2 Tesalonia 2

O Le Liliuese Tele

A group of New Testament era people gathered around a man. The people are listening to the man speak. The image illustrates the development of false beliefs and apostasy occuring in the early Christian church following the deaths of the original apostles of Jesus Christ.

Mata o le a faape’i lou olaga pe ana e le maua le atoatoaga o le talalelei a Iesu Keriso? Sa aoao atu e Paulo le Au Paia i Tesalonia e faapea, e iu lava ina taunuu le amioleaga o tagata i se pauu ese mai le talalelei (tagai i le 2 Tesalonia 2:1–7). E mafai ona fesoasoani lenei lesona e te malamalama ai i le ala na mafua ai le Liliuese o le Ekalesia i le Feagaiga Fou ma le mafuaaga na manaomia ai ona toefuatai mai le Ekalesia a le Faaola i aso e gata ai.

O le faaaogaina o mau fefaasinoaa’i. O se mau fefaasinoa’i o se mau ua tuuina mai ai ni faamatalaga po o malamalamaga faaopoopo e uiga i mea o loo suesueina. E mafai ona fesoasoani le valaaulia o tagata aoga e fefaasinoa’i mea o loo latou faitauina ma isi fuaiupu o mau ina ia faalolotoina ai lo latou malamalama i le talalelei.

Sauniuniga a le tagata aoga: Valaaulia tagata aoga e sue le “Liliuese” i Autu o le Talalelei i le ChurchofJesusChrist.org. Fai atu ia i latou e o mai sauni e faasoa mai mea sa latou aoaoina pe fai atu soo se latou fesili o i ai.

Gaoioiga E Ono Mafai Ona Aoao Ai

O Le Liliuese Tele

Faamanatu i tagata aoga e mafaufau loloto i a latou sauniuniga mo le vasega a o latou tali atu i le tulaga faataitai nei.

Faaali pe faamatala atu le tulaga faataitai ma fesili nei, ma valaaulia tagata aoga e tali mai i a latou api faamaumau mo suesuega ae latou te lei faasoa maia a latou tali i le vasega.

I se isi faiga, e mafai ona tuu tagata aoga i ni vaega taitoalua pe taitoatolu lea e faatino ai e se tagata aoga le aoaoina ae o le isi toatasi pe toalua e faatinoina le avea ma faifeautalai. O i latou o faatino le avea ai ma faifeautalai e mafai ona taumafai e faamatala le Liliuese Tele.

Vaai faalemafaufau faapea o oe o se faifeautalai i le aso muamua o lau misiona. E manaomia ona e aoaoina se isi e uiga i le Liliuese Tele.

E faapefea ona e faamatalaina lenei mea ia i latou?
Aisea e ono faigata ai lenei mea?
Aisea e te manatu ai e taua le malamalama i le Liliuese Tele?

I lau api faamaumau mo suesuega, tusi i lalo ni au fesili e uiga i le Liliuese Tele po o fesili e ono fesili ai se tagata sailiili. A o e suesue, saili le fesoasoani a le Tama Faalelagi e sue ai tali i nei fesili.

Valaaulia ni volenitia e tusi i luga o le laupapa ni fesili atonu o ia i latou po o isi e uiga i le Liliuese Tele. Valaaulia tagata aoga e tagai i nei fesili i le faagasologa o le lesona.

Ua valoia e Paulo le pauu ese atu o le Ekalesia

Sa tele popolega o le Au Paia i Tesalonia e uiga i le Afio Mai Faalua o Iesu Keriso ma sa manatu e le o toe mamao ona tupu lea. Sa talanoaina e Paulo o latou popolega i lana tusi ma faamatala atu o le a i ai se isi mea o le a tupu a o lei toe afio mai Keriso.

Faitau le 2 Tesalonia 2:1–3 ma vaavaai mo le mea na fai mai Paulo o le a tupu a o lei oo mai le Afio Mai Faalua o Keriso. Faaaoga vaefaamatalaga e fesoasoani ia e malamalama atili ai i upu a Paulo.

O le a le mea na aoao mai e Paulo o le a tupu a o lei oo le Afio Mai Faalua o Keriso?

O lenei “pauu ese” na faamatalaina e Paulo o le Liliuese Tele, lea na tupu ina ua mavae le maliliu o Aposetolo a Iesu Keriso. O lenei Liliuese Tele e ese mai le liliuese faaletagata lava ia, o le taimi lea e fouvale pe pauu ese ai tagata mai le upumoni (tagai i le Taiala i Tusitusiga Paia, “ Liliuese ,” scriptures.ChurchofJesusChrist.org).

E faapefea ona faaalia i upu a Paulo le alofa ma le popole o le Atua mo le Au Paia i Tesalonia?

O se tasi o upumoni e mafai ona tatou aoao mai nei fuaiupu e faapea, sa valoia anamua a o lei oo i le Afio Mai Faalua o Iesu Keriso, o le a tupu se liliuese mai Lana Ekalesia.

Aisea e te manatu e taua ai le malamalama i lenei upumoni?

O Peresitene M. Russell Ballard o le Korama a Aposetolo e Toasefululua na ia faamatala le mafuaaga e tutupu ai vaitau o le liliuese.

E alofa lo tatou Tama Faalelagi i Ana fanau uma lava, ma e finagalo o Ia ia latou maua uma faamanuiaga o le talalelei i o latou olaga. E le o aveesea le malamalama faaleagaga ona ua fuli le tua o le Atua ia Lana fanau. Ae, e oo mai le pogisa faaleagaga pe a fulitua uma Lana fanau ia te Ia. O se taunuuga masani o filifiliga leaga na faia e tagata taitoatasi, nuu, atunuu, ma malo uma lava.

(M. Russell Ballard, “Learning the Lessons of the Past,” Ensign po o le Liahona, Me 2009, 32)

O le a se mea o tulaga ese mai ia te oe i lenei faamatalaga? Aisea?

Ona e silafia e le Tama Faalelagi mea uma (tagai i le 2 Nifae 9:20), e lei avea le oo mai o le Liliuese Tele o se mea na faateia ai o Ia. E alofa o Ia i Lana fanau uma (tagai i le Ioane 3:16), o lea na Ia saunia ai se ala e faatoilalo ai lenei Liliuese Tele e ala i le Toefuataiga o le Ekalesia a Iesu Keriso ma le talalelei (tagai i le Galuega 3:19–21 ; Efeso 1:10).

Faaloloto lou malamalama i le Liliuese Tele

O le gaoioiga lenei e mafai ona fesoasoani e te malamalama atili ai i le ala na tupu ai le Liliuese Tele ma le mafuaaga na manaomia ai ona toefuatai mai le Ekalesia a le Faaola i aso e gata ai.

Suesue fuaitau o mau nei ma le saunoaga a Peresitene Russell M. Nelson, ona tali lea o fesili o loo i lalo.

1 Nifae 13:24–28 : Ua vaai Nifae i se faaaliga vaaia i mea o le a tutupu i upumoni taua i le Tusi Paia.
Amosa 8:11–12 : Ua valoia e Amosa se oge faaleagaga o le a oo mai.
Galuega 20:29–30 : Ua lapatai mai Paulo o le a taitaieseina tagata o le Ekalesia a le Faaola mai le talalelei.
Na aoao mai Peresitene Russell M. Nelson:

“O lo tatou Atua soifua o se Atua alofa! E finagalo o Ia i Lana fanau ia iloa o Ia ma Iesu Keriso, o lē na Ia auina mai! E finagalo foi o Ia ia maua e Lana fanau le tino ola pea ma le ola e faavavau!

“Ona o lenei faamoemoega mamalu, ua aoao atu ai e o tatou faifeautalai le Toefuataiga. Ua latou iloa pe tusa ma le 2,000 tausaga talu ai, sa faatuina ai e le Alii Lana Ekalesia. Ina ua mavae Lona Faasatauroga ma le maliliu ai o Ana Aposetolo, sa suia e tagata le Ekalesia ma ona aoaoga faavae. Ina ua mavae lea o augatupulaga o le pogisa faaleagaga, ma e pei ona valoia ai e perofeta anamua, na toefuatai mai ai e le Tama Faalelagi ma Iesu Keriso le Ekalesia, o ona aoaoga faavae, ma lana pule o le perisitua. Ona o lena Toefuataiga, ua toe avanoa ai le malamalama ma sauniga e tatau ai mo le faaolataga ma le faaeaga i tagata uma. O le faatumutumuga, o lena faaeaga e mafai ai e i tatou taitoatasi ona nonofo faatasi ma o tatou aiga i le afioaga o le Atua ma Iesu Keriso e faavavau!”

Russell M. Nelson, “Pu’e le Galu,” Ensign po o le Liahona, Me 2013, 46

O le a se mea sa e aoaoina e uiga i le Liliuese Tele?

O a mea na e aoao e uiga i le Tama Faalelagi ma Iesu Keriso e ala i nei aoaoga?

E fua i luga o mea sa e aoaoina, aisea na manaomia ai le Toefuataiga?

New Testament Seminary Teacher Manaul - 2023

O isi punaoa e mafai ona suesue e tagata aoga e aofia ai le vaega “O Le Liliuese Tele” i le “Lesona 1: O Le Savali o le Toefuataiga o le Talalelei a Iesu Keriso” i le Tala’i La’u Talalelei: O Se Taiala mo le Galuega Faafaifeautalai (2019) po o vitio “O Le A le Toefuataiga?” (5:13) po o le “Ekalesia a Iesu Keriso” (1:27), lea e mafai ona maua i le ChurchofJesusChrist.org. E mafai ona faaaoga nei mea e fesoasoani e faalolotoina ai le malamalama o tagata aoga pe a manaomia.

A uma ua lava se taimi ua tuu i tagata aoga e suesue ai, valaaulia i latou e faasoa mai a latou tali i fesili o loo i luga o le pepa tufaina atu. Fai atu ia i latou e faasoa mai po o le fea o a latou fesili na taliina ae o fea foi e lei taliina. Valaaulia isi tagata aoga e faasoa mai ni malamalamaga e mafai ona fesoasoani e tali ai na fesili.

Faaiu le vasega i le gaoioiga ma fesili nei.

Sa faasoa mai e Elder Jeffrey R. Holland o le Korama a Aposetolo e Toasefululua ni fesili atonu na ia te ia ma lona faletua pe ana faapea sa la soifua i le taimi o le Liliuese Tele: “O le a se mea o misi iinei? O le a se mea ma te moomoo ma’imau pe a na ma maua? O le a se mea o ta faamoemoe o le a saunia e le Atua e tali mai ai i o ta moomooga faaleagaga?” (“O Se Malamalama Atoatoa o le Faamoemoe,” Ensign po o le Liahona, Me 2020, 81). Mafaufau loloto i ni mafaufauga ma ni lagona faapena atonu na ia te oe pe ana faapea sa e ola i lena taimi.

Mata o le a faape’i lou olaga pe ana e le maua le atoatoaga o le talalelei a Iesu Keriso?
O le a se mea e sili ona e faafetai ai e uiga i le Ekalesia toefuataiina a le Faaola? Aisea?
O le a se mea e te lagona e finagalo le Tama Faalelagi ia e iloa, lagona, pe faia ona o lenei lesona?

Tala Auiliili ma Faamatalaga o Talaaga

Pe na matauina e tagata Kerisiano sa soifua a o lei oo i le Toefuataiga le Liliuese?

Na aoao mai e le tagata toefuataiina o Matini Luteru (1483–1546):

E leai se isi mea ua ou sailia i tua atu o le toefaatulagaina o le Ekalesia e tusa ai ma Tusitusiga Paia. … Ou te faapea atu ua le toe i ai le faa-Kerisiano ia i latou o e sa tatau ona faasaoina.

(I le E. G. Schwiebert, Luther and His Times: The Reformation from a New Perspective [1950], 509)

Na faamalamalama mai e le uluai taitai Kerisiano Amerika o Roger Williams (1603–83):

O le liliuese … ua matua faapiopio lava mea uma ina ia le mafai ona toe manuia mai lena liliuese seia auina atu e Keriso ni aposetolo fou e faatu ni ekalesia fou.

(I le Philip Schaff, The Creeds of Christendom, 3 vols. [1877], 1:851)

Na aoao mai le filosofia Siamani o Erasmus (1466–1536):

Ua matua lavelavea nei mea uma i nei fesili [o aoaoga faavae] ma ua faatonuina ai i tatou ia aua lava nei o tatou faamoemoe e toe liliu atu le lalolagi i le faa-Kerisiano moni.

(The Praise of Folly, trans. Clarence H. Miller, 2nd ed. [2003], 155–56)

Pe na o le tasi ea se liliuese na tupu?

I le taualumaga o taimi, sa tele tisipenisione na faaiuina i le liliuese. Ona toefuatai mai lea e le Alii i Lona alofa mutimutivale Lana talalelei i le lalolagi e ala i le valaauina o perofeta. Ina ia aoao atili e uiga i lenei mamanu, matamata i le “Dispensations: The Pattern of Apostasy and Restoration” (6:52), o loo maua i le ChurchofJesusChrist.org.

6:55

E faapefea ona tatou vaai atu i tagata lelei o isi ekalesia?

Na faamalamalama mai e Peresitene Dallin H. Oaks o le Au Peresitene Sili:

Tatou te talitonu o le toatele o taitai faalelotu ma soo o ni tagata talitonu faamaoni o e alolofa i le Atua ma malamalama ma auauna atu ia te ia i le mea sili latou te mafaia. Tatou te nofo aitalafu i alii ma tamaitai o e na faamumuina pea le malamalama o le faatuatua ma le aoaoina i le faagasologa o seneturi e oo mai i le aso nei. E ao ona tatou faatusatusaina le malamalama itiiti o loo i ai i tagata e le masani i suafa o le Atua ma Iesu Keriso ia iloa ai le saofaga sili na faia e faiaoga Kerisiano i le faagasologa o tausaga. Tatou te faamamaluina i latou o ni auauna a le Atua.

(Dallin H. Oaks, “Apostasy and Restoration,” Ensign, Me 1995, 85)

Gaoioiga Faaopoopo e Aoao Ai

O se isi amataga o le lesona

Faaali atu se laau totō o loo ola ma se laau totō ua pe pe o le a pe (po o se lalā ua pe i totonu o ni palapala). Valaaulia tagata o le vasega e mafaufau loloto ma tali mai i fesili nei:

Aisea e te manatu ai ua eseese foliga o nei laau o le tasi mai le isi?
E mafai faapefea ona faatusa nei laau i tulaga eseese faaleagaga?

Ona valaaulia lea o tagata aoga e mafaufau pe faapefea ona fesootai lenei talafaatusa i le Liliuese Tele. Afai e tatau ai, valaaulia i latou e suesue le Amosa 8:11–12 e fai ai ni fesootaiga a o lei suesueina le 2 Tesalonia 2:1–4 .