• Aisea o le a manaomia ai ona toefuatai mai se mea?

• E mafai faapefea ona faatusatusa nei ata i le Liliuese ma le Toefuataiga?

Ina ia toe faamanatu le sootaga i le va o le Liliuese ma le Toefuataiga, faamaea le gaoioiga lenei:

Manatu faapea o loo aoaoina e faifeautalai se tasi o au uo i lou fale. Ua laua talosagaina oe e aoao atu se vaega o le lesona e sosoo ai i le Liliuese ma le Toefuataiga. Ua e iloa ua masani lau uo i le Tusi Paia, o lea e foliga mai ai o se manatu lelei le faaaogaina o nisi o fuaiupu mai le Feagaiga Fou i le taimi o le lesona.

O le faaaogaina o le Galuega 3:21 ; Efeso 1:10 ; Efeso 2:19–22 ; ma le 2 Tesalonia 2:1–3 (po o isi fuaiupu o lau filifiliga), tusi mea e mafai ona e fai atu i le taimi o le lesona e fesoasoani ai i lau uo ia malamalama pe aisea e manaomia ai e le Faaola ona toefuatai mai o Lana talalelei i le lalolagi.

E mafai ona valaaulia tagata aoga e faasoa mai a latou tali i ni paga, i ni vaega toalaiti, pe ma le vasega atoa.

Gaoioiga E: O le faatupulaia o lou alofa mo Iesu Keriso ma lou naunautaiga e auauna atu ia te Ia

Afai na tusia e tagata aoga se tusi ia i latou lava i le lumanai i le lesona mo le “Filipi 3,” mafaufau e faaaoga le gaoioiga lenei e fesoasoani ai ia i latou e iloilo lo latou alofa mo le Atua.

I le lesona mo le “Filipi 3,” na tuu atu ai ia te oe le avanoa e tusi ai se tusi i lou lava tagata i le lumanai lea na e faailoa mai ai osigataulaga e mafai ona e faia o le a fesoasoani e te iloa atili ai Iesu Keriso ma saunia ai mo le ola e faavavau.

Afai na e faaaogaina lenei avanoa, tagai i le tusi na e tusia. Faatusatusa ou lagona o i ai i le taimi nei e uiga ia Iesu Keriso po o ou naunautaiga e auauna atu ia te Ia ma lagona ma naunautaiga sa e maua ina ua e tusia lena tusi. Afai e i ai se mea e te manao e faaopoopo i le tusi e faavae i ou aafiaga talu ai nei, ia e saoloto e faia loa i le taimi nei.

Mafaufau e valaaulia ni volenitia e faasoa mai soo se malamalamaga po o ni manatu na latou maua a o latou toe faamanatuina a latou tusi. O fesili nei e mafai ona fesoasoani i tagata aoga e tomanatu ai ma faasoa mai o latou manatu.

• A o e toe faamanatuina lau tusi, na e maitauina se suiga e uiga i lou alofa mo Iesu Keriso? Afai o lea, aisea e te manatuna suia ai?

• O a ni aafiaga talu ai nei ua faatupulaia ai lou alofa mo le Atua ma lou naunautaiga e auauna atu ia te Ia?

• O le a sou lagona po o a nisi laasaga e sosoo ai e mafai ona e faia e fesoasoani ai ia te oe e faatupulaia lou alofa mo le Atua?

Gaoioiga I: O le ofuina o le ofutau atoatoa mai le Atua

• O le a se mea e te manatua e uiga i le ofutau mai le Atua? O le a se mea e te manatua e faatatau i uiga o vaega taitasi? Afai e te manaomia se fesoasoani, tagai i le Efeso 6:14–18 mo tali.

Mafaufau e tusi le ata lenei i luga o le laupapa ma valaaulia tagata aoga e o mai i luga ma faaopoopo i ai le uiga faaleagaga mo vaega taitasi o le ofutau.

• E faapefea ona e aoteleina le uiga o le “oofu i ofutau atoatoa mai le Atua”? ( Efeso 6:11).

Tusi se ata o se tagata faafasilaau i lau api talaaga.

• O a ni au taumafaiga o fai e ofu ai i le ofutau o le Atua?

Tusi se vaega po o ni vaega o le ofutau e faatusa i na taumafaiga.

• Pe ua e mauaina ni taunuuga mai au taumafaiga? Afai o lea, o le a se aafiaga ua e oo i ai? Afai e leai, o a ni taunuuga e te manatu e mafai ona oo mai e ala i le faaauauina pea o au taumafaiga?