Filipi 3

“Ua Ou Faaleaogaina Mea Uma … Ina Ia Ou Maua Keriso”

1st illustration: A warm loving image of Christ, eyes looking out towards the reader. 2nd illustration: stars and the galaxy

O le a se mea ua e naunau e ositaulaga e mulimuli ai ia Iesu Keriso ma avea ai ma Ona soo? Sa tele mea na lafoai e le Aposetolo o Paulo ina ua ia filifili e mulimuli i le Faaola, e aofia ai lona tulaga iloga i le nuu o Iutaia o se Faresaio (tagai i le Filipi 3:5). O lenei lesona e mafai ona fesoasoani e te malamalama ai i le taua o le faia o osigataulaga ia iloa ai Iesu Keriso.

O le faatagaina atu o le filemu. O fesili aoga e mafai ona alu ai se taimi e tali ai. Tuu atu i tagata o le vasega se taimi e mafaufau loloto ai i fesili. Afai e le taliina e tagata aoga se fesili i le taimi lava lena, aloese mai le faaosoosoga e faauma vave le filemu e ala i le taliina o le fesili. O le taimi e faaalu e tagata aoga e mafaufau loloto ai i fesili e mafai ona taitai atu ai i musumusuga ma faalolotoina ai le molimau.

Sauniuniga a le tagata aoga: Afai e mafai, valaaulia tagata aoga e aoao mai ni tala mai tagata o le aiga po o tuaa o e na faia ni osigataulaga ina ia mulimuli ai ia Iesu Keriso. Uunaia i latou e o mai saunia e faasoa mai nei aafiaga i le vasega.

Gaoioiga E Ono Mafai Ona Aoao Ai

O le a se mea e te tuuina atu?

Mafaufau e faaaoga le tala lenei e amata ai le vasega, pe faasino i tala na o mai sauni iai tagata aoga e faasoa mai.

Faitau pe matamata le faamatalaga lenei mai ia Peresitene Dallin H. Oaks o le Au Peresitene Sili e uiga i se alii talavou sa faasoa atu ia Peresitene Gordon B. Hinckley (1910–2008) ia osigataulaga sa ia naunau e fai ina ia avea ai ma se tagata o le Ekalesia.

16:31

E tele tausaga ua mavae, sa faafofoga ai i latou o i lenei konafesi i se alii talavou sa mauaina le talalelei toefuataiina a o a’oga o ia i le Iunaite Setete. Ina ua oo mai le taimi e toe foi atu lenei alii i lona nuu moni, sa fesili Peresitene Gordon B. Hinckley ia te ia po o le a le mea o le a tupu ia te ia pe a ia toe foi atu i lona aiga o se tagata Kerisiano. “O le a le fiafia lo’u aiga,” na tali atu ai le alii talavou. “Atonu latou te tuliesea au ma manatu faapea ua ou oti. O lo’u lumanai foi ma la’u matata faalegaluega, atonu foi o le a tapunia uma avanoa mo au.”“Ua e manao e totogi se tau ina a tele mo le talalelei?” Sa fesili ai Peresitene Hinckley.

(Dallin H. Oaks, “Ositaulaga,” Ensign po o le Liahona, Me 2012, 21)

O le a sou manatu pe na faapefea ona tali atu le alii talavou? Aisea?

Tuu atu i tagata aoga se taimi talafeagai e tali atu ai i le fesili o le a sosoo. Mafaufau e valaaulia tagata aoga e mafaufau loloto filemu ma tusi a latou tali a o lei faasoaina atu i le vasega.

O le a se mea e ono uunaia se tagata e lafoaiina mea e tele ina ia mulimuli atu ia Iesu Keriso?

A o e suesueina le Filipi 3 , mafaufau pe o le a se mea ua e ositaulagaina mo le talalelei a Iesu Keriso ma pe na faapefea ona faamanuiaina oe i le faia o lena mea. I se isi itu, o le ositaulaga ina ia latalata atili atu i le Faaola atonu o se manatu faavae e te le masani i ai. Po o a lava ou tulaga, e naunau lava le Faaola e fesoasoani ia te oe ia alualu i luma. I le faagasologa o le lesona, ia gauai atu i mafaufauga ma lagona mai le Agaga Paia lea e mafai ona fesoasoani ia te oe e malamalama ai i le matafaioi e tatau ona faia e le osigataulaga i lou olaga.

E matuai aoga osigataulaga uma mo le talalelei a Iesu Keriso

Manatua a o lei liua Paulo ia Iesu Keriso i le ala i Tamaseko (tagai i le Galuega 9), sa avea o ia o se Faresaio, o se tagata e maualuga lona tulaga faalelotu ma faaagafesootai i tagata Iutaia (tagai i le Filipi 3:5). Ona sa ia filifili e mulimuli ia Iesu Keriso ma faaaoga lona olaga e talai atu ai le talalelei, sa oo Paulo i sauaga matuia, puapuaga, tiga faaletino, ma le atuatuvale faalelagona (tagai i le 2 Korinito 11:23–28). Tatou te faitau i le Filipi 3:7–17 i lagona o Paulo e faatatau i le lafoai o lona olaga sa i ai muamua ae mulimuli ia Iesu Keriso ma faamanuiaga na iu ina oo iai.

Atonu e manaomia e tagata aoga se fesoasoani e malamalama ai i nisi o upu i le poloka o le mau. Mafaufau e tusi faauigaga nei i luga o le laupapa pe ia avanoa foi e fesoasoani atu i tagata aoga a o latou suesue.

Faitau le Filipi 3:7–14 , ma vaavaai mo mea na naunau Paulo e lafoai ina ia iloa ai ma mulimuli ia Iesu Keriso. Ia matau o le upu faatusaina i le fuaiupu 10 o lona uiga o le ioeina, o le fasifuaitau “tausisi atu pea” i le fuaiupu 12 o lona uiga o le agai atu i luma, ma o le upu maua i le fuaiupu 12 o lona uiga ia ausia.

Mafaufau e vaevae tagata aoga i ni paga taitoalua pe i ni vaega toalaiti e faamaea ai le gaoioiga lenei. Ia gauai atu i tagata aoga o e atonu e manaomia se fesoasoani faaopoopo i le toe tusia o fuaitau i a latou lava upu.

Filifili ni fuaitau se lua po o ni fasifuaitau mai le Filipi 3:7–14 ma toetusi le savali a Paulo i au lava upu. Mo se faataitaiga, o se tasi o auala e toe faaupu ai le savali a le Filipi 3:7 o le “O mea sa taua ia te au muamua, o lenei ua leai se uiga ia te au ona o Iesu Keriso.” A maea ona e faia, tali fesili nei.

O a ni isi o faamanuiaga na maua e Paulo ona sa ia ositaulaga mo le Alii?
O a ni isi o faamanuiaga sa ia taumafai pea ia maua e ala i ana osigataulaga?
O a mataupu faavae e mafai ona tatou aoaoina mai le faataitaiga a Paulo o le ositaulaga?

O se mataupu faavae e tasi e mafai ona tatou aoao mai le faataitaiga a Paulo e faapea, afai tatou te lafoai mea uma e ono manaomia mai ia i tatou ina ia mulimuli ai ia Iesu Keriso ma uunai atu i luma i le faatuatua, e mafai ona tatou iloa o Ia ma maua le ola e faavavau. Mafaufau e tusi lenei mataupu faavae i au tusitusiga paia po o lau api faamaumau mo suesuega.

Faaalu sina taimi e mafaufau loloto ai pe faapefea ona fesootai lenei mataupu faavae ia te oe.

O a ni manatu, fesili, po o lagona o ia te oe?

Valaaulia tagata aoga naunau e tali i le fesili talu ai. Afai e lei maua e tagata aoga se avanoa i le amataga o le lesona e faasoa mai ai tala e uiga i tagata o le aiga po o tuaa o loo ositaulaga mo le talalelei, mafaufau e valaaulia i latou e faia i le taimi nei.

Afai o le a manuia tagata aoga mai le aoao e uiga i faataitaiga faaopoopo o le ositaulaga, mafaufau e faaaoga manatu o i lalo o “Faataitaiga mai le Tusi a Mamona” ma le “Leai o ni Faanoanoaga” i le vaega o “Gaoioiga Faaopoopo e Aoao Ai” o le lesona. Mafaufau e faasoa sou aafiaga patino ma se molimau foi.

Ositaulaga patino

Toe faamanatu le fesili na tuuina mai e Peresitene Hinckley i le amataga o le lesona e faatatau i le naunau o le alii talavou e ositaulaga le tele o mea mo le talalelei. Faitau le vaega o totoe o le tala na faasoa mai e Peresitene Dallin H. Oaks.

Sa tali mai le alii talavou ma loimata, “E moni, a ea?” Ina ua faamautinoaina lena mea, sa ia tali mai, “O le a la se isi mea e toe popole ai?” O le agaga lena o le ositaulaga i le toatele o tagata fou o le ekalesia.

(Dallin H. Oaks, “Ositaulaga,” Ensign po o le Liahona, Me 2012, 21)

O le a se mea ua faagaeetia ai oe e uiga i lenei alii talavou?
O faapefea ona avea le soifuaga, auaunaga, ma le Togiola a le Faaola ma faataitaiga sili o le ositaulaga?
O a ni ou mafaufauga po o lagona pe a e mafaufau loloto i mea sa naunau Iesu Keriso e ositaulaga mo oe?

A o lei faamaeaina e tagata aoga le gaoioiga lenei, atonu e fesoasoani le valaaulia o i latou e mafaufau i ni osigataulaga e ono mafai ona talosagaina i latou e vave fai ma fefaasoaai faataitaiga o le tasi ma le isi. E mafai foi e tagata aoga ona lisi i luga o le laupapa ni osigataulaga eseese e faia e le autalavou e mulimuli ai ia Iesu Keriso.

Mafaufau i le isi lima tausaga o le a sosoo ai o lou olaga ma tusi atu se tusi ia te oe lava i le lumanai. Faamolemole ia faaaofia i lau tusi ia faamatalaga auiliili nei:

O mea atonu e manaomia ona e ositaulaga i le isi lima tausaga o le a sosoo ai ina ia iloa lelei ai le Alii ma saunia ai mo le ola e faavavau.
O faafitauli e te ono fetaiai a o e faia ni osigataulaga ma “uunai i luma i … le taui” ( Filipi 3:14).
O mea ua e aoaoina e uiga i le taua o le ositaulaga ma faamanuiaga e mafai ona oo mai ai.
O le auala e mafai ona fesoasoani ai le ositaulaga ia te oe ia avea atili ai e faapei o le Faaola.

Tala Auiliili ma Faamatalaga o Talaaga

Filipi 3:14 . O le a le uiga o le tala a Paulo ina ua ia fai mai, “Ou te tausisi atu i le faailoga”?

Na aoao mai e Elder Edward Dube o le Fitugafulu mea nei.

O le tausisi atu i le faailoga o le faaauau pea lea ma le faamaoni i luga o le “ala lauitiiti ma le vaapiapi lea e tau atu i le ola e faavavau” [ 2 Nifae 31:18 ] faatasi ma lo tatou Faaola ma lo tatou Tama o i le Lagi. Sa vaai Paulo i ona mafatiaga “e le tatau ona faatusaina i le mamalu o le a faaalia mai ia te i tatou” [ Roma 8:18 ; tagai foi i le 2 Korinito 1:3–7 ]. O le tusi a Paulo i le au Filipi, lea na ia tusia a o noanoatia o ia i le falepuipui, o se tusi o le lofituina i le olioli ma le fiafia, ma le faamalosiauga ia i tatou uma, aemaise i lenei taimi faigata o le le mautonu. …

E malie, o loo apoapoai mai Paulo ia i tatou e fetuleni atu i luma, a o valaauina i tatou e faagalo i mea ua tuanai—o o tatou popolega ua te’a, o o tatou taulaiga ua tuanai, o o tatou toilalo ua mavae atu, ma o tatou faanoanoaga ua mou atu.

(Edward Dube, “Tausisi atu i le Faailoga,” Liahona, Me 2021, 90, 91)

E mafai faapefea ona ou iloa po o a osigataulaga e tatau ona ou faia e faalatalata atili atu ai ia Iesu Keriso?

Na aoao mai Elder Larry R. Lawrence o le Fitugafulu e faapea, o se taimi lelei lava e mafaufau ai ma le migao po o a osigataulaga e mafai ona tatou faia mo le Alii o le taimi o le sauniga o le faamanatuga.

I lea siosiomaga migao, pe a liliu atu o tatou manatu i le lagi, e mafai e le Alii ona fetalai mai ma le agamalu ia i tatou i mea e manaomia ona tatou galulue i ai i le isi taimi e sosoo ai. E pei o outou, ua ou mauaina le tele o savali mai le Agaga i le tele o tausaga e faaali mai ia te a’u le auala e mafai ai ona ou faaleleia a’u. …

Atonu e tau atu e le Agaga ia te oe ua manaomia ona e faamagalo se tasi. Pe e te ono mauaina se savali ina ia sili atu ona faaeteete i ata tifaga e te matamata ai po o musika e te faalogologo i ai. Atonu e te lagonaina le musuia ina ia faamaoni atili i au feutagaiga faapisinisi pe ia sili atu ona limafoai i au taulaga anapogi. E tele avanoa eseese.

(Larry R. Lawrence, “Se A se Mea o Totoe Ou Te Lei Faia?” Ensign po o le Liahona, Nov. 2015, 34–35)

O a ni isi o osigataulaga a tagata O Le Ekalesia a Iesu Keriso o le Au Paia o Aso e Gata Ai o fai e mulimuli ai i le Faaola?

Na lisiina mai e Peresitene Dallin H. Oaks o le Au Peresitene Sili le tele o osigataulaga e faia e tagata o le Ekalesia toefuataiina a le Alii. E mafai ona e faitau i lana lauga “Ositaulaga,” Ensign po o le Liahona, Me 2012, 19–22, pe matamata le vitio “Ositaulaga” (16:30), o loo maua i le ChurchofJesusChrist.org.

16:31