1–2 Tesalonia

Vaaiga Aoao

I ana tusi i tagata o Tesalonia, sa viia ai e Paulo le Au Paia mo lo latou faamaoni ma le manuia i le fesoasoani atu i isi ia o mai ia Iesu Keriso e ala i a latou faataitaiga lelei. Sa ia tautalagia le tele o a latou fesili e uiga i le Afio Mai Faalua o Iesu Keriso ma faamanino mai nisi o mea sa latou le malamalama ai. Sa ia valoia o le Afio Mai Faalua o Iesu Keriso o le a le tupu seia muai ona taunuu o le tete’a ese, po o le liliuese.

Sauni e Aoao Atu

O faamatalaga nei e tuuina atu ai i faiaoga ni manatu i mea e ono manaomia ona muai saunia mo lesona taitasi:

1 Tesalonia 1–3

Faamoemoega o le lesona: O lenei lesona ua faamoemoe e fesoasoani i tagata aoga e faamanuia ma uunaia ai isi a o latou taumafai e auauna atu e pei ona sa faia e lo tatou Faaola o Iesu Keriso.

Sauniuniga a le tagata aoga: Valaaulia le vasega e mafaufau i se taimi na latou lagonaina ai le alofa o le Faaola ona sa auauna atu se tasi ia i latou. Uunaia i latou ia saunia e faasoa mai pe na faapefea ona fesoasoani le auaunaga a lenei tagata ia i latou e mananao ai e mulimuli ia Iesu Keriso.

Ata: Faaali atu ni ata o faaalia ai le auaunaga a Iesu Keriso i isi.
Vitio: “Auauna Atu e pei ona Faia e le Faaola” (13:04; matamata mai le faailotaimi 0:45 seia oo i le 1:54)

1 Tesalonia 4–5

Faamoemoega o le lesona: O lenei lesona ua faamoemoe e fesoasoani i tagata aoga ia malamalama i auala e mafai ona latou ola ai, o le a fesoasoani ia i latou e saunia ai mo le taimi e toe afio mai ai Iesu Keriso i le lalolagi.

Sauniuniga a le tagata aoga: Fai atu i le vasega e mafaufau pe o le a faapei le taimi pe a toe afio mai le Faaola. Valaaulia i latou e tali fesili nei i a latou api faamaumau mo suesuega po o se fasipepa: O le a se mea e te fiafia i ai e uiga i le Afio Mai Faalua? O le a se mea e oso ai lou popole?

Ata: Faaali atu se ata o loo faaalia ai le Afio Mai Faalua o Iesu Keriso.
Pepa e tufa atu: Saunia ni kopi o pepa e tufa atu o le lesona ina ia lava ia tofu tagata aoga taitasi ma se tasi pe sili atu o kopi o pepa tufa atu atoa e tolu.

Fautuaga faafaiaoga mo fesootaiga i vitio: O se tasi auala e faia ai gaoioiga suesue a tagata aoga e tolu o le faaaoga lea o le vaega o talanoaga i vitio e vaevae ai tagata aoga i ni potu taapeape se tolu. Tofi se taitai vaega mo potu taitasi, ma auina atu i taitai o vaega ia anotusi o le pepa e tufa atu. Fai i vaega taitasi e mulimuli i faatonuga o i le pepa o loo tufaina atu. A maea, tuu atu i le taitai o le vaega e tofi se fofoga e faasoa mai i le vasega mea na talanoaina e le vaega.

2 Tesalonia 2

Faamoemoega o le lesona: O lenei lesona e mafai ona fesoasoani i tagata aoga ia malamalama i le moni o le Liliuese o le Ekalesia i le Feagaiga Fou ma le manaomia tatau o le toefuataina o le Ekalesia a le Faaola i aso e gata ai.

Sauniuniga a le tagata aoga: Valaaulia tagata aoga e sue le “Liliuese” i Autu o le Talalelei i le ChurchofJesusChrist.org. Fai atu ia i latou e o mai saunia e faasoa mai mea sa latou aoaoina pe fai ane soo se latou fesili o i ai.

Pepa e tufa atu: Saunia se kopi o le “Malamalama i le Liliuese ma le Manaomia o le Toefuataiga” mo tagata aoga taitasi, pe saunia se auala e faaali atu ai anotusi o le pepa e tufa atu.
Vitio: “O Le A le Toefuataiga?” (5:13), “Ekalesia a Iesu Keriso” (1:27)

Fautuaga faafaiaoga mo fesootaiga i vitio: Mafaufau e valaaulia se tasi e le o i le vasega e sau ma faatino le vaega a se tagata sailiili i le amataga o le lesona. Tuu atu i tagata aoga e aoao atu lenei tagata e uiga i le Liliuese Tele ma le Toefuataiga.

Atamai i Aoaoga Faavae: 2 Tesalonia 2:1–3

Faamoemoega o le lesona: O lenei lesona o le a fesoasoani i tagata aoga e tauloto lenei tusi faasino o aoaoga faavae ma fasifuaitau autu o le mau mo le 2 Tesalonia 2:1–3 , faamatala le aoaoga faavae, ma faaaoga mataupu faavae o le mauaina o le malamalama faaleagaga i tulaga moni faaleolaga.

Sauniuniga a le tagata aoga: Valaaulia tagata aoga e mafaufau loloto i le fesili lenei ma o mai saunia e faamatala mai pe faapefea ona latou taliina: “Aisea na manaomia ai ona faaali mai le Atua ia Iosefa Samita e toefuatai mai Lana Ekalesia pe afai ua uma ona faatuina le Faa-Kerisiano ma ua toatele tagata ua uma ona talitonu i le Tusi Paia?”

Fautuaga faafaiaoga mo fesootaiga i vitio: Mo le gaoioiga faataitai, mafaufau e vaevae tagata aoga i ni vaega se tolu ma tuu vaega taitasi i se potu taapeape. E mafai e vaega taitasi ona saunia se tali i se tasi o mataupu faavae o le mauaina o le malamalama faaleagaga, ona mafai lea e vaega e tolu ona toe o mai faatasi ma faasoa mai.

Iloilo Lou Aoaoina 10

Faamoemoega o le lesona: O lenei lesona ua faamoemoe e fesoasoani ia te oe e iloilo ai sini ua e faatuina, ma le tuputupu ae patino na e mauaina i le taimi o au suesuega o le Feagaiga Fou.

Sauniuniga a le tagata aoga: Valaaulia tagata aoga e mafaufau e uiga i sini na latou faatuina a o latou suesueina le Kalatia e oo i le 2 Tesalonia. Fai atu ia i latou e o mai saunia e faasoa mai le alualu i luma sa latou gafatia ma faafitauli sa latou fetaiai a o latou galulue e ausia na sini.

Anotusi e faaali atu: O se ata mai le taimi muamua ma le taimi ua maea ai o se mea e manaomia ona toefausia, e pei o se taavale. O se ata o se tasi o ofuina se ofutau. E mafai foi ona tusia lenei mea i luga o le laupapa.