1 Tesalonia 4–5

O Le Taimi o le a Toe Afio Mai ai Keriso i le Lalolagi

O a ni fesili po o ni manatu e oo mai i lou mafaufau pe a e mafaufau i le Afio Mai Faalua o Iesu Keriso? I lana tusi muamua i leTesalonia, mataupu 4–5, na aoao mai ai e le Aposetolo o Paulo ni faamatalaga taua e uiga i le Afio Mai Faalua o le Faaola ma auala e mafai ona tatou saunia ai mo lena mea. O lenei lesona ua faamoemoe e fesoasoani e te malamalama ai i le mea o le a tupu ma auala e mafai ona e sauni ai mo le taimi e toe afio mai ai Iesu Keriso i le lalolagi.

Sauniuniga a le tagata aoga: Fai i le vasega e mafaufau pe o le a faape’i pe a toe afio mai le Faaola. Valaaulia i latou e tali fesili nei i a latou api faamaumau mo suesuega pe i se fasipepa: O le a se mea e te fiafia i ai e uiga i le Afio Mai Faalua? O le a se mea e te popole ai?

Gaoioiga E Ono Mafai Ona Aoao Ai

Fesili e faatatau i le Afio Mai Faalua o Iesu Keriso

Faaali se ata o loo faaalia ai le Afio Mai Faalua o Iesu Keriso, e pei o lea sa faaali i le amataga o le lesona. Faamanatu atu i tagata aoga a latou gaoioiga sauniuni mo tagata aoga a o talanoaina fesili nei.

• O a ni mea ua e iloa e faatatau i le Afio Mai Faalua o Iesu Keriso?

• O a nisi o mea e te le o iloa?

O le vaega lenei o le lesona e le o faamoemoe e aofia ai mea uma e iloa pe tali ai fesili uma a tagata aoga e uiga i le Afio Mai Faalua. Peitai, o le a fesoasoani ia mafai ai ona latou fesootai atu i le Au Paia i Tesalonia, o e sa malamalama i ni isi o tulaga ae sa i ai fesili e tusa ai ma isi tulaga.

Sa i ai foi fesili a le Au Paia i Tesalonia e uiga i le Afio Mai Faalua o le Faaola. E faavae i aoaoga a Paulo i nei mataupu, atonu na i ai ni latou fesili faapea, “O afea o le a toetutu ai e pele ia i matou sa maliliu?,” “O afea o le a tupu ai le Afio Mai Faalua o Iesu Keriso?,” po o le “E mafai faapefea ona saunia i tatou lava mo le Afio Mai Faalua o Iesu Keriso?” Atonu foi o i ai ni fesili faapea ia te oe. O gaoioiga suesue nei e talanoaina ai fesili nei.

O gaoioiga suesue nei ua faamoemoe e fesoasoani i le tagata aoga e suesue ma faamatala ai aoaoga a Paulo i Tesalonia e uiga i le Afio Mai Faalua.

O se tasi o auala e ausia ai lenei mea o le vaevae o le vasega i ni paga pe i ni vaega toalaiti ma tuu atu i vaega taitasi se tasi o pepa e tufaina atu e suesue ma talanoaina faatasi. E mafai ona talosagaina se tagata mai vaega taitasi e faasoa mai i le vasega se aotelega puupuu o mea na aoaoina e le vaega mai a latou suesuega.

I se isi itu, e mafai ona tuu tagata aoga i ni vaega taitoatolu, e tofu le tagata aoga ma pepa eseese e tufaina atu e faamaea taitoatasi. Ona mafai lea e tagata aoga taitasi o le vaega ona aotele mea sa latou aoaoina mo isi tagata o la latou vaega.

E mafai e tagata aoga ona faaaoga le pito i tua o le pepa e tusi ai a latou tali.

Gaoioiga Suesue 1: O le a le mea o le a tupu i e o soifua ma e ua maliliu i le taimi o le Afio Mai Faalua o Iesu Keriso?

Faitau le 1 Tesalonia 4:13–18 , ma vaavaai mo malamalamaga e uiga i le mea o le a tupu i e amiotonu pe a toe afio mai Iesu. Matau le eseesega i le va o le mea o le a tupu ia i latou o e ua maliliu ma i latou e soifua pea i le taimi o le Afio Mai Faalua. (O upu “momoe” ma le “moe” i nei fuaiupu e faasino ia i latou o e ua maliliu.) E ono fesoasoani le faitau o le Faaliliuga a Iosefa Samita o le 1 Tesalonia 4:15, 17 (i le fuaiupu 15, vaefaamatalaga a, ma le fuaiupu 17, vaefaamatalaga a).

• O le a se mea na taua ia te oe i nei fuaiupu?

Ona faitau lea o le Mataupu Faavae ma Feagaiga 88:96–98 , ma vaavaai mo malamalamaga faaopoopo e uiga i nei mea na tutupu. (Atonu foi e te manao e faitau fuaiupu 99–101 e aoao ai e uiga i le mea o le a tupu ia i latou sa le’i taliaina Iesu Keriso i lenei olaga.)

• O a ni malamalamaga faaopoopo na e maua?

O se tasi o upumoni atonu na e mauaina e faapea, o le Au Paia faamaoni o e maliliu a o lei oo i le Afio Mai Faalua o le a toetutu pe a toe afio mai Keriso.

O le faaupuga “aveina ae” ( 1 Tesalonia 4:17) e faasino i e amiotonu o loo aufaatasi e feiloai ma le Faaola i Lona toe afio mai. E toatele tagata Kerisiano e faaaogaina le faaupuga ave olaina (mai se faaupuga Latina o lona uiga o le “aveina ae”) e faatatau i lea taimi.

Sa faasoa mai e Elder Neil L. Andersen o le Korama a Aposetolo e Toasefululua, e uiga i lenei mea paia:

E leai se mea e faaosofia ai lo’u manao e tautala e uiga ia Keriso nai lo le vaai atu faalemafaufau i Lona toe afio mai. E ui tatou te le iloa pe o afea o le a Ia toe afio mai ai, ae o mea e tutupu i Lona toe afio mai o le a ofoofogia! O le a afio mai o Ia i ao o le lagi i le mamalu ma le matagofie faatasi ma Ana agelu paia uma. E le na o nisi o agelu, ae o Ana agelu paia uma lava. E le o le kerupi alafau mūmū na valiina e Lafaele, lea tatou te maua i luga o a tatou kata Valenitina. O agelu nei o seneturi, o agelu na auina mai e tapunipuni gutu o leona, e talai faitotoa o falepuipui, e fofoga mai Lona soifua mai ua leva ona talitalia, e faamafanafana o Ia i Ketesemane, e faamautinoa i Ona soo i Lona Afio A’e, ma ia tatala le Toefuataiga matagofie o le talalelei.

Pe mafai ona tatou vaai faalemafaufau ua aveina a’e i tatou e faafetaiai o Ia, a le o i le itu lenei, po o le isi itu o le veli? O Lana folafolaga lena i e amiotonu. O lenei aafiaga ofoofogia o le a fai ma faailoga i o tatou agaga e faavavau.

(Neil L. Andersen, “Ua Matou Tautalatala e uiga ia Keriso,” Ensign po o le Liahona,Nov. 2020, 91)

Faaaoga sina taimi e vaai faalemafaufau ai pe faape’i le faitauina faatasi ma e amiotonu i le afio mai o le Faaola.

• O a ni mafaufauga po o ni lagona atonu e oo ia te oe i lena aso? O le a sou lagona pe a e iloa o loo finagalo le Faaola e te faatasi ma Ia pe a afio mai o Ia? E faapefea e le mafaufauina o lena aso i le lumanai ona aafia ai oe i le asō?

I le 1 Tesalonia 4:18 , sa fautuaina ai e Paulo le Au Paia e “fefaamafanafanaai le tasi i le isi i nei upu.”

• E faapefea ona e maua le mafanafana i aoaoga a Paulo? E mafai faapefea ona latou tuuina atu le mafanafana i tulaga i le lumanai e ono feagai ma oe?

Gaoioiga Suesue 2: O afea e tupu ai le Afio Mai Faalua o Iesu Keriso?

Pe na e mafaufau ea pe o afea e tupu ai le Afio Mai Faalua o Iesu Keriso pe o le a e saunia foi? Atonu na i ai i le Au Paia i Tesalonia na lava foi fesili.

Faitau le 1 Tesalonia 5:1–3 ma vaavaai mo upu faatusa sa faaaoga e Paulo e faamatala ai le taimi o le a toe afio mai ai Iesu i le lalolagi.

• O le a se mea na e maua?

• O le a se mea o aoao atu ia te oe e upu faatusa a Paulo i se gaoi i le po ma se fafine o loo faafanauina lana tama e mafai ona aoaoina ai oe e tusa ma le Afio Mai Faalua o le Faaola?

Faitau le 1 Tesalonia 5:4–6 ma vaavaai mo upumoni na aoao mai e Paulo e uiga i le saunia mo le Afio Mai Faalua. Faatusatusa nei aoaoga i le Mataupu Faavae ma Feagaiga 106:4–5 .

• O a ni malamalamaga na e maua?

O se upumoni e tasi e mafai ona tatou aoao mai aoaoga a Paulo e faapea, afai tatou te taumafai e avea ma “tagata o le malamalama” e ala i le mulimuli ia Iesu Keriso, o le a tatou saunia pe a toe afio mai o Ia.

Ina ia aoao atili e uiga i auala eseese ua valaaulia ai i tatou e le Alii ia avea ma tagata o le malamalama, faitau le 3  Nifae 18:24 ; Mataupu Faavae ma Feagaiga 50:23–25 ; 88:67–68 . Lisi i lau api faamaumau mo suesuega mea ua e maua o loo fesoasoani ai e te malamalama pe faapefea ona avea ai ma se tagata o le malamalama.

• E faapefea ona e valaauliaina le malamalama o le Alii i totonu o lou olaga? E mafai faapefea ona e valaauliaina le tele o Lona malamalama i totonu o lou olaga?

Gaoioiga Suesue 3: E mafai faapefea ona tatou saunia i tatou lava mo le Afio Mai Faalua o Iesu Keriso?

Sa faaiu e Paulo lana tusi muamua i Tesalonia e ala i le faasoa atu o fautuaga e uiga i le ala e mafai ai e le Au Paia ona saunia lelei e fetaiai ma le Faaola i Lona Afio Mai Faalua.

Faitau le 1 Tesalonia 5:14–22 ma vaavaai po o a malamalamaga e te maua e uiga i le saunia lelei. Ia tatala i mafaufauga e uiga po o fea o aoaoga e ono fesoasoani faapitoa ia te oe.

• O fea o nei aoaoga e sili ona anoa ia te oe? Aisea?

Saili se mau se tasi pe lua o loo fesoasoani e faalolotoina ai lou malamalama i le aoaoga na e filifilia. (E mafai ona e faaaogaina vaefaamatalaga pe sue se mataupu i le Taiala i Tusitusiga Paia po o le Taiala i Autu e fesoasoani i lau sailiga o se mau e fesootai i ai.)

• E faapefea ona fesoasoani Iesu Keriso ia te oe, pe o le a faapefea ona Ia fesoasoani ia te oe, e saunia ai mo Lona Afio Mai Faalua? O le a se mea e mafai ona e aoao mai lenei mea e uiga ia te Ia?

Mafaufau i upumoni ua e aoaoina i le aso ma faatinoga o loo uunaia oe e faatino e fesoasoani ina ia e saunia atili ma fiafia e toe feiloai ma le Faaola. Tusifaamaumau ou manatu i lau api faamaumau mo suesuega.

Molimau atu e uiga i faamanuiaga e oo mai pe a tatou faia ni laasaga faigofie ae anoa e agai atu i le saunia mo le taimi e toe afio mai ai Keriso i le lalolagi.

Tala Auiliili ma Faamatalaga o Talaaga

1 Tesalonia 5:2 . E mafai faapefea ona faatusatusa le taimi o le Afio Mai Faalua o le Faaola i se gaoi i le po?

Na faamalamalama mai e Elder Bruce R. McConkie (1915–85) o le Korama a Aposetolo e Toasefululua e faapea o se gaoi i le po e masani ona sau “e aunoa ma se lapataiga” (Doctrinal New Testament Commentary [1973], 3:54). O lenei talafaatusa ua ta’u mai ai o le Afio Mai Faalua o le Faaola o se mea e faateia ai ni isi tagata.

1 Tesalonia 5:21 . O le a le uiga o le tala a Paulo “ia tofotofo i mea uma lava; ia taofi mau i le mea lelei”?

Sa valaaulia e Paulo le Au Paia i Tesalonia e “tofotofo i mea uma lava”—o lona uiga ia suesue pe tofotofo i latou ina ia malamalama ai pe o lelei pe amioleaga—ma ia “taofi mau i le mea lelei.” I le avea ai ma tagata o le Ekalesia, ua aoaoina i tatou e le gata i le aoaoina o le talalelei, ae ia mafaufau loloto, tatalo e uiga i ai, ma iu ai ina malamalama i ai (tagai i le 3 Nifae 17:1–3 ; Mataupu Faavae ma Feagaiga 68:25–26). Ona manaomia lea ona tatou pipiimau ma le faamaoni i mea lelei ua tatou malamalama i ai.

Gaoioiga Faaopoopo e Aoao Ai

1 Tesalonia 4:11–12 ; 2 Tesalonia 3:10–11 . O le taua o le galue

Afai o le a manuia tagata aoga mai le talanoaina o le taua o le galue, mafaufau e faaaoga mea nei:

Fai i tagata aoga e faamatala mai le galuega aupito sili ona faigata sa latou faatinoina. Aisea na faigata ai? O le a le taua na maua mai i le faia o lena mea?

Valaaulia tagata aoga e faitau le 1 Tesalonia 4:11–12 ma le 2 Tesalonia 3:10–11 , ma vaavaai mo mea na aoao atu e Paulo e uiga i le galue. Tuu le avanoa i tagata aoga e faasoa mai o latou manatu. E mafai ona e fai i tagata aoga e faasoa mai pe na faapefea ona latou talisapaia le taua o le galue.

E mafai foi ona valaaulia tagata aoga e faitau ma talanoaina le vaega o le “Galue ma le Faalagolago o le Tagata ia te Ia Lava” mai le tamaitusi Mo le Malosi o le Autalavou ([2011], 40–41).

Fesili i le vasega pe mafai faapefea e le avea o i latou ma tagata galulue malosi ona fesoasoani ia i latou ia avea faapei o le Faaola.

1 Tesalonia 5:11–22 . O nisi manatu e aoao atu ai

Valaaulia tagata aoga e filifili se fasifuaitau mai nei fuaiupu (mo se faataitaiga, “Ia saga olioli pea lava” [ fuaiupu 16 ]) ma tusi se faamatalaga i ala o faasalalauga faaagafesootai pe fatu se manatu e i ai lenei ulutala. E mafai ona faaaofia ai e tagata aoga o latou manatu i mafuaaga e taua ai lenei fasifuaitau ia i latou ma pe mafai faapefea ona fesoasoani i se tasi ia latalata atili atu ia Iesu Keriso ma saunia lelei ai mo Lona afio mai.